12/08/16

Paîs Catalans: il Parlament al invie il procès costituent

Intant de riunion dai 27 di Lui, la maiorance parlamentâr catalane formade di Junts pel Sí e CUP e à fuarçât il vôt su lis conclusions de comission di studi sul procès costituent e e je lade cuintri de ordenance dal tribunâl costituzionâl spagnûl che, juste cualchi zornade prime, al difidave i orghins di guvier de Catalogne dal votâ il document. Lis conclusions de comission a son stadis fatis buinis cui 72 vôts de maiorance indipendentiste, intant che i 10 membris di Catalunya sí que es pot a àn votât cuintri. La diestre spagnoliste (PP e Ciutadans) e je jessude de aule par no partecipâ a di un at che e calcole di ilegâl, i socialiscj invezit a son restâts dentri ma cence partecipâ al vôt. Il document aprovât al previôt un percors costituent dividût in trê passaçs, a partî di un procès partecipatîf di svilupâ cuntun forum sociâl formât di membris de societât civîl. Il secont passaç al previôt prime di disleâsi dal stât centrâl cuntune serie di leçs che a permetin la gjestion separade dal stât sociâl, des jentradis e di dut ce che in dì di vuê al è controlât dal stât spagnûl, e po di davuelzi des elezions par meti sù une Assemblee costituente che e prepari la Costituzion de gnove Republiche catalane. Il tierç passaç al previôt la aprovazion dal test costituzionâl par mieç di un referendum popolâr.
Font: El Punt Avui, 28/07/16; Naiz:, 28/07/16

Paîs Catalans: iscrizions viertis pes manifestazions pe Diada

La Assemblea Nacional Catalana e l’Òmnium Cultural a àn comunicât i detais de prossime mobilitazion in program pai 11 di Setembar, in ocasion de fieste nazionâl catalane, e a àn inviât lis iscrizions par cui che al intint di partecipâ. La iniziative, che tes ultimis edizions e à rivât a puartâ in place plui di un milion di personis, e previôt chest an cinc lûcs diviers di adunance, ognidun cuntun riferiment ai elements che a compagnin il procès indipendentist. A Barcelone duncje la peraule di ordin e sarà “libertât”, a Lleida “ecuilibri teritoriâl”, a Tarragona “rêt infrastruturâl e progrès”, a Berga “culture” e a Salt “solidarietât e diversitât”. In dut a saran 44 lis tratis che a varan di jessi jempladis di citadins par dâi vite ae manifestazion. Lis dôs organizazions a invidin duncje ducj i democratics catalans a partecipâ a cheste edizion de Diada che, cui siei cinc lûcs di davuelziment, e propon un messaç di unitât e al stes timp di decentrament.
Font: VilaWeb, 26/07/16

Galizie: il servizi Gaio disponibil ancje su aplicazion

La agjenzie pe modernizazion tecnologjiche de Galizie e la segretarie gjenerâl di politiche linguistiche de comunitât autonome a àn publicât la aplicazion par sistemis Android e iOS di Gaio, il servizi di traduzion automatiche di tescj par e dal galizian. Il tradutôr – che in plui dal spagnûl si rapuarte ancje cun portughês, inglês, francês e catalan – al pues jessi personalizât cul acès a repertoris specialistics e di toponomastiche. Di cuant che dîs mês indaûr, dopo cuasi doi agns di sperimentazion intai dipartiments dal guvier galizian, Gaio al è stât metût a disposizion dal public si àn vudis plui di 3 milions di consultazions.
Font: Lingua.gal, 26/07/16

Paîs Basc: i contribûts pai media a deventin stabii

Il guvier de Comunitât Autonome Basche al à comunicât che, pe prime volte, al darà fûr contribûts stabii ai mieçs di comunicazion par euskara. In pratiche chest al vûl dî che, invezit di assegnâ i fonts an par an, al fasarà une assegnazion trienâl che e permetarà cussì ai media di programâ cun plui sigurece lis lôr ativitâts. Pai agns 2016 – 2018 la disponibilitât e je di passe 14 milions e mieç di euros. Cun di plui, cun chest an, i contribûts a laran dome ai mieçs di comunicazion che a operin dentri de Comunitât e no ancje a chei de Navare, dal moment che il guvier di chest teritori al à sigurât che al finanziarà ancje i media in lenghe basche. Une altre novitât e je leade ae incressite dai contribûts pai media che a operin su Internet e pes rivistis specializadis.
Font: ABC, 26/07/16

Asturiis: Xunta in place cuintri dai atacs ae lenghe

Militants e simpatizants de Xunta pola defensa de la llingua asturiana si son dâts adun ai 25 di Lui denant dal palaç dal guvier asturian par protestâ cuintri de decision di anulâ la ordenance sul ûs uficiâl dal asturian fate buine dal consei comunâl di Noreña. La Xunta e acuse lis autoritâts asturianis di volê copâ la lenghe proprie dal moment che di une bande no vuelin ricognossi l’asturian tant che lenghe uficiâl e di chê altre a impedissin ancje ai ents locâi di fâlu. La assurditât de situazion, a zontin, e ven fûr a clâr des motivazions dopradis par anulâ la ordenance comunâl viodût che prime si dîs che la lenghe no pues jessi uficiâl fintremai che no si le dopre cun normalitât e po che no si pues doprâle in maniere normâl fintremai che no je uficiâl.
Font: Europa Press, 25/07/16

Galizie: nazionalisim dividût in place tal Día dá Patria

Ai 25 di Lui, in ocasion dal Día dá Patria (o Día Nacional de Galicia), lis diviersis animis dal nazionalisim galizian si son cjatadis pes stradis e pes placis di S. Jacum di Galizie (Santiago de Compostela) ma ognidune par so cont. Cundut dai apei rivâts di plui bandis par meti adun une alternative nazionalitarie al guvier dal PP, par cumò lis divisions a restin fuartis e a àn puartât a celebrâ chest inovâl in maniere separade. Il BNG al à clamât dongje miârs di personis intune manifestazion là che la zornade di fieste si è cubiade cu la rivendicazion politiche, intun moment là che il moviment al è impegnât ancje intun procès di rifondazion interne. La plui part de aree nazionalitarie che no si ricognòs tal Bloque si è invezit dade adun ator dal grup Anova – Irmandade Nacionalista intune altre aree de citât. Une tierce manifestazion, cun diviers centenârs di partecipants, e à invezit tirât dongje i militants de aree indipendentiste plui radicâl.
Font: Galicia Hoxe, 25/07/16

Grecie: in place pai dirits de minorance turche

Passe 2.500 personis a àn partecipât a Gümülcine / Komotini, in Grecie, a di une manifestazion inmaneade par domandâ il rispiet dai dirits linguistics, culturâi e politics de minorance turche de Tracie. In dì di vuê, lis autoritâts greghis a van dilunc a dineâ la esistence di minorancis linguistichis e nazionâls dentri dai confins dal stât e a previodin ciertis misuris di tutele dome ae minorance musulmane che e vîf in Tracie e che e cjape dentri però turcs, pomaks e macedons. La iniziative e à jevât no pocjis tensions e la polizie si è scuintrade cuntun grup di militants neofassiscj di Albe Dorade che al voleve impedî cu la fuarce la manifestazion.
Font: EFA, 24/07/16

Bretagne: gnove manifestazion pe riunificazion in Setembar

La riforme dal sisteme des autonomiis intal stât francês e à sbassât il numar des regjons par vie de fusion tra diviersis di lôr. Un destin che, in gracie di une fuarte mobilitazion popolâr, la Bretagne e à evitât. Se il procès si è sierât cence la pierdite de autonomie, no si à invezit rivât a profitâ de ocasion par tornâ a dâ dongje il dipartiment de Loire Atlantiche che al fâs part de Bretagne storiche ma che di agns si cjate sot di une altre aministrazion regjonâl. Par tignî batût sul teme, la organizazion Bretagne Réunie e à decidût di clamâ dongje une gnove manifestazion popolâr pe riunificazion. L’apontament si davuelzarà a Naoned / Nantes sabide ai 24 di Setembar.
Font: Agence Bretagne Presse, 22/07/16

Galizie: jutoris statâi dineâts par vê doprât il galizian

La organizazion galiziane Mesa pola Normalización Lingüística e à comunicât che e denunciarà denant dal Consei de Europe il ministeri spagnûl pe industrie, pe energjie e pal turisim par vê violât la Cjarte europeane des lenghis regjonâls o minoritariis. La decision e je stade cjapade dopo che l’Istitût pe diversificazion e pal sparagn de energjie, organisim che al dipent dal ministeri, al à dineât jutoris economics impuartants ai comuns di S. Jacum di Galizie (Santiago de Compostela), Teo e Santa Comba par vie che tra i documents che a vevin presentât par otignî i fonts a ‘nd jere ancje cualchidun scrit par galizian. La decision di dineâ i jutoris no ten cont dal fat che chê galiziane e je lenghe uficiâl intune part dal stât e che il so ûs al ven tutelât de Cjarte europeane ancje in situazions come chestis.
Font: Sermos Galiza, 21/07/16

Paîs Catalans: catalan lenghe uficiâl dai Zûcs dal Mediterani

Dai 30 di Jugn ai 9 di Lui di chest an che al ven, la citât di Tarragona i darà acet ai Zûcs dal Mediterani là che passe 4 mil atletis di 26 stâts diferents si sfidaran in 33 dissiplinis sportivis. La organizazion, afidade ae fondazion Tarragona 2017, in acuardi cul guvier catalan e à decidût che tra lis lenghis uficiâls de manifestazion, dongje di inglês, francês e spagnûl, si varà ancje il catalan. Par rivâ a di un tant a son in program dai percors di formazion specifics pai passe 3 mil volontaris che a saran impegnâts pai Zûcs. A contribuî sul plan de formazion e su chel dai materiâi linguistics pe manifestazion a saran la Direzion gjenerâl di politiche linguistiche de Catalogne, il Consorzi pe normalizazion linguistiche e il Termcat.
Font: El Mundo, 20/07/16

Irlande: pussibiliscj tal Sud sul referendum pe riunificazion

Intant de sô prime visite uficiâl intes sîs conteis, il gnûf segretari di stât pe Irlande dal Nord, James Brokenshire, al à declarât che no son lis cundizions par meti in vore l’articul dai acuardis di pâs dal Vinars Sant che al previôt la pussibilitât di un referendum pe riunificazion de isule. La ipotesi e jere saltade fûr intal doman dal referendum su la jessude dal Ream Unît de Union Europeane dal moment che i citadins de Irlande dal Nord si vevin declarâts in maiorance cuintri de jessude. Dopo di un prin moment di cidin, lis autoritâts de Republiche de Irlande a àn invezit mostrât di no scartâ cheste pussibilitât. Il prin ministri Enda Kenny al à dite che propit il procès di jessude dal Ream Unît de Union Europeane al podarès creâ lis cundizions par clamâ dongje il referendum e che intes tratativis che si inviaran tra lis parts si varà di tignî cont ancje di cheste opzion. In Europe si à ancje za vût un precedent di podê imitâ – al à zontât Kenny – ven a dî la riunificazion jenfri la Gjermanie dal Ovest e chê dal Est. Ancje pal Fianna Fáil, il principâl partît di oposizion de Republiche, chê dal referendum e je une strade che e reste vierte.
Font: BBC, 18/07/16

Gales: bancjis e ûs de lenghe, alc si môf

Juste un an indaûr la comissarie pe lenghe galese, Meri Huws, e veve dât fûr un rapuart sui servizis linguistics ufierts des bancjis ativis in Gales e la fotografie che a ‘ndi vignive fûr e jere cetant negative. Tra i prins efiets dal rapuart si veve vût la nassite di une taule di confront cui operadôrs dal setôr che, dopo des primis riunions, e à rivât a dismovi alc. Par chel che al rivuarde lis aplicazions che a permetin l’acès ai servizis bancjaris, dentri de fin dal an e rivarà la version par galês de Barclays intant che chê de NatWest Cymru e je daûr a jessi imbastide. I doi istitûts a àn ancje tacât a ufrî rispuestis par galês sui lôr spazis Twitter. Par chel che al inten invezit i servizis intes filiâls dai istitûts, Barclays e à introdusût dai avîs audio bilengâi, NatWest e à inviât percors di formazion linguistiche pal so personâl e Santander e à fat savê che la cognossince dal galês e je un dai elements sensibii pes sôs assunzions in Gales.
Font: Wales On Line, 17/07/16