Albanie: leç di tutele des minorancis al esam dal Parlament

E je rivade al esam de comission parlamentâr competente la gnove propueste di leç di tutele des minorancis linguistichis metude adun dal ministeri dal interni de Albanie. Il test, che al varès di jessi fat bon in vie definitive prime de fin dal an, al previôt pai membris des minorancis ricognossudis il dirit di doprâ la lenghe proprie tes aministrazions locâls là che chestis comunitâts a rapresentin almancul il 20% dai residents. Ta chestis areis il bilinguisim al sarà in vore ancje pe toponomastiche locâl, pe segnaletiche stradâl e pai nons des viis. Tra lis comunitâts minorizadis principâls ricognossudis des autoritâts albanesis o vin grêcs, montenegrins e arumens.

Font: Albania News, 23/06/20

Montenegro: scuintri sul ûs des bandieris des minorancis

Lis autoritâts statâls montenegrinis a àn fat savê che a sanzionaran i organizadôrs di dôs manifestazions là che si varessin davueltis azions contrariis ae leç. Intun câs, a finî sot acuse, a son stadis lis cjançons patriotichis e lis bandieris serbis dopradis intant di un conciert inmaneât par tirâ sù fonts pe ricostruzion di sîts religjôs de glesie ortodosse serbe in Cossovo. Il secont câs al è invezit leât al ûs di bandieris de Albanie intune manifestazion tradizionâl che si davuelzeve te aree di Tuzi, teritori a maiorance albanese che si cjate tacât de capitâl Podgorica. Daûr dal ultin censiment, il 29% de popolazion dal Montenegro si declare di nazionalitât serbe e il 5% albanese. La leç e permet l’ûs des bandieris di chestis comunitâts, ma dome associât cun chê montenegrine. Cun di plui, pes autoritâts dal paîs balcanic, lis manifestazions culturâls no puedin jessi dopradis par alimentâ il nazionalisim. Lis sanzions menaçadis dal guvier a àn però jevât critichis duris e acusis di violazion dai dirits nazionâi sei de aleance eletorâl de minorance albanese (che par altri e poie l’esecutîf montenegrin), sei dal ministri pai forescj de Serbie.

Font: Balkan Insight, 19/08/19

Albanie: plui dirits pai albanês di Macedonie e Montenegro

Inte riunion di guvier dai 10 di Mai l’esecutîf vuidât dal prin ministri Edi Rama al à decidût di slargjâ ancje ai citadins macedons e montenegrins di nazionalitât albanese i stes dirits di acès al lavôr dai citadins albanês. La misure e vâl dome par chei puescj di vore là che no si domande in maniere esplicite la citadinance albanese e e à un valôr plui simbolic che pratic. La stesse decision e jere stade cjapade ancjemò intal 2014 pai cossovans di lenghe albanese e pe minorance albanese che e vîf in Serbie. Il messaç che si vûl dâ al è chel di une Albanie vierte, ancje sul plan dal lavôr, a ducj i albanês, di là dal stât là che a son citadins. Par chel che al rivuarde la Macedonie dal Nord i albanês a rapresentin un cuart de popolazion totâl, intant che in Montenegro a son uns cinc par cent dal totâl.

Font: Balkan Insight, 14/05/19

Albanie: tension alte cu la comunitât greghe

Il sassinament di un membri de comunitât greghe de Albanie de bande de polizie e à tornât a piâ lis tensions tra i doi paîs e tra lis istituzions albanesis e la minorance greghe formade sù par jù di uns 25 mil personis. Ai 28 di Otubar poliziots albanês a àn copât Kostandinos Kacifa dopo che al veve trat cuintri di un machine de polizie. Il fat al è capitât tal paîs di Bularat, inte aree là che e vîf la minorance greghe, intune zornade là che la comunitât locâl e jere daûr a celebrâ une fieste nazionâl greghe. La int dal paîs e à declarât che tal moment dai fats la machine de polizie e jere vueide e che Kacifa nol veve chê di ferî o di copâ nissun. Par Vangjel Dule – parlamentâr di riferiment de minorance greghe – il compuartament dai poliziots al è stât disproporzionât e no professionâl. Chest episodi al torne duncje a piâ lis tensions dopo che tai ultins agns i rapuarts tra Albanie e Grecie a jerin lâts in miôr e il Parlament di Tirane al veve fate buine une leç che e ricognòs la tutele dal grêc intai comuns là che almancul il 20% de popolazion al parten a cheste comunitât.

Font: Balkan Insight, 29-30/10/18

Serbie: al reste cjalt il teme des minorancis

Il teme des minorancis al va dilunc a movi la discussion politiche e lis tensions tra Serbie, Cossovo e Albanie. E reste in pîts, di fat, la cuistion de Zajednica, la Associazion dai Comuns Serps dal Cossovo, che il stampon dal so statût al varès vût di jessi pront ai 4 di Avost ma che ancjemò no si sa nuie di precîs in merit. Ta chestis zornadis il ministri pai forescj de Albanie, Ditmir Bushati, si è cjatât cuntune delegazion de minorance di lenghe albanese che e vîf in Serbie, te aree di Preševo / Presheva, e al à garantît l’impegn par che la lôr tutele e sedi almancul compagne di chê dai serps cossovans. Il president de Serbie, Aleksandar Vučić, al à invezit fat savê che ai 9 di Setembar al sarà in Cossovo e che ta chê ocasion al presentarà lis sôs propuestis par une soluzion dai contrascj tra i guviers di Pristina e Belgrât e pai problemis de minorance serbe dal Cossovo: temis che a saran al centri ancje di un incuintri tra lis parts che al varès di davuelzisi ai 7 di Setembar a Bruxelles.

Font: Balkan Insight, 17 e 24/08/18

Cossovo: sburt par ricognossi i gorans come minorance bulgare

Dopo vê otignût che te gnove leç su lis minorancis nazionâls fate buine dal Parlament albanês ai 13 di Otubar si ricognossès la esistence di une minorance bulgare, lis autoritâts di Sofia a domandin cumò che ancje il Cossovo al fasi chel stes pas. Al centri de rivendicazion a son i gorans, une comunitât su lis 50/100 mil personis di lenghe slave e di religjon musulmane che e vîf in trente paîs de regjon di Gora a cjaval tra Cossovo, Albanie e Macedonie. Almancul dai agns ’90 dal secul stât incà cheste popolazion e je stade rivendicade prime come part de comunitât serbe, po macedone e cumò bulgare. Sul plan sientific e linguistic la sô partignince no je masse clare e e lasse duncje la puarte vierte a interpretazions variis. La int dal puest si ricognòs intune identitât regjonâl gorane e dome une part e rivendiche la sô partignince a di une comunitât nazionâl plui grande. Diviers di lôr a àn acetât la ufierte di ricevi ancje la citadinance bulgare, massime par vie che cheste ur permeteve di vê libertât di circolazion inte Union Europeane. La Bulgarie però cumò e sburte plui a fuart e e vûl che ancje il Cossovo al procedi al ricognossiment uficiâl dai gorans come minorance bulgare, ricuardant aes autoritâts dal paîs che il guvier di Sofia al podarès dâ une man intal procès di integrazion inte UE. Il ricognossiment però al dipent ancje de volontât dai gorans stes, dal moment che la normative cossovane e previôt che a sedin lôr cuntune racuelte di firmis a lâ ta cheste direzion.

Font: Balkan Insight, 27/11/17

Albanie: si domande di ricognossi i bulgars come minorance

I europarlamentârs bulgars a son daûr a sburtâ su lis autoritâts comunitariis par che a pratindin de Albanie il rispiet dai dirits de minorance di lenghe bulgare che e sarès a stâ tes provinciis di Prespa, Golo Brdo e Gora. I deputâts bulgars a stimin che te part orientâl de Albanie a vivin tra lis 50 e lis 100 mil personis di divignince bulgare che in dì di vuê no gjoldin dal ricognossiment di minorance nazionâl o linguistiche. Di fat, cundut che propit cumò lis istituzions albanesis a son daûr a meti jù une leç di pueste pes minorancis, chestis dôs categoriis a esistin bielzà intal ordenament dal paîs. Te prime, par esempli, a jentrin lis comunitâts greghis, macedonis, serbis e montenegrinis che a vivin dentri dai confins statâi. Pes autoritât albanesis però no esistin elements storics e sientifics par calcolâ di bulgaris chês comunitâts che, dongje dal confin cu la Macedonie, a fevelin varietâts slavis diviersis dal macedon o dal serp.

Font: Balkan Insight, 07/02/17

Serbie: minorance albanese inmò cence libris di tescj

I prins ministris di Serbie e Albanie si son cjatâts cui rapresentants de minorance albanese che e vîf te aree di Bujanovac, Medveđa e Preševo / Presheva cun chê di saltâ fûr dal berdei sui materiâi scolastics pes scuelis de minorance. Zaromai di agns i fruts di cheste aree si ricjatin cuntun numar no suficient di tescj scolastics par albanês e ancje chei che a àn a son aromai vieris. L’an passât il ministeri pe educazion dal Cossovo al veve inviât passe 100 mil libris di test che a jerin però stâts blocâts des autoritâts serbis par vie che a vevin contignûts di nature storiche e politiche che il guvier di Belgrât nol podeve acetâ. Intant dal incuintri l’esecutîf serp al à dite di vê metût un milion di euros par cjoli tescj gnûfs di divignince albanese, ma dut si à tornât a blocâ dopo che i rapresentants de minorance a àn insistût par vê de Albanie ancje libris di gjeografie e di storie cun contignûts contestâts de Serbie.

Font: Balkan Insight, 31/10/16

Rom: dirit ae cjase, critichis dal Consei de Europe a siet stâts

Il comissari pai dirits umans dal Consei de Europe al à criticât siet dai 47 stâts che a formin cheste istituzion par vie des politichis di sfrat sfuarçât metudis in at cuintri dai rom intai ultins agns. Sot acuse a son Albanie, Bulgarie, France, Italie, Ongjarie, Serbie e Svezie. Il comissari al domande ai guviers di chescj stâts di fermâ ducj i sfrats fintremai che no si cjataran soluzions abitativis alternativis. Chestis azions, di fat, a incressin la vulnerabilitât des fameis rom, a pidimentin la lôr inclusion sociâl e a impedissin percors regolârs di scolarizazion.

Font: Balkan Insight, 18 e 19/02/16

Albanie: partît grêc “sot atac” intant des elezions

Dopo di vêsi confrontât cun diviers partîts sei di maiorance che di oposizion, il Partît de unitât pai dirits umans (PBDNJ), che al rapresente la minorance greghe de Albanie, al à decidût di cori di bessôl intes elezions aministrativis che si son tignudis ai 21 di Jugn. Il so intindiment al jere chel di jessi rapresentât in ducj i comuns là che e je presinte la minorance, ma i risultâts otignûts lu àn lassât malapaiât. Di là dai erôrs fats dal moviment, che a saran al centri dal prossim congrès, i siei rapresentants a segnalin che chest risultât al dipent ancje dai atacs “injustificâts e cence precedents” che il partît al à patît de bande dai mieçs di comunicazion, cence dismenteâ il compuartament des struturis statâls acusadis di vê fintremai manipolât il vôt in ciertis circoscrizions par evitâ che il partît de minorance al fos rapresentât in maniere significative intes aministrazions locâls.

Font: Independent Balkan News Agency, 26/06/15

Albanie: iniziative par difindi i rom dai escomis

Il Moviment dai Zovins Rom e lis organizazions Ushtun e Vôs dai Rom a àn domandât al Parlament albanês di mendâ la leç che e permet di condonâ i edificis tirâts sù in maniere ilegâl intai ultins agns. Il proviodiment al ponte a legalizâ la situazion di 270 mil costruzions ator pe Albanie, ma al lasse fûr i baracaments là che si cjatin a vivi cetancj rom. Lis trê organizazions a domandin duncje di superâ cheste discriminazion che e permet a centenârs di miârs di personis di metisi in regule cu la leç, ma no ai rom che a riscjin duncje di viodisi slontanâts a fuarce dai lôr alozaments. Intal presentâ cheste propueste, i ativiscj a ricuardin che une des prioritâts domandadis de Comission Europeane ae Albanie par inviâ il percors par candidâsi a jentrâ inte UE e je di garantî i dirits des comunitâts rom e combati lis discriminazions cuintri di lôr.

Font: Balkan Insight, 15/05/14

Serbie: i albanês a domandin fonts a Cossovo e Albanie

I rapresentants dal Moviment pal Progrès Democratic, un dai partîts de comunitât albanese che e vîf inte Serbie meridionâl, a domandaran un jutori finanziari ai guviers dal Cossovo e de Albanie. Se inte leç finanziarie serbe pal 2014 a son 45 milions di euros pe comunitât serbe che e vîf in Cossovo, alore si pues meti dentri fonts pe comunitât albanese de Serbie ancje intai belançs dal Cossovo e de Albanie, a zontin i rapresentants politics de minorance. Une domande uficiâl sotscrite di ducj i partîts de comunitât albanese che e vîf inte aree di Preševo / Presheva, Bujanovac e Medveđa e sarà duncje spedide in curt ai guviers di Pristina e di Tirana. La iniziative e je partide juste cualchi zornade dopo che i rapresentants de minorance a vevin bandonât la taule di confront cul esecutîf serp là che e jere stade boçade la lôr propueste di meti sù tribunâi e uficis judiziariis ancje te aree là che e vîf la comunitât albanese.

Font: Balkan Insight, 27/11/13

Cossovo - Albanie: proponût un referendum pe unificazion

La Aleance Rosse e Nere (AK), un partît albanês nassût di pôc, al à proponût di imbastî un referendum par meti adun Albanie e Cossovo intun stât unic. Une iniziative dal gjenar si scuintre però sei cu la oposizion dai stâts de aree balcaniche, de Union Europeane e dai Stâts Unîts, sei cu la stesse costituzion dal Cossovo che e proibìs la sô unificazion cuntun altri stât. La propueste e somee duncje dome une azion di stamp eletoralistic viodût che in Albanie si larà a votâ pal Parlament ai 23 di Jugn. Si à dut câs di dî che, daûr di une inchieste fate l’an passât, l’81% dai cossovans e il 63% dai albanês a saressin a pro di une union tra i doi stâts.

Font: Nationalia, 09/01/13

Albanie - Grecie: e torne a alçâsi la tension diplomatiche

Lis celebrazions pai cent agns de indipendence de Albanie a àn tornât a jevâ lis tensions diplomatichis inte aree. Cun di fat, il president albanês Sali Berisha intal so discors pal inovâl al à nomenât diviersis localitâts là che a vivin comunitâts albanesis ancje in Macedonie, Montenegro, Serbie e Grecie. Il riferiment ae citât greghe di Prevezës / Preveza e à jevât la reazion plui dure, cul ministri pai forescj grêc che al à scancelât la sô visite in Albanie leade propit aes celebrazions pai cent agns de indipendence di chel paîs. Lis autoritâts albanesis a àn rispuindût che il discors dal president al faseve dome riferiments storics e no rivendicazions teritoriâls. No je la prime volte che tra i doi paîs si alce la tension, massime par vie des piçulis comunitâts di minorance che a vivin tes areis dongje dal confin e che si cjatin intune condizion di fuarte minorizazion.

Font: Balkan Insight, 29/11/12

Albanie: impresonât un rapresentant de minorance greghe

Un tribunâl albanês al à condanât a un an di preson Naum Disho, president de organizazion de minorance greghe Omonia. L’om al jere acusât di vê dissacrât des tombis intal simitieri di Boboshtica intant che al jere daûr a restaurâ un monument pai soldâts grêcs muarts vie pe seconde vuere mondiâl. Par Naum Disho la acuse e je false e la sô condane e je leade a motivazions politichis. La sentence e rive di fat intun moment là che i partîts de diestre albanese e i rapresentants de minorance greghe a son daûr a scuintrâsi su lis domandis su etnie e religjon che a son stadis metudis dentri intal censiment.

Font: Balkan Insight, 05/01/12

Albanie: si domande di ricognossi i arumens tant che minorance nazionâl

Intant de sô visite uficiâl in Albanie, il president rumen Traian Basescu al à domandât al guvier di Tirane di ricognossi i arumens tant che minorance nazionâl. Nol è tant che la Albanie e à ricognossût chest status a grêcs, macedons e montenegrins, intant che i arumens a vegnin calcolâts dome di minorance linguistiche. Daûr dal ultin censiment, che al rimonte ancjemò al 1989, cheste comunitât no rapresente nancje l’un par cent de popolazion albanese.

Font: BalkanInsight, 08/06/10

Serbie: elets i conseis des minorancis

Ai 6 di Jugn si son davueltis in Serbie lis elezions pai Conseis nazionâi che a àn il compit di svilupâ lis politichis linguistichis e culturâls des lôr comunitâts di riferiment in setôrs impuartants tant che educazion e mieçs di comunicazion. Il vôt al à interessât 16 des 19 comunitâts nazionâls ricognossudis dal stât serp, dal moment che chês altris trê – cravuats, macedons e slovens – a doprin sistemis eletîfs diferents. Lis elezions a son stadis controladis di osservatôrs internazionâi che lis àn judicadis regolârs. Chel istès no son mancjâts i ponts critics. Cun di fat, i rapresentants de Aleance dai Ongjarês de Vojvodine – si ben che a son stâts i plui votâts – a àn acusât il principâl partît serp di vê cirût di condizionâ il vôt. Framieç de minorance albanese, invezit, a son dome doi i partîts che a àn decidût di no boicotâ il vôt: cundut achel la partecipazion tra i albanês e je stade tor dal 55%.

Font: BalkanInsight, 07-10/06/10

Macedonie: proteste dai albanês inte capitâl

A jerin sù par jù 2 mil i albanês che ai 10 di Mai a àn partecipât inte capitâl macedone a di une manifestazion inmaneade di diviersis associazions di cheste minorance. La iniziative e veve chê di invidâ il guvier a blocâ i proviodiments judicâts discriminatoris tai confronts de comunitât albanese e di domandâ la liberazion di chei che a vegnin considerâts presonîrs politics. I albanês impresonâts a son acusâts di vê partecipât a azions armadis o di vê judât cui che lis à metudis in at. La manifestazion si è davuelte cence incidents.

Font: Balkan Insight, 10/05/1o

Macedonie: protestis pe decision di anticipâ l'insegnament dal macedon

La decision dal guvier macedon di anticipâ l'insegnament de lenghe macedone de tierce ae prime elementâr ancje pai fruts che a àn une marilenghe divierse no plâs masse ae comunitât albanese, che e rapresente un cuart de popolazion totâl dal stât balcanic. Un grup di organizazions leadis a cheste minorance si à za mot par contestâ il proviodiment denant de cort costituzionâl. Cun di plui, si fevele ancje di boicotâ lis lezions di macedon che, su la fonde dal decret dal guvier, a varessin di partî ancje pai fruts di prime e di seconde elementâr. I rapresentants albanês che a dan la lôr poie al guvier a invidin a frontâ la cuestion cun plui calme e a evitâ di ufrî scusis a chei che a cirin di tornâ a impiâ lis tensions etnichis intal paîs.

Font: Balkan Insight, 19-20/01/10

Albanie: fonts pe minorance serbe dal Cossovo

Daspò di un incuintri cuntun pôcs di rapresentants de comunitât serbe dal Cossovo, il prin ministri albanês Sali Berisha al à fat savê che al metarà a disposizion de citadine di Gracanica, a maiorance serbe, un contribût di 400 mil euros. La decision e je rivade, in particolâr, daspò dal incuintri cun Slobodan Petrovic, rapresentant dal Partît Liberâl Serp (SLS), che intes ultimis elezions aministrativis al à vût la maiorance relative a Gracanica, ma che al gjolt di scjarse simpatie framieç di chês altris formazions politichis serbis. Il prin ministri albanês al à ancje comunicât di vê invidât il president serp Boris Tadic par une visite uficiâl in Albanie di maniere di miorâ i rapuarts tra i doi paîs che a jerin deventâts dificii propit daspò che Berisha al veve fevelât di unificazion nazionâl di ducj i albanês de aree balcaniche, a tacâ di chei dal Cossovo.

Font: Balkan Insight, 24/12/09