19/08/08

Pontade 17 08 (19/08/08) - 4

Ossezie e Abkhazie: daspò dai scuintris si infuartìs la voie di indipendence

Ai 16 di Avost, la zornade daspò che al jere za stât fat dal president gjeorgjan Mikhail Saakashvili, ancje il president rus Dimitri Medvedev al à sotscrit il plan in sîs ponts fat indenant de Union Europeane par meti fin al conflit armât che si veve impiât cualchi zornade prime daspò di un aument progressîf de tension jenfri Gjeorgjie e Russie su la Ossezie meridionâl. Il document al previôt l’impegn des parts in cause a no doprâ la fuarce e a meti fin a ducj i combatiments, cul ritîr dal esercit gjeorgjan intes casermis e di chel rus su lis posizions tignudis prime dal sclop de vuere, e a permeti che i jutoris umanitaris a rivin tes zonis fiscadis dal conflit. Cun di plui, il plan al dîs che si varà di vierzi un dibatiment internazionâl sul status de Ossezie meridionâl e de Abkhazie. Cundut a chel, la situazion e reste malsigure e a son segnaladis inmò azions armadis ca e là.
Su lis resons che a son daûr di chest gnûf sclop dal conflit lis versions a son diviersis. Cun di fat, i gjeorgjans a fevelin di agression russe, intant che i rus a disin di vê rispuindût ai atacs des trupis gjeorgjanis cuintri de Ossezie meridionâl. Al centri di dut a saressin, di fat, la Ossezie meridionâl e la Abkhazie: dôs regjons storichis là che a vivin popolazions diviersis di chês gjeorgjanis par lenghe, culture, e v.i. che za dai agns ’90 dal secul stât si son autoproclamadis republichis indipendentis. Une indipendence di fat che no ven ricognossude ni de Gjeorgjie che e rivendiche la plene sovranitât su chescj teritoris, ni di chei altris stâts dal mont, ma che e gjolt de protezion militâr de Russie. Cu la implosion de Union Sovietiche e de proclamazion de indipendence de Gjeorgjie, la Ossezie si è cjatade taiade in doi, cu la part setentrionâl ricognossude tant che republiche inte suaze de Russie e chê meridionâl sot de Gjeorgjie. Une situazion che no je mai stade acetade dai ossêts meridionâi e nancje dai abkhazis che a rivendichin la plene indipendence dai lôr teritoris. Tal câs de Ossezie meridionâl, che intal Novembar dal 2006 e à ancje tignût un referendum là che il 95% dai votants al à dite di sì ae indipendence, une altre alternative judicade pussibile e je chê de riunificazion cu la part setentrionâl de regjon inte suaze de Russie.
Daûr di cheste situazion – che si pues insuazâ inte lote pe autodeterminazion puartade indenant, cun formis une vore diviersis tra di lôr, di cetantis nazionalitâts minorizadis ancje inte Europe ocidentâl – si platin però ancje interès di nature economiche e strategjiche di bande di altris stâts che a doprin la difese dai dirits di chestis comunitâts dome tant che scuse. Tal câs specific, la Russie di une bande e judiche la politiche – ancje militâr – filoamericane de Gjeorgjie une provocazion e di chê altre e je preocupade pes consecuencis economics che le colpiressin cui oleodots che si vûl fâ passâ tal teritori gjeorgjan. I Stâts Unîts, invezit, a puartin indenant za di agns une politiche simpri plui fuarte di inclusion des ex republichis sovietichis inte aree di influence dal Pat Atlantic e di svilup di percors energjetics che a tain fûr la Russie (ma ancje Cine e Iran) sei sul front caucasic, sei su chel de Asie centrâl (là che, duncje, a cuistin une impuartance di fonde Afghanistan e Pakistan). Al è just di ricuardâ che chê stesse Russie che vuê e volarès presentâsi tant che la protetore des nazionalitâts tibiadis (Ossezie meridionâl e Abkhazie) e je la stesse che e je responsabile di une vere politiche di gjenocidi in Cecenie, de “vuere sporcje” (come che le definìs la organizazion internazionâl Human Rights Watch) in Ingussezie, e di violencis cuintri altris comunitâts minorizadis tant che i Mari. I Stâts Unîts, che par bocje dal lôr president a àn declarât che Abkhazie e Ossezie meridionâl a son gjeorgjanis e no puedin vê la indipendence, a son i stes che invezit a àn fat di dut par rivâ ae indipendence dal Cossovo e a son tra i prins a vêle ricognossude.
Propit la vicende dal Cossovo e veve tornât a impiâ lis sperancis di indipendence par ossêts meridionâi e abkhazis. Di fat, la pussibilitât di vignî a pats cu la Gjeorgjie e ven judicade impussibile: il president de Republiche abkhaze, Sergei Bagapsh, al spieghe che “la Gjeorgjie e je indipendente a pene di 18 agns, ma e à za fat siet vueris cuintri de Abkhazie”. Une posizion, la sô, condividude ancje dal president de Ossezie meridionâl, Eduard Kokoity, che al spere che cumò, come che al previôt il plan european, si puedi rivâ a di un acuardi internazionâl sul avignî des dôs Republichis autoproclamadis. Ancje se, al zonte Bagapsh, intant di chest ultin conflit si à viodût a clâr che la ONU no je une garanzie cuintri des agressions militârs gjeorgjanis.
Font: Gara, 16/08/08; Vilaweb, 16/08/08; Nationalia, 14/08/08;
La Repubblica, 13-16/08/08


Pontade 17 08 (19/08/08) - 3

Galizie: zuiâ e imparâ cul galizian e cul inglês

Imparâ e doprâ la lenghe proprie dal teritori adun cun chê de comunicazion internazionâl, ancje fûr de scuele. Al è chest l’intindiment dal assessorât pai zovins di Vilagarcía de Arousa, in Galizie, che e à inmaneât un cjamp linguistic estîf par fruts tra i 6 e i 12 agns. Si tacarà ai 25 di Avost e si larà indenant fin ai 5 di Setembar. Dutis lis ativitâts, pal plui di nature ludiche, a saran fatis par galizian e par inglês. Un sisteme, duncje, par imparâ e par doprâ chestis dôs lenghis cul zuiâ, cul cjantâ, cul divertîsi.
Font: Galiza Hoxe, 12/08/08


Pontade 17 08 (19/08/08) - 2

Paîs Basc: riforme dai modei linguistics te CAB, il PNV si tire indaûr

Il plan pe riforme dai modei linguistics intes scuelis de Comunitât Autonome Basche al è za pront, ma cun dute probabilitât no si lu metarà in vore ta cheste legjislature. Daûr dal progjet di riforme e je la volontât di infuartî la presince de lenghe basche inte scuele e fâ in maniere che ducj i students a jessin dal percors scolastic cuntune capacitât linguistiche dal euskara suficiente. Chest intindiment al veve cjatât la poie de maiorance dal Parlament de CAB e, daspò che il plan al jere stât metût adun dal Dipartiment pe educazion vuidât di Tontxu Campos (Eusko Alkartasuna), si calcolave di fâ cognossi al public il document dentri de fin dal Astât. Lis primis indiscrezions a fevelavin di superâ, in maniere progressive, il sisteme linguistic atuâl fondât su trê modei (model scolastic cul basc veicolâr, fûr che pal studi dal castilian; model bilengâl basc – castilian; e model cul castilian veicolâr, fûr che pal studi dal basc) par rivâ a di un model unitari cuntune presince alte de lenghe basche veicolâr e cuntun esam che al certifichi lis competencis linguistichis pal euskara. I partîts spagnoliscj – o sei PP e PSE (sezion basche dal PSOE) – no àn mai viodût di bon voli chest progjet, ma tai ultins timps i socialiscj a àn alçât il tîr sigurant la lôr oposizion totâl. Daspò di chescj ultins atacs, il Partît Nazionalist Basc (PNV) – che al guvierne la CAB intune cun EA e EB-IU – al à comunicât, cjapant in cuintripît i siei stes aleâts di guvier, che prime di meti in vore la riforme al coventarà inviâ la sperimentazion in cualchi scuele, ven a dî che i timps par che il progjet al puedi partî pardabon a saran une vore luncs. Cualchi timp indaûr, in ocasion dal vôt parlamentâr, il PNV al veve invezit votât a pro de riforme dai modei linguistics, intune cun EA, EB-IU e cu la çampe indipendentiste basche.
Font: Gara, 04/08/08; Deia, 03/08/08


Pontade 17 08 (19/08/08) - 1

Corsiche: su la strade di un moviment indipendentist unitari

Meti adun dutis lis fuarcis indipendentistis corsis intun moviment sôl. Al è chest l’impegn che si son cjapâts i rapresentants di Corsica Nazione Indipendente, Rinnovu, Fronte Populare, Consulta Naziunalista e Strada Dritti intant des “Ghjurnate Internaziunale” che si son davueltis a Corti la prime fin di setemane di Avost. Chest procès, che in pareli al viôt la separazion totâl des fuarcis autonomistis corsis, al partìs dal sfantâsi de Unione Naziunale: il cartel eletorâl metût sù di indipendentiscj e autonomiscj adun. Si trate – a àn dite i rapresentants des fuarcis indipendentistis – di meti in pîts un progjet di rifondazion dal nazionalisim cors e di decidi in maniere concrete i contignûts dal percors che al à di puartâ la Corsiche ae indipendence. Par Paul-Félix Benedetti (Rinnovu) al covente prin di dut che ducj a fasin un mea culpa pai erôrs fats. Par Paul Quastana (Strada Dritti) al covente fevelâ un lengaç che la int e puedi capî e no fâ nissun compromès cu la classe politiche tradizionâl. Dongje dal progjet pe indipendence – al à spiegât Jean-Guy Talamoni (Corsica Nazione Indipendente) – al covente lavorâ daurman par prontâ des liniis di azion su cuestions une vore sintudis de int tant che il lavôr. Tal intindiment dai siei fondadôrs il moviment unitari al varès di nassi dentri de fin dal an.
Une des cuestions che a dividin indipendentiscj e autonomiscj e je ancje la posizion in mert al moviment armât cors che al va dilunc a operâ su la isule. I rapresentants dai partîts indipendentiscj a van dilunc a garantîi la lôr solidarietât. Pai autonomiscj, invezit, par chê strade no si rivarà di nissune bande. “O ai passât la mê vite di fi a cjatâ gno pari intes galeris francesis; o passi la mê vite di avocat a visitâ i militants impresonâts; – al spieghe Yvan Colonna – e cumò no ai voie di passâ la mê vite di pari a cjatâ i miei fîs dentri di chês stessis presons”.
Font: Corse Matin, 04/08/08; Nationalia, 04/08/08; Le Monde, 02/08/08