Ai
20 di Fevrâr, la vilie de Zornade internazionâl de lenghe mari, la
direzion gjenerâl pe politiche linguistiche dal Aragon e à
presentât e metût in linie un sît internet di pueste
(www.lenguasdearagon.org)
par promovi lis dôs lenghis propriis di cheste comunitât, o sei
aragonês e catalan. Il portâl al ufrìs un archivi di materiâi pal
studi, pal insegnament e pe cognossince de realtât linguistiche dal
Aragon, un repertori toponomastic cun 2 milions di vôs e
informazions su lis ativitâts e i progjets svilupâts de direzion
gjenerâl, di altris aministrazions publichis e di sogjets impegnâts
intal promovi lis lenghis propriis. Il sît, che al è in cressite
progressive, al à za 732 documents audio o video su la tradizion
orâl, 200 publicazions in linie e 70 videos di nature pal plui
didatiche.
Il blog di Internazionalitari al nas di une trasmission di Radio Onde Furlane e al fevele, cuntun tai nazionalitari, des nazions cence stât e des minorancis nazionâls de Europe.
06/03/17
Galizie: iniziative di leç popolâr pai dirits linguistics
Ai
18 di Fevrâr la organizazion A Mesa
pola Normalización Lingüistica e à
presentât al public une iniziative legjislative popolâr par garantî
i dirits linguistics dai galizians ancje tal cjamp socioeconomic. La
propueste e je za stade sotscrite di 120 personalitâts dal mont
culturâl, academic, imprenditoriâl, sindacâl e sportîf e tai
prossims cuatri mês e sarà sostignude di une campagne par racuei
framieç dai citadins lis firmis che a coventin par sburtâle
indenant. La Mesa
e ricuarde che tal stât spagnûl si àn almancul 500 disposizions
legâls che a garantissin il castilian, di chestis 200 dome pal cjamp
socioeconomic, invezit il galizian, cundut dal so status di
couficialitât, nol gjolt dai stes dirits e al patìs une situazion
di disvantaç che e covente ribaltade. Di chi duncje la propueste par
une leç che e garantissi pardabon i dirits linguistics dai galizians
ta chest setôr.
Font:
Galicia Confidencial,
18/02/17
Scozie: consultazion sul plan linguistic pal gaelic
Il
Bòrd na Gàidhlig,
l’ufici pe lenghe gaeliche scozese, al à lançât ai 17 di Fevrâr
la consultazion publiche pal tierç Plan linguistic nazionâl pal
gaelic che al propon la strategjie par incressi il numar di chei che
a doprin o che a imparin cheste lenghe vie pai agns 2017 – 2022.
Citadins e sogjets interessâts a dî la lôr a àn timp fintremai i
17 di Mai. Il Plan al interven su areis tant che la educazion,
l’aprendiment, i mieçs di comunicazion, lis comunitâts locâls e
lis produzions culturâls. La consultazion publiche e fâs part di
une strategjie di condivision che e je centrâl pe metude in vore des
misuris di azion proponudis.
Font:
Bòrd na Gàidhlig,
17/02/17
Paîs Catalans: atacs al procès sovranist, preocupazions ONU
Il
relatôr speciâl pai dirits umans de ONU, Alfred-Maurice de Zayas,
al à inviât une letare ae ambassade spagnole di Gjinevre, ae
rapresentance de Spagne dentri de ONU e a altris organizazions
internazionâls là che si mostre preocupât pe persecuzion
judiziarie cuintri dai rapresentants politics i istituzionâi
catalans impegnâts intal procès sovranist e pes campagnis di
difamazion cuintri di lôr. Al ricuarde che la libertât di determinâ
il propri avignî e je fondamentâl par prevignî i conflits e che,
come che si à viodût intai câs dal Quebec e de Scozie, davuelzi un
referendum al è la maniere miôr par che la int e cjapi posizion e
par evitâ che si rivi al ûs de fuarce. Ta cheste logjiche si met a
disposizion des autoritâts spagnolis par discuti de situazion e dal
rispiet dai impegns internazionâi che ancje la Spagne e à in teme
di dirits umans.
Font:
VilaWeb,
16/02/17
Paîs Basc: acuardi tra Euskaltzaindia e EEP par sburtâ l’euskara
Ai
16 di Fevrâr Euskaltzaindia
e l’Ufici public pe lenghe basche (Euskararen
Erakunde Publikoa) a àn sotscrit un
acuardi di program pe dade 2017 – 2022 che si propon di incressi la
presince dal euskara
in Ipar Euskal Herria,
o sei il Paîs Basc setentrionâl cjapât dentri intal stât francês.
Il document al fisse lis azions di meti in vore e i cjamps di
colaborazion tra lis dôs istituzions. Cun di plui, cun chest acuardi
si ricognòs Euskaltzaindia
tant che riferiment uficiâl pai criteris di grafie e di
normalizazion lessicografiche dal euskara
ancje tal Paîs Basc francês, compagn di ce che al sucêt za te
Comunitât Autonome Basche e in Navare.
Font:
La Vanguardia,
16/02/17
Austrie: cu la Costituzion gnove, bilinguisim a risi in Carinzie
Il
stampon de Costituzion de Carinzie che al ten di lenghe uficiâl dome
il todesc al à discjadenât la proteste des organizazions de
comunitât slovene carinziane che, ai 14 di Fevrâr, a àn inmaneât
une proteste che e à puartât centenârs di citadins a manifestâ
pes stradis di Klagenfurt/Celovec a pro dal bilinguisim. Un altri
pont contestât al è chel di gjavâi aes aministrazions comunâls
lis competencis su la avualiance tal doprâ lis dôs lenghis là che
si à une presince significative de minorance slovene. Su la cuistion
a son intervignûts sei il prin ministri sloven, Miro Cerar, che al à
fat savê che al fasarà dut ce che in so podê par difindi il
bilinguisim, sei il president de Republiche slovene, Borut Pahor, che
al à visât lis autoritâts austriachis che se chestis mendis a
saran confermadis si metin a risi lis relazions diplomatichis tra i
doi stâts.
Font:
EFA,
15/02/17;
il Piccolo, 18/02/17
Paîs Catalans: il tribunâl costituzionâl al anule il referendum
Il
tribunâl costituzionâl spagnûl al à decidût di anulâ l’at dal
Parlament catalan che al previôt la convocazion di un referendum su
la indipendence e di denunciâ denant de procure di stât la
presidente de Assemblee catalane, Carme Forcadell, e i cuatri membris
dal ufici di presidence – Lluis Corominas, Anna Simó, Joan Josep
Nuet e Ramona Barrufet – che a àn autorizât la discussion dal at.
Dopo vêle suspindude, il tribunâl al anule cussì in maniere
definitive la risoluzion votade de maiorance sovraniste dal Parlament
catalan che e previodeve dentri dal Setembar di chest an une votazion
popolâr vincolante su la indipendence, di là che si cjati o no un
acuardi cul guvier spagnûl. I magjistrâts a àn ancje visât i
membris dal esecutîf catalan che se a clamaran dongje il referendum
a varan di rispuindi sul plan penâl. I rapresentants dal guvier
catalan però a àn fat savê daurman che la decision dal tribunâl
no mude il lôr plan di azion dal moment che la risoluzion e je stade
votade di un Parlament sovran intal esercizi plen e legjitim des sôs
funzions.
Font:
Naiz:,
14/02/17;
VilaWeb, 14/02/17
Ucraine: gnûf centri pe comunitât ongjarese de Transcarpazie
A
front dai tentatîfs in at in Ucraine par limitâ i dirits des
comunitâts minorizadis, il guvier ongjarês al incrès la poie aes
iniziativis a pro de minorance magjare che e vîf te regjon de
Transcarpazie. Dopo des risorsis metudis par sostignî i istitûts
scolastics de minorance, cumò l’esecutîf di Budapest al à
cofinanziât cun cuasi 100 mil euros la costruzion di un centri pe
comunitât ongjarese logât te citadine di Csap / Chop. La struture,
screade ta chestis setemanis, e je gjestide de Union Culturâl dai
Ongjarês de Transcarpazie (KMKSZ).
Font:
Politics.hu,
13/02/17
Føroyar: referendum tal 2018 su la gnove Costituzion
Ai
10 di Fevrâr il prin ministri des Føroyar, Aksel Johannesen, al à
comunicât che ai 25 di Avrîl dal 2018 i citadins des isulis a saran
clamâts a votâ su la gnove Costituzion di chest teritori che, za
dal 1948, al gjolt di un nivel une vore alt di autonomie de
Danimarcje. La discussion su la gnove Cjarte costituzionâl e je lade
indenant plui a dilunc di ce che si veve programât, ma il test al
varès di jessi fat bon dal Parlament des isulis ai 29 di Lui.
Johannesen – che al vuide un guvier formât di Sociâi Democratics
(Javnaðarflokkurin,
çampe autonomiste), Republiche (Tjóðveldi,
çampe indipendentiste) e Progrès (Framsókn,
indipendentiscj liberâi) – al à anticipât che la gnove
Costituzion e larà a definî i dirits e i dovês di fonde dai
citadins che a formin la nazion faroese a partî di chel ae
autodeterminazion. La Cjarte e previôt di fat che a sedin i citadins
des isulis a decidi par mieç di une consultazion referendarie se
cjapâ la strade de indipendence o se incressi la integrazion cu la
Danimarcje, e ancje su cualsisei ipotesi di partecipazion a
organisims internazionâi tant che la Union Europeane.
Font:
Government.fo,
11/02/17;
Le Monde, 11/02/17
Sapmi: adunance a 100 agns de prime assemblee unitarie
Ai
6 di Fevrâr dal 1917 te citât di Trondheim, in Norvegje, si son
dâts dongje in assemblee pe prime volte rapresentants rivâts di
dutis lis tieris dal Sami (Sapmi)
par inviâ adun la lote pal ricognossiment dai lôr dirits e de lôr
identitât. Za di agns cheste date e je stade sielzude tant che
Zornade nazionâl dai Sami. Chest an, a cent agns di chê assemblee
storiche, delegâts sami rivâts di Norvegje, Svezie, Finlande e
Russie a àn tornât a cjatâsi a Trondheim. Ae iniziative e à
partecipât ancje la prime ministre norvegjese Erna Solberg che e à
denunciât i dams causâts des politichis di snazionalizazion
puartadis indenant cuintri dai Sami e e à dite che, cundut che si à
fat tancj pas indenant, lis politichis di tutele e di promozion de
lenghe, de culture e de economie tradizionâl dai Sami a van
infuartidis. La fieste e cole juste tal moment che i Parlaments dai
Sami de Norvegje, de Svezie e de Finlande a son daûr a ratificâ la
gnove convenzion che e ponte a vualivâ la suaze normative e lis
azions di rivendicazion dai Sami tai trê stâts.
Font:
The Independent Barents
Observer, 06-07/02/17
Stât francês: sì de Assemblee a une leç su lis “lenghis regjonâls”
La
Assemblee statâl francese e à fat bon un test di leç par promovi
chês che a vegnin definidis “lenghis regjonâls”, o sei lis
lenghis minorizadis feveladis dentri dai confins statâi tant che il
basc, il breton, il catalan, il cors o l’ocitan. La propueste e
smire, tra lis altris robis, a dâi fondis plui saldis al insegnament
des e tes lenghis minorizadis, sei par chel che si riferìs ai
istitûts bilengâi, sei tant che materie facoltative tal rest dai
istitûts. Al moment dal vôt, la aule e jere mieze vueide e dai 68
presints, 63 a àn votât a pro. Se za chest al mostre il scjars
interès che si à a Parîs pal argoment, a fâ pensâ che nancje
chest test al sarà fat bon al è che i timps tecnics par che la
propueste e sedi aprovade ancje dal Senât a son plui che strents e
nol somee che si vedi la intenzion di anticipâ la sô votazion prime
che e rivi insom la legjislature.
Font:
Le Telegramme,
31/01/17
Iscriviti a:
Post (Atom)