Cechie: riclam dal Consei de Europe sul romani a scuele

La Cjarte europeane des lenghis regjonâls o minoritariis e je operative te Republiche Ceche dal 2007 incà. Tal moment de sô ratifiche a son stadis segnaladis come lenghis di tutelâ cravuat de Moravie, polac, romani, slovac e todesc. Intal so ultin rapuart sul rispiet de Cjarte, il Consei de Europe al à segnalât cemût che te documentazion prontade dal guvier di Praghe al sedi sparît ogni riferiment ae lenghe slovache. L’organisim european al domande ancje aes istituzions cechis di sbassâ il soiâr dal 10% de popolazion che al parten a di une minorance come criteri par meti fûr segnaletiche bilengâl. Il dât plui critic però al è chel che si riferìs ae presince dal romani a scuele. Cun di fat, se la lenghe de comunitât rom e cjate une cierte atenzion te universitât e je invezit dal dut insuficiente tes scuelis primariis e secondariis e assente te scuele de infanzie. Tra i elements positîfs si àn invezit la ufierte dal insegnament de lenghe todescje in diviersis scuelis de aree storiche di presince di cheste comunitât e lis iniziativis par promovi il cravuat de Moravie.

Font: Romea.cz, 25/09/20

Cechie: propueste pal insegnament de lenghe rom

Il partît conservadôr cec TOP 09, cumò ae oposizion, al à proponût un progjet di leç par che intes scuelis elementârs si ur insegni ai fruts rom un pocjis di materiis ancje te lôr lenghe proprie. Un tant, a disin i autôrs de propueste, cun chê di superâ chê baridure linguistiche che ae lungje e sburte tancj fruts rom a bandonâ la scuele adore. Il progjet, che al varès di jessi discutût in Mai inte comission parlamentâr pe educazion, al à cjatât une poie avonde largje. Dut câs al è ancje cui che al à pôre che daûr di cheste propueste e sedi in realtât la volontât di creâ classis di pueste pai fruts rom, inviant cussì une forme di segregazion scolastiche.

Font: Radio Prague, 02/04/14

Europe centrâl: a cressin lis violencis cuintri dai rom

Intune riunion de OSCE sui dirits umans che si è tignude ta chestis zornadis a Varsavie, i rapresentants dal Centri european pai dirits dai rom (ERRC) a àn denunciât la incressite de violence cuintri dai rom in diviers paîs de Europe centrâl e a àn invidât i guviers di chescj stâts a protezi lis comunitâts rom di chescj atacs e a cjapâ une posizion ferme cuintri di ogni violence di stamp raziâl. Tra i stâts là che i atacs cuintri dai rom a àn cjapât la plee plui violente si àn Ongjarie, Republiche Ceche, Slovachie e Bulgarie. Intal ultin an, dome inte Republiche Ceche, a son stâts segnalâts almancul 22 episodis di atacs violents che, in sîs câs, a àn causât la muart di membris de comunitât rom. L’aument dal nivel di violence al ven fûr benon di episodis come chei capitâts inte prime metât dal an in Slovachie, là che un poliziot fûr servizi al à copât doi rom e a ‘nd à ferîts altris trê, o in Bulgarie, là che la sede di un partît rom e je stade fiscade di un atentât che al à causât ancje la muart di une des personis che si cjatavin intal edifici.

Font: ERRC, 27/09/12

Rep. Ceche: publicade la tierce opinion dal Consei de Europe

Ta chestis zornadis il Comitât consultîf dal Consei de Europe su la convenzion cuadri pe protezion des minorancis nazionâls al à publicade la tierce opinion su la Republiche Ceche. Il document, che al diven de visite fate dal Comitât intal paîs centrieuropean, al fâs il pont sul rispiet dai dirits des minorancis che a vivin inte Republiche Ceche e al invide il guvier a meti in vore une schirie di azions par miorâ la situazion. Cundut dai mioraments legjislatîfs puartâts indenant intai ultins agns cuintri de discriminazion e par svilupâ bielzà de scuele une culture dal rispiet des diviersitâts, i problemis no mancjin. Par esempli, il Comitât al segnale che te societât e tai mieçs di comunicazion cecs si viodin dispès prejudizis e compuartaments discriminatoris cuintri dai rom cence che lis autoritâts a intervegnin e si rive fintremai al pont che lis menacis e i proclamis cuintri dai rom fats de estreme diestre ceche a gjoldin di une impunitât sostanziâl. Cun di plui, si àn diviers câs di “scuelis speciâls” là che i fruts rom no gjoldin dal stes nivel educatîf dal rest dai students. Il Comitât dal Consei de Europe al invide duncje il guvier cec a cjapâ proviodiments par superâ cheste situazion. Si domande po ancje un sburt pe nassite dai comitâts locâi pes minorancis nazionâls che fin cumò a son stâts metûts sù in mancul di un cuart dai comuns là che a varessin vût di nassi.

Font: Council of Europe, 19/03/12

Republiche Ceche: un partît gnûf par difindi i rom

Inte Republiche Ceche si è dât dongje un partît gnûf che si propon di difindi i dirits e i interès dai rom e di dutis lis categoriis plui debulis de societât. Daûr de nassite di chest gnûf sogjet politic, batiât Partît de Paritât di Oportunitâts (SRP), a son i scuintris di stamp etnic che a àn segnât la regjon di Šluknov e che a àn fat sintî tra i rom la dibisugne di vê ancje lôr une rapresentance politiche. Cun di fat, vie pai agns ’90 la Iniziative Civiche Rom (ROI) e veve diviers rapresentants in Parlament, ma po il moviment al jere stât segnât di diviersis divisions che a vevin puartât ae sô sierade. Il gnûf Partît de Paritât di Oportunitâts al è in vore par partecipâ aes prossimis elezions aministrativis in program chest Autun.

Font: České Noviny, 20/01/12

Republiche ceche: a cressin menacis e violencis di stamp raziâl

E je simpri plui preocupazion pal aument dai episodis di violence e di intimidazion di stamp raziâl inte Republiche ceche. A jessi vitimis di chescj episodis a son dispès i rom. Il câs plui seri al è capitât pocjis setemanis indaûr a Praghe là che une femine rom e je stade sassinade di un grup di zovins di estreme diestre che a jerin za stâts responsabii di agressions e menacis cuintri di altris membris de comunitât rom e di cence tet. Dongje di Plzeň, invezit, un ativist rom al è za di timp al centri di menacis une vore pesantis e al à denunciât une scjarse atenzion de bande des fuarcis di polizie. Propit par vie des menacis simpri plui penzis, ta chestis zornadis Michal Mazel al à fat savê che nol davuelzarà plui la incarghe di perît intai procès là che a son imputâts estremiscj di diestre. Mazel al è un dai pôcs esperts di moviments di estreme diestre a disposizion dai tribunâi cecs.

Font: Roma Daily News, 10/01/12

Rep. Ceche: prins intervents cuintri de discriminazion dai fruts rom

Lis organizazions internazionâls pai dirits umans a àn dât une prime valutazion positive pe letare mandade de ministre ceche pe educazion, Miroslava Kopicová, ai dirigjents des scuelis elementârs dal paîs par invidâju a controlâ che intes classis par fruts cun disturps mentâi lizêrs a sedin assegnâts dome chei frutins che a patissin pardabon di chescj problemis. Cun di fat, in dì di vuê, cetancj fruts rom a vegnin metûts ta chestis classis dome par vie de lôr partignince etniche. Daûr dai ultins dâts, plui di un cuart dai fruts rom a saressin metûts ta chestis classis speciâls: une percentuâl che no à nuie a ce viodi cun chê dai fruts che a son pardabon disvantazâts. Lis organizazions pai dirits umans, dut câs, a invidun il guvier cec a lâ plui innà des declarazions di principi e a meti in vore politichis concretis par meti fin a chest sisteme di segregazion dai fruts rom e par judâ la lôr integrazion intal percors scolastic normâl.

Font: ERRC, 02/02/10

Rom: cumò i tocje ae Slovachie domandâ scuse pe sterilizazions sfuarçadis

Il guvier cec al à dât fûr che al è pôc un comunicât uficiâl là che al domande scuse pe sterilizazion sfuarçade che par agns e je stade metude in vore su lis feminis de comunitât rom e al sigure che in avignî nol sucedarà plui. Cun di fat, a cjaval tra i agns ’70 e i agns ’90, il guvier cecoslovac al veve inviât une politiche di sterilizazion sfuarçade su lis feminis rom. Cumò lis organizazions pai dirits dai rom a domandin un at similâr ancje al guvier slovac e lu invidin a investigâ sui câs capitâts intal so teritori. Cun di fat, si à di zontâ che ancje intai ultins agns si àn vudis denunciis di sterilizazion sfuarçade.

Font: Galdu, 27/11/09

Rom: la estreme diestre ceche e domande la “soluzion finâl”

Inte sô propagande pes elezions europeanis, il partît de estreme diestre ceche Národní Strana (Partît Nazionâl) al à proponût une “soluzion finâl” pai rom che a vivin intal paîs. La plui part dai partîts cecs e à criticât il spot par vie che al riclame propit il tiermin doprât dai naziscj che, dilunc vie de seconde vuere mondiâl a àn sassinât centenârs di miârs di rom intai cjamps di stermini. La radiotelevision publiche e à decidût di no trasmeti il messaç par vie che lu calcole une incitazion al odi raziâl. Cheste decision e je stade doprade dai rapresentants dal Národní Strana par domandâ che lis elezions a vegnin anuladis. Il partît di estreme diestre al dîs che la “soluzion finâl” che al propon no si riferìs al maçalizi di cheste popolazion, ma ae sô depuartazion sfuarçade in Indie, di dulà che i rom a saressin partîts secui indaûr.

Font: Món Divers, 26/05/09

Rom: e cres la intolerance in Ongjarie e inte Republiche Ceche

Intune clime za pesante par vie de crisi economiche che e à colpît ancje i paîs de Europe centriorientâl, a cressin i episodis di intolerance e, in cierts câs, fintremai di violence cuintri des comunitâts rom. La situazion e va in piês massime in Ongjarie, là che i roms a son uns 700 mil o sei sù par jù il 7% de popolazion, e inte Republiche Ceche, là che a rapresentin il 3% dai citadins. In ducj e doi i câs a soflâ sul fûc a son prin di dut i grups de diestre estreme che a son daûr a cressi la lôr poie, ancje eletorâl, cui atacs cuintri des minorancis internis, a tacâ dai rom, e cuintri de politiche europeane. In Ongjarie, za di timp, la Magyar Gárda (Vuardie Ongjarese), leade cul partît di diestre Jobbik, e sfile in maniere intimidatorie intai paîs là che e vîf la comunitât rom. Tal zîr di doi agns, a disin i siei dirigjents, e je passade di une cincuantine a 1.500 membris. A son avonde clârs i siei riclams ai fassiscj ongjarês che, intant de seconde vuere mondiâl, a vevin judât i naziscj intal gjenocidi di rom e ebreus. Inte Republiche Ceche, la situazion e je dificile massime inte Boemie setentrionâl, là che il nivel di puaretât e la percentuâl di rom a son plui altis che intal rest dal stât. Chi, dongje des azions di intimidazion vuidadis de diestre xenofobe, si tachin a viodi segnâi di intolerance ancje de bande dai aministradôrs locâi.

Font: Le Monde, 02/04/09; L’espresso, 02/04/09

Pontade 04 07 (20/03/2007)

Irlande dal Nord: lis elezions a radicalizin lis posizions

Contrari di ce che a pensin tancj di lôr, il procès di pâs in Irlande dal Nord al è inmò lontan dal jessi rivât insom e, in dì di vuê, a son inmò tantis lis cuestions di discrosâ e i problemis che a restin ancjemò in pîts. E, ancje chi, contrari di ce che tancj a son puartâts a pensâ, i pidiments principâi no rivin de part nazionaliste e republicane de popolazion irlandese, si ben dai setôrs politics espression de part unioniste che, come che al è sucedût ta chescj agns, a son simpri pronts a cjatâ fûr gnovis provis di fâ superâ ai republicans, cence jessi disponibii a fâ nissun pas indaûr. Poiâts, ta chest mût di fâ, des autoritâts britanichis che, lontanis di davuelzi chê funzion super partes che a volaressin fâ crodi al mont, a mostrin a clâr di clopâ dut di une bande. La mancjance di disponibilitât dai partîts unioniscj ae condivision dal podê cui moviments che a rapresentin la popolazion nazionaliste e republicane irlandese, e à puartât ancjemò une volte al vôt par elei i deputâts pe Assemblee nordirlandese. Il cuadri che al è saltât fûr, dut câs, al mostre une radicalizazion inmò plui fuarte dal eletorât. In cinc partîts si son dividûts passe il 90% dai vôts. A cressi di plui al è stât il Democratic Unionist Party, o sei la ale plui dure dal unionisim vuidade dal pari – paron Ian Paisley, che cul so 30,1% dai vôts al à cumò 36 deputâts, ven a dî 6 in plui des ultimis elezions. Simpri sul front unionist, si à sbassât une vore il consens pal Ulster Unionist Party, che al à pierdût cuasi il 8% dai vôts e 9 deputâts, ma che al pues contâ ancjemò su 18 elets. A cressi une vore, invezit, al è stât il Sinn Féin, il partît di riferiment dai republicans irlandês, che al à cjapât plui dal 26% dai vôts e che al à vût 28 deputâts, 4 in plui de ultime volte. Il Social Democratic and Labour Party, che al rapresente l’eletorât nazionalist irlandês plui moderât, cul 15% dal consens al à vût 16 deputâts, ven a stâi 2 in mancul de ultime volte. Cuinte fuarce in cjamp e je l’Alliance Party, moviment che al varès di rapresentâ la aree moderade cence riferiments confessionâi, cul 5,2% dai vôts e 7 deputâts, un in plui des ultimis elezions. A completâ la Assemblee nordirlandese a son po altris trê deputâts: un vert, un indipendent e un rapresentant dal Progressive Unionist Party, ven a dî la espression politiche di une part dai grups armâts lealiscj, ma che e puarte indenant une politiche plui progressiste di chei altris moviments unioniscj e ancje plui disponibile tai confronts dal Sinn Féin. Cumò al è timp fin ai 26 di Març par rivâ a di un guvier che al meti dongje esponents unioniscj e republicans. Cence di chel si larà indenant cu la aministrazion direte di Londre.

Irlande dal Nord: gnovis consultazions pe leç sul gaelic

Il guvier britanic al à presentâts lis liniis de propueste di leç che al intint di presentâ su la tutele dal gaelic in Irlande dal Nord. Tra lis altris si previodin: la pussibilitât di doprâ l’irlandês tai procediments penâi; plans pal ûs de lenghe intai uficis publics; documents uficiâi ancje par gaelic; e un comissari pe lenghe irlandese. La leç e jere stade prometude za di timp dal guvier britanic, daspò di agns di pressions des associazions a pro dal gaelic e dai rapresentants de comunitât nazionaliste nordirlandese. Dome che cumò, il guvier al à fat savê che al vierzarà un altri zîr di consultazions di 12 setemanis, cundut che associazions, istituzions e moviments politics a fossin za stâts sintûts in proposit. Pes associazions che si batin pe tutele e la promozion de lenghe irlandese, chel dal guvier di Londre al è un compuartament scoret che al va cuintri des garanziis che a jerin stadis dadis e che a jerin previodudis ancje intai acuardis di pâs.

Cornualie: cornic inmò fûr de Convenzion Cuadri

Il rapuart su la metude in vore de Convenzion cuadri pe protezion des minorancis nazionâls che il guvier britanic al à inviât al Consei de Europe sul finî di Fevrâr nol fâs riferiment ae Cornualie. Ancjemò une volte, duncje, il Ream Unît al sielç di no calcolâ i cornics di comunitât nazionâl. Diviersis aministrazions locâls, associazions, organizazions no governativis e ancje parlamentârs a vevin domandât di slargjâ lis misuris di tutele previodudis de Convenzion ancje ae comunitât corniche, ma cence sucès. Tor de fin dal mês, dut câs, rapresentants dal Consei de Europe a saran a Londre par frontâ la cuestion sei cui delegâts dal guvier britanic, sei cui rapresentants cornics. Intai ultins agns e je cressude in Cornualie tant la domande di vê une Assemblee nazionâl, sul model di chê galese, che la domande di tutele pe lenghe proprie, une lenghe celtiche imparintade cul galês e cul breton.

Paîs Basc: si lavore su la riforme de scuele

Novitâts par chel che al rivuarde il sisteme scolastic inte Comunitât Autonome Basche. Fin cumò la plui part des scuelis e jere organizade su trê modei: A, dut par spagnûl fûr che lis oris pal insegnament de lenghe basche; B, che al jere, plui o mancul, a miezis tra spagnûl e basc; e D, dut par basc gjavadis lis oris pal insegnament dal spagnûl e di une lenghe foreste. Tai ultins agns i gjenitôrs a àn sielzût pai lôr fîs simpri di plui chest ultin model che cumò al è aromai il plui frecuentât. La plui part di chei altris students a frecuentin il model bilengâl e a son simpri di mancul chei che a seguissin il model par spagnûl. Dut câs ducj i partîts de CAB, gjavade la diestre spagnoliste dal PP, a àn decidût che al è rivât il moment di riformâ chest sisteme. Il gnûf implant scolastic che al à tacât il so iter intes istituzions baschis al previôt une presince plui fuarte dal basc e al fisse dai nivei minims di competence linguistiche di verificâ a ogni cicli scolastic. Dentri di cheste suaze, ogni scuele e podarà sielzi ce lenghis doprâ pes diviersis materiis. L’obietîf finâl al è chel di garantî che ducj i students a vedin un nivel di paronance de lenghe basche, dal spagnûl e di une lenghe foreste.

Ocitanie: a Besièrs la manifestazion “Anem Òc!”

Grande partecipazion sabide ai 17 di Març a Besièrs/Beziers, te regjon de Lenghedoc, là che si è davuelte la manifestazion “Anem Òc!” inmaneade di un coletîf di associazions formadis dal Institut d’Estudis Occitans, dal Felibrige, de Federazion dai insegnants di lenghe e culture ocitane, des scuelis Calandretas, de associazion Òc-Bi e dal Conselh de la Joventut d’Òc. Cun cheste iniziative si voleve domandâ al guvier francês il rispiet dai dirits de popolazion di lenghe ocitane cu la presince dal ocitan intes scuele statâl, inte aministrazion publiche e intai mieçs di comunicazion. La manifestazion, che e à vût la poie di 300 aministradôrs locâi, 200 associazions culturâls e 500 personalitâts dal mont culturâl, economic, sportîf e associatîf, e à puartât in place plui di 20 mil personis.

Republiche Ceche: in vore la Cjarte europeane pes lenghis

Cul prin di Març e je jentrade in vore inte Republiche Ceche la Cjarte europeane pes lenghis regjonâls o minoritariis. Cundut achel, la situazion no mude plui di tant pes comunitâts di minorance che a vivin tal paîs centrieuropean, là che la leç e previodeve bielzà misuris di tutele pal ûs des lenghis inte scuele, inte publiche aministrazion, inte justizie, tai mieçs di comunicazion e te segnaletiche. Une tutele che, dut câs, e jentre in vore dome là che la minorance e rapresente almancul il 10% de popolazion. Di chest pont di viste la situazion miôr e je chê dai polacs che a vivin te regjon a cjaval tra Moravie e Slesie. Un ciert nivel di tutele, dut câs, al interesse ancje slovacs, todescs e rom; plui dificile, invezit, la situazion pai ongjarês.