02/03/21

Paîs Catalans: 70 istitûts valenzians in difese de lenghe proprie

Intal an scolastic 2021 – 2022 si tacarà a meti in vore ancje tes scuelis secondariis dal Paîs Valenzian la leç sul plurilinguisim fate buine tal 2018 che e previôt che si vedi un minim di oris di insegnament dal 25% par castilian, dal 25% par catalan e dal 15% par inglês, lassant po ai istitûts di decidi cemût gjestî il rest des oris. Dentri dai 28 di Fevrâr i centris scolastics a àn di presentâ il plan linguistic di istitût. A son però aromai une setantine lis scuelis che a lamentin che cu la gnove leç si larà a sbassâ la cuantitât e la cualitât dal insegnament par catalan che a ufrissin in dì di vuê. A domandin duncje di previodi programs sperimentâi che ur dedin la pussibilitât di lâ indenant cu lis oris par catalan che a fasin cumò dal moment che tun teritori là che il castilian al va dilunc a jessi lenghe dominante – a spieghin – al è l’unic sisteme par rispietâ la finalitât de leç, ven a dî garantî che i students a vedin lis stessis competencis par castilian e par catalan.

Font: Levante EMV, 18/02/21

Bretagne: sot menace lis oris di breton tes secondariis Diwan

Cul prossim an scolastic lis oris setemanâls di breton intes scuelis secondariis parificadis de rêt Diwan no saran plui calcoladis par classe ma par grât. Dal moment che dentri di un stes grât si puedin vê plui classis, chest al vûl dî che lis oris di insegnament si smiezaran o piês ancjemò, cul risi ancje di pierdi puescj di docence. La gnove e à jevât la proteste dai insegnants e dai lôr sindacâts, des associazions dai gjenitôrs e dal coordenament des realtâts culturâls bretonis (Kevre Breizh) che a son daûr a studiâ formis di mobilitazion par impedî chest gnûf atac al insegnament de lenghe proprie de bande des istituzions statâls francesis.

Font: France Bleu, 17/02/21; Agence Bretagne Presse, 17/02/21

Galizie: par Madrid il galizian nol è penalizât inte scuele

Pal guvier spagnûl il model di insegnament des lenghis in vore tes scuelis de Galizie al garantìs un sisteme ad in plen bilengâl che nol limite in nissune maniere il galizian e nol à bisugne di jessi sostituît cuntun a imersion. Al è scrit sul rapuart che al rispuint aes critichis rivadis dal comitât dal Consei de Europe che al viôt dal rispiet des misuris previodudis de Cjarte des lenghis regjonâls o minoritariis. La posizion dal esecutîf di Madrid e à lassât scaturidis lis realtâts impegnadis pal galizian, a partî de Mesa pola Normalización Lingüistica, che a ricuardin che la cussì clamade leç sul plurilinguisim volude dal guvier locâl e impedìs l’ûs dal galizian par diviersis materiis e e met la lenghe proprie tune posizion di subordenazion rispiet al castilian. Un cuart dai fruts sot dai 15 agns nol è in stât di fevelâ par galizian: un dât che – a disin – si pues spiegâ dome cu lis politichis agressivis metudis in at intai ultins agns cuintri dal galizian inte scuele e te radiotelevision. Pal moviment nazionalitari BNG no si capìs cemût che un guvier formât dal PSOE e di Unidas Podemos, che si definìs progressist, al puedi sostignî la politiche linguistiche reazionarie metude in at dal PP in Galizie.

Font: Galicia Confidencial, 16/02/21

Corsiche: proteste cuintri de riforme dai Capes

Ai 15 di Fevrâr lis realtâts sindacâls e associativis impegnadis pal insegnament dal cors (STC Éducation, AILCC, APC, SNALC e Parlemu corsu) a àn inmaneât un presidi denant de sede dal ufici scolastic regjonâl par protestâ cuintri de ordenance dade fûr sul finî di Zenâr dal ministeri francês pe educazion che cul 2022 e larà a modificâ i criteris di valutazion pai certificâts di abilitazion al insegnament intai istitûts di secont grât (Capes) de Corsiche dopleant il pês des competencis par francês (di 4 a 8 ponts) e sbassant il valôr di chês par cors (di 7 a 4 ponts). Pes associazions dai professôrs di lenghe corse cheste misure si insuaze tune politiche di agression aes lenghis minorizadis e dai spazis che a vevin rivât a concuistâ tai ultins agns in plui di penalizâ cui che al à plui competencis par cors. La denuncie e je stade puartade ancje tal Parlament francês dal deputât di Pè a Corsica Paul-André Colombani ma il ministri pe educazion Jean-Michel Blanquer al à refudât ogni acuse e al à rivât fintremai a dî che il probleme nol diven des misuris dal guvier ma dal lâ al mancul dal interès de int pes lenghis locâls: une afermazion che si scuintre però cul aument continuatîf de domande di insegnament des lenghis propriis.

Font: Corse Net Infos, 15-16/02/21

Paîs Catalans: maiorance assolude pai indipendentiscj

Intes elezions pal Parlament de Catalogne che si son tignudis in forme anticipade ai 14 di Fevrâr par vie dai intervents de magjistrature spagnole, l’indipendentisim nol à otignût la maiorance assolude dome sul plan dai elets ma ancje su chel dai vôts. La pandemie e à condizionât a fuart la partecipazion ma no avonde par invalidâlis. Intal front indipendentist la fuarce plui votade e je stade ERC che cul 21,3% des preferencis e à vût 33 deputâts (un di plui dal 2017), i vegnin daûr Junts per Catalunya cul 20,04% dai consens e 32 elets (2 in mancul de volte stade), la CUP cul 6,67% dai vôts e 9 parlamentârs (a front dai 4 dal 2017) e il PDeCAT che cul 2,72% des preferencis al è restât fûr dal Parlament. Pe prime volte, duncje, i partîts a pro de indipendence a àn vude la maiorance assolude ancje tes percentuâls di vôt (54%).

Cossovo: minorancis decisivis pe gnove maiorance

Tes elezions politichis cossovanis dai 14 di Fevrâr il moviment Vetevendosje al à cjapât plui dal 48% dai consens e 56 parlamentârs e al larà a vuidâ il paîs balcanic intai prossims agns. Il sucès al nas in primis de disilusion di une gruesse part de popolazion pes politichis e pai compuartaments di chei altris partîts che si vevin alternâts al guvier. Il Partît Democratic dal Cossovo (PDK) al à vût pôc plui dal 17% dai vôts e 20 elets, la Leghe Democratiche dal Cossovo (LDK) e je colade al 13% dai consens otignint juste 15 deputâts e la Aleance pal Avignî dal Cossovo (AAK) e à cjapât sù par jù il 7% des preferencis e 9 parlamentârs. La Srpska Lista, partît leât ad in dopli cul guvier di Belgrât, e à otignût ducj i 10 puescj risiervâts ae minorance serbe cul 5,54% dai vôts. A front di une maiorance parlamentâr di 61 elets e devente decisive la posizion dai rapresentants des comunitâts plui piçulis che si dividin chei altris 10 puescj garantîts aes minorancis. Cheste prospetive, pronosticade bielzà ae vilie dal vôt, e veve sburtât i partîts plui grues a lavorâ sot vie par indreçâ il vôt su chei candidâts des minorancis che ur jerin plui favorevui.

Font: Balkan Insight, 15/02/21

Gales: servizi gnûf par judâ l’ûs dal galês intes impresis

Par mieç di un gnûf ufici operatîf (Prosiect 2050), il guvier galês al à lançât il servizi Helo Blod che si propon di judâ lis impresis che a vuelin doprâ la lenghe proprie tes lôr ativitâts. Plui tal detai Helo Blod al ufrìs la pussibilitât di vê traduzions e revisions di tescj par galês (gratuitis fin a di une cierte cuantitât), jutoris e conseis su lis modalitâts miôr par doprâ la lenghe proprie tune ativitât economiche e materiâi par judâ a identificâ sul puest di vore lis personis in stât di fevelâ par galês o che a son daûr a imparâlu.

Font: Business Wales, 15/02/21

Galizie / León: passe mil students di galizian tal Bierzo

Intant de ultime riunion de comission di supervision dal protocol di colaborazion tra il guvier de Galizie e la zonte pe promozion de lenghe galiziane si à fat il pont sul insegnament de lenghe proprie ancje tes regjons di Bierzo e Sanabria che si cjatin inte comunitât di Castilie e León. Intal an scolastic 2020 – 2021 il galego al è materie o lenghe di insegnament in tredis centris di educazion infantîl e primarie par 904 arlêfs, in cuatri istitûts di educazion secondarie par 141 students e tal liceu linguistic di Ponferrada par 38 fantats. Al è il risultât di un acuardi tra lis dôs comunitâts che al previôt che la Galizie e meti a disposizion percors di formazion pai professôrs, materiâi didatics e linguistics. L’insegnament dal galizian tal Bierzo e in Sanabria al reste dut câs di nature volontarie.

Font: Galicia Confidencial, 14/02/21

Paîs Basc: acuardi EiTB - Euskaltzaindia su la cualitât de lenghe

Ai 12 di Fevrâr la radiotelevision publiche basche Euskal Irrati Telebista (EiTB) e la academie de lenghe basche Euskaltzaindia a àn sotscrit un acuardi trienâl che si propon di sburtâ e di slargjâ un model linguistic di cualitât. L’impegn al è duncje di rispietâ dutis lis normis e i criteris definîts de academie, ancje par mieç di percors di formazion dal personâl e dal disvilup di manuâi e glossaris di pueste pai professioniscj dal setôr. Tal stes timp si cirarà di valorizâ la ricjece des varietâts doprant i regjistris linguistics che si adatin miôr ai diferents contescj e moments de comunicazion. Euskaltzaindia e varà invezit a disposizion il corpus di tescj di EiTB pal so osservatori su la lenghe e par incressi il so materiâl di vore.

Font: Deia, 13/02/21

Paîs Catalans: proteste a Perpignan pal catalan a scuele

Ai 10 di Fevrâr i sindacâts CGT, SNES-FSU, Solidaris e FCPE a àn tignût un presidi di proteste denant dal ispetorât scolastic di Perpinyà / Perpignan par rivendicâ la normalizazion dal insegnament dal catalan inte Catalogne Nord sot aministrazion francese. Vuê come vuê tes scuelis dal teritori a son disponibilis dome dôs oris di lenghe e culture catalane par setemane e un numar cussì scjars di oris intes materiis tecnichis e sientifichis che si à di formâ classis mistis cun students monolengâi e bilengâi. I sindacâts a domandin aes autoritâts scolastichis francesis che a sedin garantidis sei lis oris che lis risorsis umanis e economichis suficientis a ufrî un insegnament di cualitât de lenghe proprie. Te Catalogne Nord a operin ancje lis bressolas, scuelis parificadis catalanis a imersion, che però no son avonde par dâi rispueste a dute la domande che e rive des fameis. In dì di vuê si àn siet scuelis primariis e une secondarie ma nissun istitût secondari di secont grât. Un tant al oblee i students, rivâts a di un ciert moment, a vê di bandonâ il percors scolastic par catalan, par passâ a chel francês. In 45 agns di esistence lis bressolas a son passadis di siet a di un miâr di students par an.

Font: France3 Regions, 10/02/21; Jornalet, 12/02/21

Galizie: partît il progjet pal ricognossiment vocâl par galizian

Il grup Trasno al à inviât il progjet “Common Voice en galego” cun chê di meti a disposizion la tecnologjie di ricognossiment vocâl ancje par galizian. Si trate di un servizi che al permetarà ai dispositîfs di telefonie mobile di “capî” e di “fevelâ” ta cheste lenghe ma ancje di garantî assistents vocâi, letôrs di tescj par personis cun disabilitât e altris imprescj par galizian. La prime fase dal progjet e previôt di tirâ dongje almancul 5 mil frasis curtis di ûs cuotidian (cumò a ‘nd è za stadis cjapadis sù 1.700) par vê une base suficiente par che la inteligjence artificiâl DeepSpeech e puedi elaborâ un model linguistic specific. Il progjet al larà po indenant cu la revision dai tescj, in maniere che a sedin ducj in galizian coret, e po cu la regjistrazion de lôr leture. Si trate di un lavôr une vore grues e par chest e je stade domandade la colaborazion ative des personis che a puedin contribuî mandant tra lis cinc e lis cincuante frasis ognidun.

Font: Galicia Confidencial, 09/02/21