14/04/09

Paîs Basc: sucès pe edizion 2009 de Korrika

Internazionalitari 05 2008


Miârs di personis impegnadis par une corse durade 11 zornadis dilunc di 2.504 chilometris. A son i numars de diesime seste edizion de Korrika: la corse che e scjavace il Paîs Basc par tirâ sù fonts e par sensibilizâ citadins e istituzions a pro dal euskara, la lenghe basche. La manifestazion, chest an, e je partide ai 26 di Març a Tutera /Tudela par sierâsi po, ai 5 di Avrîl, a Gasteiz / Vitoria. AEK, la organizazion che e inmanee la Korrika, e à pandût la sô sodisfazion pe edizion di chest an, judicade la plui partecipade di dutis. Piçulis corsis di solidarietât si son davueltis ancje fûr dal Paîs Basc, de Cine ae Argjentine, di New York a Barcelone. A ruvinâ la fieste no àn rivât ni la decision dal guvier de Navare, in man ae diestre spagnoliste dal UPN, di gjavâi il so contribût ae manifestazion, e nancje i atacs dai grups de estreme diestre spagnole che a àn acusât la Korrika di “istigazion al terorisim”. La uniche istigazion che o fasìn – e à rispuindût la responsabile de manifestazion Edurne Brouard – e je chê pe lenghe basche.

Font: Gara, 08/04/09


Macedonie: scjarse partecipazion albanese pes presidenziâls

Internazionalitari 05 2008


Lis elezions presidenziâls dai 5 di Avrîl in Macedonie a àn dât la vitorie al candidât de coalizion di centri diestre, George Ivanov, cun cuasi il 60% des preferencis. Cun cheste vitorie, il so partît al infuartìs ancjemò di plui il control sul paîs, là che al à za in man il guvier, il Parlament e lis citâts plui impuartantis. I eletôrs, dut câs, a àn passât di pôc il nivel dal 40% che al garantìs la validitât des elezions. La partecipazion al vôt e je stade une vore scjarse massime tes areis là che e vîf la comunitât albanese che e rapresente sù par jù un cuart de popolazion totâl. I candidâts, di fat, a àn fevelât soredut dal lôr impegn par fâ jentrâ il stât inte UE e inte NATO e par meti fin ai contrascj cu la Grecie, ma no àn dedicât cui sa ce atenzion ae situazion e aes problematichis de minorance albanese che e à, duncje, rispuindût cuntune scjarse partecipazion al vôt.

Font: Balkan Insight, 06/04/09


Corsiche: scuintris a Bastia tra indipendentiscj e polizie

Internazionalitari 05 2008


Chê dai 4 di Avrîl e je stade une zornade di scuintris a Bastia tra militants indipendentiscj cors e fuarcis di polizie. Diviers miârs di personis, pe plui part zovins, a àn rispuindût al apel fat indenant di Corsica Libera par denunciâ la repression violente de polizie intant di une manifestazion cuintri de condane dal dirigjent indipendentist Yvan Colonna, là che un fantat al jere stât ferît in maniere une vore serie. La gnove manifestazion, dut câs, si à sierade cun altris incidents jenfri indipendentiscj e polizie, là che si fevele, dome tra chescj ultins, di une setantine di ferîts.

Font: Radio Alta Frequenza, 05-06/04/09; Corse Matin, 04/04/09


Galizie: in rêt al parone il castilian

Internazionalitari 05 2008


L’Osservatori pe Lenghe Galiziane (Observatorio da Lingua Galega) al à dât fûr une gnove ricercje su la situazion linguistiche sui sîts internet in Galizie. A fâ di paron al è il castilian, ma la situazion e je une vore divierse tra public e privât. Cun di fat, ducj i sîts des istituzions autonomichis si vierzin cu la prime pagjine par galizian. Il stes a fasin, tal 88,7% dai câs, lis aministrazions locâls. Invezit, lis sezions locâls de aministrazion statâl a doprin come lenghe di riferiment il castilian. Tes pagjinis web des organizazions politichis e sindacâls, tal 83,3% dai câs, al è il galizian a vê plui visibilitât. Il stes si lu viôt par trê des cuatri universitâts de Galizie. Il castilian al è, invezit, maioritari tai sîts internet dai mieçs di comunicazion e des istituzions religjosis (plui o mancul tai trê cuarts dai câs). Là che però il castilian al fâs pardabon di paron al è su lis pagjinis web des impresis privadis: achì, di fat, dome tal 2% dai câs il sît si vierç inte version par galizian. Cun di plui, tal 75% dai câs, si cjatisi denant di sîts monolengâi. Il galizian al mostre une cierte vivarositât, invezit, te blogosfere, là che la lenghe proprie de Galizie e ven doprade tal 30% dai câs. Un dât curiôs al è chel de coretece dai tescj: cun di fat, a scrivin par galizian cun mancul erôrs i autôrs dai blogs che no i curadôrs des pagjinis istituzionâls.

Font: Galiza Hoxe, 03/04/09



Paîs Basc: acuardi fat jenfri PSE e PP par guviernâ la CAB

Internazionalitari 05 2008


Il prin di Avrîl al è stât sotscrit in maniere uficiâl il pat jenfri PSE (la sezion basche dal PSOE) e PP par permeti ai socialiscj di guviernâ la Comunitât Autonome Basche intai prossims agns. Si trate di un acuardi sui ponts di convergjence tra lis dôs formazions politichis che al va de lote cuintri di ETA ae limitazion de politiche linguistiche a pro dal euskara, fin ae riorganizazion de radiotelevision basche EiTB daûr di criteris che a ‘nt fasin un imprest plui in linie cu la gnove situazion istituzionâl. No si trate, dut câs, di un vêr pat di guvier, dal moment che il PSE al aministrarà cuntun guvier di minorance e il PP al restarà ae “oposizion”, ma sigurant cui siei vôts une cierte stabilitât di guvier. Cun di fat, se il socialist Patxi López al sarà il gnûf president de Comunitât Autonome Basche, ae presidence dal Parlament e je za stade elete cun 38 vôts la popolâr Arantza Quiroga, intant che Izaskun Bilbao e à vût i 36 vôts dai partîts bascs (PNV, EA, EB e Aralar). In graciis de esclusion sfuarçade des listis de çampe indipendentiste basche e de sproporzion di rapresentance tra lis trê provinciis de CAB, il podê al è duncje tes mans dai partîts spagnoliscj, cundut che a son minorance intal paîs. A ricuardâlu al è stât ancje un rapresentant politic ben lontan di cualsisedi simpatie pal nazionalisim basc, ven a dî il president de Navare Miguel Sanz.

Font: Gara, 02-04/04/09; Món Divers, 31/03/09


Rom: e cres la intolerance in Ongjarie e inte Republiche Ceche

Internazionalitari 05 2008


Intune clime za pesante par vie de crisi economiche che e à colpît ancje i paîs de Europe centriorientâl, a cressin i episodis di intolerance e, in cierts câs, fintremai di violence cuintri des comunitâts rom. La situazion e va in piês massime in Ongjarie, là che i roms a son uns 700 mil o sei sù par jù il 7% de popolazion, e inte Republiche Ceche, là che a rapresentin il 3% dai citadins. In ducj e doi i câs a soflâ sul fûc a son prin di dut i grups de diestre estreme che a son daûr a cressi la lôr poie, ancje eletorâl, cui atacs cuintri des minorancis internis, a tacâ dai rom, e cuintri de politiche europeane. In Ongjarie, za di timp, la Magyar Gárda (Vuardie Ongjarese), leade cul partît di diestre Jobbik, e sfile in maniere intimidatorie intai paîs là che e vîf la comunitât rom. Tal zîr di doi agns, a disin i siei dirigjents, e je passade di une cincuantine a 1.500 membris. A son avonde clârs i siei riclams ai fassiscj ongjarês che, intant de seconde vuere mondiâl, a vevin judât i naziscj intal gjenocidi di rom e ebreus. Inte Republiche Ceche, la situazion e je dificile massime inte Boemie setentrionâl, là che il nivel di puaretât e la percentuâl di rom a son plui altis che intal rest dal stât. Chi, dongje des azions di intimidazion vuidadis de diestre xenofobe, si tachin a viodi segnâi di intolerance ancje de bande dai aministradôrs locâi.

Font: Le Monde, 02/04/09; L’espresso, 02/04/09




Galizie, Paîs Basc, Paîs Catalans: pes europeanis aleance ERC, Aralar e BNG

Internazionalitari 05 2008


Cul svicinâsi des elezions europeanis, ancje intal stât spagnûl a son daûr a concretizâsi i acuardis eletorâi tra lis formazions politichis di stamp nazionalitari. Cun di fat, al acuardi za sotscrit jenfri ERC (Esquerra Republicana de Catalunya) e i bascs di Aralar, si à zontât ancje il BNG, che lis voltis stadis si veve invezit presentât intune cui catalans di CiU e cui bascs dal PNV. Ta cheste maniere, a disin i nazionaliscj galizians, si vûl dâ plui fuarce ancje in Europe ae domande di autodeterminazion dai trê popui. Al acuardi eletorâl a podaressin zontâsi ancje Eusko Alkartasuna (Paîs Basc), Entesa per Mallorca (Paîs Catalans), Chunta Aragonesista (Aragon) e Andecha Astur (Asturiis).

Font: Gara, 31/03/09; Galiza Hoxe, 31/03/09 e 04/04/09; Món Divers, 01/04/09


Paîs Catalans: il PP cuintri de leç sul catalan te sanitât

Internazionalitari 05 2008


Il PP al à fat savê che si movarà par puartâ denant de magjistrature il decret su la cognossince dal catalan de bande dai operadôrs sanitaris che il guvier des isulis Baleârs al à fat bon ai 27 di Març. Cun di fat, pai popolârs si trate di un proviodiment discriminatori. Il guvier des Baleârs, invezit, al rispuint che si trate dome di garantî a cui che al fevele par catalan il dirit di jessi assistût e curât te sô lenghe proprie. In pratiche, il decret al previôt che i operadôrs sanitaris che a lavorin tes Baleârs a vedin doi agns di timp par dimostrâ une cognossince dal catalan di nivel B (nivel mezan).

Font: Món Divers, 31/03/09


UE: assemblee gjenerâl a Barcelone pe EFA - ALE

Internazionalitari 05 2008


Ai 27 di Març si è davuelte a Barcelone la cuinte assemblee gjenerâl de Aleance Libare Europeane (EFA), che e met adun cuarante partîts indipendentiscj e autonomiscj che a rivin di une vincjine di stâts de UE e che intal Parlament de Europe e forme un grup indipendent cui Verts. Intant de riunion si à metût jù un program pes prossimis elezions europeanis che al ponte a di une Europe plui atente al sociâl, ae difese dal ambient e des minorancis. La ALE e ponte a di une Union Europeane là che al cressi il numar dai membris in graciis dal percors di autodeterminazion des nazions cence stât. Intant de assemblee a son stâts fats jentrâ tant che membris a plen titule altris trê partîts, ven a dî: Die Friesen (comunitât frisone in Gjermanie), Strana Regiónov Slovenska (formazion regjonaliste multietniche de Slovachie), e Sud Tiroler Freiheit (Sud Tirôl). A ‘nt son po stâts acetâts altris sîs tant che osservadôrs: Südschleswigschen Wählerverbandes (comunitâts frisone e danese dal Schleswig Holstein); Lista per Fiume - Lista za Rijeku (autonomiscj di Flum, in Cravuazie); MMRÖP (partît dai rom de Ongjarie); Movimento per l’Indipendenza della Sicilia (indipendentiscj sicilians); Wendische Volkspartei – SLS (comunitât serbiane in Gjermanie); Die unabhänginge Kraft für Ostbelgien – ProDG (todescs de Belgjiche orientâl).

Font: EFA, 29/03/09


Bretagne: l’Ufici pe lenghe bretone al devente public

Internazionalitari 05 2008


Ai 28 di Març si è davuelte a Kemper / Quimper la assemblee gjenerâl dal Ufici de Lenghe Bretone (Ofis ar Brezhoneg) cu la partecipazion ancje dal president dal Consei regjonâl de Bretagne, Jean-Yves Le Drian, e dal conseîr regjonâl pe politiche linguistiche, Jean-Pierre Thomin. Intant de riunion Le Drian al à comunicât in maniere uficiâl il vôt positîf dal Consei regjonâl pe trasformazion dal Ufici tune struture publiche di cooperazion culturâl che si clamarà Ofis Publik ar Brezhoneg. Cun chest passaç si va a garantî al Ufici une stabilitât di struture e di finanziaments che i permetaran di puartâ indenant lis sôs ativitâts cun plui fuarce. Il president dal Consei regjonâl al à ancje confermât la creazion di 40 borsis di studi par cui che si iscrivarà ai masters di breton cun chê di deventâ professôr intai istitûts scolastics bilengâi. La presidente dal Ufici, Lena Louarn, e à invezit fat il pont su lis ativitâts davueltis vie pal 2008 e su chês in program par chest an.

Font: Ofis ar brezhoneg, 29/03/09