02/09/08

Pontade 18 08 (02/09/08) - 10

Paîs Basc: Otegi al jes di preson e al bat su la strade dal dialic

Arnaldo Otegi, il dirigjent plui rapresentatîf de çampe indipendentiste basche, al è tornât in libertât la buinore dai 30 di Avost, daspò cuindis mês di preson. Denant di un centenâr di personis che lu spietavin fûr de preson al à tornât a dî che la uniche soluzion par saltâ fûr dal conflit in vore intal Paîs Basc e je chê dal dialic e des tratativis. Si trate di un percors che al à di permeti al Paîs Basc di decidi in maniere libare dal so avignî e che al à di puartâ ancje ae liberazion dai centenârs di militants bascs impresonâts. Otegi al jere stât arestât ai 8 di Jugn dal 2007 par vie de sô partecipazion a di une manifestazion in ricuart dal etarra Argala sassinât dai grups paramilitârs spagnûi. Il dirigjent abertzale al jere za stât impresonât inte Vierte dal 2005 par jessi membri dal diretîf dal partît politic Batasuna e po tal Març dal 2006 par vê convocât un siopar pe muart di doi militants bascs intes presons spagnolis. A son cetancj i militants indipendentiscj bascs che si cjatin in preson dome par vie de lôr ativitât politiche.
Font: Gara, 30/08/08


Pontade 18 08 (02/09/08) - 9

Ocitanie: partide la iniziative “L’Occitània a pè”

Sabide ai 30 di Avost e je partide di Vinai (Vinaio), intes valadis ocitanis dal Piemont, la cjaminade che e scjavaçarà la Ocitanie par 1.300 chilometris par rivâ ai 7 di Novembar a Vielha, inte Val d’Aran. La iniziative, imbastide de Chambra d’Òc, e à chê di sburtâ il ricognossiment de lenghe ocitane tant che patrimoni mondiâl de umanitât. La cjaminade – che e je stade batiade “L’Occitània a pè” – e previôt ancje dute une schirie di incuintris sul teritori cu lis realtâts aministrativis e associativis ocitanis. La cjaminade e cjape dentri ducj e trê i stâts là che e je dividude la Ocitanie, ven a stâi chel talian, chel francês e chel spagnûl. Tal prin, la lenghe d’òc e je fevelade in dodis valadis alpinis dal Piemont, tun blec de Ligurie e tal comun di La Gàrdia (Guardia Piemontese) in Calabrie. Intal stât francês, la aree ocitane e cjape dentri trenteun dipartiments, o sei cuasi dute la part meridionâl dal stât. L’ocitan al è po fevelât ancje te Val d’Aran, intal Principât di Catalogne.
Font: Chambra d’Òc; VilaWeb, 30/08/08


Pontade 18 08 (02/09/08) - 8

Scozie: Liberâi Democratics possibiliscj sul referendum pe indipendence

Il gnûf dirigjent dal Partît Liberâl Democratic in Scozie, Tavish Scott, subite daspò de elezion che lu à puartât a cjapâ il puest di Nicol Stephen, al à mostrât une posizion plui pussibiliste in mert al referendum su la indipendence de Scozie domandât cun fuarce dal SNP che al in dì di vuê al à in man il guvier scozês. Scott, che tai mês stâts si veve declarât dal dut contrari a ogni progjet di referendum su la autodeterminazion, al à dite di no jessi contrari al fat che la int e puedi dî la sô su chest argoment ancje se al crôt plui intal infuartî la Scozie dentri dal Ream Unît che no te indipendence. Tai mês stâts, denant dal aument dai consens dal eletorât scozês sei pal SNP sei pal progjet di referendum, ancje i Laburiscj a vevin tornât a viodi la lôr posizion contrarie al referendum che, a vuê, al va dilunc a cjatâ la oposizion totâl dome dai Conservadôrs. La posizion pussibiliste sei dai Laburiscj che dai Liberâi Democratics, dut câs, no plâs masse nancje a Londre, alì de direzion centrâl dai doi partîts.
Font: The Scotsman, 27/08/08; Nationalia, 27/08/08


Pontade 18 08 (02/09/08) - 7

Ossezie e Abkhazie: la Russie e ricognòs la lôr indipendence

Ai 26 di Avost, la zornade daspò che lis dôs ramis dal Parlament rus a vevin votât par che il guvier al ricognossès la indipendence de Ossezie meridionâl e de Abkhazie, il president de Federazion Russe, Dimitri Medvedev, al à comunicât di vê ricognossût in maniere uficiâl la indipendence des dôs regjons dal stât gjeorgjan. Cun di fat, al à spiegât il president rus, daspò dal tentatîf decidût dal president gjeorgjan Mikhail Saakashvili ai prins di Avost di recuperâ cu la fuarce i teritoris de Ossezie meridionâl, ogni ipotesi di convivence pacifiche di cheste regjon e de Abkhazie dentri de Gjeorgjie e je lade sù pai stecs. Medvedev al à ancje fat riferiment ai referendums che si son tignûts ta chescj teritoris par rivendicâ la lôr indipendence. Il president rus al à po invidât chei altris stâts a ricognossi ancje lôr la indipendence des dôs republichis caucasichis. Fin cumò, dut câs, la decision russe no à cjatât nissune poie. Lis protestis plui duris a son rivadis, in plui de Gjeorgjie là che Saakashvili al à acusât la Russie di vê anetût i doi teritoris, dai Stâts Unîts e de Union Europeane, ancje se no si à cjatât un front comun su cemût rispuindi ae decision russe.
Al è dificil di dî ce consecuencis che cheste decision e varà sei pe aree caucasiche, sei in altris teritoris là che si àn fuartis tindincis indipendentistis. A tacâ de stesse Federazion Russe là che i ponts plui cjalts a son la Cecenie e la Ingussezie. Par intant Ossezie meridionâl e Abkhazie a jentrin te liste di chei stâts che a puedin svantâ dome un ricognossiment parziâl tant che Taiwan, il Sahara Ocidentâl, il Cossovo (che fin cumò al è stâts ricognossûts di uns 45 membris de ONU) e la Republiche turche di Cipri setentrionâl (ricognossude dome de Turchie).
Font: Món Divers, 26/08/08; Nationalia, 26/08/08


Pontade 18 08 (02/09/08) - 6

Transnistrie: domande di indipendence sul esempli caucasic

Propit l’esempli dât de Ossezie meridionâl e de Abkhazie al à tornât a stiçâ la tension ancje in Transnistrie. Si trate di une striche di tiere scliçade jenfri Ucraine e Moldove, che sul plan formâl e je part di chest secont stât, ma che e gjolt di une indipendence di fat zaromai di agns. La Transnistrie, là che e vîf la plui part de popolazion russofone de Moldove, e veve proclamât la sô indipendence ancjemò intal 1990 e daspò di un conflit cuintri de Moldove e à metût sù une republiche par so cont, cuntun Parlament e un guvier indipendent. Ancje cheste regjon, compagn de Ossezie meridionâl e de Abkhazie e gjolt de poie russe. Se la Europe e vûl pardabon la pâs e à di ricognossi la nestre indipendence, al à dite il president de Transnistrie, Igor Smirnov, intal pandi dute la sô poie aes dôs autoproclamadis republichis caucasichis. Cul ricognossi la indipendence e il dirit a vê un stât di chescj popui – al à dite Smirnov – si larà a garantî la sigurece e il svilup di ducj. Il president de Moldove, Vladimir Voronin, al à domandât la colaborazion des istituzions europeanis par saltâ fûr di cheste situazion in maniere pacifiche. Il president rumen, Traian Basescu, al à denunciât che il nivel de tension te zone al è une vore alt e al è pardanon il pericul che la situazion e scjampi di man.
Font: Nationalia, 22/08/08; Le Courrier des Balkans, 13/08/08


Pontade 18 08 (02/09/08) - 5

Bretagne: fieste pai 25 agns di Radio Bro Gwened

Fieste grande ai 30 di Avost in Bretagne pai 25 agns di Radio Bro Gwened, une des emitentis privadis che di agns e dopre il breton intes sôs trasmissions. In dì di vuê, di fat, a son une trentine ogni setemane lis oris di programazion fatis inte lenghe proprie de Bretagne. Pe ocasion, la radio – che e trasmet te zone dal Morbihan, di Vannes e di Pontivy – e à trasmetût cuasi dut il dì al viert, tal mieç de int. La sere, invezit, la fieste e je stade compagnade di un conciert di grups locâi e di un festnoz, une des innomenadis gnotoladis di fieste bretonis. Par trê dîs, dai 29 ai 31 di Avost, al è stât inmaneât ancje un radiothon par tirâ sù bêçs par judâ la ativitât de radio.
Font: Ouest-France, 26/08/08


Pontade 18 08 (02/09/08) - 4

Macedonie: nissun acuardi cu la Grecie

Lis ultimis tratativis jenfri Macedonie e Grecie, che si davuelzin cu la mediazion dal inviât speciâl de ONU Matthew Nimetz, no àn puartât nissune buine gnove par risolvi i contrascj che a esistin tra i doi stâts. Al contrari, su la taule a son stâts metûts gnûfs elements di scuintri. La cuestion e jere nassude subite daspò de indipendence de Macedonie de Federazion Jugosalve, cuant che la Grecie e veve metût in pîts une cause internazionâl che e va inmò indenant sul dirit de Republiche ex jugoslave di doprâ il non di Macedonie che, pai grêcs, al parten in maniere esclusive a di une des regjons storichis de Grecie. Ogni tentatîf par saltâ fûr di cheste situazion, fin cumò, nol à vût sucès. Cun di plui – al denuncie il prin ministri macedon Nikola Gruevski – la Grecie e cjate fûr ogni sorte di pidiment politic e economic par fâi cuintri ae Macedonie. Propit la oposizion dai grêcs e à impedît, par esempli, che la ex republiche jugoslave e jentràs inte NATO. Tai ultins documents inviâts ai rapresentants de ONU, Gruevski al lamente po che ancje la glesie ortodosse greghe e je su la stesse linie dal stât e e impedìs che si ricognossi la esistence de glesie ortodosse macedone. Il guvier di Skopje al denuncie ancje la situazion de minorance macedone in Grecie e e domande che lis autoritâts greghis a metin fin aes violazions dai dirits di cheste comunitât. La Grecie, di fat, e va dilunc a no ricognossi la presince di minorancis nazionâls e linguistichis sul so teritori e e colpìs cun fuarce ogni tentatîf di difindi i dirits di chestis comunitâts. Par rindisi cont di cheste situazion al baste dâ un cuc ae stampe greghe che, cundut che e à fevelât sei dai gnûfs contrascj cu la Macedonie, sei des declarazions di Gruevski, e je stade une vore atente a no fâ nissun riferiment ae esistence de minorance macedone in Grecie. Il segretari gjenerâl de ONU, Ban Ki Moon, al à dite che prime di frontâ la cuestion de minorance al covente risolvi il scuintri sul non.
Font: Nationalia, 21/08/08; Le Courrier des Balkans (Eleftheros Typos), 13/08/08


Pontade 18 08 (02/09/08) - 3

Sud Tirôl: si trate par incressi la autonomie

L’incuintri dai 19 di Avost tra il ministri talian pe semplificazion legjislative, Roberto Calderoli, e il president de aministrazion provinciâl dal Sud Tirôl, Luis Durnwalder, al è stât judicât in maniere positive di ducj e doi. Inte riunion si à fevelât massime dai progjets di riforme dal implant des autonomiis che il guvier talian al è daûr a prontâ. Ta cheste suaze si à fevelât di une partecipazion indirete dal Sud Tirôl al font di solidarietât tra lis Regjons cul passaç di gnovis competencis ae Provincie, ma cence di un aument intal trasferiment dai contribûts. Tra lis competencis che a podaressin passâ al Sud Tirôl si à fevelât di polizie locâl, pueste e part de magjistrature. In cambi Durnwalder, che al guvierne la Provincie in rapresentance de SVP, al à fevelât di ecuidistance dal so partît rispiet aes dôs coalizions talianis di riferiment: inta cheste maniere si slontanisi de politiche di colaborazion ative cul centri çampe vude intai ultins agns. Calderoli al à sigurât che nissun al metarà in discussion il sisteme di autonomie dal Sud Tirôl, che par altri, al è garantît di acuardis internazionâi.
Font: Corriere della Sera, 20/08/08; Món Divers, 26/08/08


Pontade 18 08 (02/09/08) - 2

Ladinie: un portâl pai ladins intal mont

Al è in linie il portâl www.ladinstlmonn.org che al à chê di rapresentâ un lûc di incuintri pai ladins che a son ator pal mont. La iniziative, che e nas de colaborazion tra la Ripartizion scuele e culture ladine de Provincie di Bolzan e i Comuns ladins, e à ancje chê di infuartî la identitât dai ladins dolomitans sei intal lôr teritori che intal forest e judâ chescj ultins a tignî i contats cu la lôr tiere par mieç di discussions viertis, testemoneancis, e de informazion. Cun di fat, cul prin di Otubar, a varessin di jessi disponibii sul sît ancje la trasmission RAI “Trail” e lis gnovis de “La Usc di Ladins”. Tra i personaçs che a àn metût la lôr muse par promovi chest progjet a son il musicist di nivel internazionâl Giorgio Moroder che cumò al vîf intai Stâts Unîts e il scultôr Richard Agreiter che al è a stâ in Austrie.
Font: Provincie di Trent, 12/08/08; Noeles, 14/08/08


Pontade 18 08 (02/09/08) - 1

Gales: dât fûr il plan di politiche linguistiche dal Ministeri de difese

Ta chestis zornadis il Ministeri de difese britanic al à metût fûr sul so sît internet il stampon dal so plan di politiche linguistiche pal galês, di maniere che il public al puedi viodilu e comentâlu. Il document al sarà disponibil pe consultazion par 12 setemanis. La version definitive e varà po di passâ pal esam dal Ufici pe Lenghe Galese. Pal Ministeri de difese l’intindiment al è chel di garantî il stes tratament ae lenghe galese e a chê inglese, almancul par chel che si riferìs aes sôs struturis e aes sôs comunicazions cul public in Gales. Par garantî chest servizi, dut câs, no son previodudis risorsis in plui, ma ogni struture e varà di doprâ par chest fin i fonts che e à za a disposizion.
Font: Welsh Language Board, 19/08/08; Ministry of Defence (UK), 19/08/08