Domenie
ai 24 di Fevrâr si son tignudis in Sardegne lis elezions par rignuvî
la Assemblee e il guvier de Regjon autonome. La partecipazion al vôt
e je stade dal 53,75%. Cuntun sisteme eletorâl che e met al centri
la figure dal president dal esecutîf, la vitorie e je lade a
Christian Solinas e ae coalizion che e met adun lis fuarcis dal
centri diestre statâl e regjonalist. Solinas – che al rive dal
Partito
Sardo d’Azione
ma che al è il responsabil de aleance tra i regjonaliscj de isule e
la Leghe (al pont di jessi stât elet senatôr propit cun chest
partît) – al à otignût il 47,81% des preferencis intant che la
coalizion che lu poiave e à cjapât il 51,76% e a varan duncje a
disposizion la maiorance assolude te Assemblee regjonâl.
Il blog di Internazionalitari al nas di une trasmission di Radio Onde Furlane e al fevele, cuntun tai nazionalitari, des nazions cence stât e des minorancis nazionâls de Europe.
04/03/19
Paîs Catalans: presidi a Perpignan par un ufici pal catalan
Un
centenâr di personis a àn partecipât a di un presidi inmaneât ai
22 di Fevrâr denant de prefeture di Perpinyà / Perpignan par
domandâ la istituzion di un ufici public pe lenghe catalane su model
di chei za inviâts pal breton, pal ocitan e pal basc. L’ufici –
che al varès di ocupâsi di promovi cun fonts propris l’ûs dal
catalan intal teritori de Catalogne Nord – al gjolt de poie dal
dipartiment dai Pireneus Orientâi e de regjon aministrative de
Ocitanie e al varès za a disposizion i spazis ufierts de universitât
di Perpinyà / Perpignan ma al è di mês in spiete dal vie libare
dal ministeri francês pe educazion e pe culture. Intant de
iniziative, inmaneade de Associazion pal Insegnament dal Catalan
(APLEC), si à domandât ancje un incuintri cui rapresentants dal
guvier par savê alc sul parcè di chest cidin de bande des
autoritâts di Parîs.
Font:
VilaWeb,
22/02/19
Paîs Catalans: siopar gjenerâl e manifestazions pai presonîrs
Uns
150 mil personis a àn partecipât aes manifestazions inmaneadis ai
21 di Fevrâr ator pe Catalogne in ocasion de zornade di siopar
gjenerâl proclamade de Intersindical
SCS.
Denant de proibizion di sioperâ par resons politichis, il sindacât
di base catalan al veve proclamât la astension dal lavôr par
domandâ il recupar de riforme dal lavôr e de legjislazion sociâl
fate buine dal Parlament catalan e suspindude de cort costituzionâl
spagnole. Chel istès al jere clâr par ducj che la proteste e veve
chê di manifestâ cuintri dal procès inviât ai 12 di Fevrâr alì
dal tribunâl suprem spagnûl cuintri di dodis dirigjents
indipendentiscj catalans. Lis stimis uficiâls a fevelin di une
adesion dal 67% intes universitâts, dal 30% tes ativitâts
comerciâls, dal 28% inte scuele, dal 24% tes aministrazions
publichis e dal 8% inte sanitât. Si fevele de seconde partecipazion
plui alte a di un siopar in Catalogne tai ultins cuindis agns. Un
risultât che al risalte inmò di plui se si ten cont che nol
gjoldeve de poie dai doi sindacâts principâi – CCOO e UGT – che
a resonin daûr di logjichis statâls. La serade dai 21 si son po
davueltis diviersis manifestazions cuintri de criminalizazion dal
procès di autodeterminazion catalan cun sù par jù 70 mil personis
in place a Girona, 9 mil a Tarragona, 8 mil a Lleida e 40 mil a
Barcelone là che però la manifestazion di place principâl si veve
davuelte sabide ai 16 di Fevrâr. La zornade si veve vierte cul bloc
des rêts stradâls e feroviariis principâls de Catalogne de bande
di centenârs di membris dai CDR. Dilunc vie de zornade si à vût
ancje cualchi scuintri tra manifestants e polizie.
Font:
VilaWeb,
21/02/19
Paîs Basc: Aberri Eguna 2019 a Iruñea e a Donibane-Garazi
Lis
celebrazions principâls pal Aberri
Eguna,
la Zornade nazionâl basche, si davuelzaran ai 21 di Avrîl a Iruñea
/ Pamplona, in Navare, e a Donibane-Garazi / Saint-Jean-Pied-de-Port,
intal Paîs Basc sot aministrazion francese. A comunicâlu a son
stâts i rapresentants des coalizions de çampe indipendentiste
basche EH
Bildu
e EH
Bai
che chest an a àn decidût di cjapâ in man in maniere direte la
organizazion des celebrazions. Tai ultins agns la organizazion e jere
stade curade de rêt Independentistak
Sarea
cun chê di evitâ di meti intor de fieste etichetis di partît ma,
chel istès, no si veve rivât a dâ adun ducj i partîts bascs. Al
centri de manifestazion a saran il teme de sovranitât tant che
imprest par podê decidi di bessôi il propri avignî ma ancje par fâ
sù une societât plui juste. Al è di fat ce preocupâsi – a disin
– pal cressi des menacis che a rivin sei tal stât spagnûl, cu la
incressite de estreme diestre spagnoliste e cu la repression
anticatalane, sei tal stât francês cu la violence istituzionâl
metude in cjamp cuintri de proteste dai gilets
jaunes
(gjilês zâi).
Font:
MediaBask,
19/02/19
Ocitanie: in miârs in place pal ocitan te educazion publiche
Ai
17 di Fevrâr miârs di personis a àn manifestât pes viis di Tolosa
/ Toulouse cuintri de eliminazion de lenghe ocitane de educazion
publiche. La iniziative e jere stade clamade adun dal CRÈO (centri
regjonâl dai insegnants di ocitan) e e veve cjatât daurman la
adesion de federazion des calandretas
(lis scuelis ocitanis a imersion), de federazion dai insegnants di
lenghe e culture ocitane (FÈLCO) e di une sdrume di coletîfs de
Ocitanie. La mobilitazion e à viodût in place ancje personaçs di
prin plan de culture e dal sport ocitan e politics tant che
l’eurodeputât ecologjist José Bové. A jessi contestade e je in
primis la decision de direzion scolastiche dal distret di Tolosa di
taiâ i fonts pal ocitan: une misure che e lasse uns 15 mil students
cence dal insegnament de lenghe proprie e che e colpìs la ativitât
di une cincuantine di professôrs. A favorî cheste decision e je
però la riforme dal sisteme di istruzion superiôr imbastide a Parîs
che e je daûr a jevâ critichis e protestis framieç di dutis lis
comunitâts minorizadis dal stât francês. Chel di Tolosa al è dome
un dai undis distrets scolastics che e je dividude la Ocitanie
“francese” ma, di bessôl, al conte il 60% dai students che a
studiin l’ocitan intal cicli de educazion secondarie.
Font:
Jornalet,
18/02/19
Europe: il Parlament al proibìs une mostre sul catalan
Il
Parlament european al à scancelât une esposizion dedicade ae lenghe
catalane che e varès vût di jessi screade ai 4 di Març intai
spazis de istituzion. A denunciâlu e je la organizazion Plataforma
per la Llengua
che e veve curât la mostre cun chê di fâ cognossi plui in detai ai
parlamentârs e ai ospits de Assemblee la situazion de diesime cuarte
lenghe plui fevelade de Europe. I responsabii dal Parlament a àn
motivât la decision cu la volontât di no interferî cu lis elezions
anticipadis che si tignaran in curt intal stât spagnûl. Une version
che e lasse maraveâts sei par vie dal teme che pal lûc de
esposizion. Che daûr al sedi alc altri lu spieghe a clâr il
president de Plataforma,
Òscar Escudero, che al conte cemût che ta chestis setemanis a
vessin ricevût diviersis domandis indreçadis a censurâ parts de
esposizion. Al ven di domandâsi po cemût mai che il Parlament
european al vedi scancelât cheste mostre su la lenghe catalane, ma
no une conference dal segretari gjenerâl dal partît de estreme
diestre spagnole Vox – part ative des elezions – che si tignarà
ai 6 di Març. Juste cualchi zornade prime, par indicazion dal stes
president dal Parlament – il talian Antonio Tajani –, e jere
stade proibide la conference clamade dongje di un eurodeputât
flamant che e previodeve la partecipazion dal president dal guvier
catalan Quim Torra e dal ex president Carles Puigdemont.
Font:
Plataforma
per la Llengua,
18/02/19
Aragon: a Zaragoza dome il 5,5% al capìs lis lenghis propriis
No
dan masse confuart i ultins dâts publicâts dal ufici pe lenghe
aragonese in mert ae cognossince e al ûs des dôs lenghis propriis
dal Aragon. Il studi al à cjapât dentri un campion di cuasi 140 mil
personis, sù par jù il 12% de popolazion aragonese, ma si à
centrât massime su la citât di Zaragoza, che e rapresente cuasi il
40% dal campion. Par chel che al rivuarde l’aragonês, la sô
presince e je plui fuarte te Alte aragonese, une aree di mont che e
tint a dispopolâsi simpri di plui. La situazion e je miôr pal
catalan che si centre te cussì clamade Franja
de Ponent,
a confin cul principât di Catalogne. Te capitâl, cundut di une
presince alte di fameis e personis origjinariis di chestis dôs
areis, dome l’1,1% de int al fevele par aragonês e un altri 2% lu
capìs, intant che il catalan al è fevelât dal 1,8% dai residents e
capît dal 3,3% di lôr. Si trate però di lenghis che a riscjin di
disparî di cheste citât dal moment che no si à passaç
intergjenerazionâl e a mancjin cuasi dal dut i fruts sot dai 16 agns
che lis fevelin. Framieç di chei che a fevelin par aragonês, sù
par jù la metât lu dopre ogni dì, intant che un altri 38,1% lu
dopre dome cualchi volte. Il so ûs al è centrât cuasi dal dut par
conversazions in cjase o cun int di famee. Dome inte Alte aragonese
la lenghe proprie e à une cierte presince ancje fûr di cjase, in
ambient di lavôr e un tic ancje a scuele. E je un tic miôr invezit
la situazion dal catalan, sei par vie dai materiâi disponibii ta
cheste lenghe, sei pal status di uficialitât che e gjolt in
Catalogne e in altris comunitâts autonomis.
Font:
el
Periódico de Aragón,
15/02/19
Galizie: nassude la associazion dai ents locâi pe lenghe
Ai
15 di Fevrâr a S. Jacum di Galizie e je stade metude in pîts in
maniere uficiâl la Associazion dai ents locâi pe lenghe (Asociación
de Entidades Locais pola Lingua).
La Associazion e met adun uns cuindis ents galizians che si proponin
di svilupâ progjets comuns par promovi la lenghe proprie e par lâ
indenant intal so procès di normalizazion. Dongje di une gjestion
plui eficace dai progjets a pro de lenghe, si ponte ancje a cressi il
numar dai ents che a svilupin politichis linguistichis ativis pal
galizian. Tra i comuns che a son daûr de iniziative o cjatìn ancje
chei di A Coruña / La Coruña, Ferrol e Pontevedra.
Font:
Galicia
Confidencial,
15/02/19
Irlande: a West Belfast nons des stradis ancje par gaelic
Il
consei comunâl di Béal Feirste / Belfast al à fate buine la
propueste di meti fûr la toponomastiche stradâl ancje par irlandês
in dute la part ocidentâl de citât. Si trate di un salt indenant
che al rispuint a di une domande sociâl simpri plui marcade. Baste
pensâ che dai dusinte cartei bilengâi metûts fûr di cuant che,
sul finî dai agns ’90, la normative lu permet, cincuante a son
stâts metûts sù l’an passât. I regolaments comunâi su la
toponomastiche a previodin che prime dal vôt dal consei, la
propueste e vedi di vê il vie libare di plui de metât dai residents
di chê vie e che la traduzion e sedi supervisionade di un espert de
universitât citadine. Tal câs des gnovis viis, a dâ il vie libare
al è stât in medie tra il 65% e il 75% dai residents ma, in cualchi
câs, si à tocjât fintremai il 100%. A sburtâ la iniziative in
consei comunâl al è stât il conseîr dal Sinn
Féin,
Séanna Walsh, che al à batût sul fat che la toponomastiche
bilengâl e je une misure inclusive e no je cuintri di nissun.
Font:
Belfast
Live,
13/02/19
Gales: servizis par galês, pal guvier la int e à di fâ di plui
La
ministre galese pes politichis linguistichis, Eluned Morgan, e je
intervignude sul ûs dal galês intai servizis che lis compagniis
privadis di utilitât publiche a ufrissin ai lôr clients. Chel dai
nivei di riferiment pe lenghe galese (standards),
ven a dî i dirits linguistics minims che aministrazions locâls,
ents publics e societâts che a davuelzin ativitâts di interès
public a àn di garantî ai citadins, al è un dai temis plui cjalts
dai ultins agns e si incrose ad in dopli cui compits assegnâts al
comissari pe lenghe. Militants e organizazions pai dirits linguistics
a sburtin par che ancje i sogjets privâts che a davuelzin ativitâts
di interès public, tant che lis bancjis, a sedin obleâts a garantî
ai utents galês servizis ancje te lôr lenghe proprie. Pe ministre
però in dì di vuê no saressin lis cundizions par lâ ta cheste
direzion dal moment che, ancje là che i servizis za a son, a son
doprâts di une percentuâl masse piçule di citadins. Eluned Morgan
e sburte duncje i citadins a doprâ chescj servizis e e invide il
comissari e lis organizazions pe lenghe a impegnâsi di plui par
sensibilizâ la int impen di fâ pressions sul guvier e su lis
compagniis privadis par che a dedin fûr altris servizis par galês.
Font:
BBC,
13/02/19
Cornualie: cornic sui assegns, ativiscj cuintri Lloyds Bank
La
Lloyds Bank e je stade acusade di “razisim istituzionâl” par no
vê acetât un assegn compilât par cornic. La direzion dal istitût
e à spiegât che i siei dipendents no puedin acetâ documents in
lenghis che no cognossin. Dut câs, se e je vere che a son sì e no
500 lis personis in stât di fevelâ in maniere fluente par cornic e
su lis 5 mil chês che a àn une cualchi capacitât di conversazion,
e je ancje vere che la lenghe e gjolt di un ricognossiment uficiâl e
che tal assegn il cornic al jere stât doprât dome par scrivi la
date e la entitât de cifre in cuistion, indicade cun di plui ancje
cui numars. Pai ativiscj pe lenghe, duncje, no si capìs parcè che
tune filiâl dal istitût in Cornualie l’assegn nol sedi stât
cjapât, tant plui che la bancje e declare di no vê fastidis a acetâ
i assegns compilâts par galês o par gaelic scozês.
Font:
BBC,
13/02/19
Finlande: violâts i spazis di autodeterminazion dai sami
Il
comitât pai dirits umans de ONU al calcole falade la decision dal
tribunâl aministratîf superiôr finlandês che al veve ametût un
centenâr di personis intes listis eletorâls pal Parlament sami
cuintri dal parê dai orghins eletorâi di cheste istituzion. Cun
cheste decision, a spieghin i membris dal comitât, lis istituzions
finlandesis a van cuintri dal dirit di autodeterminazion dai sami.
Pal organisim de ONU la Finlande e à di meti in at ducj i passaçs
che a coventin par evitâ che une situazion di cheste fate e torni a
capitâ. Par lâ ta cheste direzion e je bisugne ancje di une
revision de leç istitutive dal Parlament sami.
Font:
The
Barents Observer,
13/02/19
Ocitanie: non e strategjiis gnovis pe Assemblada Occitana
La
organizazion Assemblada
Nacionala Occitana,
nassude tal 2015 sul model de Assemblea
Nacional Catalana,
e à decidût di mudâ non e strategjie ma e manten tant che obietîf
finâl chel di rivâ ae libertât di dute la Ocitanie, dal Atlantic
aes Alps. Dongje di semplificâ il non in Assemblada
Occitana,
il moviment ocitanist al à ancje rignuvît il so logo. Par chel che
si riferìs invezit ae strategjie, il sfuarç si centrarà sul
dismovi la cussience nazionâl dai ocitans. Par fâlu si lavorarà
massime su doi fronts, ven a dî meti a disposizion risorsis – in
primis su Internet – par permeti ae int di cjatâ fûr dutis lis
informazions sui aspiets politics, linguistics, culturâls, economics
e ecologjics de nazion ocitane, e imbastî plateformis di
colaborazion e di svilup di progjets. Dut chest mantignint la sô
struture di moviment di citadins e di grup di difese dai interès
popolârs.
Font:
Assemblada,
04/02/19
Iscriviti a:
Post (Atom)