Spagne: procès ai leaders indipendentiscj, finidis lis udiencis

Ai 12 di Jugn si à sierade, denant dal tribunâl suprem di Madrid, la prime part dal procès cuintri dai leaders indipendentiscj catalans che e je lade indenant par cuatri mês, cun 52 udiencis e 422 testemonis. Il confront tra acusis e difesis no à però mudât la situazion dal moment che lis domandis di condane (o di assoluzion) a son restadis lis stessis fatis indenant sul principi. In particolâr il public ministeri al domande 25 agns di preson par Oriol Junqueras, 17 agns par Jordi Sànchez, Jordi Cuixart e Carme Forcadell, 16 agns par Raül Romeva, Jordi Turull, Josep Rull, Joaquim Forn e Dolors Bassa, e 7 agns par Meritxell Borràs e Santi Vila.

Paîs Basc: Ikas-Bi e denuncie l’atac ae scuele publiche par basc

A jessi sot atac intal stât francês nol è dome il sisteme scolastic privât a imersion ma, se pussibil inmò di plui, ancje chel public. Lu dîs a clâr Ikas-Bi, la associazion des fameis dai students che a frecuentin i percors bilengâi par basc inte scuele publiche. Intune conference stampe che si à tignude ai 13 di Jugn a Baiona / Bayonne, i rapresentants de associazion a àn acusât il guvier francês di blocâ il svilup de educazion publiche bilengâl par resons ideologjichis. A motivâ chestis declarazions a son massime doi fats. In dì di vuê a son 17 lis scuelis publichis che a ufrissin percors a imersion par basc, altris 3 scuelis a àn completât i percors aministratîfs che a coventin par ufrî cheste pussibilitât a partî dal prossim an scolastic ma, pe prime volte di cuant che si à tacât (2004), il ministeri pe educazion nol à dât la sô autorizazion. E je po la cuistion dal numar dai insegnants che, daûr des circolârs ministeriâls, al à di jessi proporzionât al numar dai students: chel istès, in nûf scuelis cun insegnament par basc, no si à autorizât avonde insegnants par rispietâ cheste prescrizion. Ikas-Bi e invide duncje i parlamentârs e i aministradôrs publics elets intal Paîs Basc sot aministrazion francese a ativâsi par sburtâ il guvier di Parîs a cambiâ ande. Lis primis rispuestis positivis a son rivadis dal sindic di Baiona / Bayonne e dal president de Coletivitât teritoriâl basche.

Font: Naiz:, 13/06/19

Irlande: tv par gaelic, lis propuestis de comission parlamentâr

La comission parlamentâr su la lenghe irlandese e à pontât la atenzion su la situazion dramatiche de lenghe proprie tal sisteme radiotelevisîf de Republiche, cu la television publiche TG4 sotfinanziade, cu la rêt publiche RTÉ là che il gaelic al mancje cuasi dal dut e cu lis emitentis privadis che a rivin a fâ ancje di piês. Par chest l’organisim, che al met adun rapresentants sei de Cjamare che dal Senât, al à fat indenant al guvier irlandês une vincjine di propuestis di intervent che si varessin di meti in vore cun urgjence. Tra chestis o cjatìn une revision de normative statâl su la radiotelevision che e sedi plui vincolante sul plan de lenghe, la istituzion di organisims di pueste par tignî di voli la programazion par gaelic sei te television di stât (RTÉ), sei dentri de autoritât di control su lis telecomunicazions (BAI). Si domande po di tornâ a meti i 6 milions di euros anuâi gjavâts al canâl televisîf public par irlandês (TG4) che a jerin stâts gjavâts intun moment di crisi des financis publichis ma che, cundut che la situazion economiche e je tornade a bon, no son plui stâts metûts. Tra lis misuris che a coventaressin si propon ancje une stazion radiofoniche musicâl par irlandês, indreçade soredut ai zovins e che e trasmeti in dute la Irlande 24 oris su 24.

Font: An Sionnach Fionn, 12/06/19

Ocitanie: un altris pas indaûr intal insegnament bilengâl a Albi

Il liceu di Albi al jere stât un dai prins, ancjemò tal 1995, a inserî une sezion bilengâl par dâi acet massime a chei students che a vevin fat il lôr percors di studi tes primariis ancje par ocitan. Cul prossim an scolastic però cheste pussibilitât no sarà plui disponibile. I students interessâts a podaran dome sielzi une ore setemanâl di insegnament opzionâl di ocitan, che e sarà compagne sei par chei che za a rivin di un percors bilengâl, sei par chei che si svicinin pe prime volte ae lenghe. La associazion Òc-Bi, formade pe plui part di gjenitôrs e di insegnants, e segnale che cheste decision e va cuintri de convenzion sotscrite tal 2017 dai rapresentants dal stât centrâl, de regjon e dal distret scolastic di Tolosa / Toulouse. Distret che, par altri, al va dilunc a no rispuindi ae propueste de associazion di ufrî un percors curicolâr bilengâl di almancul dôs oris par setemane.

Font: Jornalet, 11/06/19

Paîs Basc: inmò in place pe liberazion dai presonîrs bascs

Ai 8 di Jugn la cjaminade che e cercene la splaze principâl di Miarritze / Biarritz, une des localitâts balneârs plui innomenadis intal stât francês, e je stade il teatri di une cjadene umane formade di almancul trê mil personis che a domandavin il superament dal conflit basc cu la liberazion dai presonîrs che ancjemò si cjatin intes presons spagnolis e francesis. Tal stes moment altris dîs mil personis a manifestavin a Bilbo / Bilbao pe stesse reson. Al è zaromai di agns che ETA e à metût fin ae lote armade e che e à po sielzût la strade de dissoluzion, chel istès i guviers di Madrid e di Parîs a àn fat pôc o nuie par contribuî ae fin dal conflit cu la liberazion dai presonîrs o almancul cul spostâju in struturis logadis intal Paîs Basc. La manifestazion di Miarritze / Biarritz e à vût une presince cualificade e trasversâl di rapresentants politics dal Paîs Basc sot aministrazion francese.

Font: MediaBask, 11/06/19

Paîs Catalans: esams di acès ae universitât ancje par ocitan

I esams par jentrâ te universitât di Lleida, scomençâts cui 12 di Jugn, a cjapin dentri pe prime volte ancje des provis scritis par ocitan aranês in gracie di un acuardi tra il guvier catalan (Generalitat de Catalunya), il Consei Gjenerâl de Val di Aran e lis autoritâts academichis. Par cumò cheste pussibilitât e interesse dome l’esam di storie, obligatori par ducj i students, ma cui prossims agns si ponte a proponi par ocitan ancje il rest dai esams. La iniziative si insuaze tes azions par saborâ la cognossince, l’ûs e la difusion de lenghe ocitane in Catalogne. Cun di fat intal 2006 si à ricognossût al ocitan, inte sô varietât aranese, un status di uficialitât in dut il principât de Catalogne ma dome tai ultins agns il dirit di doprâ cheste lenghe al à tacât a jessi esercitât pardabon ancje fûr de Val di Aran.

Font: Generalitat de Catalunya, 11/06/19

Scozie: passe 5 milions par sburtâ azions culturâls pal gaelic

A son dodis lis organizazions finanziadis dal Bòrd na Gàidhlig, la agjenzie pe lenghe gaeliche, par promovi il gaelic scozês par mieç di iniziativis artistichis, educativis e culturâls. Pe prime volte lis risorsis metudis a disposizion dal guvier scozês, che a passin i cinc milions di sterlinis, a laran a sostignî progjets cuntune durade trienâl e no plui anuâl. I beneficiaris a àn preseât une vore cheste decision che i permet di planificâ miôr lis lôr ativitâts e di movisi cun plui sigurece te progjetazion. Il finanziament plui grues, o sei passe 1,3 milions di sterlinis, al è lât ae organizazion Comunn na Gàidhlig par ufrî in cuindis diviersis localitâts de Scozie ativitâts ludichis e culturâls là che i fruts e lis lôr fameis a puedin doprâ il gaelic ancje fûr des aulis di scuele. Tra i sogjets finanziâts si à, pe prime volte, ancje il grup Gu Leòr, che al puarte il teatri gaelic ator pe Scozie, al sburte la scriture creative e al lavore su la formazion professionâl di autôrs, atôrs e diretôrs di teatri par gaelic. I finanziaments a son lâts po a realtâts impegnadis tal meti sù un centri di musiche e danze gaeliche, tal svilupâ lis arts tradizionâls par mieç dal gaelic, tal inmaneâ events che a judin la cognossince e la difusion di cheste lenghe, tal publicâ libris e favorî la leture par gaelic, o tal produsi repertoris digjitâi de toponomastiche gaeliche.

Font: Gaidhlig.scot, 10/06/19

Gales: un biel esempli di promozion de lenghe dal bas

Lis azions par promovi l’ûs di une lenghe minorizade no scugnin par fuarce partî des istituzions ma a puedin ancje nassi dal bas. Al è il câs di un locâl dal paîs di Blaenau Ffestiniog, in Gales, là che i gjestôrs a àn decidût di ufrî un scont dal dîs par cent sul presit dal cafè o dal te a ducj chei che lu ordenin par galês. La iniziative no je indreçade dome a chei che za a mastiin la lenghe proprie ma ancje a chei che a son daûr a imparâle e fintremai ai turiscj. Cun di fat, tal locâl si cjate ancje un panel là che a son scritis, cun tant di pronuncie, lis pocjis frasis che a coventin par ordenâ par galês. Dal moment che la lenghe galese e rapresente un element carateristic di cheste localitât, a spieghin i gjestôrs dal ambient, nus someave just dâ un contribût par valorizâle. E che la iniziative e vedi vût un bon acet lu dimostre ancje il fat che ancje altris locâi e buteghis le vedin cjapade sù.

Font: North Wales News, 07/06/19

Paîs Basc: in miârs a Biarritz par sostignî la scuele basche

Passe cinc mil personis a àn partecipât ai 7 di Jugn ae manifestazion che si à davuelte pes stradis di Miarritze / Biarritz in rispueste ae convocazion di Seaska, la rêt des scuelis baschis privadis a imersion. Ae iniziative a àn partecipât in primis students, gjenitôrs, insegnants e lavoradôrs di Seaska rivâts di dute Ipar Euskal Herria, o sei il Paîs Basc setentrionâl sot aministrazion francese. Al centri de mobilitazion e je la domande aes istituzions francesis di autorizâ altris trente professôrs che a coventin par garantî la tignude de rêt educative tal prossim an scolastic. La iniziative e veve ancje chê di rispuindi ai atacs rivâts di diviers ministris dal guvier di Parîs cuintri des scuelis a imersion intes lenghis minorizadis dal stât francês. La sielte di manifestâ a Miarritze / Biarritz no je stade casuâl ma e diven dal fat che propit inte citât balneâr basche, un mês indaûr, il president francês Emmanuel Macron al veve pandût la sô poie al model scolastic a imersion e, simpri achì, in Avost si davuelzarà la prossime riunion dai paîs dal G7. Cun di fat, i dirigjents di Seaska si domandin cemût mai che a Parîs no son i bêçs par trente puescj di insegnant pes scuelis baschis ma no son fastidis a spindi 30 milions di euros par trê zornadis di riunions. Simpri par difindi la scuele basche a imersion a son stadis za programâts altris trê dîs di mobilitazion vie pal mês, o sei ai 17, ai 23 e ai 27 di Jugn.

Font: MediaBask, 07/06/19

Asturiis: pe XDLA 10 mil puescj di vore cul asturian uficiâl

Un studi publicât dal Istitût Valenzian di Ricercjis Economichis al calcole l’impat economic dal catalan valenzian sui 2 mil milions di euros ad an, o sei il 2,1% dal prodot interni sporc, cun 56 mil lavoradôrs, ven a dî il 3% dal totâl dai ocupâts di chê comunitât autonome. Une ricercje de Comunitât Autonome Basche riferide al 2015 e calcolave il zîr economic de lenghe basche sui 2.800 milions di euros, ven a stâi il 4,2% dal prodot interni sporc, cun passe 56 mil ocupâts, o sei il 6,28% dal totâl. Il Consei de Culture Galiziane al à invezit calcolât che la industrie de culture e prodûs uns 30 mil puescj di vore e e rapresente il 2% dal prodot interni sporc, o sei plui di 1.100 milions di euros. Ancje su la fonde di chestis ricercjis, la Xunta pola Defensa de la Llingua Asturiana (XDLA) e à stimât che se il guvier des Asturiis al ricognossès la uficialitât de lenghe proprie e al metès in vore dutis lis misuris leadis a chest ricognossiment, si podarès svilupâ un zîr economic che al rapresentarès il 2% dal prodot interni sporc di cheste comunitât autonome e la creazion di plui di 10 mil puescj di vore.

Font: La Voz, 06/06/19

Paîs Catalans: ancje il catalan te app di trascrizion automatiche

Al è ancje il catalan tra lis setante lenghis cjapadis dentri te aplicazion svilupade di Google pal ricognossiment vocâl che e trascrîf in maniere automatiche lis peraulis pronunciadis intal microfon dal dispositîf mobil che si è daûr a doprâ. Chel de trascrizion automatiche al è un sisteme pensât sul imprin par judâ lis personis cun deficiencis auditivis ma che al pues zovâ a ducj. In plui des peraulis intes lenghis cjapadis dentri tal progjet, la tecnologjie e permet di ricognossi ancje rumôrs di fonts tant che ridadis, musiche, vuacadis o colps che a vegnin visualizâts cun etichetis di pueste. La direzion gjenerâl di politiche linguistiche dal guvier catalan e je daûr a colaborâ cun Google ancje par creâ un model acustic pe sintesi statistiche parametriche dal catalan, o sei une vôs parametrizade par catalan di alte cualitât. Une altre colaborazion e je po in vore ancje pal svilup di altris doi progjets di ricognossiment vocâl, il Common Voice di Mozilla e un cun codiç viert e libar puartât indenant dal grup Col∙lectivat.

Font: Generalitat de Catalunya, 06/06/19