15/02/13

Paîs Catalans: declarazion di sovranitât a risi impugnazion

La Declarazion di sovranitât dal popul catalan fate buine ai 23 di Zenâr dal Parlament de Catalogne e sarà impugnade denant de Cort costituzionâl de bande dal guvier spagnûl. Cheste almancul e je la linie che e je stade anticipade de vicepresidente dal esecutîf spagnûl Soraya Sáenz de Santamaría dopo che la avocadure di stât e à segnalât di vê cjatât intal document dai elements di incostituzionalitât. Prime de impugnazion però, e à zontât la vicepresidente dal guvier di Madrid, si vûl spietâ ancje il parê dal Consei di stât. Pal esecutîf catalan la intenzion di ricori denant dal tribunâl costituzionâl e palese un compuartament antidemocratic che al cîr di impedî la volontât dal popul catalan.
Font: VilaWeb, 08/02/13

Finlande: ultime a firmâ il tratât pai dirits dai popui natîfs?

Ai 6 di Fevrâr, zornade là che e cole la fieste nazionâl sami, i membris di diviersis organizazions zovanîls di cheste comunitât si son dâts adun denant dal Parlament finlandês par domandâ la ratifiche dal tratât ONU sui dirits des popolazions nativis (o indigjenis). Il tratât al impegne i stâts che lu sotscrivin a cjapâ misuris concretis par difindi lis tieris storichis, la culture e l’ambient des popolazions nativis. Dentri de UE la uniche comunitât ricognossude tant che popolazion native e je chê sami e a son doi i stâts che no àn ancjemò sotscrit l’acuardi: un al è chel svedês che però al à fat savê di jessi dongje ae firme e chel altri e je la Finlande che e riscje di jessi la ultime a sotscrivi chest tratât.
Font: Finugor, 06/02/13

Scozie: il guvier al propon il percors pal dopo referendum

Intal câs che la maiorance dai scozês e voti sì intal referendum pe indipendence in program pal 2014, si varà di inviâ un procès di trasferiment di sovranitât dal Parlament britanic a chel scozês. Par chest, daûr dal invît rivât de Comission eletorâl par che si sclarissin i detais dal percors che si fasarà dopo dal referendum, ai 5 di Fevrâr il guvier scozês al à dât fûr un document là che al presente la sô propueste in proposit. La intenzion dal guvier di Edimburc e je chê di meti sù, intal Març dal 2016 e in acuardi cun chel di Londre, une plateforme costituzionâl che e proviodi a ducj chei passaçs che a coventin par permeti al Parlament e al guvier scozês che a jessaran des elezions dal Mai dai 2016 di operâ cu la plene sovranitât di un stât indipendent, ma ancje in continuitât cun chês istituzions che la Scozie e intint conservâ (tant che il corpus normatîf scozês za in vore, la partignince ae UE, il leam cu la monarchie britaniche). I spietarà po al Parlament che al jessarà des elezions dal 2016 imbastî i lavôrs che a puartaran ae scriture di une Costituzion pe Scozie. Il document nol à però cjatât un acet masse bon de bande dal front unionist. Pal segretari di stât pe Scozie Michael Moore, juste par citâ un coment, il guvier di Edimburc al fasarès miôr a ocupâsi di imbastî il referendum prime di pensâ a ce che al sucedarà dopo.
Font: BBC, 05/02/13

Cravuazie: manifestazion cuintri dal ûs dal serp a Vukovar

Plui o mancul 20 mil personis si son dadis dongje ai 2 di Fevrâr a Vukovar, in Cravuazie, par protestâ cuintri de metude in vore ancje ta chê citât de leç su lis minorancis linguistichis che e previôt l’ûs couficiâl de lenghe minoritarie te segnaletiche, te cartelonistiche e intai rapuarts cu la aministrazion publiche cuant che i membris di chê comunitât a son almancul un tierç de popolazion totâl. Daûr dai dâts dal censiment dal 2011, che a son stâts comunicâts che al è pôc, a Vukovar il 34,8% de popolazion si declare serbe. Il guvier cravuat al à duncje comunicât che ancje ta chê citât lis misuris previodudis de leç di tutele des minorancis a saran metudis in vore. A inmaneâ la manifestazion dai 2 di Fevrâr a son stadis lis associazions dai veterans di vuere che a domandin che la leç no sedi metude in vore ta chê che e ven considerade une citât martare. Cun di fat, intal 1991 Vukovar e jere stade fiscade e assediade par trê mês, prime di colâ intes mans dal esercit jugoslâf e des miliziis paramilitârs serbis che si vevin rindudis protagonistis di diviers crimins di vuere. Chel istès il sindic de citât, Željko Sabo, ancje lui veteran e presonîr di vuere, al à poiât la decision dal guvier di meti in vore la leç di tutele. Decision che, dopo de manifestazion, e je stade confermade dal prin ministri cravuat Zoran Milanović. Par Milorad Pupovac, president dal Consei nazionâl serp che al rapresente la minorance in Cravuazie, l’ûs de retoriche di vuere par fâi cuintri al ûs de lenghe serbe al rapresente un atac aes leçs e ae Costituzion cravuate.
Font: Ansa, 02/02/13; Balkan Insight, 04/02/13

Paîs Basc: politichis gnovis par promovi l’ûs dal euskara

La aministrazion provinciâl de Gipuzkoa, chês di dôs unions comunâls e chês di 36 comuns a àn concuardât une schirie di criteris linguistics che a saran metûts in vore in maniere unitarie par chel che al rivuarde la gjestion dai servizis e des operis che a intindin meti in cantîr. Di cumò indenant ducj chescj ents a varan standards compagns in mert aes carateristichis linguistichis domandadis a cui che al vûl partecipâ aes garis pal apalt di servizis o di oparis publichis. Si larà cussì a regolâ la lenghe che il servizi al ven dât, la competence linguistiche domandade ai lavoradôrs impegnâts, la lenghe di doprâ intai rapuarts cu la aministrazion publiche e chê doprade pal cussì clamât “paisaç linguistic” (segnaletiche, tabelis, manifescj, avîs, e v.i.). Ancje la gnove aministrazion de Comunitât Autonome Basche e intint dâ plui snait aes politichis pe promozion dal ûs dal euskara. Intai ultins agns si à vût un ralentament inte politiche linguistiche, e à dite la ministre Cristina Uriarte, e il gnûf guvier al vûl recuperâ il timp pierdût. Tra lis primis iniziativis in program si fevele dal rilanç de leç sui dirits linguistics dai consumadôrs par garantî la pussibilitât di doprâ la lenghe basche cu lis aziendis che a gjestissin i servizis di utilitât sociâl e intai centris comerciâi plui grancj.
Font: Noticias de Gipuzkoa, 31/01/13 e 02/02/13

Cossovo: manifestazion cuintri des tratativis Belgrât - Pristina

Ai 30 di Zenâr uns 5 mil serps a àn inmaneât une manifestazion inte citât di Mitrovica, intal Cossovo setentrionâl, par pandi il lôr no ai acuardis che lis autoritâts serpis e chês cossovanis a son daûr a imbastî inte suaze de normalizazion dai rapuarts tra i doi paîs, passaç domandât des autoritâts di Bruxelles par permeti ae Serbie di jentrâ inte UE. Al è di dî che, se di une bande il guvier di Belgrât al è daûr a sotscrivi une schirie di acuardis cun chel di Pristina, di chê altre al va dilunc a finanziâ lis istituzions paralelis ativis inte aree setentrionâl dal Cossovo a maiorance serbe. La pôre di cheste comunitât e je chê di jessi bandonade des autoritâts di Belgrât in cambi dal vie libare ae jentrade de Serbie inte UE e la manifestazion di Mitrovica e veve propit chê di mostrâ ancjemò une volte che i serps che a vivin alì no intindin ricognossi in nissune maniere la autoritât dal guvier cossovan a maiorance albanese.
Font: Balkan Insight, 31/01/13

Gales: indipendence de S4C sigurade tal acuardi cu la BBC

L’acuardi sotscrit, dopo di une lungje consultazion publiche, tra la BBC e la emitente in lenghe galese S4C al varès di garantî a cheste ultime di mantignî la sô indipendence editoriâl, organizative e operative. Pes sôs ativitâts la emitente televisive galese e varà a disposizion un contribût parziâl dal guvier britanic, che fin cumò al jere il finanziadôr principâl, lis sôs jentradis diretis e un finanziament dal BBC Trust che al larà dai 76,3 milions di sterlinis de anade 2013/2014 ai 74 milions e mieç dal 2016/2017. L’acuardi sul gnûf sisteme di finanziament de television galese al à cjatât il bon acet de plui part dai sogjets politics e dai operadôrs dal setôr ancje se no mancjin i elements di preocupazion leâts massime ae pussibilitât di altris tais intai prossims agns.
Font: BBC, 30/01/13

Asturiis: la tv publiche no rispiete i toponims par asturian

La organizazion Xunta pola Defensa de la Llingua Asturiana e à presentât une proteste formâl ae direzion de television publiche des Asturiis, la RTPA, e al guvier asturian par domandâ che la emitente e tachi a doprâ in maniere sistematiche intai siei programs i toponims par asturian. La Xunta e lamente che inte plui part dai câs i presentadôrs a doprin dome i nons par spagnûl, ancjemò piês la situazion su la radio là che i toponims par asturian no vegnin mai doprâts. Dopo de uficializazion dai nons par asturian, e ricuarde però la organizazion, i toponims a àn di jessi doprâts simpri inte forme asturiane, di là de lenghe che si dopre, e duncje no si pues acetâ che e sedi propit la radiotelevision publiche la prime a lâ cuintri de leç.
Font: Europa Press, 30/01/13

Voivodine: tensions sul avignî de provincie

E cres la tension sul avignî de Voivodine, la provincie autonome de Serbie là che si à il numar plui alt di minorancis a tacâ dai sù par jù 250 mil ongjarês. A scjaldâ la situazion a vevin contribuît za diviers episodis. Intal Zenâr dal an passât la gnove aministrazion de capitâl Novi Sad / Újvidék, passade intes mans dai conservadôrs dal Partît Progressist Serp (Srpska Napredna Stranka), e veve tacât a doprâ pai nons des stradis e dai sîts istituzionâi dome l’alfabet cirilic e no chel latin che al ven invezit doprât dai ongjarês e de plui part di chês altris comunitâts di minorance de Voivodine. Po, intal mês di Lui, une sentence de Cort Costituzionâl e veve limitât o eliminât une schirie di proviodiments cjapâts de provincie, a tacâ de pussibilitât di vê un ufici di rapresentance autonom a Bruxelles fin al titul di capitâl atribuît ae citât di Novi Sad. Cumò il scuintri al somee centrâsi suntune sorte di vuere di manifescj tra i nazionaliscj serps di Treća Srbija che a volaressin la abolizion de autonomie de provincie e il Partît de Voivodine (Vojvođanska Partija) che al domande invezit une modifiche de costituzion serpe par che la Voivodine e deventi une republiche dentri di une Serbie trasformade in federazion. Dut câs, no mancjin nancje lis segnalazions di violencis di stamp etnic, massime tra i zovins.
Font: Balkan Insight, 29/01/13

Ongjarie: “classis speciâls” pai rom, condane de Cort europeane

In diviers stâts de Europe centrâl tant che Ongjarie, Republiche Ceche e Slovachie, une vore di fruts rom a vegnin metûts, dome su la fonde de lôr partignince etniche, in “classis speciâls” pensadis par cui che al patìs di ciertis disabilitâts. La Cort europeane pai dirits dal om e à cumò condanât la Ongjarie par cheste pratiche discriminatorie e i à dât reson a doi zovins rom di nancje vincj agns che le àn subide su la lôr piel. Za intal 2009 un rapuart dal Consei de Europe al veve segnalât il probleme, ma cence che si cjapassin misuris diretis par cambiâ la situazion. Il guvier ongjarês, cumò intes mans dai nazionaliscj di Fidesz, si è justificât cul dî che a son stadis svilupadis des liniis di intervent par valorizâ la storie e la culture rom ancje dentri des scuelis, ma chest nol à ancjemò puartât al superament des “classis speciâls”.
Font: BBC, 29/01/13

ONU: la France no si impegne pai dirits linguistics

Intant des audizions che si vevin tignudis alì dal Consei dai dirits dal om de ONU in Novembar i rapresentants de Rêt europeane pe avualiance des lenghis a vevin fat indenant une schirie di racomandazions par che il stât francês al ricognossi e al rispieti la diversitât linguistiche e culturâl che al à al so interni. Propit su la fonde di chestis indicazions, ai 21 di Zenâr diviers dai stâts membris dal Consei a àn domandât ae France di modificâ la sô Costituzion par superâ i pidiments che a limitin il rispiet dai dirits des comunitâts minorizadis, di ratificâ la Cjarte europeane pes lenghis regjonâls o minoritariis e di garantî une presince plui fuarte des lenghis minorizadis inte radiotelevision publiche. La delegazion inviade dal guvier francês no à però cjapât nissun impegn in proposit e no à nancje mostrât di vê intenzion di fâlu.
Font: Agence Bretagne Presse, 29/01/13

Finlande: lenghe sami discriminade de television publiche

Oddasat, il principâl program in lenghe sami in programazion su la rêt YLE, o sei la television publiche finlandese, al va in onde dopo des siet di sere intes regjons dal Nord che a fasin part dal teritori sami, ma par viodilu intal rest dal teritori statâl si à di spietâ che e rivi miezegnot. Dal moment che il 60% dai sami finlandês al vîf fûr de lôr tiere e che la finalitât de rêt televisive e je chê di fâ servizi public, cheste programazion e ven calcolade “indecente” de bande de difensore civiche dal Parlament finlandês Maija Sakslin che i à dât timp fin al mês di Otubar ae direzion de YLE par comedâ chest disservizi prime di intervignî cun sanzions. Il program al va in onde ancje su lis televisions publichis di Svezie e Norvegje, ma ta chest câs, l’orari di emission al è pardut chel di 5 e mieze dopodimisdì.
Font: Finugor, 28/01/13

Galizie: miârs in place cuintri de leç che e penalize il galizian

Diviers miârs di personis a àn rispuindût al apel de organizazion pai dirits linguistics Queremos Galego e ai 27 di Zenâr a àn partecipât ae manifestazion che si è tignude a Sant Jacum di Galizie (Santiago de Compostela) par domandâ che il decret sul plurilinguisim dât fûr dal guvier galizian al vegni ritirât. Cun di fat, di là dal non, il proviodiment al rapresente un pas indaûr rispiet ae leç di normalizazion linguistiche e, in plui di un pont fondamentâl, al à vût ancje il parê negatîf dal tribunâl superiôr de Galizie. Cun chest decret e cu la riforme scolastiche che il guvier spagnûl al vûl meti in vore, a disin i organizadôrs de manifestazion, il galizian si ricjatarà a ocupâ inte scuele une posizion dal dut residuâl. In place, in plui di tancj citadins, a jerin i rapresentants di cetantis associazions, di ducj i partîts di oposizion, dai sindacâts principâi e des organizazions dai students. Dûrs i coments dai rapresentants de oposizion cuintri dal guvier galizian in cjarie (PP): il segretari dal Partît Socialist de Galizie, Pachi Vázquez, al à declarât che al è indecent che “il prin nemì dal galizian, o sei dal element identitari principâl de Galizie, al sedi propit il guvier galizian”; Xosé Manuel Beiras, puartevôs di Alternativa Galega de Esquerda, al à dite che il guvier in cjarie al mostre il probleme tipic di colonizâts, o sei chel di pandi “autoodi e dispresit pai valôrs dal so popul”.
Font: Praza Pública, 28/01/13