03/02/17

Ocitanie: convenzion par infuartî l’ocitan tes scuelis

Ai 26 di Zenâr la ministre francese pe educazion, Nejat Vallaud-Belkacem, e à sotscrit une convenzion di suaze pal insegnament dal ocitan che e interesse lis regjons aministrativis de Gnove Aquitanie e de Ocitanie e i uficis scolastics teritoriâi di Bordèu / Bordeaux, Limòtges / Limoges, Montpelhièr / Montpellier, Peitieus / Poitiers e Tolosa / Toulouse. Il test al fevele di organizazion e continuitât dal insegnament cuntune incressite des oris cul ocitan veicolâr, cu la riduzion de mobilitât dai insegnants, cu la produzion e la distribuzion di materiâi didatics. L’Ofici Public de la Lenga Occitana al varà la incarghe di fâ cognossi lis ufiertis di insegnament dal ocitan ancje par mieç di campagnis informativis. Al stât centrâl i spiete invezit di controlâ su la formazion par ocitan dentri des universitâts. L’obietîf al è chel di incressi il numar di students cuntune nivel di competence B1 de lenghe. A jessi interessâts des misuris previodudis a varessin di jessi uns 10 mil students.
Font: Jornalet, 27/01/17; France3-Regions, 21/01/17

Corsiche: Coletivitât Teritoriâl, boçadure dal Senât francês

Il Senât francês al à boçât par 161 vôts a 143 lis ordenancis fatis indenant dal guvier pe gnove Coletivitât Teritoriâl uniche de Corsiche che e metarà adun la Coletivitât atuâl cui doi dipartiments che e je dividude la isule. Ai 9 di Fevrâr la normative e rivarà al esam de Assemblee statâl e, prime che e finissi la legjislature, si calcole di tornâ a presentâle in Senât. Se lis dôs Cjamaris no vessin di fâ bon il stes test, la nassite de gnove istituzion che e je in program il prin di Zenâr dal 2018, e larà sù pai stecs dal moment che lis ordenancis a integnin disposizions eletorâls, misuris istituzionâls e regolaments finanziaris e fiscâi dal gnûf sogjet. A votâ a pro des ordenancis a son stâts socialiscj, ecologjiscj e la çampe alternative, intant che la diestre republicane, il Front National e i comuniscj a àn votât cuintri. A jessi decisîfs a son stâts però i senatôrs centriscj che dopo vêsi mostrâts disponibii a sostignî la gnove istituzion, a àn fat mancjâ la lôr poie. La boçadure des ordenancis e à sustât no pôc Jean-Guy Talamoni, president de Assemblee de Corsiche, e Gilles Simeoni, president dal esecutîf isolan, che a àn ricuardât cemût che ca di pôc, cuant che si votarà pes elezions politichis francesis, i cors si visaran di cui che al à impedît la nassite de gnove Coletivitât.
Font: Alta Frequenza, 26/01/17; France3-Regions, 26/01/17; Corse Net Infos, 26/01/17

Paîs Basc: fat bon in Navare il I plan strategjic dal euskara

Il guvier de Navare al à fat bon il prin plan strategjic de lenghe basche. Il document si svilupe su siet cjamps di azion strategjics – ven a dî ûs sociâl, fevelants gnûfs, servizis publics, status e atrat, svilup economic, suaze linguistiche e agjenzie pe promozion de lenghe (Euskarabidea) – e al previôt sîs obietîfs gjenerâi, 29 obietîfs specifics e 190 misuris operativis. Tra i obietîfs principâi si àn la incressite de ufierte di ativitâts par euskara in maniere di infuartî il so ûs sociâl, miorâ la eficacie dai intervents pai fruts e pai fantats ancje fûr de scuele, aumentâ la presince de lenghe tai mieçs di comunicazion e tai imprescj tecnologjics di ultime gjenerazion, favorî l’ûs dal basc intes ativitâts economichis e tai servizis professionâi, slargjâ la presince de lenghe tal paisaç e te vite sociâl. Par meti di vore lis zions previodudis dal plan di chi al 2019 si stime che a coventaran sù par jù 11 milions di euros.

Finlande: a coventin infuartidis lis leçs sui dirits dai Sami

Un grup di ricercjadôrs internazionâi al à metût jù su incarghe dal guvier finlandês i pas che al coventarès di fâ par garantî i dirits de comunitât sami. Za dome cui oblics che a divegnin de Costituzion e des convenzions internazionâls in vore, lis istituzions statâls a saressin clamadis a slargjâ i dirits ricognossûts ai Sami. Duncje, se par miorâ la situazion si invide a ratificâ ancje gnovis convenzions su la tutele dai dirits dai popui natîfs, il guvier al pues za intervignî su lis leçs che a regolin i dirits su lis tieris e su la aghe in maniere di difindi i Sami e la lôr culture, e infuartî il test di leç sul Parlament sami par incressi il spazi di autodeterminazion di cheste comunitât. Po dopo si propon di riviodi la stesse definizion di sami, sul model di chê in ûs in Norvegje, in maniere di limitâ i spazis di scuintri cumò in at tra lis istituzions finlandesis e il Parlament sami.
Font: Valtioneuvosto.fi, 25/01/17

Bretagne: prime segnaletiche stradâl bilengâl a Nantes

Ai 25 di Zenâr a Naoned / Nantes si à tacât a meti fûr lis primis tabelis cui nons des viis par francês e par breton. La gnove segnaletiche bilengâl e interessarà in maniere progressive un centenâr di stradis de part centrâl de citât, ma ancje lis areis là che la lenghe proprie e je za di cjase tant che chês dulintor des scuelis bilengâls o a imersion. La iniziative e je stade proponude dai conseîrs de Union Démocratique Bretonne e e à cjatât la poie de maiorance dal consei comunâl. Naoned e je la plui grande citât de Bretagne, ancje se si cjate fûr de regjon aministrative cun chest non e, cundut che e je lontane des areis là che la lenghe e je ben inlidrisade, e je ancje la prime par numar di adults che a frecuentin cors par imparâle.
Font: Le Peuple Breton, 25/01/17

Paîs Catalans: Puigdemont al domande ae UE di intervignî

Ai 24 di Zenâr il president dal guvier catalan, Carles Puigdemont, al à tignût une conference tal Parlament european par spiegâ il procès di autodeterminazion de Catalogne. Cundut dai tentatîfs dal PP spagnûl par boicotâ l’apontament, a scoltâlu a jerin uns cuatricent tra europarlamentârs, gjornaliscj e membris dai grups di interès che a àn sede a Bruxelles. Il president de Generalitat al à riferît che al plui tart intal Setembar di chest an la Catalogne e inmanearà un referendum vincolant su la indipendence, se si rivarà a concuardâlu cu lis istituzions spagnolis miôr, ma se nol sarà pussibil si lu fasarà distès. Cun di fat, al à spiegât, in zûc no je tant la indipendence, ma la democrazie, baste pensâ che plui dal 80% dai catalans al domande il referendum di là di ce che a votaran. Puigdemont al à batût sul fat che si trate di un probleme european e che duncje la UE e à di jessi part de soluzion sei par coerence cui principis democratics che e declare, sei par pragmatisim.
Font: VilaWeb, 24-25/01/17; Naiz:, 24-25/01/17

Paîs Basc: si invie la prime istituzion di Ipar Euskal Herria

Ai 23 di Zenâr si è dade dongje la Comunitât Provinciâl Basche, la prime istituzion che e met adun dute Ipar Euskal Herria, o sei il Paîs Basc setentrionâl sot aministrazion francese. L’organisim al è formât di 233 conseîrs che a rapresentin ducj i comuns bascs a Nord dai Pireneus. Ae sô presidence al è stât elet, cul 68% dai vôts, il sindic di Baiona / Bayonne, Jean-René Etchegaray che, tal dal so discors di salût, al à ricuardât ducj i sfuarçs fats par rivâ a di un sogjet istituzionâl rapresentatîf de comunitât basche “francese”, ma al à soredut batût sui pas di fâ par che al deventi operatîf ad in plen e al sepi rispuindi aes dibisugnis dai citadins. Pe prime assemblee dal organisim, a jerin presints rapresentants de societât civîl locâl e ancje dai partîts politics e des organizazions di riferiment di Hego Euskal Herria, o sei dal Paîs Basc meridionâl sot aministrazion spagnole.
Font: Naiz:, 24/01/17

Paîs Catalans: 37,4 milions par promovi il catalan tal 2017

Il conseîr pe culture dal guvier catalan, Santi Vila, al à presentât denant de comission pe culture dal Parlament de Catalogne la propueste di belanç dal so dipartiment pal 2017. Si fevele di une disponibilitât complessive di 263 milions e mieç di euros, cuasi il 10% in plui dal an passât. Di chescj 37,4 a son par promovi il catalan, cuntun aument dal 7,5% rispiet al 2016. La cifre plui gruesse, o sei 29 milions di euros, e je indreçade al Consorzi pe Normalizazion Linguistiche cui siei 22 istitûts e i 146 uficis sparniçâts pal teritori che a garantissin la formazion di passe 70 mil personis. A son 3,4 i milions a disposizion invezit par infuartî la presince de lenghe proprie tal cine e tes ativitâts economichis. Il centri terminologjic TERMCAT al varà 1,3 milions, intant che l’Istitût di Studis Catalans (IEC) a ‘nd varà 1. Altris risorsis a son in program par puartâ indenant il cors in rêt Parla.cat che al conte za 200 mil iscrits, un progjet par rignuvî la ufierte formative par catalan e par miorâ lis azions di sensibilizazion linguistiche. Intal belanç a son po cuasi 200 mil euros par intervents di promozion de varietât ocitane fevelade inte Val di Aran.
Font: Generalitat de Catalunya, 20/01/17

Bretagne: students Diwan mobilitâts par diplomâsi par breton

A van indenant lis iniziativis dai students dal liceu a imersion Diwan di Karaez / Carhaix par domandâ che ancje i esams pal diplome a sedin par breton. Al è dal dut incoerent, a disin, studiâ par agns a dilunc par breton e po vê di dâ i esams par francês. Cussì i students dal istitûts a àn prime inviât une petizion che e à racuelt diviers miârs di firmis, po a àn scrit une letare vierte ae ministre francese pe educazion e ae direzion scolastiche regjonâl e, ai 18 di Zenâr, a àn inmaneât une proteste in place. In dì di vuê, intal moment di dâ i esams pal diplome, i students a cjatin il breton dome te prove di storie e gjeografie. La bataie pai esams in lenghe proprie però no interesse dome la Bretagne. Cun di fat, intal Paîs Basc francês i students che a frecuentin il liceu a imersion, in plui de prove di storie e gjeografie, a puedin za doprâ l’euskara pal esam di matematiche e cumò a domandin di fâ il stes ancje te prove di filosofie.
Font: Le Télégramme, 19/01/17

Ongjarie: violencis sui rom, condane de Cort europeane

La Cort europeane dai dirits umans e à condanât lis istituzions statâls ongjaresis a paiâ une indenizazion a doi citadins de comunitât rom par vie che no àn garantît la lôr tutele intant di une manifestazion inmaneade de diestre xenofobe ongjarese. I fats a rimontin al Avost dal 2012 cuant che, te citât di Devecser, i doi rom a jerin stâts vitimis prime di abûs verbâi di stamp razist e po ancje di une agression fisiche de bande di un trop di manifestants. La denuncie e jere partide dal fat che la polizie che e controlave la manifestazion no veve fat nuie par impedî i discors raziscj tignûts intant de iniziative, no jere intervignude par difindi i doi rom des violencis dai manifestants e po no veve indagât in maniere serie sul episodi.
Font: Politics.hu, 18/01/17

Paîs Basc: vitorie pal euskara su France Télévision

Euskal Konfederazioa e à otignût une prime vitorie te cause cuintri di France Télévision su la presince de lenghe basche inte television publiche francese. La cuistion si veve inviade ancjemò tal 2013 cuant che la television di stât e veve stimât plui che avonde trasmeti dôs oris par an di programazion par euskara, cuant che pal cors e garantive 95 oris, pal alsazian 92 e pal breton 65. Il ricors de organizazion basche par “violazion de avualiance dai dirits” al veve cjatât un judizi negatîf prime de bande dal tribunâl aministratîf e po de cort di apel di Parîs. Il Consei di Stât i à invezit dât reson e al à confermât che la societât France Télévision e à tra lis sôs finalitâts tant che servizi public ancje chê di svilupâ e trasmeti programs intes lenghis minorizadis e che i spazis di programazion a àn di jessi in linie cun cheste mission. Fuarte di cheste sentence, Euskal Konfederazioa e domande duncje ae emitente publiche di intevignî daurman par incressi la sô programazion par basc.
Font: Mediabask, 18/01/17

Irlande: proteste tal Nord pai dirits linguistics

Diviers centenârs di ativiscj a àn manifestât ai 12 di Zenâr a Béal Feirste / Belfast denant de sede dal dipartiment des comunitâts dal guvier nordirlandês par domandâ il rispiet dai dirits linguistics di cui che al fevele par gaelic. A discjadenâ la proteste, coordenade de organizazion An Dream Dearg, e jere stade la decision dal ministri unionist Paul Givan (DUP), po revocade, di gjavâ lis 50 mil sterlinis pes borsis di studi che a permetevin a cent students in cundizions economichis disvantazadis di studiâ il gaelic. A mandâ in bestie tancj di lôr al jere stât massime il fat che Givan al veve motivât il tai cun resons di “eficience” finanziarie cuant che il so partît al è responsabil di un scandul che al riscje di fâi paiâ ai citadins 400 milions di sterlinis. I ativiscj pai dirits linguistics a ricuardin ancje che a dîs agns dai acuardis di S. Andree che a previodevin une leç par promovi la lenghe irlandese, il Partît Unionist Democratic che al veve firmât chel pat al va dilunc a pidimentâ ogni tentatîf par fâ buine une leç di tutele. La arogance dal partît unionist e je ancje daûr de decision dal Sinn Féin di fâ colâ il guvier par lâ a elezions anticipadis.
Font: Irish Central, 18/01/17