Il guvier irlandês al à autorizât la nassite di un gnûf canâl televisîf par gaelic irlandês dut dedicât ai fruts inte suaze dal servizi radiotelevisîf public TG4. Par inviâlu a son stâts metûts 3 milions e 300 mil euros cjapâts dentri tai 7 milions e 300 mil euros di aument che il guvier al à decidût di meti par sostignî la radiotelevision publiche in lenghe irlandese. Si trate, par altri, dal aument anuâl plui alt assegnât fin cumò ae cjadene dedicade al gaelic.
Font: Gov.ie, 29/09/22
E torne a montâ la tension in Corsiche dopo de decision di refudâ a Pierre Alessandri il regjim di semilibertât. Dopo dal sassinament dal militant indipendentist Yvan Colonna vie pal mês di Març di chest an la mobilitazion popolâr e i scuintris di place che a vevin segnât la isule par setemanis a vevin puartât il guvier francês a impegnâsi par vierzi un procès di discussion tra il stât e la Corsiche che al frontàs lis problematichis jevadis de societât isolane sul plan sociâl, economic e culturâl, cuntune atenzion particolâr pe evoluzion istituzionâl in direzion di un Statût di autonomie. Tra i temis centrâi al jere ancje chel dai presonîrs politics, cuntune atenzion particolâr massime par Alessandri e Alain Ferrandi (acusâts cun Colonna di formâ il comant che al veve copât il prefet Erignac). In Avrîl i doi a jerin stâts trasferîts su la isule, te preson di U Borgu / Borgo, e cumò si spietave, dopo di 23 agns di preson e su la fonde di ce che e previôt la stesse legjislazion francese, che a podessin passâ a di une cundizion di semilibertât. Savude la gnove, cul plen acuardi di ducj i partîts, la Assemblee corse e à decidût la sierade anticipade de sô session di lavôr e e à invidât il guvier francês a fâ la sô part. Il refût di concedi la semilibertât a Alessandri, di fat, e met a risi il procès di negoziazion inviât a Parîs. L’element paradossâl – a disin i rapresentants des istituzions corsis – al è che la reson doprade par justificâ la sô permanence in preson e je che cu la semilibertât si varès metût a risi l’ordin public cuant che invezit, cemût che si à za viodût intai mês stâts, al è propite il fat di tignîlu in preson che al riscje di discjadenâ disordins e violencis.
Font: Alta Frequenza, 29/09/22
Ai 30 di Setembar si à sierade la fase partecipative dal Pat Nazionâl pe Lenghe inviade in Catalogne vie pal mês di Fevrâr. Chest percors al à cjapât dentri une vincjine di incuintris sul teritori par presentâ i contignûts dal progjet e dodis taulis tarondis di setôr. A son passe 300 i contribûts rivâts di ents, organizazions, associazions e citadins par un totâl di cuasi 3 mil propuestis concretis. La fase partecipative si à sierade cuntune taule taronde cu lis organizazions che a rapresentin il mont de imigrazion, setôr judicât strategjic pal avignî de lenghe. Jenfri i 3 e i 24 di Otubar lis propuestis tiradis sù intant di cheste fase a saran sistematizadis in mût di presentâlis ae taule di lavôr formade dai rapresentants dal Consei sociâl de lenghe catalane e di altris entitâts che a operin pe lenghe proprie che, a partî di li e dentri de fin dal mês, a metaran jù un stampon di test che, tra la fin di chest an e il Març dal 2023, al rivarà al esam dal guvier e dai partîts par concretizâsi tal document finâl.
Font: Generalitat de Catalunya, 28/09/22
Il comitât di esperts dal Consei de Europe che al viôt de metude in vore de Cjarte europeane des lenghis regjonâls o minoritariis al à dât fûr il so rapuart sul rispiet dai dirits linguistics in Svuizare. Achì la Cjarte e je jentrade in vore tal 1998 e i siei contignûts a valin pal jenische (lenghe di stamp gjermanic fevelade di comunitâts cuntun passât seminomadic), pal rumanç e pal talian, ma ancje par francês e todesc intai cjantons là che no son lenghis uficiâls. Diviersis lis notis positivis segnaladis intal document ma no mancjin i ponts negatîfs. Il rapuart al domande di meti in cjamp misuris suplementârs par promovi lis lenghis rumance e taliane tal cjamp economic e sociâl. Par chel che al rivuarde in particolâr il rumanç si sugjerìs la creazion di une radio privade par rumanç in zonte a chê publiche za in vore, ma ancje intervents par favorî l’ûs di cheste lenghe tai rapuarts cu la justizie e timps plui svelts pe produzion di materiâi scolastics. Cun di plui, si invidin lis autoritâts locâls a normâ l’ûs di todesc e francês inte vite publiche ancje là che no son lenghis uficiâls.
Font: Council of Europe, 28/09/22
La agjenzie scozese pe lenghe gaeliche Bòrd na Gàidhlig e à assegnât 413 mil sterlinis par 36 progjets a pro de lenghe proprie te suaze di un aument dai fonts previodûts de normative linguistiche. Tra i organisims che a àn ricevût plui risorsis o cjatìn il coordenament des organizazions des isulis ocidentâls (Comhairle nan Eilean Siar) par diviers progjets che a àn chê di infuartî lis competencis linguistichis e l’insegnament dal gaelic. A pro dal insegnament de lenghe inte aree des isulis ocidentâls al è ancje un progjet de universitât finanziât cun 33 mil sterlinis. Fonts a son pro previodûts ancje par iniziativis che si proponin di infuartî lis comunitâts di lenghe gaeliche che si son disvilupadis, massime tai ultins agns, in citâts tant che Edimburc, Glaschu / Glasgow o Dùn Dèagh / Dundee.
Font: Bòrd na Gàidhlig, 27/09/22
I sindacâts ELA e LAB intune cu la organizazion Euskalgintzaren Kontseilua a àn presentât al guvier de Comunitât Autonome Basche e ai partîts rapresentâts in Parlament une propueste par “euskaldunizâ” i servizis aministratîfs de Comunitât tal zîr di 15 agns. L’obietîf al è chel di fâ in mût che ae fin dal procès in ducj i uficis e i servizis che a dipendin de aministrazion publiche si vedi un nivel minim di cognossince de lenghe basche. Il fat che tai prossims agns la metât dai dipendents publics e larà in pension e rapresente, di chest pont di viste, une oportunitât straordenarie. Par cemût che e je stade imbastide, la propueste – a zontin i doi sindacâts maioritaris – e je compatibile cu la difese dai dirits dai lavoradôrs. Il plan al previôt che si fissi par ogni puest di vore lis competencis linguistichis che a coventin, daûr des relazions dal dipendent cul public e cul rest dal personâl, a son duncje previodudis ancje ecezions e percors di mobilitât interne, in plui di jutoris e cors di formazion specifiche. Par che che si riferìs ai puescj là che la cognossince de lenghe proprie e covente, si previôt almancul un nivel di competence B2.
Font: EiTB, 26/09/22
Il comun di Elna / Elne, che si cjate te Catalogne dal Nord sot aministrazion francese, al è daûr a studiâ un ricors di puartâ denant de cort costituzionâl dopo che il prefet al à denunciât la mende al regolament dal consei comunâl che e garantìs il dirit di intervignî par catalan in aule. Une strade che, par altri, e je stade po inviade ancje di une cuindisine di altris comuns de Catalogne dal Nord, ancje lôr menaçâts dal rapresentant dal guvier francês par che a tornin indaûr su la decision. Pe aministrazion comunâl di Elna / Elne il compuartament dal prefet al è schizofrenic dal moment che, di une bande, al è copresident dal ufici public pe lenghe catalane che si propon di promovi la lenghe e, di chê altre, al perseguìs cui che le valorize e le dopre. Par dî che l’ûs dal catalan tun organisim public al menace lis fondis de Republiche francese, par altri, il prefet al è lât a pescjâ fûr fintremai un edit reâl dal 1539 che al imponeve l’ûs esclusîf dal francês: riferiment che, pe aministrazion comunâl, al à ducj i elements par jessi declarât incostituzionâl.
Font: VilaWeb, 26/09/22
Su la fonde dai risultâts di une consultazion popolâr, vie pal Astât, il Consei comunâl di Béal Feirste / Belfast al à semplificât la normative sul ûs de segnaletiche stradâl bilengâl in citât. Cu la gnove normative – sostignude di Sinn Féin, Alliance Party, SDLP, People Before Profit e Verts, e contrastade dai partîts unioniscj – al è cetant plui sempliç domandâ e otignî che al non di une vie i si zonti ancje la version par irlandês. Dopo de modifiche de leç, a son za uns 500 lis domandis rivadis al comun par vê la segnaletiche bilengâl. La cuantitât di domandis e je une vore plui alte di ce che la aministrazion si spietave e duncje i citadins a son stâts invidâts a vê un tic di pazience par permeti al comun di gjestî dutis lis proceduris dal câs.
Font: Belfast Live, 21/09/22
Il guvier de Comunitât Autonome Basche al à decidût che al presentarà ricors cuintri de sentence dal tribunâl aministratîf di Vitoria Gasteiz che al permet di acedi ai puescj di polizie locâl ancje cence vê la certificazion de cognossince di almancul un nivel B2 di euskara. La leç di normalizazion de lenghe basche dal 1982 e previôt che i citadins a vedin il dirit di indreçâsi aes aministrazions publichis inte lenghe che a àn miôr – basc o castilian che al sedi – e il dovê des aministrazions di garantî chest dirit. Di cheste fonde si son po svilupadis normis e regolaments par dâi sostance a chest principi. A front di un aument dai citadins che a doprin l’euskara tai rapuarts cui rapresentants de aministrazion publiche, a son i stes ents locâi che a domandin che i lôr dipendents – e un tant al vâl ancje pe polizie locâl – a vedin une cognossince suficiente de lenghe basche. Cheste sentence e va invezit, par mieç di astrazions juridichis, a impedî che i principis fissâts de leç a vegnin garantîts inte vite di ogni dì. Di chi, duncje, la decision di procedi a impugnâ la sentence dal tribunâl.
Font: Noticias de Alava, 20/09/22
Il Movimento Cultural da Terra de Miranda al à riclamât la atenzion sul pericul di estinzion dal mirandês, la varietât asturiane-leonese fevelade in trê comuns de aree di Miranda do Douro che e rapresente la uniche lenghe minoritarie dal Portugal. Intai ultins sessante agns chest teritori al à pierdût doi tierçs de sô popolazion e tai ultins dîs agns il numar dai zovins al è calât dal 25%. Chest dispopolament, al spieghe il moviment, al met a risi la esistence stesse de lenghe proprie; al covente duncje invertî cheste tindince e intervignî su lis causis dal dispopolament, in primis chês economichis. Pe organizazion, la aree di Miranda do Douro e à cundizions naturâls par disvilupâ une agriculture siore e variade che a son stadis però penalizadis di sieltis politichis faladis. Ve che alore l’apel indreçât aes autoritâts politichis portughesis al è di cambiâ in maniere radicâl lis sieltis economichis pal teritori in mût di permeti ae int di restâ tai siei paîs e mantignî la sô lenghe e la sô culture specifiche.
Font: JM Madeira, 19/09/22
Il guvier spagnûl al à fat indenant une domande formâl al Parlament european par che si ricognossi la pussibilitât di doprâ il basc, il catalan e il galizian intant des riunions plenariis de istituzion. L’esecutîf di Madrid si è impegnât a cuvierzi dutis lis spesis che cheste iniziative e compuartarès e si à declarât disponibil a discuti daurman i detais pratics par che la domande si concretizi. Chest pas al jere tra chei concuardâts inte taule di dialic jenfri il guvier spagnûl e chel catalan.
Font: VilaWeb, 16/09/22
Ai 15 di Setembar il comitât di esperts dal Consei de Europe che al viôt de metude in vore de Cjarte europeane pes lenghis regjonâls o minoritariis al à dât fûr il so rapuart sul rispiet dai dirits linguistics in Gjermanie. Achì la Cjarte e je jentrade in vore tal 1999 e i siei contignûts a valin pal danês, pal frison, pal bas todesc, pal romani e pes dôs varietâts dal sorbian (feveladis inte Alte e te Basse Lusazie). Tra lis notis positivis si à il vie libare des autoritâts federâls ae zonte di gnovis garanziis pal ûs di bas todesc, danês e frison intai cjamps de culture, de toponomastiche e de aministrazion publiche tal land dal Schleswig-Holstein, e la incressite progressive de segnaletiche publiche bilengâl. Tra lis notis negativis la dibisugne di infuartî lis lenghis minorizadis intal insegnament là che un dai problemis principâi si riferìs ae mancjance di insegnants. Il rapuart al segnale ancje la scjarse presince di chestis lenghis intai rapuarts cu lis aministrazions publichis e tai mieçs di comunicazion.
Font: Council of Europe, 15/09/22
Ai 14 di Setembar i delegâts dal ufici publiche dal euskara e cuatri dai sîs parlamentârs elets intal dipartiment che al cjape dentri il Paîs Basc dal Nord sot aministrazion francese si son cjatâts cui colaboradôrs dal ministri francês pe educazion, Pap Ndiaye. Intant de riunion si à frontât il teme dal insegnament imersîf che si cjate a fâ i conts cuntun cuadri legjislatîf pôc clâr e cuntun numar di puescj pal insegnament masse limitât. I rapresentants ministeriâi si son impegnâts a semplificâ il mecanisim pe vierzidure di gnovis sezions in lenghe basche tes scuelis publichis dant in man la gjestion al stes ufici pe lenghe basche. Plui ingredeade la cuistion de pussibilitât pai students che a àn studiât par euskara di frontâ i esams finâi des secondariis e chei di amission ae universitât inte lenghe che a àn studiât. Pe prime categorie e je une disponibilitât de bande dal ministeri a dâ une rispueste clare in timps avonde curts, pe seconde invezit e je rivade la promesse di vierzi une linie di dialic specifiche. Ta chest an scolastic a son in dut 370 i students bascs che a varan di frontâ chescj esams.
Font: Naiz:, 14/09/22
Il Collectiu Occitan, coordenament di organizazions che a rivendichin la presince dal ocitan dentri de television publiche, si darà adun ai 7 di Otubar a Tolosa / Toulouse par tornâ a lançâ la campagne “Volèm l’occitan a la television regionala”. In dì di vuê, la television publiche francese e propon juste 17 oris di emissions par ocitan ad an. Il coletîf al domande invezit di vê dai spazis cuotidians e cheste sô rivendicazion e à za cjatât la poie di 618 comuns e 3 dipartiments che a àn votât des mozions che a van ta cheste direzion. Dal moment che il guvier francês al à in ments di imbastî une riforme dal setôr dal audiovisîf, il Collectiu Occitan al stime che al sedi il moment par sburtâ cun fuarce il teme cun gnovis mobilitazions.
Font: Jornalet, 14/09/22
Il tentatîf dal esecutîf dal Aragon di otignî une classe di concors pal insegnament dal aragonês si à cjatât denant dal “no” dal ministeri spagnûl pe educazion. La motivazion dade par chest dinei e je che nol è avonde che si trati di une lenghe minorizade ricognossude e tutelade ma, par otignî il ricognossiment di une categorie di insegnament specifiche, al covente che cheste lenghe e sedi ricognossude ancje come couficiâl. Intal câs dal Aragon chest al oblearès a mudâ il Statût di autonomie, cuntun percors lunc e par nuie sempliç. A cambiâ la linie dal guvier di Madrid no à coventade nancje la sigurazion che la Comunitât dal Aragon e varès cuviert jê ducj i coscj pai insegnants ricognossûts. In dì di vuê l’aragonês – che si stime che al sedi cjacarât o almancul cognossût dal 3% de popolazion de Comunitât – al è za presint come materie di insegnament a scuele ma i 21 professôrs che lu insegnin (tra scuele de infanzie, primariis e secondariis) si cjatin intune posizion lavorative precarie che ju sburte a cirîsi une ocupazion plui garantide.
Font: Heraldo, 14/09/22
Il guvier de Comunitât Autonome Basche al à anticipât il prin stampon de riforme de leç su la educazion che al diven di une tratative avonde imberdeade tra i doi aleâts di guvier – PNV e PSE-EE – e lis dôs fuarcis di oposizion plui impuartantis, o sei EH Bildu e Elkarrekin Podemos - IU. Il mudament principâl che si cjate tal document al inten il superament dal sisteme cun trê diviers modei scolastics di riferiment nassût intal 1983 e che al previôt un percors imersîf par euskara (model D), un par castilian (model A) e un bilengâl (model B). L’intindiment al è chel di sostituî chest sisteme cuntun model unitari ma flessibil definît dai diviers istitûts e che al vedi il basc come lenghe prevalente, intune cuntune buine presince dal castilian e di une lenghe foreste. L’obietîf al è che ae fin dal cicli scolastic obligatori i students a vedin almancul un nivel di competence linguistiche B2 intes dôs lenghis principâls. Il document al à cumò di passâ pal vie libare definitîf dal guvier prime di rivâ al esam dal Parlament. Dut câs si sa za che cualchi passaç dal test al varà di jessi cambiât par vie che nol ven incuintri aes domandis des fuarcis che a varessin po di votâlu.
Font: El Diario, 14/09/22
Buinis gnovis pal mirandês, la varietât asturiane-leonese fevelade tai comuns di Miranda do Douro, Mogadouro e Vimioso che e rapresente la uniche lenghe minoritarie dal Portugal. Tal an scolastic a pene tacât il 79% dai students che a frecuentin lis scuelis di cheste aree a àn decidût di cjapâ dentri tal lôr percors di studi ancje lis oris opzionâls di lenghe e culture mirandese, une cifre cetant plui alte che tai agns stâts. Cheste materie e veve tacât a jessi ufierte in forme volontarie a partî dal an scolastic 1986/87 e dal 2009 incà e ven proponude in forme continuative de scuele de infanzie fintremai aes secondariis. Tra lis gnovis positivis di chest an si à une semplificazion regolamentâr che e rint plui sempliç il reclutament dai professôrs.
Font: Publico, 12/09/22
Ai 7 di Setembar si à tignût a Bruxelles un confront par fâ il pont su la situazion des comunitâts minorizadis europeanis. La iniziative e je stade inmaneade dal intergrup pes minorancis tradizionâls, lis comunitâts nazionâls e lis lenghis cu la poie di diviers grups rapresentâts intal Parlament european. A vierzi la conference al è stât il delegât speciâl de ONU pes minorancis, Fernand De Varennes. Dopo vê marcât ancjemò une volte che i dirits nazionâi e massime chei linguistics a son in dut e par dut dai dirits umans e che a van duncje tutelâts ta cheste suaze, contrari di ce che ciertis istituzions e cierts grups politics a cirin di fâ crodi, De Varennes al à denunciât il fat che tai ultins agns in Europe i dirits des comunitâts minorizadis a son daûr a pierdi teren, massime par chel che al rivuarde la educazion. Il delegât ONU al à ancje condanât la boçadure de bande de Comission europeane des misuris di tutele e promozion che a fasevin part de iniziative popolâr Minority SafePack, cuistion cumò al esam de cort di justizie europeane. La UE – si à dite intant dal incuintri – e à di indotâsi di une suaze normative comune pe tutele des comunitâts minorizadis che ur garantissi il massim nivel di ricognossiment, che e impegni a lotâ cuintri di ogni discriminazion di stamp linguistic o nazionâl e che e previodi il control continuatîf dal rispiet dai dirits di chestis comunitâts.
Font: FUEN, 08/09/22
Si infuartìs la ufierte di cors disvilupade dal Consorzi pe Normalizazion Linguistiche (Consorci per a la Normalització Lingüística) de Catalogne. Cun Setembar a son disponibii plui di 1.300 cors di catalan par un totâl di 28.500 puescj. La plui part dai cors a son di nivel basic e a son pensâts par cui che nol à cuasi nissune cognossince dal catalan. I cors di base a son sore nuie e, pal 80%, in presince. Divierse la situazion dai cors di nivel plui alt. Par esempli a son 60 i cors par otignî une certificazion di competence linguistiche di nivel C2 e, par cheste session, a son ancjemò ducj in linie.
Font: Generalitat de Catalunya, 05/09/22
Cu la partence dal gnûf an scolastic si àn inviadis 11 gnovis filieris di insegnament bilengâl intes scuelis de Bretagne. A son centradis intal distret scolastic di Roazhon / Rennes par vie che lis propuestis di vierzidure fatis indenant inta chel di Naoned / Nantes no àn cjatât il bon acet dal ministeri francês pe educazion. Al è il setim an di file che, cul inviâsi dal an scolastic, a partissin almancul une disine di percors bilengâi gnûfs. Nûf des vierziduris a interessin la rêt publiche, dôs lis scuelis confessionâls convenzionadis. No ‘nd è nissune invezit tra lis scuelis imersivis Diwan.
Font: Ofis Publik ar Brezhoneg, 01/09/22
La autoritât pe educazion nordirlandese, par mieç dal so plan operatîf 2022 – 2024, e larà a dopleâ il numar des scuelis secondariis che a àn l’irlandês di lenghe veicolâr. A vuê, intes sîs conteis irlandesis sot aministrazion britaniche, i centris educatîfs di chest gjenar a son dome doi: un a Dún Geimhin / Dungiven e un a Béal Feirste / Belfast. Il plan al previôt la nassite di altris dôs scuelis imersivis, une te aree setentrionâl de citât di Béal Feirste / Belfast e une altre te regjon di Tír Eoghain / Tyrone e Fear Manach / Fermanagh. Il numar di fameis che a vuelin iscrivi i fîs tes scuelis a imersion al va dilunc a cressi e ancjemò in Jugn il dirigjent dal istitût za atîf a Béal Feirste / Belfast al veve fat savê di vê nûfcent students iscrits, masse rispiet ai spazis disponibii te sô struture.
Font: Belfast Media, 02/09/22
Cul prin di Setembar si à inviât il gnûf an scolastic intai istitûts che a aderissin ae rêt Seaska, o sei la federazion che e ten adun lis scuelis a imersion par euskara che a operin in Ipar Euskal Herria, o sei il Paîs Basc dal Nord sot aministrazion francese. Il numar dai centris educatîfs al reste il stes dal an passât ma al è cressût il numar dai iscrits che, rispiet al an scolastic 2021 – 2022, a son un centenâr in plui. Par che al jentri in vore il gnûf istitût secondari imersîf di Senpere / Saint-Pée-sur-Nivelle si varà di spietâ il prossim an. Intant a restin viertis dutis lis sfidis in at cu lis istituzions scolastichis francesis, a partî de pussibilitât di davuelzi i esams finâi par basc.
Font: EiTB, 01/09/22
Ai 31 di Avost il Comitât pai dirits umans de ONU al à dât fûr une sentence là che si dîs che il stât spagnûl «al à violât i dirits politics di ex membris dal guvier e dal Parlament de Catalogne» cuant che al à suspindût des lôr funzions publichis i dirigjents indipendentiscj acusâts intal procès che al puartarà po, tal 2019, ae lôr condane par vie dal referendum su la indipendence de Catalogne che si veve tignût il prin di Otubar dal 2017. A indreçâsi al Comitât a jerin stâts il vicepresident dal guvier catalan di in chê volte, Oriol Junqueras, e i membris dal esecutîf Raül Romeva, Josep Rull e Jordi Turull. L’organisim de ONU ur à dât reson sul fat che la decision di suspindiju des lôr funzions prime de sentence di condane e leve cuintri dal Pat internazionâl sui dirits civîi e politics. Il Comitât al condane ancje il fat che a fossin stâts acusâts di “ribelion” – reât che al previôt un riviel violent – cundut che i dirigjents indipendentiscj a vessin simpri invidât i citadins a mantignî compuartaments pacifics.
Font: Naiz:, 31/08/22
Il guvier des Asturiis al à fat bogns i curricola pes scuelis secondariis (ESO, o sei educazion secondarie dal oblic, e formazion preuniversitarie) e al à cussì sierât il procès par adatâ ae realtât locâl la suaze de gnove leç statâl su la educazion (LOMLOE). Tra lis novitâts che a jentraran in vore cul gnûf an scolastic si à ancje une incressite de presince dal asturian intal insegnament, cuntun aument medi di 3 oris setemanâls in plui.
Font: AsturNews, 31/08/22
La Belgjiche e je un stât federâl dividût in dôs comunitâts principâls – la Valonie di lenghe francese e lis Flandris là che si fevele une varietât neerlandese – che si ur zonte il distret de capitâl Bruxelles, che al à un statût di bilinguisim, e la aree là che e vîf une minorance gjermanofone. Tes secondariis dal distret de capitâl i students a àn di studiâ dutis e dôs lis lenghis uficiâls, ta chês des Flandris il francês al à une presince impuartante, ta chês de Valonie il flamant nol è obligatori ma al è dispès presint come lenghe seconde. Cheste presince e je però daûr a calâ simpri di plui. Tal an scolastic 2021-2022 dome un tierç dai students des secondariis de Valonie al à sielzût di seconde lenghe il flamant, cuasi il 7% di mancul dal an 2019-2020.
Font: Brussels Times, 29/08/22
Ai 22 di Avost si à sierade la consultazion inviade dal Comitât pai afârs galês in mert al avignî dal servizi radiotelevisîf public in Gales. Il cuadri gjenerâl al è cambiât une vore tai ultins agns e si à resonât se a son lis cundizions par mantignî in vore un servizi di cheste fate in clâr. Il guvier di Londre al à ridusût in maniere progressive la sô poie economiche ae television publiche par galês S4C (nassude ancjemò tal 1982) che cumò e ven finanziade cul cjanul pal servizi public tirât sù de BBC. La impression e je che si vueli lâ in direzion di un servizi a paiament sul model des plateformis privadis. Cuintri di cheste ipotesi si fâs sintî la Cymdeithas yr Iaith che e rivendiche il trasferiment aes istituzions galesis des competencis e des risorsis pal setôr radiotelevisîf gjestidis fin cumò di Londre. Za di timp la organizazion pe lenghe galese e à inviât une campagne pe devoluzion dal setôr e si augure che cheste e sedi la ultime volte che un organisim di Westminster al è clamât a decidi dal avignî dal servizi radiotelevisîf public par galês.
Font: Nation Cymru, 26/08/22
La agjenzie scozese pal gaelic Bòrd na Gàidhlig e à anticipât i prins risultâts de consultazion publiche sul prossim plan nazionâl pe lenghe gaeliche. Il 65% des organizazions e dai singui che a àn partecipât ae consultazion al à concuardât su la dibisugne di centrâ il plan su la incressite dal ûs dal gaelic e sul so insegnament. Ta chest sens si à marcât la impuartance di aumentâ lis iniziativis che a permetin di cressi la confidence tal doprâ cheste lenghe, di meti sù centris teritoriâi pal ûs e pe promozion dal gaelic e di sburtâ la sô presince tai mieçs di comunicazion e in rêt. Il stampon dal plan al sarà cumò riviodût daûr dai indreçaments rivâts de consultazion e, dopo dal esam de bande dal guvier scozês, al varès di jessi publicât inte sô version definitive tal Avrîl di chest an che al ven.
Font: Bòrd na Gàidhlig, 25/08/22
Si davuelzarà ai 2 di Otubar la Santxikorrota, une corse di 20 chilometris che si propon di promovi la cognossince e l’ûs de lenghe basche te Navare dal Sud dulà che, in dì di vuê, no gjolt di nissune forme di tutele e di promozion de bande des istituzions navaresis. La manifestazion si davuelzarà inte aree de Bardea / Bardenas, un teritori salvadi cun paisaçs inmagants. La corse e je di nature competitive ma no previôt premis. La partecipazion massime e sarà di cuatricent personis e cui che al aderìs al à di paiâ une cuote che e covente par finanziâ iniziativis a pro dal euskara. A inmaneâ la corse e je la organizazion Agerraldia che in plui di promovi la lenghe basche e opere par sburtâ il disvilup sostignibil e lis produzions tipichis di cheste part de Navare. Cu la sô ativitât e favorìs ancje la nassite di iniziativis in rêt cun altris realtâts baschis interessadis a partecipâ a progjets di disvilup de lenghe e de identitât basche ta cheste aree.
Font: Noticias de Navarra, 24/08/22
La responsabile pe universitât dal esecutîf catalan (Generalitat) e à fat savê che il guvier al invistirà 3,8 milions di euros par infuartî la presince e l’ûs de lenghe catalane tal sisteme universitari e de ricercje de Catalogne. Ta cheste direzion e va ancje la jentrade de universitât di Perpignan, a partî dal an academic 2022 – 2023, tal sisteme di borsis di studi “Joan Fuster” che al sburte la mobilitât dai students intes 22 universitâts che a formin la rêt Xarxa Vives.
Font: MagisNet, 22/08/22
Il guvier de Letonie al à fate buine une leç che e larà a impedî l’ûs dal rus intal setôr public, tal cjamp dai servizis, dai traspuarts, des bancjis e ancje tes ativitâts economichis privadis. Il test al improibìs fintremai di domandâ la cognossince o l’ûs di une lenghe no uficiâl de UE par cjapâ sù a vore une persone. La gnove leç e varès di jentrâ in vore cul prin di Lui di chest an che al ven e, par cui che no le rispietarà, si previodin sanzions aministrativis inmò di fissâ. Il gnûf proviodiment si zonte ae leç che cul 2025 e scancelarà i percors educatîfs bilengâi par sostituîju cul insegnament dome par leton. L’intindiment declarât dal esecutîf al è chel di meti in vore il risultât di un referendum tignût inmò tal 2012 là che il 74,8% dai votants si mostrave contrari al ricognossiment dal rus come lenghe couficiâl de Letonie. No le pensin cussì i membris de minorance russofone che, tal mieç di une clime antirusse alimentade dal conflit in Ucraine, le viodin come une misure par sburtâju a lassâ il paîs. Daûr dai dâts dal ufici statistic statâl, il rus al è la lenghe native dal 37,5% de popolazion. Intal 1989 dome il 23% de minorance russofone e saveve fevelâ ancje par leton ma in dì di vuê si è rivâts aromai al 90% e passe.
Font: SwissInfo, 21/08/22
IndyLan – la aplicazion nassude cun chê di fâ cognossi lis lenghis minorizadis e lis comunitâts che lis fevelin – no sarà plui finanziade. Il progjet, disvilupât inte suaze de universitât Heriot-Watt di Edimburc, al veve di fat podût disvilupâsi in gracie dai fonts europeans dal program Erasmus+ che, cu la sierade progressive dai canâi economics leâts ae partignince ae UE, cumò no son plui disponibii. In plui di meti a disposizion elements lessicâi, fraseologjics, gramaticâi e di comprension auditive par tacâ a imparâ basc, cornic, gaelic, galizian, sami e scots, chest imprest al ufrìs ancje acès a informazions culturâls che a permetin di cognossi plui a fonts ancje i popui che a fevelin chestis lenghis. Cence fonts la aplicazion no podarà incressi i siei contignûts e nancje zontâ altris lenghis minorizadis europeanis. I siei ideadôrs a àn cussì decidût di meti a disposizion in forme libare il codiç dal program di maniere che altris comunitâts a puedin fâle lôr e impleâle par fâ cognossi la proprie lenghe e la proprie culture.
Font: Neofalantes, 18/08/22
Ae vilie de publicazion de bande dal guvier galês dal stampon de leç pe educazion in lenghe galese, la organizazion Cymdeithas yr Iaith e à presentât la sô cuintripropueste là che si bat su la oportunitât che il ministeri al à di garantî la educazion par galês a ducj cuancj. In dì di vuê dome il 20% dai students al à la pussibilitât di vê il galês tant che lenghe veicolâr, intant che chei altris a àn di contentâsi di vêlu, cuant che e va ben, come seconde lenghe e duncje di no vê une fluence suficiente par vivi ad in plen la lôr comunitât e la lôr culture o par podê spindi la cognossince de lenghe sul plan lavoratîf. Tra i ponts di fonde che si cjatin inte propueste de Cymdeithas si à di fissâ come obietîf che tal 2050 il galês al sedi la lenghe veicolâr di dutis lis scuelis dal Gales, che dutis lis scuelis gnovis metudis sù di cumò indenant a sedin a imersion par galês, e che i plans educatîfs locâi pe lenghe galese a lassin il puest a di un plan strategjic nazionâl.
Font: Nation Cymru, 02/08/22
La Casa de las Lenguas de universitât di Uviéu / Oviedo e proponarà vie pal an academic 2022-2023 l’insegnament di 15 lenghis inte sô sede centrâl e ta chês distacadis di Xixón / Gijón e Avilés. Tra chestis nol è l’asturian che invezit al jere fin al an passât. L’insegnament de lenghe proprie al è stât sostituît cun chel dal ucrain. A denunciâ cheste situazion e je la organizazion Xunta pola Defensa de la Llingua Asturiana (XDLA) che e atribuìs la responsabilitât al gnûf retôr Ignacio Villaverde che si veve mostrât plui di une volte critic sul ûs dal asturian inte universitât rivant a considerâlu di rude «posizion ideologjiche» in dispresi dal Statût di autonomie, de leç di ûs e promozion dal asturian e dal stes statût de universitât.
Font: Asturies.com, 02/08/22
Plui de metât dai utents di Instagram in Catalogne e doprarès la configurazion par catalan se e ves la pussibilitât di fâlu. La plateforme e je disponibile in 25 lenghis ma no par catalan, cundut che tra chês che si pues configurâ Instagram a ‘nd è ancje di chês che a àn un pês demografic similâr tant che il norvegjês, il finlandês o il danês. Daûr di une inchieste comissionade de organizazion Plataforma per la Llengua ae GESOP al ven fûr che doi milions e mieç di internautis catalans a varessin gust di doprâ cheste rêt sociâl par catalan, intant che altris 850.000 che cumò no son su Instagram le dopraressin se e fos disponibile ta cheste lenghe. La inchieste e à mostrât ancje che il 25% dai utents di lenghe catalane al à miôr doprâ la version inglese di Instagram impen di chê par castilian. Cheste rêt sociâl e parten al grup Meta che al è proprietari ancje di Facebook che invezit al è disponibil par catalan. Ancje par chest Plataforma per la Llengua e domande ae multinazionâl americane di vierzi al catalan ancje Instagram. Une strade – a zontin – che e je vantazose ancje pal fat che cul calâ de etât la sielte dal catalan e aumente, cu la fasse tra i 16 e i 29 agns plui sensibile ae lenghe proprie di chê tra i 30 e i 44 agns.
Font: El Nacional, 01/08/22
Ai 31 di Lui si à davuelte la vincjevotesime edizion de “Corsa d’Aran per sa Lengua”, une manifestazion rivendicative, sportive e festive che si propon di promovi l’ûs sociâl de lenghe ocitane in cheste valade pirenaiche che sul plan aministratîf e parten ae Comunitât autonome de Catalogne. Un miâr e passe di personis a àn animât la iniziative rivant dai diviers borcs de valade ma ancje di altris tieris di lenghe ocitane. La manifestazion e je inmaneade dal coletîf Lengua Viua e chest an e bateve massime su la rivendicazion dal ûs dal ocitan come lenghe veicolâr intal sisteme educatîf aranês.
Font: Jornalet, 31/07/22
L’ufici public de lenghe ocitane (Ofici Public de la Lenga Occitana - ÒPLO) al à inviât une campagne par promovi lis filieris di studi de lenghe proprie intal insegnament secondari tes scuelis des dôs regjons aministrativis plui ocidentâls de Ocitanie (Gnove Acuitanie e Ocitanie). Tra lis resons ricuardadis par invidâ i students a cjapâ cheste strade si à l’acès a professions là che e je domande di personâl, la pussibilitât di davuelzi un semestri di studis intal forest par partecipâ a percors di intercomprension linguistiche, fâ part a di une rêt sociâl e associative une vore vivarose, jessi part vive e ative di une comunitât e dal teritori là che e vîf.
Font: Jornalet, 28/07/22
Il Comitât de ONU pe eliminazion des discriminazions raziâls al à dât reson al Parlament sami cuintri de decision dal tribunâl suprem finlandês che e autorizave la iscrizion intai regjistris eletorâi pal organisim rapresentatîf dai sami ancje di personis che no vevin lis carateristichis fissadis dal Parlament stes. Une posizion similâr e jere stade cjapade za tal 2019 ancje dal Comitât de ONU pai dirits umans che al veve ancje riclamât lis istituzions finlandesis al rispiet de declarazion dai dirits dai popui natîfs che e previôt che chestis comunitâts a “determinin in maniere libare il lôr status politic e a sedin libaris di puartâ indenant il lôr disvilup culturâl, sociâl e economic”. I rapresentants des istituzions sami si augurin che cu la poie di chestis cjoltis di posizion il guvier finlandês al dreci la sô politiche sul autoguvier dai sami.
Font: The Barents Observer, 28/07/22
Il Consei comunâl di Béal Feirste / Belfast al à comunicât i risultâts di une consultazion publiche su lis propuestis fatis indenant par mendâ la normative sul ûs de segnaletiche stradâl bilengâl in citât. La idee di fonde e je chê di rindi plui semplicis lis proceduris par zontâ al non de vie par inglês ancje chel par irlandês. Cu la gnove normative – sostignude di Sinn Féin, Alliance Party, SDLP, People Before Profit e Verts, e contrastade dai partîts unioniscj – al bastarès un resident o un conseîr comunâl par imbastî une consultazion tra i citadins che a vivin inte vie che si volarès meti il non bilengâl e uns 15% di favorevui par zontâ ancje il non par irlandês. Chestis propuestis a son stadis puartadis al esam dai citadins che te consultazion publiche che si è tignude tai mês stâts si son declarâts a pro de semplificazion normative tune misure di sù par jù il 60% dai partecipants.
Font: Belfast Live, 28/07/22
La tierce riunion de taule di dialic jenfri lis delegazions dal guvier spagnûl e di chel catalan si à sierade cun doi acuardis: il prin par superâ la judizializazion de politiche e il secont su lis garanziis pe lenghe catalane. Par chel che al rivuarde il prin, il ministri ae presidence Félix Bolaños di une bande al à declarât che lis dôs delegazions a àn acetât che la ativitât politiche e istituzionâl si davuelzi dentri de suaze de Costituzion spagnole, come a dî che il teme de indipendence al reste fûr di ogni confront, e di chê altre al à ricognossût che no si previodin azions par fermâ lis causis judiziariis che a colpissin l’indipendentisim e che, par cumò, no son lis cundizions par riformâ il cussì clamât delit di “sedizion”, ancje se si vûl lâ ta chê direzion. Une vore dûr in proposit il coment de Assemblea Nacional Catalana che e à definît la taule une pantumine doprade dal esecutîf di Madrid par mascarâ ai voi de comunitât internazionâl il lâ indenant de repression cuintri dal indipendentisim catalan, intant che l’esecutîf catalan si mostre simpri plui pleât su politichis autonomistis tradint i eletôrs che lu àn votât. Par chel che al rivuarde la protezion dal catalan, Bolaños al à sostignût la leç sui ûs linguistics fate buine cualchi setemane indaûr dal Parlament de Catalogne e al à vierzût ae pussibilitât di intervignî sui regolaments par podê fevelâ par catalan intal Senât spagnûl. Declarazions lis sôs che però a contrastin cuntune realtât là che i socialiscj e lis diestris a àn za boçât la pussibilitât di doprâ lis lenghis couficiâls intai lavôrs dal Parlament di Madrid e là che il tribunâl superiôr di justizie al à puartât al esam di chel costituzionâl la gnove leç catalane sui ûs linguistics tes scuelis.
Font: VilaWeb, 27-29/07/22
Si slargje la ufierte di aragonês inviade te seconde metât dal an academic stât alì de sede universitarie di Uesca / Huesca. Par dut l’an academic 2022 – 2023 i students che a studiin alì, di là de facoltât frecuentade, a podaran integrâ tal lôr percors di studi specific il cors di lenghe aragonese. Si previodin doi nivei formatîfs che lis lôr lezions a saran disponibilis par ducj e doi i semestris di studi. Cun di plui, ancje par chest Astât, la sede distacade de universitât di Zaragoza e à inmaneât un cors in linie di inviament ae lenghe aragonese che al permet ancje di aumentâ i credits formatîfs di cui che lu frecuente.
Font: Heraldo, 27/07/22
Il ricognossiment mutuâl dai certificâts di cognossince dal catalan de bande dal guvier di Andorra e di chei des Comunitâts autonomis de Catalogne, dal Paîs Valenzian e des isulis Baleârs al cjate cumò visibilitât ancje sui sîts internet di chestis cuatri realtâts che a rapresentin la plui part des tieris di lenghe catalane. Al è il risultât dai acuardis cjatâts tra i cuatri guviers locâi vie pal mês di Lui e, in plui di ufrî ai citadins une informazion complete e unitarie sui contignûts e lis modalitâts par otignî i certificâts, a dan evidence inmò plui clare e uficiâl de unitât de lenghe.
Font: Generalitat de Catalunya, 26/07/22
Uns 1.700 personis a àn partecipât in maniere ative ae zornade di lote no violente inmaneade sabide ai 23 di Lui dai coletîfs Bake Bidea e Artisans de la paix intal Paîs Basc dal Nord sot aministrazion francese (Ipar Euskal Herria) par domandâ al guvier di Parîs di meti fin ae politiche carcerarie punitive cuintri dai presonîrs bascs. A stiçâ inmò di plui la proteste e je stade la boçadure de bande de avocadure di stât de domande di libertât condizionâl fate indenant di Jakes Esnal e Ion Kepa Parot, impresonâts aromai di 32 agns e che za di timp a varessin vût dirit a misuris cautelârs alternativis.
Joibe ai 21 di Lui si è tignude a Parîs la prime riunion dal comitât strategjic sul avignî de Corsiche cu la partecipazion dal ministri francês pal interni, Gérald Darmanin, e di une delegazion insulâr vuidade dal president dal esecutîf cors, Gilles Simeoni. Di ce che al è stât riferît si à vude une discussion di cuasi cuatri oris, cence tabù, là che si à fissât un sisteme di lavôr e i temis di frontâ. Ae fin, i rapresentants cors si son mostrâts avonde sodisfats ma, viodûts i precedents, la prudence e reste alte. La prossime riunion si tignarà ai 16 di Setembar e e varà al centri il teme dal model economic e sociâl. Tai incuintris seguitîfs a son stâts fissâts altris argoments di confront: la lote cuintri de speculazion finanziarie e imobiliâr, la fiscalitât, la transizion energjetiche e ambientâl, la educazion e la formazion, la salût, lis infrastruturis, la insularitât e i rapuarts cu la Europe, lenghe, culture e identitât. In ducj i apontaments e sarà presinte la cuistion istituzionâl, o sei il nivel di autonomie de isule tal gjestî chestis tematichis. Une volte sierât il cicli di incuintris, il materiâl jessût al sarà presentât al president de Republiche che al decidarà cemût frontâlu e se e coventarà une modifiche costituzionâl. Il ministri Darmanin al à metût daurman su la taule dôs liniis rossis, o sei chê de partignince de Corsiche ae Republiche francese e chê de creazion di “citadins cun plui dirits di altris”.
Font: CorseNetInfos, 21/07/22
I doi ministris de Republiche di Irlande cun deleghe su la lenghe gaeliche e su lis comunitâts che le fevelin a àn fat savê che Údarás na Gaeltachta – la agjenzie di stât responsabile pal svilup economic des areis gaelichis – e ricevarà un finanziament di 3 milions e 169 mil euros, intant che Foras na Gaeilge – la organizazion publiche che i sta daûr ae promozion dal irlandês – a ‘ndi cjaparà 494 mil par disvilupâ lis ativitâts di planificazion linguistiche par chest 2022. La gnove e je stade comunicade in ocasion de scree dal gnûf servizi di promozion e di normalizazion de lenghe gaeliche de citât di Dún Garbhán / Dungarvan. Si trate dal setim plan linguistic che si invie in areis urbanis che si cjatin fûr dal Gaeltacht.
Font: Gov.ie, 14/07/22
Il guvier de Comunitât Autonome Basche al à fat bon il bant anuâl par incressi l’ûs e la presince dal euskara tai puescj di vore dal setôr privât. Pal 2022 a son stâts metûts a disposizion doi milions di euros. Di chescj, plui de metât, a laran par sostignî lis ativitâts des impresis che si son za indotadis di un plan linguistic; 150 mil a saran invezit disponibii pes aziendis che no lu àn; 200 mil par analizâ la situazion linguistiche interne e meti jù i plans; e 550 mil a laran a chês realtâts che a disviluparan azions a pro de lenghe basche che a van plui innà di chês programadis intal plan linguistic.
Font: Noticias de Gipuzkoa, 12/07/22
Fin a un 16% dai istitûts scolastics catalans al varà di cambiâ i progjets linguistics par adatâsi ae gnove normative che il guvier catalan al à imbastît dopo che la magjistrature spagnole e à metût sot atac il model educatîf a imersion in vore fin cumò in Catalogne. La cifre e diven dai risultâts de inchieste davuelte dal dipartiment pe educazion intai centris scolastics dal paîs. I istitûts che no previodin l’ûs veicolâr dal castilian, dongje di chel dal catalan, a àn un an di timp par riorganizâ i lôr plans linguistics in maniere di rivâ a fâlu.
Font: El Nacional, 12/07/22
Lis aministrazions locâls dal Gales a son daûr a imbastî i lôr plans strategjics pe educazion in lenghe galese e a àn timp par fâlu ancjemò fin al prin di Setembar. L’intindiment al è chel di disvilupâ tai prossims dîs agns l’insegnament imersîf par galês. In chest sens, ai 12 di Lui, l’esecutîf galês al à fat savê che si à in program di inviâ 23 gnovis scuelis primariis imersivis e di aumentâ la capacitât di altris 25 che a son za operativis.
Font: Cambrian News, 12/07/22
Intune letare indreçade al guvier francês, il consei dai dirits dal om de ONU al à criticât la decision dal consei costituzionâl che l’an passât al à boçât diviersis disposizions de cussì clamade leç Molac su lis lenghis minoritariis. In particolâr si conteste la decision di censurâ l’insegnament imersîf, discriminant lis lenghis locâls no dome in confront al francês ma fintremai dal inglês. Si domande duncje al esecutîf di Parîs di intervignî daurman par garantî almancul il model a imersion intal sisteme scolastic privât e parificât. Si conteste ancje la boçadure de pussibilitât di doprâ segnâi diacritics e grafemis tipics des lenghis minorizadis e che no si cjatin inte grafie dal francês. Cun chestis decisions, a disin i rapresentants dal organisim de ONU, la France e va cuintri “de dignitât, de libertât, de avualiance e de no discriminazion” des personis che a fevelin une lenghe o a partegnin a di une comunitât minorizade. La censure de leç Molac e ven calcolade une menace al rispiet dal pat internazionâl sui dirits civîi e politics, de convenzion internazionâl sui dirits dai fruts, e dal pat internazionâl sui dirits economics, sociâi e culturâi.
Font: CorseNetInfos, 05/07/22
La organizazion A Mesa pola Normalización Lingüistica e denuncie che i bants publicâts chest an dal esecutîf de Galizie (Xunta) par judâ a comprâ lis novitâts editoriâls e par miorâ lis colezions des bibliotechis locâls a penalizin la lenghe proprie. L’an passât a jerin stâts assegnâts 100 mil euros par comprâ libris gnûfs par galizian e 200 mil par miorâ il patrimoni librari des bibliotechis e, ta chest secont câs, almancul il 25% dai acuiscj al veve di jessi di publicazions in lenghe proprie. Chest an la cifre e je cressude e no di pôc cun 200 mil euros par cjoli libris gnûfs par galizian e 550 mil par miorâ lis colezions des bibliotechis. Dut câs, par chest secont bant, al è sparît il vincul di comprâ almancul il 25% dai libris par galego e al è stât fissât invezit l’oblic di comprâ almancul il 50% des publicazions par castilian. La eliminazion di ogni garanzie pe lenghe proprie e je stade motivade dal esecutîf galizian cul fat che i bants a son finanziâts cun fonts europeans (NextGenerationEU) che a previodaressin vincui linguistics che no lassin spazi di manovre ai guviers locâi.
Font: A Mesa, 04/07/22
Dal 2003 incà il program di volontariât pe lenghe (VxL), sostignût de direzion gjenerâl di politiche linguistiche de Catalogne e coordenât dal Consorzi pe normalizazion linguistiche, al à passât aromai lis 158 mil cubiis formadis. La iniziative si propon di judâ a fevelâ miôr par catalan cul cubiâ personis che a àn une cognossince limitade de lenghe e volontaris che invezit a àn une buine competence linguistiche e a puedin judâlis a fâ pratiche. Vie pal 2021 si àn formadis 7.351 cubiis. Si trate di une cifre in cressi rispiet al an prime cuant che ancje il program di volontariât pe lenghe al jere stât penalizât de emergjence pandemiche. La modalitât virtuâl dal program, inviade tal 2017, e à invezit puartât ae nassite di 9.697 cubiis: 5.259 di chestis dome l’an passât. Des personis che a àn aderît al volontariât l’an passât, dome il 5% al è origjinari de Catalogne e il 70% al è rapresentât di feminis.
Font: Generalitat de Catalunya, 04/07/22
Il guvier des Asturiis al à inviât il percors par meti sù l’ufici pai dirits linguistics, une gnove unitât aministrative che e centralizarà la gjestion di dutis lis denunciis, lis segnalazions e lis domandis di informazion o di jutori fatis indenant dai citadins ae aministrazion publiche in materie linguistiche. La norme istitutive e je previodude intal plan normatîf de aministrazion publiche asturiane pal 2022. La gnove realtât, che no varà une funzion sanzionatorie, e vûl jessi un pas indenant inte metude in vore de normative su la normalizazion linguistiche dentri de aministrazion publiche, sei par chel che si riferìs al asturian che pal galizian fevelât inte part plui ocidentâl de Comunitât autonome. Cun di plui, une volte ad an, e proponarà ancje une relazion sul stât dai dirits linguistics intes Asturiis.
Font: La Voz de Asturias, 02/07/22
Dopo des mobilitazions puartadis indenant intes setemanis stadis di students, professôrs e fameis, la direzion scolastiche di Bordèu / Bordeaux – competente ancje pes scuelis dal Paîs Basc dal Nord sot aministrazion francese (Ipar Euskal Herria) – e à acetât che si dopri il sisteme a imersion par euskara in trê istitûts scolastics de rêt publiche. Plui tal detai, l’ûs veicolâr de lenghe basche si inviarà cul prossim an scolastic tes sezions infantîls (tra 3 e 5 agns) des scuelis di Barkoxe / Barcus e Larraine / Larrau, e ta chês dal prin cicli (fin a 8 agns) tal istitût di Irisarri / Irisarry.
Font: EiTB:, 28/06/22
La universitât di Abertawe / Swansea e à lançât une gnove strategjie cuincuenâl pal galês. Dopo di un lavôr di confront e scolte lât indenant par 18 mês cul personâl, cui students e cui puartadôrs di interès, la direzion dal ateneu e à metût jù un plan strategjic pe lenghe galese pe dade 2022-2027. Il document si poie su cuatri as di intervent, o sei: lavorâ par che la universitât e sedi un lûc di acet par une comunitât multiculturâl e plurilengâl; creâ un ambient che al judi il plui pussibil a favorî i progrès di cui che al è daûr a imparâ il galês; sburtâ la istituzion a lâ ancje plui innà dai standards linguistics fissâts de normative; sostignî la presince dal galês intes ativitâts di ricercje e di inovazion. La strategjie e je compagnade di un plan des azions che al cjape dentri ducj i organisims e i membris de universitât.
Font: Prifysgol Abertawe, 23/06/22
Il catalan si slargjarà in maniere progressive intai centris educatîfs de Catalogne dal Nord, sot aministrazion francese, e tal zîr di un pâr di agns ducj i fruts che a volaran a podaran imparâlu. Al è ce che al previôt l'acuardi sotscrit ai 22 di Jugn a Perpinyà / Perpignan dai rapresentants dal ministeri pe educazion francês, de regjon aministrative de Ocitanie e dal dipartiment dai Pireneus Orientâi. A promovi e a verificâ la metude in vore dal acuardi al è stât incjariât l'ufici public de lenghe catalane (OPCL). A chest acuardi di suaze i vignarà daûr une convenzion che e larà a fissâ i detais pratics de iniziative e che si à sigurât che e sarà firmade in curt.
Font: VilaWeb, 22/06/22
Uns 97,2% dai students a àn sielzût il catalan come lenghe veicolâr pes provis di acès ae universitât che si son tignudis in Catalogne, a front di un 2,8% che al à optât pal castilian. Une cifre in cressi rispiet al an passât cuant che a sielzi la lenghe dal stât al jere stât uns 5% dai fantats. I students a vevin di fâ la lôr sielte par mieç di un formulari anonim, imponût par vie judiziarie, là che a vevin di specificâ se a volevin rispuindi aes domandis dal esam par catalan, par castilian o par ocitan aranês. La rapresentante dal guvier catalan pes universitâts, Gemma Geis, e à declarât che l'intervent de magjistrature spagnole al à pidimentât la organizazion des provis ma si à mostrade cetant sodisfate pe sielte cuasi totâl dai fantats a pro dal catalan.
Font: VilaWeb, 22/06/22