Paîs Catalans: a procès par disubidience il president Torra

Il tribunâl superiôr di justizie de Catalogne al à decidût di inviâ il procediment judiziari cuintri dal president de Generalitat, Quim Torra. Il rapresentant dal guvier catalan al è clamât a rispuindi dal reât di disubidience par vie che, intant de campagne eletorâl pes politichis spagnolis dai 28 di Avrîl, si veve refudât di meti in vore la decision de zonte eletorâl centrâl spagnole che i imponeve di tirâ vie dai edificis de Generalitat i flocs zâi (che a rapresentin une manifestazion di solidarietât cui presonîrs politics), i strissons pe liberazion dai presonîrs e lis bandieris indipendentistis catalanis (esteladas). La zonte eletorâl ju calcolave ducj simbui di part e duncje assimilabii a propagande di partît che e violave la neutralitât domandade aes istituzions intant des campagnis eletorâls. Une interpretazion refudade dal guvier catalan che al viôt i flocs zâi e i strissons tant che part di une campagne pai dirits umans. La publiche acuse e domande par Torra la esclusion di ogni incarghe publiche par un an e vot mês e une multe di 30 mil euros.

Font: VilaWeb, 12/07/19; Naiz:, 12/07/19

Irlande: gaelic sot dal 3% tra i dipendents publics

Daûr dal rapuart presentât ai 11 di Lui dal comissari pe lenghe irlandese, Rónán Ó Domhnaill, dai 20 mil puescj di vore governatîfs de Republiche de Irlande a son a pene 84 chei che a previodin in maniere esplicite la cognossince dal gaelic irlandês. Intai diviers dipartiments ministeriâi a pene il 2,63% dai dipendents al à une buine competence de lenghe irlandese. Pal comissari al covente duncje che il guvier al proviodi daurman a mendâ la leç su la lenghe e a intervignî su lis politichis di reclutament dal personâl in maniere che e sedi previodude la cognossince de lenghe par un numar di posizions une vore plui alt.

Font: RTE, 11/07/19; CnaG, 11/07/19

Ocitanie: prins diplomâts superiôrs des calandretas

Trê students des calandretas a àn otignût pe prime volte il diplome superiôr completant il lôr percors scolastic di plante fûr par ocitan. Lis calandretas a son scuelis a imersion parificadis che a doprin l’ocitan tant che lenghe veicolâr e che a seguissin il program educatîf fissât dal ministeri pe educazion francês. Nassude cuarante agns indaûr la rêt des calandretas e conte in dì di vuê plui di sessante istitûts sparniçâts ator pe Ocitanie che a van des scuelis de infanzie aes superiôrs.

Font: Jornalet, 11/07/19

Paîs Catalans: passe 200 cors estîfs par adults

Si infuartìs la partecipazion ai cors estîfs di formazion intensive par catalan promovûts dal Consorzi pe normalizazion linguistiche (CPNL). La organizazion e ufrìs 213 cors sparniçâts sul teritori dal principât e centrâts intai mês di Lui e di Avost. Chest an lis iscrizions a son stadis 4.272, o sei il 7,5% in plui dal an passât. A partecipâ a son pal 95% personis che a rivin di fûr de Catalogne. Cun di fat, i cors a son pensâts massime pes personis cun mancul abilitâts comunicativis par catalan ma che a àn dibisugne di svicinâsi a di cheste lenghe par integrâsi miôr tal tiessût sociâl e economic de Catalogne.

Font: Generalitat de Catalunya, 09/07/19

Paîs Catalans: in cressi la cognossince de lenghe proprie

Ai 8 di Lui a son stâts presentâts i risultâts de inchieste sui ûs linguistics de popolazion puartade indenant dal Istitût di Statistiche de Catalogne vie pal 2018. I dâts principâi a mostrin che il 94,4% de popolazion al capìs il catalan, l’85,5% al è bon di leilu, l’81,2% di fevelâlu e il 65,3% di scrivilu. Rispiet ae inchieste precedente, che e rimonte al 2013, a son cressudis massime lis capacitâts di scrivi (5%) e di lei (3%). Lis percentuâls a tornin duncje sui nivei di prime de gruesse ondade migratorie che e veve interessât la Catalogne tra il 2003 e il 2008. In dì di vuê, un tierç de popolazion catalane al è nassût fûr de Catalogne. Chel istès plui di trê cuarts de popolazion si cjatin a doprâ il catalan ogni dì. Il catalan al è doprât dal 42% de popolazion che no lu à come lenghe native. I setôrs là che il so ûs al cres di plui a son chei dal cumierç e de sanitât. Il catalan al aumente ancje tes cjacaradis cui compagns di vore, cui amîs e cui vicins.

Bretagne: prime radio par breton de Loire Atlantiche

Cui 9 di Lui e à tacât a trasmeti Radio Naoned, la prime emitente radiofoniche in lenghe bretone dal dipartiment de Loire Atlantiche. Si trate di une radio digjitâl che si pues scoltâ cul sisteme DAB e su Internet, che e trasmet dai studis logâts intal Centri Culturâl Breton di Sant-Ervlan / Saint-Herblain e che si zove dal lavôr di doi dipendents e di un zovin dal servizi civîl. La emitente e nas come sezion distacade di Radio Kerne, che e trasmet dal 1998 inte regjon dal Finistère.

Font: Ouest France, 06/07/19

Cornualie: Londre e poie lis azions a pro dal cornic

Il guvier britanic al à sigurât un finanziament di 200 mil sterlinis par judâ la lenghe proprie e la culture de Cornualie. Trê cuarts des risorsis a laran par finanziâ un program par promovi la cognossince e l’ûs de lenghe corniche. Il rest dai fonts invezit al larà par azions di promozion culturâl. Dome intal 2014 il guvier britanic al à ricognossût la specificitât de identitât corniche cul inserî ancje cheste comunitât tra chês tuteladis par mieç de Convenzion cuadri pe protezion des minorancis nazionâls. Dut câs pe Rêt Europeane pe Avualiance Linguistiche (ELEN) al covente che lis istituzions britanichis si impegnin cun azions politichis e risorsis continuativis a partî de costituzion di un sisteme scolastic a imersion che al ledi des scuelis de infanzie aes secondariis.

Font: Go.UK, 05/07/19; ELEN, 09/07/19

Paîs Basc: cuasi 2 milions pal euskara in Ipar Euskal Herria

Il guvier de Comunitât Autonome Basche, tal stât spagnûl, e l’Ufici public de lenghe basche (Euskararen Erakunde Publikoa) che al opere in Ipar Euskal Herria, o sei il Paîs Basc sot aministrazion francese, a àn rignuvît l’acuardi par promovi in maniere unitarie l’euskara. Il pat, firmât pe prime volte intal 2007, al met a disposizion risorsis par un milion e 930 mil euros. Il contribût principâl, che al è di 520 mil euros, al va ae organizazion AEK che si ocupe dal insegnament de lenghe basche ai adults. Sul insegnament a van ancje altris 496 mil euros che, pe plui part, a son stâts assegnâts a Seaska, la rêt des scuelis a imersion ative tal Paîs Basc sot aministrazion francese. Passe 300 mil euros a van invezit ai media par euskara, massime ae federazion des radios in lenghe basche Euskal Irratiak. Cuasi 180 mil euros a son stâts assegnâts aes organizazions impegnadis intal promovi il basc inte culture e tal timp libar. Altris 355 mil euros a son stâts invezit metûts su progjets specifics di valorizazion dal euskara.

Font: Mediabask, 05/07/19

Man: serie di boi par celebrâ la lenghe proprie

In ocasion de setemane dal manx, la lenghe de famee gaeliche che si fevele te isule di Man, e je stade publicade une serie di sîs boi che a celebrin cheste lenghe. Declarât “estint” intal 2009 de UNESCO, in realtât il manx al è daûr a vivi ta chescj agns une sorte di resuriment ancje se no son plui personis monolengâls o che lu àn di prime lenghe. La serie e à par protagonistis dôs surisutis che a proponin in ogni bol un mût diferent di saludâsi par manx. Ta cheste maniere, in plui di celebrâ la lenghe, si vûl ufrî cualchi frase semplice di podê doprâ tes conversazions di ogni dì ancje ae int de isule che no fevele par manx e ai turiscj che a vegnin a visitâ cheste tiere.

Font: BBC, 03/07/19

Europe: in miârs a Strasburc pai eurodeputâts catalans

Almancul 8 mil personis a àn manifestât ai 2 di Lui a Strasburc, fûr dal Parlament european, par protestâ cuintri de impussibilitât di Carles Puigdemont, Oriol Junqueras e Toni Comín di partecipâ ae riunion di scree de gnove legjislature. I trê dirigjents indipendentiscj catalans a son stâts elets ma no àn podût cjapâ sù la incarghe di eurodeputâts. La zonte eletorâl centrâl spagnole e à pretindût, pe prime volte, che par vê acès al puest di parlamentâr european si ves prime di increditâsi a Madrid. Puigdemont e Comín, che si cjatin in esili in Belgjiche, no àn podût fâlu par vie che se a vessin di jentrâ tal stât spagnûl a saressin arestâts. Tal câs di Junqueras, che si cjate invezit in preson preventive, al è stât il tribunâl suprem spagnûl a impedii di increditâsi. Al è di dî che lis decisions des autoritâts spagnolis a àn cjatât la plene complicitât des istituzions di Bruxelles che a àn permetût cussì che passe doi milions di citadins europeans si cjatin cence dai rapresentants che a àn sielzût in maniere democratiche. Dome cualchi europarlamentâr al à solidarizât in maniere esplicite cui manifestants e, plui tal specific, i bascs di EH Bildu e PNV, i scozês dal SNP, i nazionaliscj flamants, i ecologjiscj Bové e Onesta, la portughese Matias dal Bloc di Çampe e l’irlandês Matt Carthy dal Sinn Féin che, su chest teme, si à scuintrât in aule cul president dal Parlament, Antonio Tajani.

Font: Naiz:, 02/07/19

Paîs Catalans: canâl Twitter par aranês de DGPL catalane

La direzion gjenerâl di politiche linguistiche dal guvier de Catalogne e à ativât un gnûf canâl Twitter dut par aranês, la varietât ocitane fevelade inte Val di Aran. Par mieç di chest gnûf profîl – @occitan_aranes – si metaran in evidence lis gnovis che a puedin jessi plui di interès pe comunitât aranese e, plui in gjenerâl, par chê ocitane. La ativazion di chest canâl si insuaze intal impegn de Generalitat par valorizâ l’aranês intes rêts sociâls e tai sîts istituzionâi dal guvier catalan.

Font: Generalitat de Catalunya, 01/07/19