Al è
soredut un messaç indreçât aes autoritâts europeanis il comunicât
fat rivâ di ETA ae agjenzie France Presse tor de metât di Mai. Cun
di fat, intal test si invide lis istituzions comunitariis a poiâ il
procès inviât par dâ une soluzion definitive al conflit basc.
Ancjemò ai 20 di Otubar dal an passât la organizazion basche e veve
anunciât la fin de lote armade, ma l’imobilisim mostrât fin cumò
dai guviers spagnûl e francês nol jude a fâ pas indenant su cheste
strade e al va dilunc a mantignî situazions che no àn plui nissune
justificazion tant che lis misuris di ecezion cuintri dai presonîrs
bascs e il dinei di ativitât legâl par diviersis organizazions
politichis de çampe indipendentiste. Intal so comunicât ETA e
invide ducj i sogjets politics e sociâi bascs a inviâ un dialic che
al permeti di superâ lis resons dal conflit e di vierzi un senari di
pâs e di libertât pal Paîs Basc. Euskadi Ta Askatasuna e fâs po
savê di vê nomenât une delegazion par imbastî un dialic diret cui
guviers spagnûl e francês.
Pai rapresentants dal front
nazionalitari si trate di un altri pas indenant che al mostre la
volontât di ETA par rivâ a di une soluzion politiche dal conflit.
Tant i nazionaliscj moderâts dal PNV che i socialiscj a àn
rispuindût che no acetin nissun invît de bande di ETA e che l’unic
pas che si spietin de organizazion al è che si disfi. Pal guvier
spagnûl (che al è tes mans dal PP) no dome no je nissune intenzion
di dialogâ cun ETA, ma no je nancje dibisugne di sogjets
internazionâi che a viodin dal disarmament de organizazion basche.
Chest ultin riferiment al è pes declarazions de Comission
internazionâl di control che tai ultins mês e à verificât la
astension di ogni azion violente de bande di ETA e il so percors di
disarmament. Di Parîs, intant, si à vût dome une declarazion di
poie al guvier di Madrid.
Font:
Gara, 16/05/12
Nessun commento:
Posta un commento