19/10/13

Paîs Basc: miârs di personis in place par Herrira

A jerin almancul 65 mil lis personis che sabide ai 5 di Otubar a àn sfilât pes stradis di Bilbo / Bilbao par protestâ cuintri de operazion di polizie metude in at cuintri de organizazion Herrira e par domandâ il rispiet dai dirits dai presonîrs bascs e la soluzion pacifiche dal conflit. La iniziative e à viodût la adesion de maiorance sindacâl basche, di cetancj partîts politics, di organizazions sociâls di ogni sorte e di diviersis aministrazions locâls tant che la Provincie di Gipuzkoa e la assemblee dai sindics bascs Udalbiltza. La manifestazion e ven daûr di cetantis iniziativis di solidarietât cui arestâts che si son tignudis dilunc vie di dute la setemane in disinis di localitâts dal Paîs Basc e no dome.

Paîs Basc: libertât condizionâl pal torturadôr Galindo

L’ufici centrâl di vigjilance penitenziarie spagnole al à concedût la libertât condizionâl al ex gjenerâl de Guardia Civil Enrique Rodríguez Galindo che al jere stât condanât a 75 agns di preson pes sôs responsabilitâts intal secuestri, inte torture e intal sassinament dai militants bascs Joxean Lasa e Joxi Zabala. I doi a jerin stâts secuestrâts a Baiona / Bayonne intal Otubar dal 1983 dai GAL, formazion paramilitâr che e veve in Rodríguez Galindo un dai siei responsabii principâi. I lôr rescj a jerin stâts identificâts dome intal 1995. Rodríguez Galindo al jere stât condanât intal 2001 adun cun altris membris dai GAL, ma al veve passât a pene cuatri agns in preson prime di jessi trasferît ai domiciliârs. Cumò i è stade dade fintremai la libertât condizionâl, intant che centenârs di militants bascs impresonâts par vie de lôr ativitât politiche o par reâts no di sanc si ricjatin no dome a vê di scontâ dute la lôr pene in preson, ma fintremai a no podê gjoldi dai sconts di pene previodûts de leç spagnole: une diference di tratament che e palese a clâr la nature repressive des azions judiziariis puartadis indenant intal Paîs Basc no par resons di justizie, ma cul fin di colpî la part plui ative e vivarose de societât basche.
Font: Naiz:, 04/10/13; VilaWeb, 04/10/13

Man: sucès de aplicazion par imparâ il manx

Il manx, la plui piçule tra lis lenghis de famee che e cjape dentri ancje il gaelic irlandês e chel scozês, al jere stât declarât estint de UNESCO intal 2009. Inte realtât la lenghe e je ancjemò vive e inte isule di Man e ven fevelade di plui di un miâr di personis. Cun di plui l’interès par cheste lenghe al va dilunc a cressi ancje fûr de isule. Par vignî incuintri a cheste domande, nancje un an indaûr, la Manx Heritage Foundation e veve dât fûr une aplicazion gratuite par smart phones e tablets. A vuê a son plui di 4 mil lis personis che le àn za discjariade, intant che lis lezions di manx sei su la isule che vie internet a cjatin simpri plui frecuentadôrs.
Font: BBC, 01/10/13

Bretagne: la educazion par breton e va dilunc a cressi

L’ûs veicolâr de lenghe bretone intes scuelis al va dilunc a cressi. Lis iscrizions intal an scolastic 2013 – 2014 a son aumentadis dal 4,3% e a segnin il trentesisesim an seguitîf di incressite. Plui in detai, i istitûts bilengâi dal setôr public (Div-Yezh) a contin cumò 6.662 students cuntun aument dal 6,5% rispiet al an prime, lis scuelis catolichis Dihun a àn invezit 4.971 iscrits cuntune incressite dal 3%, intant che lis scuelis a imersion Diwan a àn 3.705 students e un aument des iscrizions dal 2,2%. Si trate di risultâts che a palesin il cressi de cussience de impuartance de lenghe bretone framieç des fameis, ma ancje il lavôr positîf puartât indenant no dome des scuelis ma ancje dal Publik ar Brezhoneg, o sei l’Ufici public pal breton. No mancjin però i elements critics. Cun di fat, l’aument dai students al domande ancje une incressite di insegnants specializâts che invezit a tachin a mancjâ par vie de poie scjarse che il guvier francês al da ae formazion par breton.
Font: NPLD, 30/09/13

Kurdistan: prometudis riformis pai curdis in Turchie

Il prin ministri turc Recep Tayyip Erdogan al à fat savê che il so guvier al à in cantîr diviersis riformis che a laran ancje a pro de comunitât curde che e vîf dentri dai confins de Turchie. Si fevele di une modifiche de leç eletorâl che e varès di sbassâ dal 10 al 5% o fintremai di puartâ ae eliminazion totâl dal soiâr par podê jessi rapresentâts in Parlament. Chest proviodiment al varès di favorî duncje i partîts turcs plui piçui e une rapresentativitât plui fuarte des formazions politichis curdis. Une altre misure che e varès di jentrâ in vore e je la pussibilitât di doprâ i nons des citâts dal Kurdistan setentrionâl no dome par turc, ma ancje par curdi. Sul front de educazion invezit l’ûs de lenghe curde al sarà permetût intai istitûts scolastics privâts. Lis gnovis a son stadis cjapadis in maniere avonde frede de bande dai rapresentants de comunitât curde dal moment che si trate di misuris une vore limitadis che no rispuindin aes domandis fatis indenant inte suaze dal procès par une soluzion pacifiche dal conflit che par agns al à viodût cuintri lis autoritâts turchis e il PKK. Si è di fat une vore lontans dal garantî ai curdis la pussibilitât di studiâ la e in lenghe curde e ancje de liberazion dai passe mil militants curdis impresonâts.
Font: BBC, 30/09/13

Paîs Catalans: maree in place tes Baleârs pal catalan

Ai 4 di Otubar la assemblee dai docents des isulis Baleârs e à decidût di suspindi il siopar cuintri de metude in vore dal decret su lis lenghis fat bon dal guvier de comunitât autonome des isulis par regolâ l’insegnament des dôs lenghis uficiâls des isulis, ven a dî catalan e spagnûl, e dal inglês. Il proviodiment al cjape il puest di chel dal 1997 che al viodeve il catalan tant che lenghe di riferiment par sostituîlu cuntun implant là che a fâ di paron a son il spagnûl e l’inglês. Il cussì clamât decret sul trilinguisim volût de diestre spagnoliste (PP) che e je cumò al guvier des isulis si è però cjatât denant di une oposizion dure no dome dai partîts catalaniscj e di çampe, ma ancje dai insegnants, dai students e dai sindacâts che a difindin la funzion centrâl de lenghe catalane.

Sami: in Svezie violâts i dirits des comunitâts nativis

Ancje la comissarie svedese cuintri de discriminazion, Agneta Bruberg, e à criticât la politiche dal guvier intai confronts dai sami. Ancjemò intal 1977 la Svezie e à ricognossût ai sami il status di nazionalitât native, ma – e spieghe la Bruberg – no à po jamplât chest ricognossiment cun contignûts concrets intal cjamp dai dirits par mieç di une normative di pueste. Un tant si lu viôt une vore ben par chel che al rivuarde i dirits su lis tieris che a partegnin par tradizion ai sami. Un dai câs plui resints al è chel dal progjet de multinazionâl Beowulf Mining PLC par vierzi un gnûf sît minerari a Gállok / Kallak, une citadine di 3 mil abitants che si cjate juste disore dal circul polâr artic. La popolazion locâl cu la poie di militants sami e à blocât plui voltis lis stradis di acès al sît par impedî che la compagnie minerarie e puedi inviâ lis esplorazions, ma e je stade atacade cun violence de polizie svedese. Lis autoritâts dal paîs a van dilunc a no tignî cont des protestis dai sami, ancje dopo de poie che ur è rivade de comission de ONU cuintri des discriminazions raziâls. Cun di plui, vie pal Astât, il guvier svedês al à autorizât une altre multinazionâl a disfrutâ i dipuesits di nichel che si cjatin intes tieris dai sami.
Font: Finugor, 27/09/13

Scozie: ralentade la pierdite dal gaelic

I dâts dal ultin censiment a mostrin che la diminuzion progressive dai scozês che a fevelin par gaelic e je daûr a sbassâsi in maniere significative. Cun di fat, se il censiment dal 2001 al segnave un mancul 11 par cent intal numar des personis che a dopravin cheste lenghe celtiche, chel dal 2011 al mostre une diminuzion di a pene un 1,2 par cent, ven a dî di 59 mil a 58 mil personis. Cun di plui, i risultâts dai dâts linguistics cjapâts sù cul censiment e comunicâts che nol è tant, a mostrin fintremai un aument dal 0,1 par cent di chei che a fevelin par gaelic inte fasse di etât sot dai vincj agns. Il ministri scozês pes lenghis, Alasdair Allan, al pant dute la sô sodisfazion par chescj dâts che a mostrin cemût che i invistiments fats sul gaelic intai ultins agns a son daûr a puartâ dai risultâts evidents e, ai numars dal censiment, al zonte ancje l’aument dal 12 par cent dai fruts che a tachin il lôr percors educatîf in scuelis che a àn il gaelic tant che lenghe veicolâr. A palesâ sodisfazion par chescj risultâts al è ancje Iain Campbell, president de agjenzie pe lenghe Bòrd na Gàidhlig. La incressite dal interès pal gaelic e dal numar di fruts che a studiin ta cheste lenghe al è testemoneât ancje dal aument dai istitûts che a doprin il gaelic pal insegnament ancje fûr de aree là che la lenghe e je ancjemò avonde fevelade; baste pensâ che a Glaschu / Glasgow a son za dôs lis scuelis a imersion e che intal mês di Setembar e à tacât lis lezions la prime scuele gaeliche di Edimburc.
Font: BBC, 26/09/13

Scozie: sì al gnûf plan pal gaelic di Glasgow

La aministrazion comunâl di Glaschu / Glasgow e à fat bon il so gnûf plan pe lenghe gaeliche. Il document al ten dentri lis politichis linguistichis che si intint svilupâ intai prossims cuatri agns par promovi il gaelic inte educazion, inte culture e intal mont dal lavôr. Il plan al è za stât al centri di une consultazion publiche e cumò, pal so vie libare definitîf, i mancje dome la aprovazion dal Bòrd na Gàidhlig, o sei la agjenzie scozese pe lenghe gaeliche. I contignûts dal plan a àn chê di vignî incuintri e svilupâ ancjemò di plui la popolaritât che cheste lenghe e je daûr a cjatâ dentri de societât scozese.
Font: BBC, 26/09/13

Ocitanie: Bastir!, gnûf progjet politic ocitan

Al à non Bastir! il gnûf progjet politic ocitan che al è daûr a svilupâsi intes regjons meridionâls dal stât francês, ma plui che un partît al è un cartel che al met adun i candidâts che a condividin lis liniis programatichis di chest moviment che al à chê di confrontâsi cui eletôrs intes elezions comunâls dal 2014. Bastir! al met in prin plan la valorizazion de lenghe e de culture ocitane, viodudis tant che strument di cambiament che al pues vê un impat fuart ancje sul plan sociâl, economic e ecologjic. Il moviment, di fat, al puarte indenant un progjet che al va cuintri dal centralisim francês e che al propon di superâ il liberisim salvadi di une economie regolade dai marcjâts, par svilupâ modei economics e sociâi gnûfs che a metin al centri lis comunitâts locâls e l’ambient. I candidâts che a àn za aderît al progjet a rivin di esperiencis politichis diviersis, che a van di là dal ocitanisim politic storic e a lassin fûr dome la diestre nazionaliste francese, e tal câs che a sedin elets a metaran sù une assemblee ocitaniste che e deventarà lûc di riflession e di confront sui temis di interès public. Par cumò Bastir! al à za cjatât candidâts in Lenghedoc, Aquitanie, Provence e in altris regjons de Ocitanie, ma la liste definitive des candidaturis si cognossarà dome ai 9 di Novembar.
Font: La Dépêche du Midi, 25/09/13; bastir2014.com

Galizie: tais ae educazion par galizian intal Bierzo

Il guvier de comunitât autonome di Castilie e León al à decidût di scancelâ il program di imersion linguistiche par galizian de scuele superiôr di Cacabelos, un dai cuatri istitûts di educazion secondarie de regjon dal Bierzo là che si studie par galizian. Cun di plui, il galizian al è stât gjavât tant che materie facoltative ancje dal liceu locâl, in maniere che cumò, par cui che al à doprât cheste lenghe pai siei studis, no si à plui la pussibilitât di otignî il diplome che al certifiche la competence linguistiche par galizian. Chê dal Bierzo e je une regjon che, dal pont di viste aministratîf, e je fûr dai confins de Galizie, ma che e parten a cheste comunitât par lenghe, culture e identitât. In dì di vuê si calcole che a sedin uns 40 mil lis personis che a fevelin ancjemò par galizian. La decision dal guvier di Castilie e León e je stade motivade cun resons di sparagn, ma e va cuintri dai acuardis uficiâi cjapâts di cheste comunitât cul guvier de Galizie. Acuardis che a permetevin a passe un miâr di students di doprâ il galizian intal lôr percors di studi.
Font: Praza Pública, 23/09/13