Cossovo: siopars e gnovis protestis de minorance serbe

I magjistrâts, i funzionaris judiziaris e i rapresentants politics espression de minorance serbe in Cossovo a àn fat siopar ai 25 di Març par protestâ cuintri de sospension de presidente dal tribunâl di Mitrovica, Liljana Stefanovič, e de decision dal consei judiziari dal Cossovo di meti sù une comission di inchieste par investigâ sul so compuartament. Daûr di chestis decisions al è l’incuintri che la magjistrade, intune cun altris membris de minorance, e à vût a Belgrât cul president serp Aleksandar Vučič dopo che lis istituzions cossovanis si son refudadis di permeti che lis urnis pes elezions serbis dai 3 di Avrîl a fossin metudis ancje tai comuns dal Cossovo là che a vivin comunitâts serbis. Un dinei, chel des autoritâts di Pristina, che par Vučič al va cuintri dai acuardis di Bruxelles dal 2013 che a cirivin di normalizâ i rapuarts tra Serbie e Cossovo. In plui dal siopar, ai 25 di Març si son tignudis ancje manifestazions di proteste cu la partecipazion di centenârs di lôr a Mitrovica e in altris localitâts a maiorance serbe.

Font: Balkan Insight, 25/03/22

Cossovo: ancjemò scuintris e violencis a Mitrovica

No si fermin lis violencis e lis tensions inte part setentrionâl dal Cossovo a maiorance serbe. La mediazion europeane e veve permetût di cjatâ un acuardi tra lis parts dopo che il guvier di Pristina al veve introdusût l’oblic pai veicui cun targhe serbe di gjavâle e sostituîle cuntune cossovane cuant che a passavin il confin: une decision che e veve causât scuintris tra i membris de comunitât serbe che a vevin ocupât il passaç di confin di Brnjak / Bernjak e i reparts speciâi de polizie mandâts des autoritâts statâls. Par garantî la tignude de intese sul puest a jerin stâts inviâts ancje reparts des fuarcis di interposizion de NATO. Cuant che la crisi e someave aromai superade, i cuartîrs setentrionâi di Mitrovica – aree là che si centre la plui part de minorance serbe – a son stâts interessâts di une operazion di polizie che e à puartât al arest di vot personis. La iniziative e jere indreçade a colpî la criminalitât organizade ma, te clime di tension che za e jere, e je stade lete come une vere invasion puartant grups di serps a tirâ sù baricadis pes stradis a e confrontâsi cu la polizie a colps di molotovs. Tai scuintris un serp al è stât ferît cuntune arme di fûc. Il president serp, Aleksandar Vučić, intant di un incuintri cui rapresentants de minorance, ju à invidâts a rispuindi in maniere pacjifiche ma al à ancje zontât che a àn il dirit di difindisi cuant che a son atacâts cu la violence e che, se al ves di sucedi, la Serbie ju poiarà. Invîts ae calme a son rivâts sei dai Stâts Unîts che de UE che e à ancje invidât lis autoritâts di Pristina a no meti in at azions unilaterâls.

Font: Balkan Insight, 13/10/21

Cossovo: tensions e violencis al confin cu la Serbie

A butâ gnove benzine sul fûc des tensions tra lis istituzions cossovanis e la minorance serbe, che e vîf massime te aree setentrionâl de regjon balcaniche, si à la decision dal guvier di Pristina di introdusi l’oblic pai veicui cun targhe serbe di gjavâle cuant che a passin il confin par sostituîle cuntune cossovane. Il proviodiment al va a colpî cuasi dome i membris de minorance serbe che a son la grande maiorance di chei che a àn mieçs imatricolâts in Serbie e che a passin dispès il confin. Par protestâ cuintri di chel che a calcolin un abûs, par diviers dîs a dilunc, disinis di membris de comunitât serbe a àn ocupât e blocât il passaç di confin di Brnjak / Bernjak. Il guvier cossovan al à mandât sul puest i reparts speciâi de polizie statâl. La situazion e à causât diviers incidents. I media locâi a àn segnalât il feriment di trê oms de comunitât serbe che a saressin stâts pacâts de polizie: episodi che cheste ultime e à dineât (ricognossint però che trê personis a son finidis in ospedâl ma cence spiegâ il parcè).

Font: Balkan Insight, 24/09/21

Cossovo: gnovis tensions pe condane di un deputât serp

La condane a doi agns di preson dal deputât de Srpska Lista, Ivan Todosijevič, par intolerance etniche o religjose de bande de cort di apel dal Cossovo e à discjadenât la proteste sei de minorance serpe dal paîs che des autoritâts di Belgrât. Ai 25 di Avost i judiçs serps dal distret di Mitrovica a àn fat siopar par denunciâ che il procès imbastît cuintri dal parlamentâr nol à rispietât lis regulis fissadis dai acuardis jenfri Cossovo e Serbie. La denuncie e je stade sostignude ancje dai aministradôrs dai comuns cossovans a maiorance serbe, intant che il partît di racuelte de minorance – la Srpska Lista – al à fevelât di sentence politiche. Todosijevič al è stât condanât par vê declarât che i fats capitâts a Racak / Recak intal 1999, là che a vevin pierdût la vite 45 cossovans albanês, nol jere un maçalizi indiscriminât di civîi ma une azion militâr cuintri dai milizians dal UÇK. La vicende e presente inmò dai aspiets pôc clârs e la sô interpretazion e va dilunc a dividi cun fuarce serps e cossovans, ancje parcè che propit chest episodi al è stât doprât par justificâ i bombardaments de NATO su la Jugoslavie.

Font: Balkan Insight, 25-26/08/21

Cossovo: in cressi i ats di violence cuintri dai serps

La polizie cossovane e à arestât trê personis acusadis di vê pacât ai 17 di Avost un fantat serp a Mitrovica par vie de sô partignince nazionâl. Si trate dal cuart episodi di violence etniche cuintri di membris de minorance serbe che e vîf in Cossovo tal zîr di un mês. Su la cuistion al è intervignût ancje il guvier di Belgrât par marcâ cemût che chescj episodis a sedin cressûts une vore dal principi di chest an par vie dai discors di intolerance cuintri de comunitât serbe che a rivin dal gnûf guvier cossovan. Par cjalcjâ la coresponsabilitât istituzionâl che e je daûr di chestis agressions, il guvier serp al à segnalât che un dai responsabii dal ultin at di violence capitât a Mitrovica al partignarès aes fuarcis di polizie cossovanis: declarazion che par cumò no je stade ancjemò smentide dal guvier di Pristina.

Font: Balkan Insight, 18/08/21

Cossovo: minorancis decisivis pe gnove maiorance

Tes elezions politichis cossovanis dai 14 di Fevrâr il moviment Vetevendosje al à cjapât plui dal 48% dai consens e 56 parlamentârs e al larà a vuidâ il paîs balcanic intai prossims agns. Il sucès al nas in primis de disilusion di une gruesse part de popolazion pes politichis e pai compuartaments di chei altris partîts che si vevin alternâts al guvier. Il Partît Democratic dal Cossovo (PDK) al à vût pôc plui dal 17% dai vôts e 20 elets, la Leghe Democratiche dal Cossovo (LDK) e je colade al 13% dai consens otignint juste 15 deputâts e la Aleance pal Avignî dal Cossovo (AAK) e à cjapât sù par jù il 7% des preferencis e 9 parlamentârs. La Srpska Lista, partît leât ad in dopli cul guvier di Belgrât, e à otignût ducj i 10 puescj risiervâts ae minorance serbe cul 5,54% dai vôts. A front di une maiorance parlamentâr di 61 elets e devente decisive la posizion dai rapresentants des comunitâts plui piçulis che si dividin chei altris 10 puescj garantîts aes minorancis. Cheste prospetive, pronosticade bielzà ae vilie dal vôt, e veve sburtât i partîts plui grues a lavorâ sot vie par indreçâ il vôt su chei candidâts des minorancis che ur jerin plui favorevui.

Font: Balkan Insight, 15/02/21

Cossovo: crepaduris intal model eletorâl “etnic”

20 dai 120 puescj dal Parlament dal Cossovo a son risiervâts aes minorancis etnichis. Di chescj, par solit, 10 a van a rapresentants de comunitât serbe e 3 a chei de minorance bosgnache. Tes elezions che si tignaran ai 14 di Fevrâr il moviment Vetevendosje al ven dât tor dal 48% dai consens, un risultât che i permetarès di guviernâ ancje dome cu la poie di cualchidun tra i deputâts des minorancis. Une prospetive che e preocupe e no pôc la part de comunitât serbe plui leade al guvier di Belgrât. Il vôt des minorancis al devente cussì centrâl intal scuintri politic. Ve che alore la Union Democratiche Sociâl e à acusât la Srpska Lista, partît leât ad in dopli cul guvier di Belgrât e che tes ultimis elezions al à simpri otignût ducj i dîs puescj risiervâts ae minorance serbe, di zuiâ sporc. Si stime che il partît al puedi fâ stât su almancul 10 mil vôts in plui di chei che i coventin par sigurâsi i dîs deputâts e che ju implearà par mandâ in Parlament candidâts “amîs” che si presentin intes listis di altris minorancis. Sot de lint a son in particolâr il partît bosgnac de Comunitât Unide (Ujedijnena Zajednica) e il moviment Iniziative Rom. Dut câs, a movisi ta cheste direzion, no saressin dome i serps. Di fat al è stât segnalât ancje il câs di un candidât albanês che si presente cul Gnûf Partît Democratic, che al varès invezit di rapresentâ i bosgnacs.

Font: Balkan Insight, 28-29/01/21

Bosgne / Cossovo: tensions etnichis e minorancis discriminadis

Intal ultin rapuart de organizazion Human Rights Watch dedicât ae Europe centrâl e sudorientâl si segnale cemût che a son diviers i stâts là che i dirits umans, chei des minorancis, la libertât di stampe e il rispiet des garanziis ufiertis de leç a son sot menace. Par chel che al rivuarde i dirits des comunitâts minorizadis si segnale, in particolâr, la situazion dal Cossovo dulà che, dongje des tensions simpri vivis tra la maiorance albanese e lis comunitâts serbis, si segnalin lis discriminazions patidis massime des minorancis rom, ashkalis e egjizianis. Par chel che al rivuarde la Bosgne, se la atenzion si centre simpri di plui su lis cundizions disperadis di miârs di dispatriâts che a domandin asîl, Human Rights Watch e ricuarde ancje che tal paîs balcanic a son inmò fuartis lis divisions etnichis tra bosgnacs, cravuats e serps e lis discriminazions intai confronts des minorancis internis.

Font: Balkan Insight, 13/01/21

Cossovo / Serbie: si slontane la nassite de Zajednica

Ai 13 di Otubar il prin ministri cossovan Avdullah Hoti al à sierât la puarte ae istituzion in timps curts de Zajednica, o sei la Associazion dai Comuns Serps dal Cossovo. Par Hoti no je nissune pussibilitât che cheste istituzion e cjapi vite fintremai che no si rivarà a di un ricognossiment uficiâl dal Cossovo de bande de Serbie, ipotesi cheste che e je ben lontane dal concretizâsi. In plui di incressi inmò di plui la tension cu lis autoritâts di Belgrât, la posizion dal prin ministri cossovan e à sustât ancje lis istituzions europeanis che a son daûr a cirî une mediazion tra lis parts. Peter Stano, puartevôs de UE pe politiche foreste, al à ricuardât cemût che il Cossovo ancjemò tal 2013 al veve cjapât un prin impegn pe costituzion de Associazion, ratificât a maiorance dal so stes Parlament. Po a Bruxelles, tal 2015, al veve concuardât i detais di cheste istituzion che e varès di vê competence su educazion, disvilup economic, salût e planificazion teritoriâl e finanziaments direts dal guvier serp.

Font: Balkan Insight, 14/10/20

Cossovo: minorancis penalizadis des gnovis regulis eletorâls

La comission eletorâl centrâl dal Cossovo e à dât fûr une circolâr là che si previôt che tes prossimis elezions parlamentârs in program ai 6 di Otubar a podedin votâ dome i citadins che a presentin un document identificatîf emetût des autoritâts cossovanis. La decision e à jevât lis protestis une vore duris dai rapresentants politics e istituzionâi des comunitâts serbis e montenegrinis dal Cossovo che le judichin contrarie ae stesse suaze normative statâl. Se e fos metude in vore, cheste circolâr e impedirès di votâ a cetancj membris des dôs minorancis che, cundut che a son iscrits intes listis eletorâls, a doprin cjartis di identitât dadis fûr des autoritâts serbis. Pal cjâf dal ufici pal Cossovo dal guvier serp, Marko Djurić, se no interven la comunitât internazionâl par comedâ la situazion lis prossimis elezions cossovanis a pierdaran ogni legjitimitât. I citadins a son clamâts a votâ in maniere anticipade pal gnûf Parlament dopo des dimissions dal prin ministri Ramush Hardinaj, sot acuse par crimins di vuere.

Font: Balkan Insight, 12/09/19

Cossovo: dubis sui risultâts des comunâls inte aree serbe

Intes elezions comunâls che si son tignudis ai 19 di Mai inte aree a maiorance serbe dal Cossovo la vitorie e je lade pardut ae Srpska Lista, partît di racuelte de comunitât serbe leât ad in dopli cul guvier di Belgrât. Diviers osservadôrs internazionâi a àn però jevât critichis su la plene democraticitât dal vôt. La Srpska Lista e à passât il 90% dai consens in ducj i cuatri comuns a maiorance serbe, o sei Mitrovica / Kosovska Mitrovica, Leposavić / Leposaviq, Zvečan / Zveçan e Zubin Potok, ma chest risultât al diven dal fat che no si à presentade nissune altre liste serbe. Cun di fat, il partît Justizie, Democrazie, Serbie al à decidût di no partecipâ al vôt par vie de clime di intimidazion intai siei confronts, massime dopo dal sassinament dal so leader Oliver Ivanović che i siei responsabii a restin ancjemò discognossûts. Si son invezit presentâts doi moviments albanês – il PDK (Partît Democratic dal Cossovo) e Vetevendosje (Autodeterminazion) – che però a àn cjapât sù dome i vôts de piçule comunitât di lenghe albanese che ancjemò e vîf inta chescj comuns.

Font: Balkan Insight, 21/05/19

Albanie: plui dirits pai albanês di Macedonie e Montenegro

Inte riunion di guvier dai 10 di Mai l’esecutîf vuidât dal prin ministri Edi Rama al à decidût di slargjâ ancje ai citadins macedons e montenegrins di nazionalitât albanese i stes dirits di acès al lavôr dai citadins albanês. La misure e vâl dome par chei puescj di vore là che no si domande in maniere esplicite la citadinance albanese e e à un valôr plui simbolic che pratic. La stesse decision e jere stade cjapade ancjemò intal 2014 pai cossovans di lenghe albanese e pe minorance albanese che e vîf in Serbie. Il messaç che si vûl dâ al è chel di une Albanie vierte, ancje sul plan dal lavôr, a ducj i albanês, di là dal stât là che a son citadins. Par chel che al rivuarde la Macedonie dal Nord i albanês a rapresentin un cuart de popolazion totâl, intant che in Montenegro a son uns cinc par cent dal totâl.

Font: Balkan Insight, 14/05/19

Cossovo: scuintri sul progjet di un comun sôl par Mitrovica

Ai 22 di Zenâr, in ocasion dal incuintri cul sindic di Mitrovica Sud Agim Bahtiri, il president dal Cossovo Hashim Thaci al à declarât che il procès di unificazion de citât no si pues fermâ e al à dât la sô poie plene ae propueste di Bahtiri di fusion des dôs parts de citât – chê cossovane-albanese a Sud e chê serbe a Nord – intun comun unic. Il sindic di Mitrovica Sud al à fat indenant cheste propueste sul finî dal mês di Novembar stât e al à presentât ae Assemblee dal Cossovo une petizion, sostignude di 16 mil personis, par lâ ta cheste direzion. La poie di Thaci ae propueste e à jevât lis critichis dal responsabil dal ufici pal Cossovo dal guvier di Belgrât, Marko Djurić, che al à ricuardât che il ricognossiment di Mitrovica Nord tant che comun autonom al è sei tal plan di pâs, sei tai acuardis firmâts l’an passât a Bruxelles dal stes president cossovan. Djurić al à po invidât lis autoritâts di Pristina a meti fin aes menacis cuintri de minorance serbe. Pal sindic dimissionari di Mitrovica Nord, Goran Rakić, la “unificazion” sostignude di Thaci no sarès nuie di plui di un tentatîf di completâ la “netisie etniche” de comunitât serbe ancje de ultime ponte di citât di dulà che no jere stade eliminade tal 1999.

Font: KoSSev, 23/01/19

Cossovo: l’esercit al divît inmò di plui serps e cossovans

Ai 14 di Dicembar il Parlament cossovan, cun 105 vôts su 120, al à fate buine la leç che i assegne ae fuarce di sigurece dal Cossovo lis carateristichis e lis competencis di un esercit vêr e no plui chês di un cuarp di polizie. Chest cambi al è stât fat cuntune leç ordenarie e cence di un mudament costituzionâl in maniere di no vê bisugne de poie ancje di doi tierçs dai vincj deputâts assegnâts aes comunitâts minoritariis dal Cossovo. Il vôt al è stât boicotât de Srpska Lista, il moviment di racuelte de minorance serbe che di bessôl al conte dîs parlamentârs e che, fin cumò, al veve rivât a impedî ogni tentatîf di meti in pîts un esercit cossovan par vie costituzionâl. Il puartevôs dal moviment, Goran Rakić, al à fat savê che la leç e sarà impugnade denant de cort costituzionâl. Al à ancje fat capî che se cualchi repart di chest esercit al ves di provâ a jentrâ tes areis a maiorance serbe al sarà calcolât di fuarce di ocupazion ilegâl. La uniche poie, sul plan internazionâl, e je rivade dai Stâts Unîts, intant che sei la UE che la NATO a àn judicât in maniere negative la iniziative, massime pal fat di no vêle concuardade cu lis minorancis, in primis chê serbe.

Font: Balkan Insight, 14/12/18

Cossovo: dimissions e protestis dai sindics serps

Il sindic de part di Mitrovica a maiorance serbe, Goran Rakić, al à decidût di dimetisi par protestâ cuintri dai dazis metûts dal guvier cossovan su dutis lis marcjanziis che a rivin de Serbie e cuintri des violazions dai dirits de minorance serbe che e vîf dentri dai confins dal Cossovo. La stesse strade e je stade anticipade ancje di altris aministradôrs de comunitât serbe che a àn za sierât ogni linie di comunicazion cu lis istituzions cossovanis. Intune situazion za une vore tirade, la decision cjapade dal guvier di Pristina ai 21 di Novembar di incressi i dazis dal 10 al 100% e à esasperât ancjemò di plui il scuintri tra la minorance serbe e lis istituzions cossovanis di une bande e tra il guvier di Pristina e chel di Belgrât di chê altre.

Font: Balkan Insight, 27/11/18

Cossovo/Serbie: alte tension ancje tal incuintri di Bruxelles

Nancje la mediazion europeane e je stade buine fin cumò di cuietâ lis tensions in vore jenfri Cossovo e Serbie. Cun di fat nol è durât nancje une ore l’incuintri tra il president serp Aleksandar Vučić e chel cossovan Hashim Thaci che si è tignût a Bruxelles ai 8 di Novembar. Il rapresentant serp al à bandonât la riunion e al à fat savê che no si varan altris incuintris fintremai che il Cossovo nol gjavarà i dazis dal 10% metûts su dutis lis marcjanziis che a rivin de Serbie e de Bosgne. Par Vučić lis tarifis a son une violazion palese dal acuardi sul libar cumierç inte aree centrieuropeane (CEFTA). A violâ i acuardis in vore al sarès po ancje il progjet di meti sù un esercit cossovan e di logânt une part intes areis a maiorance serbe. Chescj elements di scuintri si son zontâts aes tensions nassudis za chest Astât par vie dai ritarts inte aprovazion dal statût de Zajednica, la Associazion dai Comuns Serps dal Cossovo, e des declarazions rivadis des istituzions cossovanis suntun pussibil scambi di teritori tra i doi paîs par ridusi il numar de minorance serbe in Cossovo e di chê albanese in Serbie.

Font: Balkan Insight, 08/11/18; RFE RL, 09/11/18

Serbie: al reste cjalt il teme des minorancis

Il teme des minorancis al va dilunc a movi la discussion politiche e lis tensions tra Serbie, Cossovo e Albanie. E reste in pîts, di fat, la cuistion de Zajednica, la Associazion dai Comuns Serps dal Cossovo, che il stampon dal so statût al varès vût di jessi pront ai 4 di Avost ma che ancjemò no si sa nuie di precîs in merit. Ta chestis zornadis il ministri pai forescj de Albanie, Ditmir Bushati, si è cjatât cuntune delegazion de minorance di lenghe albanese che e vîf in Serbie, te aree di Preševo / Presheva, e al à garantît l’impegn par che la lôr tutele e sedi almancul compagne di chê dai serps cossovans. Il president de Serbie, Aleksandar Vučić, al à invezit fat savê che ai 9 di Setembar al sarà in Cossovo e che ta chê ocasion al presentarà lis sôs propuestis par une soluzion dai contrascj tra i guviers di Pristina e Belgrât e pai problemis de minorance serbe dal Cossovo: temis che a saran al centri ancje di un incuintri tra lis parts che al varès di davuelzisi ai 7 di Setembar a Bruxelles.

Font: Balkan Insight, 17 e 24/08/18

Cossovo: gnovis tensions su la istituzion de Zajednica

Ai 4 di Avost a scjadevin i cuatri mês assegnâts al grup di lavôr incjariât di meti jù il stampon dal statût de Zajednica, la Associazion dai Comuns Serps dal Cossovo. La mancjance di cualsisei informazion sul andament dai lavôrs e sui contignûts dal test a àn cressût une vore lis tensions sei dentri dal Cossovo, sei cu la Serbie. Cussì il president cossovan Hashim Thaci di une bande al sigurave che la scjadince e sarès stade rispietade, di chê altre al proponeve une revision dai confins che e cjapàs dentri la aree serbe a maiorance albanese di Bujanovac, Medveđa e Preševo / Presheva. I partîts cossovans invezit a fevelavin di menace ae integritât statâl e a contestavin ogni forme di autonomie pes minorancis serbis. Il president de Serbie, Aleksandar Vučić, ur rispuindeve invidant lis comunitâts serbis dal Cossovo a no colâ tes provocazions e garantint la lôr sigurece cuintri di ogni menace. Dome ai 6 di Avost il ministri cossovan pes aministrazions locâls al à comunicât di vê ricevût il stampon dal statût de Associazion dai Comuns Serps e che lu varès inviât aes autoritâts europeanis che dal 2015 incà a cirin di mediâ su cheste cuistion. La dì dopo però sei i uficis de Comission Europeane, sei chei de presidence cossovane a àn dineât di vê ricevût alc. La responsabile pe politiche foreste de UE, Federica Mogherini, e à sigurât che il teme al sarà frontât a Bruxelles di Thaci, Vučić e dai delegâts europeans inte prime date utile, date che però e reste ancjemò di fissâ.

Font: Balkan Insight, 03-06/08/18; Gazeta Express, 03-07/08/18; Focus News Agency, 06/08/18

Cossovo: gnovis tensions cu la minorance serbe

E reste alte la tension in Cossovo dopo che ai 26 di Març la polizie di stât e à arestât il responsabil dal ufici serp pal Cossovo, Marko Djurič, intant di une visite fate te aree a maiorance serbe di Mitrovica. La operazion e je stade fate cuntun displei di fuarcis e cuntun ûs de violence fûr di misure. Prime de sô espulsion, il diplomatic al è stât menât inte capitâl Pristina dulà che al è stât fat sfilâ in manetis denant dai gjornaliscj e dai citadins. Lis autoritâts a àn justificât l’arest e la espulsion cul fat che la sô visite no sarès stade autorizade, ma a àn ricognossût che la operazion no je stade gjestide te maniere juste. La vicende e je stade doprade de minorance serbe par domandâ lis dimissions dal ministri cossovan pal interni, Flamur Sefaj, e par riclamâ lis missions de UE e de NATO in Cossovo al lôr dovê di prevignî i atacs cuintri de comunitât e dai siei rapresentants. I aministradôrs dai comuns a maiorance serbe, ae unanimitât, a àn po fat savê che se tal zîr di trê setemanis il guvier cossovan nol tacarà a meti in pîts la Assemblee dai comuns serps previodude dai acuardis sotscrits di Cossovo e Serbie a Bruxelles intal 2013 a proviodaran a fâlu di bessôi. Une ipotesi che membris dai guvier di Pristina a àn za fat savê che, se metude in at, e puartarès drets in preson i aministradôrs serps.

Font: Balkan Insight, 28-30/03/18

Cossovo: sburt par ricognossi i gorans come minorance bulgare

Dopo vê otignût che te gnove leç su lis minorancis nazionâls fate buine dal Parlament albanês ai 13 di Otubar si ricognossès la esistence di une minorance bulgare, lis autoritâts di Sofia a domandin cumò che ancje il Cossovo al fasi chel stes pas. Al centri de rivendicazion a son i gorans, une comunitât su lis 50/100 mil personis di lenghe slave e di religjon musulmane che e vîf in trente paîs de regjon di Gora a cjaval tra Cossovo, Albanie e Macedonie. Almancul dai agns ’90 dal secul stât incà cheste popolazion e je stade rivendicade prime come part de comunitât serbe, po macedone e cumò bulgare. Sul plan sientific e linguistic la sô partignince no je masse clare e e lasse duncje la puarte vierte a interpretazions variis. La int dal puest si ricognòs intune identitât regjonâl gorane e dome une part e rivendiche la sô partignince a di une comunitât nazionâl plui grande. Diviers di lôr a àn acetât la ufierte di ricevi ancje la citadinance bulgare, massime par vie che cheste ur permeteve di vê libertât di circolazion inte Union Europeane. La Bulgarie però cumò e sburte plui a fuart e e vûl che ancje il Cossovo al procedi al ricognossiment uficiâl dai gorans come minorance bulgare, ricuardant aes autoritâts dal paîs che il guvier di Sofia al podarès dâ une man intal procès di integrazion inte UE. Il ricognossiment però al dipent ancje de volontât dai gorans stes, dal moment che la normative cossovane e previôt che a sedin lôr cuntune racuelte di firmis a lâ ta cheste direzion.

Font: Balkan Insight, 27/11/17