09/05/13

Cornualie: pas indenant dai nazionaliscj tes elezions

Joibe ai 2 di Mai i citadins de Cornualie, piçule nazion celtiche cjapade dentri intal Ream Unît, a son lâts a votâ par decidi i lôr rapresentants intal Consei teritoriâl. Il grup di elets plui numerôs al è chel dai indipendents cun 37 conseîrs, cuatri in plui de volte stade. Subite daûr a rivin i liberâi democratics che cui lôr 36 elets, doi in mancul des ultimis elezions, a passin denant dai conservadôrs che dai 49 conseîrs de legjislature stade a son colâts jù a 31 elets. Di cheste pierdite massive di consens a profitin un pôc ducj i partîts, dai laburiscj che a otegnin 8 conseîrs ai populiscj dal UKIP che a ‘nt cjapin 6, dai verts che a otegnin un elet ai nazionaliscj dal Mebyon Kernow che a puartin a 4 il numar dai lôr conseîrs, un in plui de volte stade.
Font: BBC, 03/05/13

Gales: a Anglesey a doplein i conseîrs nazionaliscj

Ai 2 di Mai si votave ancje pal Consei de isule di Anglesey / Ynys Môn, in Gales. I unics a no pierdi posizions a son stâts i nazionaliscj dal Plaid Cymru che a àn dopleât il numar dai lôr conseîrs, che di 6 a son deventâts 12. La aree politiche plui rapresentade e reste chê dai indipendents cun 14 conseîrs, 2 in mancul de volte stade. Intal Consei de isule a saran po trê laburiscj, un in mancul di chê altre volte, e un liberâl democratic, un in mancul rispiet aes elezions stadis. I conservadôrs a pierdin invezit ducj i doi conseîrs che a vevin e a restin cence rapresentance inte assemblee locâl.
Font: BBC, 03/05/13

Spagne: gnove propueste sul dirit di autodeterminazion

I deputâts di Amaiur, ERC e BNG a àn presentât une propueste par che intal stât spagnûl si garantissi il dirit di autodeterminazion dai popui. Si trate dal tierç tentatîf di puartâ la cuistion denant dal Parlament spagnûl, dopo che i prins doi a son stâts boçâts cul vôt compat dai deputâts dal PP che a àn la maiorance assolude inte assemblee. Cul fat che cheste volte no si trate di une propueste di leç, i deputâts dai trê moviments nazionalitaris a sperin che si rivi a puartâ la discussion dentri dal Parlament.
Font: Naiz:, 30/04/13

Spagne: la Europe e domande di impedî la torture

Il Comitât pe prevenzion de torture dal Consei de Europe al à domandât aes autoritâts spagnolis plui decision par impedî che i arestâts e i presonîrs a sedin maltratâts o fintremai torturâts de bande des fuarcis di polizie. Il rapuart dal Comitât al nas di une ispezion intai centris di detenzion spagnûi e des testemoneancis di cui che al è passât par chê esperience. Tra lis testemoneancis racueltis a son ancje chês di undis citadins bascs che si son cjatâts in regjim di incomunicazion. Fûr che intun câs, la denuncie dal tratament che a àn patît alì e je stade judicade dal Comitât comprovade di elements concrets. Daûr di chestis testemoneancis al ven fûr che la Guardia Civil e profite dal regjim di incomunicazion par maltratâ e torturâ i arestâts (menacis, esercizis fisics cence padin, colps, tentatîfs di scjafoiament e, intun câs, ancje abûs sessuâl) di maniere di otignî di lôr confessions. Il Comitât al domande duncje aes autoritâts spagnolis di indagâ a fonts su chescj episodis, di punî i responsabii e di evitâ che si tornin a ripeti: un tant al sarès facilitât cul permeti ai arestâts di contatâ daurman un avocat e di vê acès a di un miedi di fiducie ancje cuant che a vegnin metûts in regjim di incomunicazion.
Font: Naiz:, 30/04/13

Paîs Catalans: pas indenant pe vision des tv par catalan

Il guvier de Catalogne e chel dal Paîs Valenzian a àn cjatât un acuardi che al permet di viodi lis emissions des televisions dal grup TV3 inte aree valenziane e chês dal grup Canal Nou intal principât. La reciprocitât no rivarà però daurman, ma dome cuant che la comunitât valenziane e varà a disposizion gnûfs spazis pe teledifusion che a àn di jessi concedûts dal guvier spagnûl. L’acuardi al rive dopo agns di contrascj là che il guvier dal Paîs Valenzian, in man ae diestre spagnoliste, al à cirût in dutis lis manieris di impedî che il segnâl de television catalane al rivàs sul so teritori. A obleâlu a cambiâ direzion e je stade une sentence dal tribunâl suprem spagnûl che al à ancje multât l’esecutîf valenzian pal bloc des emissions di TV3.
Font: Vilaweb, 30/04/13; Avui, 30/04/13

Bosgne: censiment acusât di dividi i bosgnacs

Cinc tra lis plui impuartantis istituzions de comunitât musulmane bosgnache a àn inviât une letare ae direzion de agjenzie statâl di statistiche là che si dîs che lis categoriis su la partignince nazionâl, religjose e linguistiche dai citadins, cemût che a son stadis metudis jù intal test dal prossim censiment, a riscjin di meti in pericul i atuâi ecuilibris internis de federazion e di creâ divisions framieç dai bosgnacs. Contrari di ce che al jere sucedût cul ultin censiment, chel dal 1993, si à decidût di doprâ il tiermin bosgnac al puest di musulman, cundut che a son ancjemò tancj i citadins di cheste comunitât che a àn miôr doprâ musulman ancje tant che riferiment etnic – nazionâl. Si riscje alore che tancj a fasin confusion e no si rivi a vê un cuadri esat de popolazion che no à ancjemò rivât a fâ i conts cui efiets des vueris dai agns ’90 che a àn fat 100 mil muarts e disinis di miârs di sfolâts e dispatriâts.
Font: Balkan Insight, 29/04/13

Ucraine: plui jutoris de Ongjarie ae sô minorance

Il prin ministri ongjarês Viktor Orbán al à visitât la minorance magjare che e vîf in Ucraine e al à sotscrit un acuardi che al previôt un contribût di un milion e sietcent mil euros pal istitût di istruzion superiôr ongjarês Ferenc Rákóczi II di Beregszász / Berehove. I bêçs a coventaran par miorâ lis infrastruturis dal istitût, par svilupâ i siei percors di formazion e di ricercje, e par incressi la colaborazion cu lis istituzions scolastichis ongjaresis. Intal distret di Berehove, là che a vivin sù par jù 54 mil personis, plui dal 75% al parten ae comunitât ongjarese. Inte regjon de Transcarpatie, là che si cjate chest distret, si calcole che i ongjarês a sedin uns 150 mil.
Font: Finugor, 29/04/13

UE: partence in Jugn pe ICE su la diversitât linguistiche

La Iniziative dai Citadins Europeans (ICE) par infuartî il sisteme di tutele des minorancis linguistichis e nazionâls dentri de Union Europeane e sarà presentade in maniere uficiâl inte seconde metât di Jugn in Sud Tirôl in ocasion dal congrès de Union Federâl des Nazionalitâts Europeanis (FUEN). A imbastî cheste azion, in plui de FUEN, a son stadis la Zoventût des Nazionalitâts Europeanis (YEN), la Aleance Democratiche dai Ongjarês in Romanie (RMDSz) e la SVP, partît di riferiment de comunitât sudtirolese. Dongje di chestis cuatri realtâts organizadoris, si son però za zontadis cuasi un centenâr di associazions e organizazions di dute Europe impegnadis intal cjamp dai dirits linguistics e nazionâi. Il lôr compit al è chel di operâ a nivel locâl par tirâ sù un milion di firmis dentri di un an, di maniere che la Comission Europeane e meti adun un implant legjislatîf che al garantissi a dutis lis minorancis la no discriminazion, la protezion de diversitât linguistiche e culturâl, e la paritât intai dirits linguistics, intal insegnament des lôr lenghis e intal acès ai servizis publics.
Font: Agence Bretagne Presse, 28/04/13

Paîs Basc: tal Nord un altri sburt pe coletivitât teritoriâl

Ai 27 di Avrîl a Baiona / Bayonne si son tignûts i stâts gjenerâi de Coletivitât teritoriâl là che uns cinccent rapresentants politics e de societât civîl di Ipar Euskal Herria, la part setentrionâl dal Paîs Basc, a àn fat bon un manifest che al rivendiche la nassite di une realtât aministrative che e cjapi dentri dute la aree basche che e fâs part dal stât francês. I promotôrs de iniziative a domandin al esecutîf e al Parlament francês di scoltâ e dâ une rispueste ae domande che e rive dal Paîs Basc setentrionâl. La assemblee dai 27 di Avrîl e rapresente, ancje sul front des adesions, un altri pas indenant dopo che la domande di une Coletivitât teritoriâl a statût speciâl e jere za stade fate indenant intal Novembar dal an passât dal Consei dai elets dal Paîs Basc e de maiorance des fuarcis politichis di chel teritori (socialiscj, ecologjiscj, nazionaliscj bascs, la maiorance dai centriscj e une part de UMP e dai comuniscj). Par sburtâ il progjet e je po in program, simpri a Baiona, une mobilitazion popolâr che si tignarà il prin di Jugn.
Font: Le Journal du Pays Basque, 27/04/13; Gara, 28/04/13

Paîs Basc: in Navare e cres la scuele par basc

Daûr dai ultins dâts comunicâts des autoritâts de Navare, tra il 2005 e il 2011 ta cheste comunitât autonome al è cressût dal 20% il numar di fruts e di fantats che a frecuentin il Model D de scuele, ven a dî che fat dut in lenghe basche fale lis oris di lenghe e leterature castiliane che a son par spagnûl (chest model al interesse cuasi il 24% dai students). Il model plui sielzût, ancje par vie des limitazions imponudis al basc dal guvier locâl, al reste però chel G, o sei chel dut par spagnûl, che ta cheste dade di timp al è cressût dal 9% e che al cjape dentri il 55% dai students. L’unic model scolastic che al piert teren al è il D, ven a dî chel dut par spagnûl fûr che lis oris di lenghe e leterature basche che a vegnin fatis par euskara. Chest model, che al interesse pôc plui dal 16% dai students, al à pierdût intai ultins agns il 4% des iscrizions.
Font: Noticias de Navarra, 27/04/13

Kurdistan: il PKK al tache il so ritîr ai 8 di Mai

Al è in program pai 8 di Mai il ritîr dai militants dal PKK (Partît dai Lavoradôrs dal Kurdistan) di là de frontiere tra il stât turc e il Kurdistan meridionâl (Irak). A dâ la notizie al è stât il president dal consei esecutîf de Union des Comunitâts Curdis (KCK), Murat Karayılan, considerât ancje il comandant in cjâf dal stes PKK. Karayılan al à però zontât che se si varan atacs o provocazions de bande dal esercit turc, i militants dal PKK a judicaran rote la tregue in at e a rispuindaran cu lis armis. La tregue e il ritîr de resistence armade curde a son i prins passaçs previodûts intal plan di pâs dal leader dal PKK Abdullah Öçalan che al jere stât rindût public ai 21 di Març a Amed / Diyarbakır, capitâl dal Kurdistan turc, in ocasion dal Newroz, la fieste plui impuartante de comunitât curde.
Font: UIKI, 25/04/13

UE: mozion su la diversitât linguistiche

Il deputât dal Parlament european, François Alfonsi, al à presentât une mozion par che la assemblee e fasi buine une risoluzion su la diversitât linguistiche inte UE e su lis lenghis minorizadis de Europe. Intal test si marche i beneficis che a divegnin dal plurilinguisim, ma ancje la urgjence di intervignî par difindi e par promovi la pluralitât linguistiche massime par chês lenghis che a vivin une situazion di minorizazion. Inte mozion si stice lis autoritâts europeanis a finanziâ progjets e iniziativis che a judin chestis lenghis, a partî des risorsis a disposizion dai fonts struturâi, dai fonts pe educazion e dal font sociâl european.
Font: Npld.eu, 24/04/13

Galizie: pas indenant pal domini .gal

La associazion PuntoGAL e à fat savê che la candidature par otignî il domini internet .gal e va indenant cence fastidis e che nissun dai sogjets rapresentâts intal ICANN, l’organisim internazionâl che al guvierne lis direzions su la rêt, al à fat obiezions pal so ricognossiment. La rispueste definitive e podarès rivâ za chest Astât e, se e ves di jessi positive, sul imprin di chest an che al ven il domini .gal al podarès jentrâ in vore. L’obietîf dal ricognossiment dal domini .gal al è chel di dâi un spazi autonom su la rêt a ducj chei che a doprin la lenghe galiziane o che a rapresentin la identitât e la culture de Galizie. La domande fate indenant di PuntoGAL e gjolt de poie dal guvier galizian, di passe un centenâr di sogjets publics e privâts tra i plui impuartants de Galizie e di plui di 12 mil internautis.
Font: Codigo Cero, 23/04/13

Cossovo: acuardi cun Belgrât su la minorance serbe

Ai 17 di Avrîl, dopo mês di tratativis sot de mediazion de Union Europeane, la delegazion serbe e chê cossovane vuidadis dai doi prins ministris Ivica Dačić e Hashim Thaçi a àn cjatât un acuardi su la gjestion dai comuns dal Cossovo a maiorance serbe. Par Dačić si trate des condizions miôr che si podeve otignî pe comunitât serbe restade intal Cossovo; Thaçi al à invezit fevelât di un acuardi che al judarà a superâ lis feridis dal passât. Il test al è svilupât su cuindis ponts e al regole ducj chei aspiets che fin cumò a vignevin gjestîts in maniere indipendente de comunitât serbe dal Cossovo cu la poie economiche e operative dal guvier di Belgrât.

Man: prime serie animade televisive par manx

La serie animade “Friends and Heroes” produsude de BBC a partî dal 2007 e je stade cumò voltade par manx, la lenghe celtiche fevelade su la isule di Man (Ellan Vannin). Si trate de prime serie televisive par fruts disponibile ta cheste lenghe e lis sôs pontadis a son stadis dadis fûr ancje in dutis lis scuelis de isule. Ogni pontade e dure vincjecinc minûts e e je sottitulade par inglês e, ancje par vie dal atrat che e à pai fruts, e ven calcolade un strument didatic une vore bon. Intal 2009 il manx al jere stât declarât estint de Unesco, ma in realtât cumò al è daûr a vivi une gnove sfloridure e al cres il numar di chei che a vuelin imparâlu sei su la isule che ator pal mont.
Font: BBC, 19/04/13

Paîs Catalans: gnûf decret su lis lenghis intes Baleârs

Il guvier de Comunitât autonome des Baleârs al à fat bon il gnûf decret su lis lenghis che al regole l’insegnament des dôs lenghis uficiâls des isulis, ven a dî catalan e spagnûl, e di une lenghe foreste che, inte plui part dai câs, e je chê inglese. Il proviodiment, che al à vût une fuarte oposizion de bande des fuarcis catalanistis e des associazions di categorie, al cjape il puest di chel dal 1997 che al veve il catalan tant che lenghe di riferiment e lu sostituìs cuntun implant che al incrès la presince dal spagnûl e de tierce lenghe e, par chest, al fisse une cuote minime di materiis che a àn di jessi insegnadis in ogni lenghe. La metude in vore di chest model linguistic gnûf e tacarà tal an scolastic 2013 – 2014. Par garantî un numar suficient di insegnants par ogni lenghe a son daûr a jessi formâts plui di 1.300 professôrs za in servizi, intant che un altri centenâr al tacarà servizi cun chest an che al ven.
Font: Diario de Mallorca, 19/04/13