23/12/08

Pontade 26 08 (23/12/08) - 12

Irlande: al à sierât l’unic cuotidian par gaelic

Daspò di 25 agns di esistence al à sierât Lá Nua (Dì gnûf), l’unic cuotidian par gaelic irlandês. La ultime jessude dal gjornâl, che e veve la peraule “bás” (ven a dî muart) in vierzidure, si le à vude ai 19 di Dicembar. Daûr de fin dal cuotidian e je la decision dal Foras na Gaeilge, la agjenzie pe lenghe irlandese, di gjavâi i finanziaments a Lá Nua. La direzion de agjenzie pe lenghe irlandese e à dite che in dì di vuê un cuotidian par gaelic nol à marcjât, ma e à fat savê che e pense di meti 400 mil euros par un setemanâl e par un servizi informatîf digjitâl. Il gjornâl, che al stampave 4 mil copiis par dì, al veve la sô sede a Belfast e al deve di vore a vot personis. Gerry Adams, il president dal Sinn Féin (il partît republican irlandês), al à pandût il so marum pe gnove e al à declarât che il so partît al è daûr a viodi de pussibilitât di meti in pîts un altri cuotidian par gaelic, sei su cjarte che in linie.

Font: RTÉ News, 19/12/08; Nationalia, 19/12/08

Pontade 26 08 (23/12/08) - 11

Ream Unît: no a di une scuadre di balon britaniche pai zûcs olimpics

Tifôs di balon galês, nordirlandês, scozês e fintremai inglês adun par dî di no al progjet di une rapresentative britaniche unitarie pai zûcs olimpics dal 2012 che si davuelzaran a Londre. Al è chest il spirt che al sta daûr de campagne “No Team GB” che al è nassût par fâi cuintri al progjet sburtât dal prin ministri britanic Gordon Brown che, di resint, al à vût ancje la poie de FIFA, la federazion internazionâl dal balon. I tifôs i tegnin ae indipendence des lôr scuadris nazionâls e a àn pôre che chest al sedi il prin pas par fâlis sparî. Lis nazionâls di balon di Gales, Scozie, Irlande dal Nord e Ingletiere no puedin partecipâ ai zûcs olimpics par vie che il CIO al acete dome rapresentativis statâls. Dut câs, dal moment che i zûcs si davuelzaran a Londre, il prin ministri britanic al ponte a vê in cjamp ancje i parons di cjase. A fâi cuintri al progjet a son ancje partîts politics tant che l’SNP scozês e il Plaid Cymru galês.

Propit i rapresentants di chescj doi partîts a son tra i promotôrs de campagne par ospitâ in Gales e in Scozie i campionâts europeans di balon in program pal 2016. La iniziative e je stade presentade ai dirigjents des dôs federazions nazionâls di balon par che a viodin se a son lis fondis par puartâ indenant il progjet.

Font: Món Divers, 18/12/08; EFA, 11/12/08

Pontade 26 08 (23/12/08) - 10

Stât spagnûl: nassude Diverslinguae par promovi il plurilinguisim

Promovi la diviersitât linguistiche intal stât spagnûl e controlâ che la legjislazion in materie linguistiche e sedi rispietade. A son chescj i obietîfs principâi de associazion Diverslinguae che e je stade presentade cualchi zornade indaûr a Sant Jacum di Galizie (Santiago de Compostela) e che e met adun organizazions baschis (Aurten Bai e Euskara Kultur Elkargoa), catalanis (CIEMEN), e galizianis (A Mesa pola Normalización Lingüistica). Tra i prins progjets in program si à la vierzidure di un portâl web plurilengâl, ancje in colaborazion cu la aministrazion statâl. Cun di plui, la presentazion de associazion e je stade la ocasion par comentâ lis racomandazions inviadis al guvier di Madrid dal Consei dai ministris de Europe. Se lis autoritâts europeanis a vessin vût dutis lis informazions su la situazion dai dirits linguistics intal stât spagnûl, il riclam al sarès stât inmò plui dûr, a àn dite i rapresentants des organizazions che a componin Diverslinguae.

Font: Nationalia, 18/12/08

Pontade 26 08 (23/12/08) - 9

Sami: metudis lis fondis par un Parlament ancje in Russie

Une sessantine di delegâts sami de penisule di Kola, intefederazion russe, a àn metût lis fondis pe nassite di un Parlament propri come che za si ‘nd àn pai samis de Norvegje, de Svezie e de Finlande. I rapresentants di chest popul, che in dì di vuê al forme a pene il 0,2% de popolazion totâl de penisule di Kola, a àn metût sù un organisim di rapresentance formât di nûf membris che al varà di puartâ ae nassite tal zîr di doi agns di un Parlament pai sami de Russie. Par rivâ a di un tant, dut câs, al coventarà modificâ diviersis leçs federâls e provinciâls. A dâi une man al organisim rapresentatîf dai 2 mil sami de regjon a saran ancje i rapresentants dai Parlaments sami che za a son inta chei altris trê stâts là che al vîf chest popul.

Font: Gáldu, 16/12/08; Món Divers, 16/12/08

Pontade 26 08 (23/12/08) - 8

Ocitanie: la Val d’Aran a pro dal ocitan patrimoni de umanitât

Il Consei gjenerâl de Val d’Aran, la valade di lenghe ocitane che si cjate intal Principât di Catalogne, al à fate buine une mozion che e domande che la Unesco e proclami la lenghe ocitane tant che patrimoni de umanitât. Il document, che al è passât cul vôt di ducj i partîts aranês, al poie duncje la campagne inviade de associazion Chambra d’Oc. Ae iniziative a vevin za dât la lôr poie diviersis aministrazions comunâls ocitanis, ma ancje la Regjon Piemont, la Provincie di Potenza e la Regjon Lenghedoc – Rosselló. Inte stesse riunion dal Consei si à fat bon in maniere uficiâl il test dal imni aranês, o sei “Montanhes araneses”.

Font: Món Divers, 16/12/08

Pontade 26 08 (23/12/08) - 7

Romanie: il partît dai ongjarês fûr dal guvier

La Aleance Democratiche dai Ongjarês in Romanie (Romániai Magyar Demokrata Szövetség), che e à otignût il 6,4% dai vôts intes elezions politichis che si son davueltis ai 30 di Novembar, no fasarà part dal guvier di coalizion che al à di vuidâ la Romanie pai prossims agns. Il Partît Democratic Liberâl e chel Socialdemocratic si son dâts dongje par guviernâ il paîs te prossime legjislature: adun a àn 329 dai 471 parlamentârs rumens e, duncje, no ur coventaressin altris fuarcis par tignî in pîts il guvier. Dut câs, il partît dai ongjarês de Romanie al veve za declarât di no jessi disponibil a jentrâ tune coalizion cui socialdemocratics.
Font: Nationalia, 15/12/08

Pontade 26 08 (23/12/08) - 6

Bretagne: mobilitazion par difindi la toponomastiche storiche

La int di Plougerne / Plouguerneau si è dade dongje tun comitât par difindi i nons tradizionâi par breton des stradis dal lôr paîs e evitâ che a vegnin batiadis cun nons gnûfs par francês. Il sindic al à spiegât che il cambiament dai nons des stradis al sarès leât al fat che lis puestis a àn problemis a capî i nons par breton… Il comitât, che al à non “Vuardians de memorie”, al à inviât une campagne par convinci la aministrazion comunâl a cambiâ strade e al à invidât ducj a scrivi al sindic par manifestâ la contrarietât al progjet.

Font: Oui au breton, 14/12/08; Eurolang, 19/12/08

Pontade 26 08 (23/12/08) - 5

Paîs Basc: ex presonîrs politics a denunciin la politiche penitenziarie

Un centenâr di ex presonîrs politics bascs si à dât dongje tes zornadis stadis a Usurbil par rivendicâ une soluzion dialogade dal conflit jenfri il Paîs Basc e i stâts spagnûl e francês e par denunciâ la politiche penitenziarie in vore in dì di vuê. Di une bande no si ricognòs ai presonîrs bascs il status politic, e di chê altre si doprin misuris di ecezion che a valin dome par lôr. Joxean Agirre e Begoña Sagarzazu, a non dal coletîf, a àn ricuardât lis misuris persecutoris dopradis cuintri dai presonîrs bascs: de dispersion fin al dinei dal dirit ae salût, des violencis al isolament continuât, cence po dismenteâ i ritarts inte liberazion a fin pene o il progjet che al previôt misuris di control par vincj agns daspò de liberazion. A vuê a son passe 760 i presonîrs politics bascs che si cjatin tes presons spagnolis e francesis.

Font: Gara, 13/12/08; Món Divers, 15/12/08

Pontade 26 08 (23/12/08) - 4

Bretagne: une sdrume di zûcs in rêt par breton sot dal arbul

Pes fiestis di Nadâl di chest an l’Ufici pe lenghe bretone al à fat cjatâ “sot dal arbul” une sdrume di zûcs in rêt inte lôr lenghe pai fruts e pai zovins de Bretagne. Cun di fat, di cualchi zornade, al è disponibil ancje par breton, cul non di Melldudi, un portâl che al ufrìs uns 700 zûcs di stamp diviers. Il portâl al jere za disponibil ancje in altris lenghis minorizadis tant che il catalan, il galizian e l’ocitan. Cun di plui, simpri cu la poie dal Ufici, al è stât voltât par breton ancje Freecol, la version libare dal zûc “Colonizazion, Civilizazion”, che e jere za disponibile tune cuarantine di lenghis.

Font: Ofis ar Brezhoneg, 12/12/08

Pontade 26 08 (23/12/08) - 3

Stât spagnûl: riclam de Europe sui dirits linguistics

Il Consei de Europe al à riclamât il stât spagnûl al rispiet dai siei dovês intal cjamp de protezion e de promozion des lenghis diviersis dal castilian, daûr di ce che e previôt la Cjarte europeane pes lenghis regjonâls o minoritariis. Intes racomandazions inviadis al guvier di Madrid dal Consei dai ministris de Europe si lamente che al è stât fat pôc o nuie par risolvi i problemis che a jerin za stâts segnalâts, ven a dî, prin di dut, l’ûs des lenghis couficiâls (basc, catalan, e galizian) intal cjamp de justizie, de aministrazion periferiche statâl e dai servizis publics gjestîts dal stât a tacâ des puestis e des feroviis. Intal document dal Consei dai ministris de Europe si invide ancje a incressi l’ûs des lenghis couficiâls intal sisteme scolastic, magari cul sisteme de imersion, massime in Galizie (galizian), in Navare (basc), inte Comunitât valenziane e intes Baleârs (catalan). Cundut che alc si à mot, al zonte il document, al covente un ricognossiment juridic clâr che al garantissi la difese e la promozion dal catalan e dal aragonês intal Aragon e dal galizian inte regjon di Castilie e Leon. Lis racomandazions de Europe a fasin riferiment ancje ae situazion dificile dal asturian, che nol è stât inmò ricognossût tant che lenghe couficiâl. Il document dal Consei dai ministris al lamente po che il guvier di Madrid nol à dât informazions su chês altris lenghis minoritariis feveladis dentri dai confins statâi, ven a dî il portughês te zone di Olivença (Extremadura), l’amazic (berber) a Melilla, l’arap a Ceuta, e lis lenghis de comunitât rom (romaní e caló).

Font: Avui, 11/12/08; Món Divers, 12/12/08

Pontade 26 08 (23/12/08) - 2

Gjermanie: propueste contrastade pal todesc lenghe uficiâl te Costituzion

E à discjadenât reazions duris la propueste de CDU todescje di meti dentri intal articul 22 de Cjarte costituzionâl il ricognossiment dal todesc tant che lenghe uficiâl. La propueste, fate buine dal congrès dal partît democratic cristian, e à dismot lis critichis sei di chês altris formazions politichis todescjis, sei dai organisims di rapresentance des minorancis nazionâls che a vivin intal stât todesc. I socialdemocratics dal SPD e la çampe radicâl (Die Linke) a àn invidât la CDU a ocupâsi plui dai problemis sociâi e de integrazion, impen di stâi daûr dai simbui nazionâi. La propueste, par altri, no je plasude nancje a ducj i membris de CDU, a tacâ de cancelire Angela Merkel. Il Consei des minorancis nazionâls autoctonis de Gjermanie, che al met adun i rapresentants dai sorbians, dai danês, dai frisons e dai rom todescs a àn invezit declarât che se il todesc al sarà metût dentri te Costituzion a varan di jessilu ancje lis lôr lenghis. Su la stesse linie ancje la Aleance Libare Europeane e il Partît Bavarês (Bayernpartei).

Font: Món Divers, 07/12/08

Pontade 26 08 (23/12/08) - 1

Ucraine: dirigjents rutens acusâts di menacis pe integritât statâl

Il Servizi di sigurece ucrain al à acusât di separatisim pre Dimitri Sidor, che al vuide il moviment dai rutens de Ucraine, e Piotr Getsko, prin ministri de Republiche de Transcarpazie che e jere stade proclamade ai 25 di Otubar di un grup di delegâts rutens vuidâts dal religjôs ortodòs. I doi cumò a riscjin diviers agns di presons. La decision di proclamâ une Republiche rutene e jere nassude par sburtâ la Ucraine a ricognossi cheste comunitât minorizade. Intal 1991, inte suaze de consulte su la indipendence de Ucraine, la maiorance de popolazion de Transcarpazie e veve votât par che il lôr teritori al deventàs une republiche autonome. I guviers ucrains, invezit, no àn mai dât nissune forme di autonomie ae Transcarpazie e si son refudâts ancje di ricognossi la esistence di une minorance rutene. I rutens a son tignûts par minorance in diviers stât europeans, o sei in Ongjarie, Polonie, Serbie, Slovachie, e inte Republiche Ceche. Intal 2006 ancje il Comitât pe eliminazion de discriminazion raziâl de ONU al veve invidât il guvier ucrain a ricognossi cheste comunitât tant che minorance nazionâl. L’unic ricognossiment, dut câs, al è rivât intal 2007 dal Consei regjonâl de Transcarpazie. “La pression de assimilazion sfuarçade e je cussì fuarte che se no si batìn pal nestri status, tal zîr di 15 agns i rutens a saran ricuardâts dome sui libris di storie” al à dite Sidor.
Font: Russia Today, 10/12/08; Nationalia, 10/12/08


09/12/08

Pontade 25 08 (09/12/08) - 12

Bretagne: il president francês Sarkozy al cimie ae riunificazion bretone

Al è zaromai di agns che i moviments politics bretons a domandin di tornâ a meti adun dentri di une sole realtât aministrative dute la Bretagne. In dì di vuê, di fat, il teritori storic di cheste nazionalitât si cjate dividût in cinc dipartiments, cuatri di lôr a formin la regjon bretone e il cuint (chel de Loire Atlantiche, là che si cjate la capitâl Naoned / Nantes) al è invezit inte regjon dal Paîs de Loire. La domande di riunificazion e cjate une poie fuarte sei tra i aministradôrs, sei tra i citadins de regjon bretone e dal dipartiment de Loire Atlantiche. Cumò al somee che il progjet al cjati il benstâ ancje dal president de Republiche francese, Nicolas Sarkozy. Cun di fat, denant dal 91esim congrès dai sindics e dai presidents des comunitâts de France, Sarkozy al à dite che si à di sburtâ un moviment sperimentâl e volontari di fusion tra lis regjons e i dipartiments. Un dai esemplis fats al è propit che de Bretagne, là che al somearès che si vedin lis condizions miôr par inviâ chest procès. E je la prime volte che un president francês al dîs alc dal gjenar e fintremai i indipendentiscj bretons dal Emgann lu calcolin di “vitorie”. Des peraulis, dut câs, si à di passâ ai fats e la Union Democratiche Bretone e il Partît Breton a son tra i prins a domandâ che si ledi prime che si pues al referendum che al varà di decidi su la riunificazion aministrative de Bretagne.
Font: Agence Bretagne Press, 28/11-03/12/08; Món Divers, 02/12/08


Pontade 25 08 (09/12/08) - 11

Paîs Catalans: consultazions su la autodeterminazion a nivel locâl

Il moviment di conseîrs comunâi catalans Decidim si è impegnât a imbastî une consultazion popolâr a nivel locâl sul dirit ae autodeterminazion. La decision e je stade cjapade ai 30 di Novembar a Barcelone tant che rispueste aes menacis fatis indenant cuintri dal Statût di autonomie. A son passe un miâr i conseîrs comunâi che a àn za fate lôr la iniziative. Pe plui a partegnin a moviment politics nazionaliscj tant che CiU, ERC e ICV, ma si ‘nd à ancje di leâts al Partît Socialist.
Font: Món Divers, 01/12/08


Pontade 25 08 (09/12/08) - 10

Romanie: confermade la presince ongjarese in Parlament

Intes elezions pal Parlament rumen, che si son davueltis ai 30 di Novembar, il partît di riferiment de minorance ongjarese al à rivât a passâ il soiâr dal 5% che i permet di mandâ i siei rapresentants a Bucarest. La Aleance Democratiche dai Ongjarês in Romanie (Romániai Magyar Demokrata Szövetség) e à di fat otignût il 6,4% dai vôts a nivel statâl e e podarès ancje vê une part di prin plan intai ecuilibris politics di cheste legjislature, dal moment che il risultât dal vôt nol à dât une maiorance clare in stât di guviernâ il paîs. La Aleance e domande, tra lis altris robis, che l’ongjarês al deventi lenghe uficiâl tes areis de Transilvanie là che i magjârs a son maiorance e misuris di autoguvier plui fuartis pe comunitât ongjarese.
Font: Món Divers, 01/12/08; Nationalia, 01/12/08; Le Courrier des Balkans, 01/12/08


Pontade 25 08 (09/12/08) - 9

Paîs Basc: corot par Mikel Laboa, pari de gnove cjançon basche

Il prin di Dicembar al è muart a Donostia, Mikel Laboa, cjantautôr considerât, intune cun Benito Lertxundi, il pari de gnove cjançon basche. Nassût tal 1934 te capitâl gipuzkoane, al jere stât un dai animadôrs de rinassince linguistiche e culturâl basche vie pai agns ’60. Diviersis des sôs cjançons a son jentradis tal patrimoni popolâr basc, ma la plui innomenade e je dal sigûr Txoria txori cjantade ancje di Joan Baez.
Font: Gara, 01/12/08; Deia, 01/12/08; Galiza Hoxe, 01/12/08


Pontade 25 08 (09/12/08) - 8

Paîs Basc: e esistarès une “liste nere” di personis di arestâ

I nons di passe un centenâr di zovins bascs a saressin dentri tune “liste nere” che la polizie e doprarès cuant che e à di arestâ cualchidun in Navare. A denunciâlu a son stâts i rapresentants dal moviment pe amnistie. Dal mês di Avost a saressin za une vincjine i fantats arestâts cu la acuse gjeneriche di jessi membris di Segi o Ekin (organizazions zovanîls baschis metudis fûr leç) o di vê partecipât a ats di kale borroka (lote di strade), ma intant des percuisizions dai lôr alozaments nol è vignût fûr nissun materiâl suspiet. Il moviment basc pe amnistie al sigure po di savê che almancul suntune altre vincjine di personis, che no son stadis inmò arestadis, a son prontis des “imputazions costruidis” de polizie. I interessâts si son presentâts denant de magjistrature par sclarî la lôr posizion, ma no ur al è stât permetût par vie che si spietarès “che a rivin denant dal judiç cu la sospension dai lôr dirits daspò jessi stâts arestâts e metûts in regjim di incomunicazion”. Al sarès propit intant des zornadis di incomunicazion che – a disin i rapresentants dal moviment basc pe amnistie – si ur gjavaressin ai arestâts declarazions che a incolpin altris personis. Ta cheste maniere la polizie e sarès daûr a meti adun une “liste nere” di personis di arestâ cuant che ur covente.
Font: Gara, 29/11/08


Pontade 25 08 (09/12/08) - 7

Bretagne: la Universitât di Rennes 2 e cres l’impegn pe lenghe

La universitât di Rennes 2 e je la prime istituzion universitarie de Bretagne a sotscrivi l'acuardi “Ya d'ar brezhoneg” che al impegne a puartâ indenant diviersis azions a pro de lenghe bretone. La Universitât di Rennes e à une lungje tradizion di atenzion ae lenghe proprie de Bretagne: i prins insegnaments di breton a rimontin di fat al 1880 e, in dì di vuê, chel di breton al è un dai cors di lenghe plui frecuentâts. A Rennes 2 a vegnin ancje formâts i gnûfs insegnants di breton. Ce che al mancje, invezit, a son altris cors universitaris par breton par vê la pussibilitât di completâ il cicli dai studis ta cheste lenghe. Inte universitât si cjate ancje segnaletiche e materiâl di presentazion bilengâl. Cu la firme di chest acuardi, la universitât si impegne a incressi lis azions a pro de lenghe.
Font: Ofis ar brezhoneg, 28/11/08


Pontade 25 08 (09/12/08) - 6

Gales: il galês al jentre ancje tal Comitât des Regjons europeanis

La lenghe galese e je daûr a fâ pas indenant storics intes istituzions europeanis. Ai 20 di Novembar, come che si veve za riferît, il ministri galês pal patrimoni culturâl, Alun Ffred Jones, al jere stât il prin a fevelâ par galês intant di une riunion uficiâl dal Consei dai ministris de Union Europeane. Ai 26 di Novembar, Nerys Evans, elete tes filis dal Plaid Cymru inte Assemblee Nazionâl Galese, e je stade la prime a fevelâ par galês intune assemblee plenarie dal Comitât des Regjons de Europe a Bruxelles. Il galês, duncje, al è lât a zontâsi al basc, al catalan e al galizian, tra lis lenghis no statâls dopradis dal Comitât. La lungje bataie dai galês par puartâ la lôr lenghe intes istituzions comunitariis e segne cussì un altri pas indenant impuartant. Il president dal Comitât des Regjons, Luc Van den Brande, al à pandude la sô sodisfazion par chest pas sul la strade dal pluralisim linguistic. “O soi une vore content – al à declarât – dal moment che il Comitât des Regjons al crôt cun fuarce intal principi dal plurilinguisim e inte impuartance des lenghis regjonâls, ancje dentri des istituzions de Union Europeane.”
Font: Eurolang, 27/11/08


Pontade 25 08 (09/12/08) - 5

Paîs Catalans: lis Baleârs si zontin ae aleance pes lenghis minorizadis

Il guvier des Isulis Baleârs al à comunicât di vê aderît al protocol di colaborazion che al jere stât sotscrit ai 16 di Març dal 2007 a Bilbo / Bilbao dai guviers de Comunitât Autonome Basche, de Galizie e de Catalogne. L’obietîf dal pat al è chel di dâsi dongje par sburtâ lis politichis linguistichis di chescj teritoris e di lavorâ adun pe normalizazion linguistiche des lenghis diviersis dal castilian. Intal stât spagnûl i cantins là che si cjatin plui dificoltâts pes lenghis propriis di chestis comunitâts a son chei de justizie e dai uficis leâts ae aministrazion statâl. I guviers des cuatri comunitâts a son dacuardi tal scambiâsi informazions e esperiencis intal cjamp de terminologjie specialistiche, de promozion des lenghis e dal lôr insegnament a nivel internazionâl.
Font: Nationalia, 27/11/08


Pontade 25 08 (09/12/08) - 4

Flandris: moviments in spiete des elezions dal 2009

Intal 2009 il Parlament des Flandris al varà di jessi rignuvît e i diviers partîts flamants a son daûr a studiâ lis strategjiis miôr pes prossimis elezions. La ultime gnove si riferìs ai Progressiscj Flamants (Vlaams Progressieven) che a àn fate buine une propueste dal lôr om di ponte, Geert Lambert, che ju puartarès a presentâsi aes elezions di bessôi e no plui in aleance cul Partît Socialist (Socialistische Partij). Cheste strade, dut câs, e podarès costâi cjare al partît che in dì di vuê, daûr dai ultins sondaçs, nol somee lâ plui innà dal 1% dai consens. Cun di plui, une part dai membris dal partît, massime chei che a àn responsabilitâts politichis intal guvier des Flandris, a podaressin decidi di bandonâ i Progressiscj Flamants par passâ cui socialiscj. La diestre flamande, invezit, e je scjassade de gnove Liste Dedecker, formazion fondade intal 2007 dal senatôr Jean-Marie Dedecker, che pai sondaçs e riscje di cjapâ fintremai il 12% dai vôts. Il partît al sburte par une Belgjiche confederâl là che il guvier centrâl al vedi inmò mancul competencis di chês che al à in dì di vuê. La Liste Dedecker e cjape sù consens sei framieç dai eletôrs dai Democratics Cristians, sei framieç dal partît di estreme diestre Vlaams Belang.
Font: Món Divers, 27/11/08


Pontade 25 08 (09/12/08) - 3

Cornualie: petizion par che il cornic al gjoldi de tutele de CCPMN

Tra lis lenghis celtichis feveladis intal Ream Unît chê che si cjate a vivi une situazion plui dificile par chel che si riferìs al ricognossiment istituzionâl e je il cornic, la lenghe native de Cornualie. Par domandâ che il guvier britanic al meti ancje cheste lenghe framieç di chês che a puedin gjoldi des misuris di tutele de Convenzion Cuadri pe Protezion des Minorancis Nazionâls, cumò si cjate ancje une petizion che si pues sotscrivi su www.petitiononline.com/CORNISH/petition.html . Si trate di une des variis iniziativis metudis in pîts dal Cornish Fighting Fund par che il cornic si zonti al galês, al gaelic e a chês altris lenghis tuteladis de Convenzion.
Font: Eurolang, 26/11/08


Pontade 25 08 (09/12/08) - 2

Groenlande: vôt massîf par incressi l’autoguvier de isule

La popolazion de Groenlande e à dite di sì a di un gnûf Statût di autonomie che al slargje no pôc il nivel dal so autoguvier, che al previôt la gjestion plene des sôs risorsis economichis e che a ‘nt garantìs il dirit ae autodeterminazion, duncje, ancje cu la pussibilitât di rivâ ae indipendence de Danimarcje. Cun di fat, intal referendum che si è davuelt ai 25 di Novembar, il 75,54% dai groenlandês che a son lâts a votâ (ven a dî il 71,9% dal totâl) al à dite di sì ae riforme statutarie. Il gnûf Statût al jentrarà in vore intal Jugn dal 2009: trente agns daspò che la isule e veve otignût de Danimarcje une prime forme di autonomie. Chest procès al cjate la poie sei dal guvier che de plui part dai partîts danês. La riforme e previôt che de Danimarcje no rivin plui finanziaments pe Groenlande e che la isule e gjestissi in plene autonomie lis risorsis energjetichis, massime petroli e gâs, che e plate sot vie. La lenghe groenlandese (imparintade cu lis lenghis inuit che si fevelin intal Canada e in Alaska) e je uficiâl, dongje dal danês, bielzà dal 1979.
Font: Politiken.dk, 26/11/08; Món Divers, 26/11/08; Gara, 26/11/08


Pontade 25 08 (09/12/08) - 1

Slovachie: nissun dirit coletîf pai ongjarês

La Serbie e ricognòs i dirits coletîfs des minorancis, la Slovachie no lu fâs e no à nancje intenzion di ricognossi une cualsisei forme di autonomie par nissune minorance etniche.” Al à rispuindût cussì il ministri slovac pai forescj, Jan Kubis, intant de sô visite in Vojvodine cuant che i è stât domandât se il guvier slovac al jere disponibil a dâi une cierte autonomie ae comunitât ongjarese, che in Slovachie si calcole che e cjapi dentri il 10% de popolazion. In Vojvodine i ongjarês a son sù par jù il 15% de popolazion e a gjoldin di diviersis formis di autonomie sei politiche che culturâl. Kubis al à dite che la Slovachie no cjaparà mai cheste strade e che no darà seont aes politichis dal guvier ongjarês par incressi la autonomie des comunitâts storichis magjaris che a vivin intai stâts dulintor.
Font: Balkan Insight, 24/11/08; Nationalia, 24/11/08


25/11/08

Pontade 24 08 (25/11/08) - 13

Paîs Basc: manifestazion pe uficialitât plene dal euskara in Navare

Cundut dal brut timp a jerin passe 5 mil lis personis che ai 22 di Novembar a àn sfilât pes stradis di Iruñea / Pamplona par rivendicâ la uficialitât dal euskara – la lenghe basche – in dute la Navare. La iniziative, poiade di diviersis organizazions politichis, sindacâls e sociâls, e veve chê di denunciâ lis limitazions e lis divisions imponudis cu la leç linguistiche navare dal 1986 e di domandâ il rispiet dai dirits linguistics di ducj i citadins. Il ricognossiment dal status di une lenghe nol baste se po a mancjin i contignûts e i mieçs par garantî l’ûs normâl di chê lenghe in ducj i setôrs, a àn dite i organizadôrs de manifestazion che po a àn zontât che cheste rivendicazion no je un mateç di pôcs di lôr, ma alc di leât ad in dopli cul rispiet dai dirits umans che, chei linguistics, a ‘nt son part. “O domandìn une lenghe par gjoldi cul cjant dai bertsolaris, che si scolti tes cusinis dai cjasâi – si à dite intant de manifestazion – ma che si scolti ancje tes aulis des universitâts, tai mieçs di comunicazion e intal Parlament… O volìn vivi par basc in plene normalitât: alc che invezit, in dì di vuê, nol è pussibil.”
Font: Gara, 23/11/08


Pontade 24 08 (25/11/08) - 12

Gales: il galês al jentre tal Consei dai ministris european

Diolch madam llywydd”, ven a dî “grazie siore presidente”: a son stadis chestis lis primis peraulis par galês pronunciadis intant di une riunion dal Consei dai ministris de Union Europeane. A dîlis al è stât il ministri galês pal patrimoni culturâl, Alun Ffred Jones, che al vuidave la delegazion britaniche intant di une riunion dedicade al multiculturalisim. “Intal Ream Unît o vin une des lenghis plui feveladis intal mont, o sei l’inglês, che par tancj e je marilenghe; ma tes nestris isulis o doprìn lenghis diviersis e jo o soi braurôs di fevelâus intune des plui antighis, ven a dî il galês, la lenghe dal Gales” al à spiegât Jones a chei altris ministris europeans. Daspò di une bataie durade cualchi an, cumò il galês al à otignût un status di couficialitât intal Consei dai ministris, intune cun basc, catalan e galizian, dongje des 23 lenghis uficiâls des istituzions comunitariis. Chê dai 20 di Novembar e je stade duncje une zornade storiche pal galês, ma la bataie – a àn za dite i politics impegnâts pe lenghe galese – e larà indenant par puartâ cheste lenghe celtiche ancje intal Parlament e inte Comission europeane. Jones, che al è un membri dal Plaid Cymru, al à po declarât ae stampe che la Europe e je une vore divierse tal so interni e che il Gales al è part di cheste diviersitât. Vuê, al à dite, o sin intal Consei dai ministris de Europe tant che part dal Ream Unît, ma o speri che un doman o sarìn alì come galês che a rapresentin il Gales.
Font: BBC, 20/11/08; Wales on line, 21/11/08; Món Divers, 21/11/08


Pontade 24 08 (25/11/08) - 11

Paîs Basc: menace di ilegalizazion par EA che si slontane dal PNV

Eusko Alkartasuna e à decidût di cori di bessole intes prossimis elezions pe Comunitât Autonome Basche. La decision e je stade cjapade ai 10 di Novembar dal esecutîf dal partît nazionalitari basc. Al jere za di timp che i rapuarts jenfri EA e il PNV, ven a dî i doi partîts principâi de coalizion che in dì di vuê e guvierne la Comunitât Autonome Basche (intune cu la formazion di çampe Ezker Batua), a clopavin. La decision e je stade cjapade in bloc, cence nancje bisugne di metile ai vôts – al à dite il segretari pe politiche istituzionâl di EA, Rafael Larreina – parcè che o jerin ducj dacuardi. A sburtâ EA a decidi chest pas – al à spiegât Larreina – al è stât prin di dut il fat che il PNV si à slontanât simpri di plui de bataie pe sovranitât dal Paîs Basc, cemût che si à viodût a clâr cul sfantâsi dal progjet de consultazion popolâr e po cui pidiments metûts di diviers setôrs dal PNV a puartâ la cuestion a nivel european. Une part dal PNV e je aromai su posizions autonomistis e e à metût di bande la cuestion de sovranitât dal Paîs Basc – al à zontât il rapresentant di EA – e duncje e je bisugne di un sogjet che al sedi un riferiment clâr pal percors di autodeterminazion dal popul basc e che al dedi une scjassade ae situazion. La decision no je stade glotude masse ben de dirigjence dal PNV che no à platât il so malstâ pe sielte di EA di cori di bessole.
La volontât di cori di bessole e di meti adun un front impegnât a clâr pe sovranitât dal Paîs Basc e à metût EA al centri dai atacs dal PP, il partît de diestre spagnoliste che al à fat savê che al controlarà lis listis eletorâls par viodi che no sedin dentri candidâts leâts ae çampe indipendentiste basche, che e à viodût aromai dutis lis sôs espressions politichis metudis fûr leç. Denant de menace dal PP di sburtâ la sô ilegalizazion, la rispueste dal partît basc no si è fate spietâ. EA di agnorums e je impegnade inte difese dai dirits umans e cuintri dal ûs de violence, il stes no si pues dî di diviers dirigjents dal PP – e à rispuindût la direzion dal partît basc – e duncje ancje nô o controlarìn lis listis dal PP par viodi in ce rapuarts che a son cui sassins fassiscj e franchiscj par podê domandâ di metilisu fûr leç.

Font: EiTB, 19/11/08; Món Divers, 20/11/08; Deia, 11/11/08; Gara, 11/11/08; Món Divers, 11/11/08


Pontade 24 08 (25/11/08) - 10

Sardegne: publicât ancje par sart l’Anuari dal contribuent

La Agjenzie des Jentradis e à publicât ancje par sart l’Anuari dal contribuent, un test di 190 pagjinis cun dutis lis informazions utilis par paiâ lis tassis e, plui in gjenerâl, in materie fiscâl. Il lavôr di traduzion al è stât fat dal Ufici regjonâl pe lenghe sarde e si insuaze intal percors, inviât de Regjon, di meti a disposizion dai citadins i documents de aministrazion publiche ancje in lenghe sarde. Il lavôr di traduzion al à permetût ancje di incressi la terminologjie specialistiche dal sart intal cjamp de economie e de finance, che cussì e podarà zovâ par voltâ ancje altris documents.
Font: ULS Ogiastra, 19/11/08


Pontade 24 08 (25/11/08) - 9

Cossovo: manifestazion cuintri dal plan de ONU

Ai 19 di Novembar diviers miârs di cossovârs albanês (lis stimis a van dai 5 mil ai 100 mil) a àn rispuindût cuntune manifestazion a Pristina al apel fat indenant di une trentine di realtâts associativis par protestâ cuintri dal plan de ONU che al previôt che lis areis dal Cossovo a maiorance serbe a restin sot dal control judiziari e poliziâl des Nazions Unidis, intant che il rest dal teritori al passarà sot de supervision de mission europeane EULEX. Pes organizazions albanesis il plan al menace la integritât e la sovranitât de Republiche cossovare e al ricognòs istituzions serbis che la maiorance albanese e ten di ilegâls. Il plan de ONU al è stât concuardât cu la Union Europeane e cu la Serbie, ma al cjate la oposizion des istituzions cossovaris che, par bocje dal prin ministri Hashim Thaci, a àn fat indenant une propueste alternative.
Font: New Kosova Report, 19/11/08; B92, 19/11/08; Món Divers, 19/11/08; Nationalia, 19/11/08


Pontade 24 08 (25/11/08) - 8

Irlande dal Nord: intese su la devoluzion di justizie e polizie

Daspò di passe cinc mês di bloc, l’esecutîf nordirlandês al torne a lavorâ. A blocâ lis sôs ativitâts a jerin stâts i contrascj jenfri il Democratic Unionist Party e il Sinn Féin, i doi partîts principâi de comunitât unioniste e di chê republicane de Irlande dal Nord. Daûr dai lôr contrascj e jere massime la cuestion de devoluzion dai podês su la justizie e su lis fuarcis di polizie, che cumò a fasin ancjemò riferiment a Londre. A pidimentâ il passaç dai podês al jere soredut il DUP, che cumò al somee vê cjatât une intese cul Sinn Féin par inviâ chest procès. Cundut che no si à fissât des scjadincis, si calcole che il trasferiment des competencis di Londre a Belfast al podarès jessi a bon pe Vierte di chest an che al ven. Cu la devoluzion de justizie si varà di meti sù un ministeri di pueste. A ocupâlu al varà di jessi un ministri elet cul vôt de maiorance sei dai parlamentârs unioniscj, sei di chei republicans.
Font: Irish Times, 18/11/08; Belfast Telegraph, 18/11/08; Món Divers, 18/11/08; Nationalia, 19/11/08


Pontade 24 08 (25/11/08) - 7

Sahara Ocidentâl: in miârs in place a Madrid pe autodeterminazion

A jerin in miârs ai 15 di Novembar a Madrid par manifestâ la lôr solidarietât cul popul saharawi e par denunciâ la ocupazion ilegâl dal Sahara Ocidentâl de bande dal Maroc e lis responsabilitâts dai diviers guviers spagnûi par cheste situazion. Cun di fat, propit la Spagne e à lis responsabilitâts plui grandis a nivel european pe ocupazion marochine dal Sahara Ocidentâl, dal moment che intant dal procès di decolonizazion e à lassât man libare al Maroc par ocupâ militarmentri il teritori. La manifestazion e je stade inmaneade dal coordenament des associazions solidariis cul popul saharawi e di une associazion che e ten adun rapresentants dal mont dal spetacul impegnâts pe libertât dal Sahara Ocidentâl. Lis responsabilitâts de Spagne, dut câs, no si riferissin dome al procès di decolonizazion, ma ancje al dì di vuê dal moment che e furnìs al Maroc materiâl militâr che al covente par mantignî la ocupazion dal Sahara Ocidentâl e par perseguitâ la popolazion saharawi che di passe trente agns si bat pal dirit ae autodeterminazion.
Font: Nationalia, 17/11/08


Pontade 24 08 (25/11/08) - 6

Bretagne: iniziativis pal bilinguisim intes stazions de ferovie

A van indenant lis iniziativis dal coletîf Ai’ta par sburtâ lis feroviis francesis a doprâ ancje la lenghe bretone tes stazions che si cjatin in Bretagne. La ultime azion si è davuelte alì de stazion de citât di An Oriant / Lorient, là che la aministrazion e à sielzût la strade dal bilinguisim. Cundut achel, di fat, la lenghe bretone no cjate spazi inte stazion feroviarie che e je gjestide de societât francese des feroviis (SNCF). Cussì i militants dal coletîf Ai’ta a àn inmaneât inte jentrade de stazion une rapresentazion su la muart lente dal breton che e à fat no pôc scjas. Se lis feroviis francesis no cambiaran ande – a àn fat savê i membris dal coletîf – a varan di usâsi a iniziativis di cheste fate e no dome in Bretagne, ma ancje intal Paîs Basc setentrionâl e inte Catalogne dal Nord sot aministrazion francese.
Font: Ovest France, 17/11/08


Pontade 24 08 (25/11/08) - 5

Corsiche: indipendentiscj e autonomiscj cuintri dal PADDUC

La gnove aleance indipendentiste che si ricognòs tal progjet Corsica Libera e à presentât un progjet alternatîf al PADDUC, ven a dî il Plan plurienâl di svilup de Corsiche che al varès di fissâ lis liniis di svilup de isule pai prossims cincuante agns. La propueste di Corsica Libera e ponte suntun svilup che al rispuindi pardabon aes potenzialitâts economichis de isule e che a ‘nt rispieti l’ambient e lis carateristichis naturâls. A contestâ il PADDUC, ancje se cun formis diviersis, a son ancje il moviment armât FLNC (Front di Liberazion Nazionâl Cors) e il partît autonomist A Chjama Naziunale. Chest ultin al à invidât chês altris fuarcis politichis di aree nazionaliste a dâsi dongje par rapresentâ une alternative politiche reâl ai sogjets politics che in dì di vuê a son al guvier in Corsiche.
Font: Radio Alta Frequenza, 17/11/08


Pontade 24 08 (25/11/08) - 4

Bretagne: militants de çampe indipendentiste inmò sot procès

A jerin sù par jù 350 lis personis che si son dadis dongje ai 15 di Novembar a Roazhon / Rennes par manifestâ la lôr solidarietât a Gaël Roblin, Kristian Georgeault e Pascal Laizé, trê militants de çampe indipendentiste bretone che si cjatin di gnûf sot procès par une schirie di atentâts. Daspò di une vicende judiziarie durade cuatri agns e denunciade di tancj mieçs di informazion tant che indegne di un paîs democratic, i trê a jerin stâts assolts. Cundut achel cumò, a cuatri agns de lôr assoluzion, si ricjatin di gnûf sot procès denant di un tribunâl speciâl pai stes fats, ma cence che si vedin elements gnûfs. Pai moviments politics bretons, sei di çampe che di drete, si trate di une farse che e volarès meti sot procès la militance indipendentiste a pro de Bretagne. Che la vicende judiziarie no fos imparziâl si lu veve capît bielzà dal imprin, cun di fat la zornade stesse dal atentât plui grues che al ven atribuît ai trê (chel di Quévert), l’incjariât de procure antiterorisim di Parîs al veve za dite che la uniche piste di investigâ e jere chê dal indipendentisim breton.
Font: ABP, 15/11/08; Eurominority, 08/11/08


Pontade 24 08 (25/11/08) - 3

Scozie: a risi il procès di devoluzion

Pal moment il guvier britanic nol pense di trasferî gnovis competencis al esecutîf scozês. Cheste posizion e je stade confermade tun document presentât ae comission Calman, metude sù dai principâi partîts britanics par prontâ une propueste di devoluzion par fâi cuintri al progjet indipendentist dal SNP, che cumò al guvierne la Scozie. Il guvier di Londre al dîs a clâr, par esempli, che il setôr energjetic al à di restâ tes sôs mans, massime a front dal disen di fâ sù gnovis centrâls nucleârs che al viôt invezit contrari l’SNP. No mancjin po i riferiments a di une revision dal sisteme di gjestion des jentradis che nol plâs par nuie al esecutîf scozês che, par bocje dal prin ministri Alex Salmond, al acuse il guvier britanic di menaçâ il procès di devoluzion. In Scozie ducj i partîts, ancje chei contraris ae indipendence, a son dacuardi tal domandâ il trasferiment di plui podês, ma i lôr coleghis sentâts intal Parlament britanic a mostrin di vê une altre posizion.
Font: BBC, 10/11/08; Món Divers, 11/11/08


Pontade 24 08 (25/11/08) - 2

Ladinie: tes provinciâls trentinis, confermât il conseîr de UAL

Lis elezions provinciâls in Trentin a àn confermât ae presidence Lorenzo Dellai (centri çampe) cul 56,99% des preferencis. Il so aversari principâl, Sergio Divina (centri diestre), al à vût invezit di fermâsi al 36,5%. In corse pe presidence a jerin ancje altris cuatri candidâts, ma gjavât Nerio Giovanazzi (poiât di dôs listis civichis), nissun al à passât il 2%. In Consei, dongje di Giovanazzi e Divina, a son stâts elets: intal centri çampe, 8 conseîrs dal PD, 6 de UpT, 3 dal Partît Autonomist Trentin Tirolês, e un parom dai Verts, de liste Di Pietro e de Union Autonomiste Ladine; e tal centri diestre, 6 conseîrs de Leghe Nord, 5 dal PdL e un de liste civiche Divina. Il partît che al è cressût di plui rispiet aes elezions dal 2003 al è chel de Leghe Nord, che e je passade dal 6,12% al 14,07. Par chel che al rivuarde lis comunitâts gjermanichis dal Trentin, inte aree dai mochens si à vude une tindince a votâ massime par UpT e PATT, invezit tra i cimbris i partîts plui votâts a son stâts PD e PATT. Te circoscrizion ladine, che e à dirit a elei un conseîr, si à vude la conferme di Luigi Chiocchetti, de Union Autonomiste Ladine. Chest colp, contrari dal 2003, a jerin dôs lis listis ladinis che si confrontavin: dongje de UAL leade al centri çampe, di fat, si veve ancje la liste Fassa, aleade cul centri diestre. Dentri de circoscrizion, la prime e à cjapât il 54,03% des preferencis (1,17% a nivel provinciâl) e la seconde il 26,63% (0,61% a nivel provinciâl). Tra lis novitâts di chestis elezions, si à vût ancje un spazi informatîf par ladin cu la forme de web tv par inzornâ in direte sui risultâts eletorâi. Un servizi, a disin i responsabii dal servizi provinciâl pe promozion des minorancis linguistichis, che al à vût une buine rispueste di public.
Font: Provincie di Trent, 10-12/11/08


Pontade 24 08 (25/11/08) - 1

Paîs Catalans: in place a Perpignan pe uficialitât dal catalan

A jerin sù par jù 2 mil lis personis che ai 8 di Novembar a àn partecipât a Perpinyà / Perpignan a di une manifestazion par domandâ la uficialitât de lenghe catalane inte Catalogne Nord, sot aministrazion francese. La iniziative e jere leade ae ultime tape de edizion 2008 de Correllengua che, chest an, e je passade par 450 comuns dai Paîs Catalans clamant dongje, in dut, uns 300 mil personis.
Font: Món Divers, 10/11/08


11/11/08

Pontade 23 08 (11/11/08) - 15

Paîs Catalans: proteste intes Baleârs par une sanitât ancje par catalan

Un servizi sanitari che si indreci ai pazients che lu domandin ancje par catalan. Al è ce che al domande il Comitât dai utents de salût publiche des isulis Baleârs che si è dât dongje di pôc e che, ai 7 di Novembar, al à inmaneât une iniziative par riclamâ la atenzion su cheste problematiche. Un dai problemis plui grues, a disin i membris dal Comitât, al è che al pues fintremai sucedi di vê diagnosis faladis par vie de diference di lenghe tra miedi e pazient. La domande di vê personâl bilengâl, par altri, e cjate la poie ancje di une part dal personâl sanitari. Cun di fat, ae iniziative a àn partecipât ancje miedis e infermîrs. Dut câs, a ‘nd è ancje personâl sanitari che nol vûl che si vedi di cognossi la lenghe locâl par podê lavorâ intal setôr sanitari public des Baleârs. Uns dusinte di lôr a vevin manifestât la dì prime cuintri dal stampon di decret che al previôt la cognossince dal catalan par podê lavorâ te sanitât publiche des isulis.
Font: Vilaweb, 07/11/08


Pontade 23 08 (11/11/08) - 14

Paîs Catalans: servizi di traduzion automatiche ancje par ocitan

Il servizi di traduzion automatiche in linie de Generalitat de Catalunya al è stât slargjât par cjapâ dentri ancje l’ocitan. Di cumò indenant, di fat, al sarà pussibil voltâ tescj dal catalan e dal spagnûl al ocitan, sei te varietât di riferiment, sei ta chê aranese. La traduzion e je pussibile ancje ta chê altre direzion, ven a dî dal ocitan al catalan e al spagnûl. Si à di ricuardâ che l’ocitan al è ricognossût tant che lenghe couficiâl intune piçule part dal teritori dal Principât di Catalogne, ven a dî la Val d’Aran.
Font: Món Divers, 06/11/08


Pontade 23 08 (11/11/08) - 13

Serbie: guvier acusât di no vê difindût lis minorancis

La organizazion pe difese dai dirits umans Human Rights Watch e à dât fûr un rapuart là che e acuse il guvier di Belgrât di no vê difindût lis buteghis e lis cjasis dai albanês che a vivin sul so teritori dai atacs di estremiscj serps intai dîs daspò che il Cossovo al à declarât la indipendence. Lis autoritâts de Serbie a vegnin acusadis di no vê cirût di prevignî chestis azions e di no vê fat cuasi nuie par fermâ e po par puartâ denant de justizie i colpevui. Si fevele di almancul 200 episodis di violence e di juste 10 condanis, cundut che plui di une volte i fats a vessin vût tant che testemonis membris dai mieçs di comunicazion o fintremai des fuarcis di polizie. HRW e à ancje ricuardât che l’ûs de violence cuintri des minorancis nol è un fat gnûf in Serbie, no dome cuintri dai albanês, ma ancje di rom e musulmans.
Font: Nationalia, 05/11/08


Pontade 23 08 (11/11/08) - 12

Paîs Basc: riclam de ONU ae Spagne su la violazion dai dirits umans

Ai 31 di Otubar al è stât dât fûr il cuint rapuart dal Comitât pai dirits umans de ONU sul stât spagnûl là che si domande al guvier di Madrid di intervignî par eliminâ chei elements che a pidimentin i dirits civîi e politics. I esperts de ONU si mostrin preocupâts pai câs di torture segnalâts intal stât spagnûl e a denunciin il guvier di Madrid di no vê imbastît nissun intervent par dislidrisâ cheste pratiche. Tra lis misuris di cjapâ par lâ ta cheste direzion, il Comitât pai dirits umans al domande di eliminâ il regjim di incomunicazion, di limitâ l’ûs de preson preventive e di garantî la presince dai avocats difensôrs e la riprese audiovisive di ducj i interogatoris. La situazion piturade dal rapuart de ONU si riferìs dispès a câs che a rivuardin citadins bascs, compagn di un altri aspiet denunciât intal document, ven a dî l’abûs de definizion di terorisim doprade par impresonâ e po par condanâ citadins e realtâts associativis. Il Comitât pai dirits umans, di fat, al ponte il dêt cuintri di nûf articui dal codiç penâl spagnûl che tai ultins agns a son stâts doprâts in maniere sistematiche cuintri di citadins bascs, come tal câs dal procès 18/98 o ta chel cuintri des associazions pai dirits umans Gestoras – Askatasuna. L’ûs spropositât de definizion di “associazion o colaborazion cun grups teroriscj”, si lei tal document, al pues limitâ in maniere no justificade la libertât di espression e di associazion. Il rapuart de ONU al pant preocupazion ancje pe pussibilitât dal judiç di proibî ae difese l’acès parziâl o fintremai totâl ai documents de istrutorie.
Font: Gara, 01/11/08


Pontade 23 08 (11/11/08) - 11

Bretagne: pericui pal insegnament bilengâl

L’Ufici pe lenghe bretone (Ofis ar brezhoneg) al à presentât i dâts su la situazion dal insegnament bilengâl in Bretagne. In dut a son passe 12 mil i students des scuelis publichis, di chês associadis o di chês confessionâls che a puedin studiâ par breton, un numar un pôc plui alt di chel dal an passât. Ancje il numar des scuelis che a ufrissin l’insegnament bilengâl al è un tic cressût. Cundut achel, la incressite e je la plui basse che si à vude intai ultins agns e no dal sigûr par vie de domande, che e je alte. Cun di fat, là che lis scuelis bilengâls a son za, la domande e va dilunc a cressi compagnade, almancul in part, ancje di un aument de ufierte; di chês altris bandis, invezit, no si da rispueste ae domande di insegnâ ancje par breton che e rive dai citadins. L’Ufici pe lenghe bretone al domande, duncje, al stât che si impegni di plui inte politiche linguistiche e al domande che i vegni dade la pussibilitât di coordenâ ducj i sogjets interessâts. Dut câs, al denuncie il Coletîf breton pe democrazie e pai dirits dal om, la situazion e je plui penze di chê piturade dal Ufici pe lenghe bretone. Cun di fat, a disin, no si sa ce fin che al vedi fat il concors par reclutâ i professôrs des scuelis bilengâls, otignût tal 2002 dopo agns di bataiis. Cence dismenteâ che di plui bandis si à refudât di meti in pîts classis bilengâls cundut che lis iscrizions a fossin avonde. Ta cheste maniere, al dîs il Coletîf, si va a sassinâ la scuele bilengâl gjavantji personâl e spazis.
Font: Oui au breton, 01/11/08; Ofis ar brezhoneg, 23/10/08


Pontade 23 08 (11/11/08) - 10

Ingussezie: dimetût il president ingùs

Il president de Federazion Russe, Dimitri Medvedev, al à sostituît ae presidence de Republiche de Ingussezie Murat Zyazikov, che si à dimetût daspò des pressions rivadis dal Cremlin. Zyazikov, che al jere acusât di plui bandis di jessi responsabil par cetantis violencis e violazions dai dirits umans vudis tai ultins timp in Ingussezie, al è stât obleât a tirâsi indaûr dal president rus pe sô incapacitât intal “pacificâ” la situazion dal paîs caucasic. Al so puest al è stât nomenât Yunus-Bek Evkurov, un militâr nassût tal 1963 intune aree a maiorance ingusse de Ossezie dal Nord. La oposizion, invezit, e domandave che al so puest al tornàs il president ingùs di prime, ven a dî Ruslan Aushev. Tai ultins mês, in Ingussezie, a son cressudis sei lis violencis dai militârs rus e de polizie locâl, sei lis azions dai grups armâts ingùs di stamp islamist, al pont che plui di cualchidun al à piturât la situazion di vuere civîl di basse intensitât.
Font: Món Divers, 31/10/08


Pontade 23 08 (11/11/08) - 9

Ucraine: domandât il dirit di autodeterminazion dai rutens

La Republiche de Carpazie rutene e je stade proclamade ai 25 di Otubar di un grup di delegâts rutens vuidâts dal religjôs ortodòs Dimitri Sydor. Cun chest at i rapresentants di cheste comunitât, che e vîf a cjaval tra Polonie, Slovachie e Ucraine, a sburtin par che la Ucraine ur ricognossi ai rutens il dirit di autodeterminazion. O sperìn tune division pacifiche tant che chê jenfri Cechie e Slovachie, al varès dite Sydor. I delegâts rutens a ricuardin che intal 1991, inte suaze de consulte su la indipendence de Ucraine, la maiorance de popolazion de Transcarpazie – la regjon là che a vivin i rutens – e veve votât par che il lôr teritori al deventàs une republiche autonome. I guviers ucrains, invezit, no dome no àn mai dât nissune forme di autonomie ae Transcarpazie, ma fin al 2007 no ricognossevin nancje la esistence di une minorance rutene. La azion politiche dai delegâts rutens e à discjadenât la fote di diviers partîts ucrains, in primis Nestre Ucraine e Svoboda, che a domandin di incriminâ i dirigjents dal congrès ruten. Daûr di cheste azion – a acusin i partîts ucrains – al è il Cremlin che al à chê di destabilizâ la Ucraine. La Transcarpazie e jere passade ae Union Sovietiche daspò de seconde vuere mondiâl. In dì di vuê, intal so teritori a vivaressin uns 800 mil rutens, intune cuntune significative minorance ongjarese.
Font: Món Divers, 30/10/08


Pontade 23 08 (11/11/08) - 8

Scozie: sucès grandon par BBC Alba

Ai 19 di Setembar, come che si veve za dite, a son tacadis lis trasmissions di BBC Alba: il gnûf canâl de television publiche britaniche par gaelic scozês. Dome cumò, dut câs, a son stâts comunicâts i dâts sui nivei di scolte de prime setemane di emission di BBC Alba. Daûr di chescj dâts, al ven fûr che ta cheste dade a son stâts 610 mil i scozês che si son sintonizâts sul gnûf canâl, ven a dî sù par jù 15% de popolazion totâl. Dut câs, ce che al à fat plui scjas, al è che in Scozie si calcole che lis personis che a fevelin par gaelic a sedin uns 70 mil. I programs, duncje, a son stâts viodûts ancje di cetancj scozês che no fevelin par gaelic, judâts dal ûs dai sottitui par inglês. La diretore di BBC Alba, Margaret Mary Murray, une vore contente par chest sucès e à spiegât che la int si à sintude atirade de origjinalitât e de frescjece dal canâl.
Font: Nationalia, 28/10/08, The Herald, 28/10/08


Pontade 23 08 (11/11/08) - 7

Sami: manifestazion cuintri dal disfrutament de lôr culture

Lis organizazions zovanîls sami di Finlande, Svezie e Norvegje so son dadis dongje a Rovaniemi, intant de diesime novesime edizion de conference sami, par protestâ cuintri di chel che a judichin un disfrutament e un ûs distuart dal lôr costum tradizionâl. I sami a àn dite che no son plui disponibii a acetâ che la industrie turistiche e disfruti par fins comerciâi la lôr culture e il lôr vistî tradizionâl.
Font: Eurolang, 28/10/08


Pontade 23 08 (11/11/08) - 6

Grecie: indenant cu la repression dai macedons

A son siet lis personis indagadis de magjistrature greghe pe proteste cuintri des servitûts militârs metude in at de popolazion di Zabrdeny / Lofi, un dai paîs là che e vîf la minorance macedone. A son ducj membris de comunitât locâl che a vevin cirût di fermâ i cjars armâts grêcs domandant che il lôr teritori nol fos plui doprât pes esercitazions de artiliarie pesante. Lis voltis stadis, di fat, in plui des limitazions pe int, il paîs al jere stât centrât des bombis. Lis personis indagadis a son stadis acusadis di vê blocât un traspuart publicât, di vê inviât la proteste e di vê resistût in maniere violente ae polizie. I fats di Lofi a son stâts al centri di un dibatiment dal Parlament grêc, a àn jevât lis protestis de Republiche di Macedonie, e a àn puartât il partît de minorance macedone a acusâ lis autoritâts greghis di discriminazions. Cun di fat, azions cuintri des servitûts militârs a vevin za interessât altris zonis de Grecie, ma cence mai jevâ une reazion cussì dure des autoritâts greghis che a vevin ancje arestât e po espuls cuatri gjornaliscj rivâts de Macedonie par documentâ i fats.
Font: Eurolang, 28/10/08


Pontade 23 08 (11/11/08) - 5

Sud Tirôl: vitorie de SVP, ma e cres la diestre

Lis elezions aministrativis in provincie di Bolzan a àn tornât a dâ al partît storic sudtirolês, la SVP (Südtiroler Volkspartei), la maiorance dai conseîrs elets, ven a dî 18 su 35. Ta cheste maniere il president in scjadince, Luis Durnwalder, in carghe bielzà dal 1989, al larà indenant a guviernâ inmò par une legjislature. Cundut achel, la SVP e à pierdût la maiorance assolude dai consens, passant dal 55,6% des aministrativis dal 2003 al 48,1% di cumò. La plui part dai vôts pierdûts di cheste formazion politiche a son passâts al partît Die Freiheitlichen, partît di diestre cun leams fuarts cu la analighe formazion austriache, che al è stât votât dal 14,3% dai eletôrs passant dai 2 elets dal 2003 ai 5 dal dì di vuê. Al tierç puest par numar di vôts, cul 8,3%, si cjate il prin partît talian, o sei il Popolo della Libertà che al oten cussì 3 conseîrs. Cun doi elets parom si àn po il Partît Democratic (6% dai vôts), i Verts – Listis Civichis (5,8%), e la Süd-Tiroler Freiheit (4,9%), che e domande un referendum par tornâ cu la Austrie. A completâ il cuadri dai elets o cjatìn, cuntun conseîr ognidun, la Union für Südtirol (2,3%), la Leghe Nord (2,1%) e Unitalia (1,9%), coalizion de estreme diestre taliane. Lis formazions di stamp autonomist o nazionalist sudtirolês a cjapin in dut 26 dai 35 conseîrs disponibii. La liste Ladins Dolomites si è fermade al 1,1% dai vôts e no à rivât a jentrâ in Consei provinciâl. Intai Comuns ladins dal Sud Tirôl e je rivade cuasi pardut disore dal 15%, cun pontis dal 27,6% a S. Martin e dal 20,3% a Badia.
Font: Provincie di Bolzan, 27/10/08; Món Divers, 27/10/08; Nationalia, 27/10/08


Pontade 23 08 (11/11/08) - 3

Cossovo: ipotesi di division aministrative

Une division aministrative dal Cossovo che e separi la minorance serbe dal teritori a maiorance albanese. Al è un dai ponts de propueste fate indenant di Andrew Ladley - che al è a cjâf de scuadre di mediatôrs de ONU che e cîr di cjatâ un acuardi jenfri i guviers di Priština e di Belgrât - ai rapresentants dal guvier cossovâr intant di un incuintri riservât. Di Priština e je rivade la conferme dal incuintri, ma si à dineât che Ladley al vedi presentât une propueste di acuardi. Daûr di fonts gjornalistichis, i rapresentants cossovârs a varessin impedît al mediatôr de ONU di presentâ la sô propueste e a varessin bandonât l’incuintri par vie che par lôr la indipendence e la integritât dal Cossovo no son plui in discussion.
Font: B92, 27/10/08


Pontade 23 08 (11/11/08) - 4

Gales: promozion dai prodots agricui cul galês

La compagnie Really Welsh, che e distribuìs prodots alimentârs, e à decidût di doprâ la lenghe galese su lis confezions dai siei cauliflôrs. Ta cheste maniere si podarà viodi il simbul doprât par segnalâ un prodot che al “fevele” ancje par galês sui 60 mil cauliflôrs che la aziende e met fûr ogni setemane. La lenghe galese e zonte alc di plui ae cualitât dal prodot – a àn spiegât i rapresentants de compagnie – parcè che la int si fide dal mangjâ produsût in Gales. O tachìn cui cauliflôrs – a àn zontât – ma o vin intenzion di meti il galês su ducj i nestris prodots alimentârs. La iniziative e je nassude de colaborazion tra la imprese e l’Ufici pe lenghe galese.
Font: WLB, 27/10/08


Pontade 23 08 (11/11/08) - 2

Gales: arestâts militants pai dirits linguistics

Sîs membris de Cymdeithas yr Iaith Gymraeg – la Societât pe lenghe galese, grup di pression che di agns al è in prime linie inte difese dai dirits linguistics dai galês – a son stâts arestâts par vê piturât suntun mûr de gnove sede de Assemblee nazionâl galese a Aberystwyth la scrite “Mesur Iaith Cyflawn” (ven a dî: une leç complete pe lenghe), messaç po sotscrit di une altre cincuantine di militants. Tra i arestâts a son la gnove presidente de associazion Menna Machreth, il vicepresident Rhys Llwyd, e la responsabile de campagne pe lenghe Bethan Williams. La azion si insuaze te campagne par che il Guvier galês al rispieti la sô promesse di dâ fûr une gnove leç di politiche linguistiche pal galês che e cjapi dentri ancje lis aziendis privadis. La propueste de Cymdeithas par une gnove leç e veve cjatât la poie dai plui impuartants partîts politics, ma cumò il Guvier galês nol da segnâi di lâ indenant par cheste strade. Altris membris de associazion a jerin za stâts arestâts e multâts par vê fat scritis a pro di une gnove leç su lis vitrinis des grandis cjadenis che a àn politichis aziendâls judicadis discriminatoriis pal galês.
Font: Cymdeithas, 25/10/08; Eurolang, 27/10/08; Racó Català, 30/10/08


Pontade 23 08 (11/11/08) - 1

Ucraine: la politiche statâl e viole i dirits linguistics

Daspò de indipendence, a son plui di setante i ats legjislatîfs e i regolaments fats bogns in Ucraine par limitâ l’ûs de lenghe russe. Dai 20 mil istitûts secondaris cul rus tant che lenghe veicolâr dal 1991 si è passâts ai 1.345 dal dì di vuê. A son chescj un pôcs dai dâts che il rapresentant dal plui impuartant partît di oposizion (Partît des Regjons), Viktor Janukovyč, al à doprât par denunciâ la politiche linguistiche dal guvier ucrain. Si trate – al à dite – di une violazion dai dirits dal om e de Cjarte europeane des lenghis regjonâls o minoritariis. Il Partît des Regjons al è cumò daûr a meti adun un progjet di leç che al previôt che ducj i funzionaris publics a vedin di cognossi sei l’ucrain che il rus – al à dite Janukovyč – parcè che nol è pussibil che no si cognossi il rus tun paîs là che la metât de popolazion e fevele cheste lenghe. La fuarce de Ucraine – al à zontât il rapresentant de oposizion – e sta ancje intal fat che si trate di un stât plurinazionâl là che, dongje dai ucrains, a vivin rus, grêcs, ebreus, bulgars, rumens, moldâfs, ongjarês, e membris di altris comunitâts.
Font: RIA Novosti, 22/10/08


28/10/08

Pontade 22 08 (28/10/08) - 12

Paîs Basc: mobilitazions diviersis pe autodeterminazion

Miârs di rapresentants dai trê partîts che a guviernin la Comunitât Autonome Basche (PNV, EA, EB) e dal partît nazionalitari Aralar si son dâts dongje ai 25 di Otubar a Gasteiz e in altris cinc localitâts baschis par presentâ la iniziative “Hitza hitz” che e à chê di rivendicâ il dirit dal popul basc di decidi dal so avignî. Si sin dâts dongje – si à declarât intant de manifestazion – par proclamâ denant de Europe e dal mont la nestre esistence come popul e il nestri dirit a jessi sintûts par decidi in maniere libare e democratiche il nestri avignî. I organizadôrs a àn di une bande domandât a ETA di bandonâ la lote armade par podê inviâ un procès di pâs che al cjapi dentri dutis lis fuarcis politichis cence esclusions e, di chê altre bande, a àn denunciât i atacs judiziaris e legjislatîfs che a àn violât la libertât e lis garanziis democratichis di citadins, grups politics, associazions, e mieçs di comunicazion bascs. La normalizazion politiche – a àn zontât – e domande inclusion e avualiance di condizions e no la esclusion.
I rapresentants de çampe indipendentiste basche (metude fûr leç des autoritâts spagnolis) si son, invezit, dâts adun a Donostia là che a àn invidât ducj i setôrs indipendentiscj e progressiscj dal Paîs Basc a unî lis fuarcis e a no ripeti i erôrs dal passât. L’obietîf che si à di dâsi – al è stât dit – al è chel de autodeterminazion dal popul basc e par fâlu al covente superâ il statût di Gernika e i pidiments de Costituzion spagnole, che a son stâts doprâts par fâ sù la Spagne e sdrumâ il Paîs Basc, e par rindi il basc une lenghe di seconde categorie. Intant de iniziative no son mancjadis lis critichis ae politiche dal PNV, acusât di fâ i siei interès e no chei dal popul basc.
Font: Gara, 25/10/08


Pontade 22 08 (28/10/08) - 11

Flandris: il guvier al domandarà un domini internet propri

Il guvier flamant al à decidût di domandâ un domini propri su internet pes Flandris. La domande e sarà fate indenant tal 2009 al organisim internazionâl che al assegne i dominis su la rêt. A vierzi la strade pe assegnazion di un domini aes nazions cence stât e jere stade la Catalogne e a son za diviersis lis nazionalitâts minorizadis che a àn fat indenant cheste domande. Dut câs, nol è stât decidût ce non che si domandarà, lis ipotesis plui probabilis a son .fla o ben .vla (di Vlaanderen, il non flamant des Flandris).
Font: Món Divers, 24/10/08


Pontade 22 08 (28/10/08) - 10

Italie: al cres il marum des minorancis pai ats dal guvier talian

Al cres il marum framieç des comunitâts minorizadis intal stât talian par vie des ultimis decisions dal guvier talian. A preocupâ a son massime i tais previodûts sul front finanziari e su chel scolastic. Tra i prins a mobilitâsi a son stâts i slovens che, pai tais decidûts dal ministri Tremonti, a riscjin une riduzion dal 40% dai lôr contribûts. I tais, dut câs, a cjapin dentri ancje la minorance taliane in Slovenie e in Cravuazie e a menacin ancje i fonts pe leç statât 482/99 che tai ultins agns a son stâts sbassâts dal continui. Cun di plui, la menace di tais, in plui des risorsis, e ven slargjade ancje aes istituzions di riferiment des minorancis come tal câs dal Istitût Culturâl Ladin “Majon di Fascegn” che pal ministri talian Brunetta al sarès un “ent inutil” che al meretarès sierât. Preocupazions a son po ancje pai contignûts dal decret Gelmini che cu la figure dal “mestri unic” al menace l’insegnament e l’ûs des lenghis minoritariis no dome in realtâts come chê dal istitût bilengâl di Sant Pieri dal Nadison, ma ancje a front di ce che e previôt la leç 482/99.
Font: Novi Matajur, 24/10/08; Il Trentino, 18/10/08; Slovit, n. 131; Primorski Dnevnik, 12/10/08


Pontade 22 08 (28/10/08) - 9

Corsiche: nassude la Federazion dai elets nazionaliscj

Inte suaze dai moviments che a interessin il panorame des fuarcis nazionalistis e autonomistis corsis za di cualchi timp, cumò e je nassude “A Federazione di l'eletti naziunalisti, eculugisti è prugressisti” (La Federazion dai elets nazionaliscj, ecologjiscj e progressiscj) che e met adun za une sessantine dai 250 aministradôrs locâi de Corsiche. Il prin obietîf de Federazion al è chel di meti jù un document che al fissi te difese de tiere e de identitât corse, te superioritât dai interès gjenerâl, e te trasparence de azion publiche i principis di fonde di cheste gnove realtât.
Font: Radio Alta Frequenza, 23/10/08; Nationalia, 23/10/08


Pontade 22 08 (28/10/08) - 8

Norvegje: prin incuintri su lis lenghis artichis nativis

A Tromso, in Norvegje, dai 19 ai 21 di Otubar si è davuelt il prin incuintri su lis lenghis artichis nativis. La iniziative e je stade inmaneade dal Consei Artic, un organisim intergovernatîf su lis cuestions dai popui natîfs artics che al met adun i rapresentants istituzionâi di chestis popolazions. Dal incuintri al è rivât un apel ai guviers dai stâts che a aministrin lis tieris artichis par che a incressin i sfuarçs par sigurâ la vitalitât des lenghis nativis. I guviers interessâts a son chei de Danimarcje, de Finlande, de Islande, de Norvegje, de Russie, de Svezie, dal Canada e dai Stâts Unîts. Intant dal apontament si à ancje marcât il leam tra la difese des lenghis nativis e il svilup sostenibil di cheste zone dal mont. Tra lis popolazions europeanis interessadis di cheste iniziative, la plui gruesse e je chê sami.
Font: Nationalia, 22/10/08


Pontade 22 08 (28/10/08) - 7

Romanie: RMDSz al domande l’ongjarês uficiâl in Transilvanie

L’ongjarês al à di deventâ lenghe uficiâl ta chês provinciis de Transilvanie là che i magjârs a son la maiorance. A domandâlu al è Marko Bela, il president de Aleance Democratiche dai Ongjarês in Romanie (RMDSz), che al à sigurât che chest al sarà un dai impegns dal so partît daspò des elezions pal Parlament rumen che si davuelzaran ai 30 di Novembar. Dut câs, ce che e à fat plui scjàs in Romanie e je la propueste di previodi l’insegnament curicolâr dal ongjarês par ducj i fruts che a frecuentin lis scuelis ta chês provinciis. I partîts rumens, di fat, no vuelin che la lenghe ongjarese e vedi di jessi studiade ancje dai fruts che no partegnin ae comunitât magjare. In ogni câs, il prin pidiment che il partît di Bela al varà di superâ al è chel di passâ il soiâr dal 5% previodût pes elezions politichis rumenis par podê jentrâ in Parlament. Tes elezions dal 2004 la Aleance Democratiche dai Ongjarês in Romanie e veve otignût il 6,2%, ma chest colp e podarès no rivâ a passâ il soiâr par vie de concorince di une altre formazion politiche ongjarese, ven a dî Partît Civic Magjâr (MPP).
Font: Balkan Insight, 21/10/08; Món Divers, 22/10/08


Pontade 22 08 (28/10/08) - 6

Romanie: une campagne par fâ cognossi i rom

Lis comunitâts rom a son la minorance plui discriminade a nivel european, come che a dimostrin diviers studis davuelts ancje des istituzions comunitariis. Cheste situazion si le cjate ancje in Romanie, là che i rom a son une des comunitâts minoritariis plui gruessis. Par cirî di combati cheste situazion e par sdrumâ jù i stereotips che a tocjin cheste popolazion, e je stade imbastide une campagne informative che e larà in onde su lis televisions rumenis. La iniziative, inmaneade dal dipartiment pes relazions interetnichis e de agjenzie nazionâl pai rom dal guvier rumen, e previôt la trasmission e la discussion di cinc documentaris curts che a fevelin dai rom e des lôr problematichis. Cun di plui si previodin ancje dai messaçs publicitaris che a invidin a “Cognossi i rom prime di judicâju”.
Font: Divers.ro, 20/10/08