09/07/15

Paîs Catalans: presentade la manifestazion dai 11 di Setembar

La Assemblea Nacional Catalana e l’Òmnium Cultural, lis dôs organizazions che a son daûr des mobilitazions popolârs pe indipendence, a àn presentât la manifestazion pai prossims 11 di Setembar. Cheste volte la iniziative, batiade Via Lliure a la República Catalana, si propon di jemplâ la Meridiana di Barcelone dal Parc de la Ciutadella fintremai vie Rosselló Pòrcel. Si trate di passe cinc chilometris di viâi che a saran dividûts in dîs sezions dedicadis ai temis principâi de mobilitazion pes elezions dai 27 di Setembar, viodudis tant che moment centrâl intal percors pe indipendence. Si fevele duncje di ecuilibri teritoriâl, diversitât, solidarietât, vierzidure al mont, sostenibilitât, avualiance, inovazion, rinovament democratic, educazion e culture, benstâ e justizie sociâl. Il colôr de mobilitazion di chest an al sarà il blanc, segnât però di piçulis frecis di cetancj colôrs che a compagnaran une grande frece che e mostre la strade pe libertât e che e corarà dilunc di dut il percors su lis mans de int, come une grande onde che e rivarà fin li dal Parlament catalan. Lis iscrizions dai volontaris a tacaran tor de metât dal mês di Lui.
Font: VilaWeb, 02/07/15

Paîs Basc: campagne internazionâl pe liberazion di Otegi

La campagne pe liberazion di Arnaldo Otegi, pont di riferiment de çampe indipendentiste basche, e cjape dentri ancje la Catalogne là che un grup di personaç di prin plan dal mont politic, culturâl e sociâl in plui di firmâ il manifest che al domande la liberazion di Otegi e la fin de dispersion dai presonîrs politics bascs al à poiât il lanç di une campagne dedicade in maniere specifiche ai Paîs Catalans. Si trate di un scandul juridic grandonon che Otegi al resti in preson cuant che no je nissune prove che al sedi mai stât un militant di ETA, al à dite intant de presentazion de campagne l’avocat August Gil Matamala. A nivel internazionâl, la campagne pe liberazion di Otegi e pues contâ su la poie di oms di guvier tant che José Pepe Mùjica, ex president dal Uruguay, Fernando Lugo, ex president dal Paraguay, José Manuel Zelaya, ex president dal Honduras, e Leyla Zana, prime deputade curde intal Parlament turc, oms di glesie tant che il sudafrican Desmond Tutu e Harold Good, president de glesie metodiste irlandese, oms di pâs tant che Nora Morales de Cortiñas, cofondadore des Madres de la Plaza de Mayo, e il premi Nobel pe pâs Adolfo Pérez Esquivel, oms di culture tant che il filosof sloven Slavoj Žižek e la diretore di La Jornada Carmen Lira.
Font: Jornalet, 02/07/15

Bretagne: azion dimostrative cuintri de riforme des regjons

La riforme des regjons cussì cemût che e je stade imbastide dal guvier francês no permet la riunificazion de Bretagne, e innee la Alsazie intune regjon plui grande, no previôt la nassite di une regjon savoiarde e di une basche. Par chest i militants nazionalitariis di chestis comunitâts a àn colaborât a diviersis azions par denunciâ cheste situazion e par sburtâ soluzions diferentis. Tra chês plui di impat mediatic o vin chê metude adun dai moviments Bretagne réunie e Bonnets rouges, che a àn puartât vie di Tulle i cartei cul non dal comun e ju àn po plaçâts denant de puarte des cinc prefeturis logadis te Bretagne storiche. La vile là che al è nassût il president François Hollande e je cussì disparide par cualchi zornade de segnaletiche: une sorte di cuintripàs pe disparizion aministrative che il stât francês al va dilunc a assegnâ aes comunitâts minorizadis che a vivin dentri dai siei confins.
Font: Agence Bretagne Presse, 30/06/15

Gales: la Cymdeithas e domande di fermâ la sierade des scuelis

La organizazion Cymdeithas yr Iath Gymraeg e à domandât di no sierâ altris scuelis di paîs cul galês veicolâr almancul fintremai che no si varà a disposizion i risultâts di une ricercje sui efiets sociolinguistics di chestis sieradis. Intai ultins agns a son diviersis lis scuelis che a son stadis sieradis in areis là che il galês al è ancjemò avonde fevelât e il câs de Ysgol Llangynfelyn, dongje Aberystwyth, al mostre che il procès no si ferme. Cuant che si siere une scuele galese i siei students si cjatin obleâts a lâ te scuele plui dongje che dispès e je par inglês cul risultât di pidimentâ i fruts intal imparâ o perfezionâ il galês. Cence dismenteâ po che pes cubiis zovinis la mancjance di une scuele in paîs e pues fâ la diference tra sielzi un puest o un altri, cul risultât che tes areis là che si fevele par galês lis cubiis zovins a van vie e magari a rivin personis che no cognossin la lenghe. Pe Cymdeithas al covente duncje studiâ ben i efiets che la sierade des scuelis galesis e à vût sul tiessût linguistic e sociâl des comunitâts e, su la fonde dai risultâts, fâ sieltis che no fasin dam ae lenghe.
Font: Cymdeithas, 29/06/15

Sardegne: gnove propueste di leç pe lenghe sarde

Il grup “Sardegna Vera” al à presentât in Consei regjonâl une gnove propueste di leç su la valorizazion de lenghe sarde. La iniziative, metude adun cul Coordenament pal Sart Uficiâl, e ponte a saltâ fûr dal inclapament là che si cjate la politiche linguistiche pal sart. Tra i ponts di fonde de propueste o cjatìn il ricognossiment de Limba Sarda Comuna tant che lenghe couficiâl de Regjon, la introduzion di dutis lis facilitazions pe lenghe sarde che si puedin za meti in vore cence bisugne di modifichis dal Statût di autonomie, il passaç de competence su la lenghe dal assessorât pe istruzion publiche ae presidence de Regjon, la nassite di une agjenzie pe politiche linguistiche, l’inseriment dal sart tant che lenghe curicolâr e veicolâr intes scuelis, la creazion di regjistris pai insegnants e pai operadôrs linguistics, e dute une schirie di misuris specifichis par sburtâ il sart intes aministrazions publichis, tai mieçs di comunicazion, te editorie, tal associazionisim e tes realtâts produtivis. Si previôt po une dotazion anuâl di 3 milions di euros, almancul pai prins trê agns. La propueste e previôt misuris di tutele ancje par chês altris varietâts linguistichis feveladis su la isule tant che il catalan algherês, il sassarês, il galurês e il tabarchin.
Font: Casteddu On Line, 27/06/15

Bretagne: azion rivendicative di Ai’ta! a Lorient

Ai 27 di Jugn uns vincj militants di Ai’ta!, coletîf impegnât intal promovi la lenghe bretone te vite publiche, a àn metût in at une azion rivendicative inte Cité de la voile, il centri culturâl ricreatîf dedicât al mâr, de citât di An Oriant / Lorient. Cun di fat, dopo che il centri al è stât ristruturât dutis lis tabelis e la segnaletiche par breton a son stadis gjavadis. I militants a àn ocupât la jentrade de Cité dulà che a àn metût in sene une sorte di rapresentazion de muart de lenghe bretone. Une delegazion di Ai’ta! e je stade ricevude dal diretôr dal centri che al à motivât la disparizion cul fat che a jerin pôcs i visitadôrs di lenghe bretone e al à dite che in curt e sarà a disposizion une audio vuide par breton.
Font: Ouest France, 27/06/15

Albanie: partît grêc “sot atac” intant des elezions

Dopo di vêsi confrontât cun diviers partîts sei di maiorance che di oposizion, il Partît de unitât pai dirits umans (PBDNJ), che al rapresente la minorance greghe de Albanie, al à decidût di cori di bessôl intes elezions aministrativis che si son tignudis ai 21 di Jugn. Il so intindiment al jere chel di jessi rapresentât in ducj i comuns là che e je presinte la minorance, ma i risultâts otignûts lu àn lassât malapaiât. Di là dai erôrs fats dal moviment, che a saran al centri dal prossim congrès, i siei rapresentants a segnalin che chest risultât al dipent ancje dai atacs “injustificâts e cence precedents” che il partît al à patît de bande dai mieçs di comunicazion, cence dismenteâ il compuartament des struturis statâls acusadis di vê fintremai manipolât il vôt in ciertis circoscrizions par evitâ che il partît de minorance al fos rapresentât in maniere significative intes aministrazions locâls.
Font: Independent Balkan News Agency, 26/06/15

Spagne: pal ELEN discriminazion linguistiche istituzionalizade

Ai 25 di Jugn, la Rêt Europeane pe Avualiance Linguistiche (ELEN) e à denunciât denant dal Consei dai dirits umans de ONU la discriminazion linguistiche che si cjatin a patî intal stât spagnûl i citadins che a fevelin par catalan, galizian, basc, asturian e aragonês. La delegazion – formade di rapresentants des organizazions Plataforma per la Llengua, Acció Cultural, Mesa pola Normalización Lingüística e Iniciativa pol Asturianu – e à presentât un rapuart là che a son dentri i atacs rivâts di istituzions statâls cuintri di chestis cinc lenghis a nivel scolastic, aministratîf, de justizie, dai mieçs di comunicazion e v.i. Lis provis che si cjatin intal rapuart, al è stât dite intant dal incuintri, a permetin di afermâ che intal stât spagnûl la discriminazion cuintri des lenghis minorizadis al è alc di sistemic e, par cierts aspiets, istituzionalizât. Il coordenament al domande duncje al Consei dai dirits umans de ONU di riclamâ lis istituzions spagnolis par che a metin fin a cheste situazion. La Rêt Europeane pe Avualiance Linguistiche e à po anticipât che e domandarà ae Union Europeane che e invii une procedure di infrazion cuintri dal stât spagnûl par vê violât la Cjarte europeane dai dirits fondamentâi e la diretive su la avualiance. Intant de audizion, l’ambassadôr spagnûl nol à contestât nissun dai abûs segnalâts intal rapuart, ma si è limitât a dî che in Spagne no si discrimine nissun.
Font: Ciemen, 25/06/15; Sermos Galiza, 25/06/15; La Veu, 26/06/15; El Punt Avui, 26/06/15

Cossovo: pas pal ricognossiment di montenegrins e cravuats

Prins pas in Cossovo pal ricognossiment di cravuats e montenegrins tant che minorancis separadis. Par completâ il percors si à di modificâ la Costituzion, par chest al covente prime il vie libare de cort costituzionâl e dopo chel dal Parlament. Sul plan normatîf chestis dôs comunitâts a son cjapadis dentri te minorance serbe, ma il president cossovan Atifete Jahjaga al à sigurât che ur sarà dât il status di minorancis costituzionâls e duncje cul dirit di jessi ancje rapresentadis intal Parlament. In dì di vuê lis comunitâts ricognossudis a àn vincj deputâts garantîts, dîs i spietin ae minorance serbe e dîs a son dividûts tra chês altris comunitâts. Tra i ponts di disgredeâ, tra l’altri, al è propit chel di viodi se la incressite des minorancis ricognossudis e puartarà a di un aument dai puescj garantîts o se a saran chês altris minorancis a vê di lassâur une part dai lôr puescj. A vuê al mancje ancje un cuadri esat dal pês che lis dôs comunitâts a àn sul plan numeric dal moment che l’ultin dât sigûr al rimonte al censiment dal 1991 cuant che i montenegrins a jerin sù par jù 20 mil e i cravuats 5 mil.
Font: Balkan Insight, 25/06/15

Gales: garanziis pai spazis galês te universitât di Aberystwyth

A son rivâts insom il siopar de fam e chês altris formis di proteste puartadis indenant di un grup di professôrs, lavoradôrs e students de universitât di Aberystwyth cuintri de sierade de residence Pantycelyn là che a cjatavin acet la associazion dai students di lenghe galese e altris organizazions e societâts universitariis leadis a cheste lenghe. In plui dai students, la decision di sierâ la struture e veve alarmât ancje uns cincuante dipendents de universitât che a segnalavin cemût che cu la sierade si metevin a risi sei diviers puescj aministratîfs, sei l’insegnament par galês. La proteste e je rivade insom dopo che il senât academic al à dât garanziis su la gnove vierzidure de struture, sui timps par finî i lavôrs di ristruturazion e sui finanziaments leâts aes ativitâts didatichis, aministrativis e extracuricolârs par galês.
Font: Wales On Line, 22/06/15

Asturiis: acuardi di colaborazion asturian - mirandês

Il comun di Miranda do Douro, la associazion de lenghe e de culture mirandese e la academie de lenghe asturiane a àn firmât un acuardi che al permet di inviâ une gnove stagjon di relazions culturâls e economichis tra la aree mirandese, in Portugal, e lis regjons di lenghe asturiane dal stât spagnûl. La intese e facilitarà il scambi di professôrs e di students, publicazions in comun e altris azions par tutelâ e par svilupâ asturian e mirandês, varietâts che a partegnin ae stesse famee linguistiche asturiane leonese. Fevelât massime inte aree di Miranda do Douro, il mirandês al è doprât di uns 7/8 mil personis e dal 1999 al è ricognossût dal Portugal tant che lenghe couficiâl di chest teritori.
Font: Noticias ao minuto, 20/06/15

Paîs Basc: domini .eus ancje par Twitter

Ancje Twitter al à fat so il domini .eus dedicât ae lenghe e ae identitât basche dopo che za dal 2012 la rêt sociâl e veve metût a disposizion dai utents une interface par euskara. Twitter però nol ricognòs ancjemò in maniere automatiche la lenghe basche, un passaç che al varès di jessi disponibil in curt dal moment che i siei tecnics a son daûr a lavorâ cu la fondazion PuntuEUS propit par rivâ a chest obietîf. Il domini .eus al è presint su internet di pôc plui di un an incà, ancje se la pussibilitât di doprâlu e je stade dade ai utents dome cul Dicembar dal 2014. Di in chê volte a vuê a son za 3.600 i sîts che si son regjistrâts cun chest domini.
Font: EiTB, 19/06/15