28/05/21

Paîs Catalans: denuncie internazionâl de repression spagnole

Plui di un centenâr tra personalitâts e organizazions internazionâls a àn sotscrit un manifest imbastît de ANC là che si segnale la vitorie clare dal indipendentisim intes elezions dai 14 di Fevrâr che a ratifichin duncje la volontât dal popul catalan a costituîsi tun stât indipendent. Intal test si domande la risoluzion dal conflit politic su la fonde dal rispiet dai dirits fondamentâi, de liberazion dai presonîrs politics e de fin de repression judiziarie cuintri dai ativiscj e dai rapresentants politics impegnâts intal procès di autodeterminazion. Il manifest al cjale cun preocupazion la arbitrarietât che e compagne la rispueste des autoritâts spagnolis, lis violazions dai dirits e lis iregolaritâts democratichis che a àn compagnât la repression judiziarie che e à aromai colpît uns 3.300 personis. A firmâ il document a son sei personalitâts tant che il premi Nobel pe pâs Adolfo Pérez Esquível e l’ex president dal Honduras Manuel Zelaya che organizazions de societât civîl tant che lis Maris di Plaza de Mayo e la Rêt Europeane pe Avualiance Linguistiche (ELEN).

Font: VilaWeb, 14/05/21

Paîs Basc: colp dal TSJPV ae normalizazion linguistiche

Il tribunâl superiôr di justizie dal Paîs Basc (TSJPV) al à anulât il criteri linguistic dal concors public pal personâl de polizie locâl di Irun judicant discriminatorie la cognossince obligatorie de lenghe basche. Pal osservatori dai dirits linguistics Behatokia e pe organizazion Kontseilua si trate di une decision plui politiche che no juridiche. Te sentence si lei che i citadins a àn dirit di relazionâsi par euskara cu la polizie locâl ma che chest dirit al à di jessi garantît de aministrazion e no dai singui agjents. Il probleme però, sul plan pratic, al è che a relazionâsi cui citadins a son propit i agjents e no la aministrazion publiche tal so complès e chest al vûl dî che cui che al fevele par basc nol varà mai i stes dirits di cui che al fevele par castilian intal moment che si cjate denant un agjent che al cognòs dome cheste ultime lenghe. Cheste – a disin lis dôs organizazions pai dirits linguistics – e je la vere discriminazion e no dal sigûr domandâ a cui che al davuelç un servizi public di cognossi la lenghe dal teritori. Cheste sentence, par altri, e rapresente un precedent che al menace une part significative dal procès di normalizazion linguistiche dentri de aministrazion publiche.

Font: EiTB, 13/05/21

Galizie: poie dal Parlament ae iniziative “Xabarín”

La propueste fate indenant di A Mesa pola Normalización Lingüistica par meti sù un canâl in lenghe proprie dedicât a fruts e fantats dentri de radiotelevision publiche de Galizie (CRTVG) e à cjatât la poie dai trê grups principâi dal Parlament de Galizie. La iniziative, sostignude sul imprin dai nazionalitaris dal BNG e dai Socialiscj (PSdeG), dopo di cualchi mende e à vût ancje la poie dai Popolârs (PPdeG). L’acuardi al previôt che la radiotelevision publiche e incressi la ufierte par galizian indreçade ai plui zovins (canâl Xabarín) par mieç dai canâi disponibii su fibre otiche, satelit, adsl e tecnologjie mobile. Di chê strade si larà ancje a infuartî une aplicazion cun contignûts educatîfs e di intratigniment. Si trate dal prin acuardi slargjât in materie linguistiche di dodis agns incà – al à dite il president di A Mesa, Marcos Maceira –, un risultât otignût in gracie de poie popolâr (cu lis passe 30 mil firmis a pro de iniziative legjislative) che al mostre cemût che la mobilitazion e sedi la strade miôr par fâ lâ indenant la lenghe galiziane.

Font: Galicia Press, 11/05/21

Paîs Basc: trente piçui Herri Urrats par sostignî Seaska

La pandemie e à impedît, pe seconde volte di file, di inmaneâ il tradizionâl Herri Urrats, la fieste des ikastolas dal Paîs Basc dal Nord sot aministrazion francese (Ipar Euskal Herria), che si ten dongje dal lâc a Senpere / Saint-Pée-sur Nivelle. La iniziative si davuelç par tirâ sù fonts par finanziâ la federazion des scuelis baschis Seaska che tal Paîs Basc dal Nord e gjestìs 38 istitûts e che e conte plui di 4 mil students. Chel istès, par dâ almancul un segnâl, a son stâts imbastîts trente piçui events cuntune partecipazion contade par rispietâ lis misuris di sigurece. Cheste modalitât limitade no à però permetût di racuei chei 300 mil euros che a coventavin e si à duncje inviât percors alternatîfs di racuelte dai fonts. I bêçs di chest an a coventin par infuartî i cuatri istitûts secondaris gjestîts di Seaska là che cumò a studiin un miâr di arlêfs e là che si à bisugne di spazis gnûfs viodût che tai prossims agns il numar dai students al varès di cressi dal 30%.

Font: EiTB, 08/05/21

Asturiis: di gnûf in place pal asturian lenghe uficiâl

Ai 8 di Mai, in ocasion de Zornade de leterature asturiane, la Xunta pola Defensa de la Llingua e je tornade in place par domandâ la uficialitât dal asturian. Dopo che l’an passât, par vie de crisi sanitarie, no si veve podût davuelzi la manifestazion programade, chest an si à imbastît une iniziative publiche che e rispietàs lis misuris di sigurece. Cussì te place de catedrâl di Uviéu / Oviedo cinccent personis a àn componût un mosaic di bandieris di colôrs diviers cu la peraule “oficialidá”. Tun moment là che la riforme dal Statût di autonomie e je sostignude dal stes president de Comunitât, Adrián Barbon, si domande che l’asturian al sedi ricognossût ad in plen tant che lenghe uficiâl des Asturiis, intune cul castilian, e che si garantissi la tutele plene ancje pal galizian fevelât intes areis plui ocidentâls de Comunitât. Intal discors che al à sierât la manifestazion, la puartevôs de Xunta, María Xosé Martínez, e à declarât che e je ore di meti di bande lis strategjiis di partît e di ricognossi daurman e cence scurtis l’asturian lenghe uficiâl.

Font: El Comercio, 08/05/21

Scozie: si infuartìs la maiorance parlamentâr indipendentiste

Lis elezions pal Parlament scozês dai 6 di Mai a àn infuartît la posizion dal SNP e a àn garantît al front indipendentist une clare maiorance parlamentâr. Il Partît Nazionâl Scozês al à otignût 64 deputâts, un in plui des elezions stadis e a pene un in mancul de maiorance assolude in Parlament. Il scuintri si à zuiât massime tes 73 circoscrizions eletorâls che e je dividude la Scozie là che il vôt si à polarizât di une bande sul SNP e di chê altre sul candidât dal front unionist che al ufrive plui pussibilitât di sucès: propit achì i Nazionaliscj scozês a àn vût il 47,7% dai consens e sfiliât il milion e 300 mil preferencis. Divierse invezit la situazion pal vôt sul listin nazionâl là che cundut dal 40% di preferencis, par vie dal mecanisim di compensazion cul vôt des circoscrizions, il SNP al à otignût dome 2 dai 56 puescj disponibii. Tal listin il Partît Nazionâl Scozês al à vût un câl di consens dal 1,4% rispiet aes elezions stadis: vôts che a son lâts a finî su Alba, il gnûf partît indipendentist vuidât dal ex leader dal SNP Alex Salmond, che però cul 1,7% des preferencis nol à vût nancje un elet. La maiorance indipendentiste e je dut câs sigurade dai 8 parlamentârs otignûts dai Verts, doi in plui de volte stade. Il moviment aleât di guvier dal SNP al à concuistât plui dal 8% dai vôts intal listin nazionâl.

Gales: maiorance laburiste te gnove Assemblee Nazionâl

Intes elezions pe Assemblee Nazionâl Galese (Senedd) che si son tignudis ai 6 di Mai, i Laburiscj si son confermâts la fuarce politiche plui votade cun passe 400 mil vôts e plui dal 36% dai consens, cuntun aument di cuasi il 5% rispiet ae volte stade. In gracie di un sisteme eletorâl che al assegne la maiorance dai parlamentârs cun circoscrizions uninominâls e une part su la fonde di un listin nazionâl, il Labour al à otignût 30 dai 60 puescj de Assemblee, un in plui des elezions stadis. Il partît che al è cressût di plui al è chel dai Tories, i Conservadôrs di fat a àn otignût 16 parlamentârs – 5 in plui de volte stade – e une percentuâl di vôts tor dal 25%, in aument di cuasi il 6%. Si trate di un salt indenant che nol met in discussion il primât dai Laburiscj e che al diven massime dal sfantâsi dal UKIP, moviment de diestre populiste britaniche che in Gales al à pierdût plui dal 11% dai consens e ducj i 7 parlamentârs che al veve. I nazionalitaris galês dal Plaid Cymru a infuartissin la lôr posizion tant che tierce fuarce dal paîs, cul 20% dai vôts e 13 deputâts, un in plui des elezions passadis. A completâ il cuadri dai elets o vin i Liberâi Democratics che a confermin l’unic deputât che a vevin ma a calin a pôc plui dal 4% dai vôts.

Font: BBC, 07-08/05/21