28/01/17

Paîs Basc: autoguvier, EH Bildu al stice PNV e Elkarrekin

Inte Comunitât Autonome Basche i parlamentârs di EH Bildu a àn domandât al gnûf guvier jessût des elezions dai 25 di Setembar e formât de coalizion jenfri Partît Nazionalist Basc (PNV) e socialiscj (PSE-PSOE) di presentâ daurman lis azions che a pensin di meti in vore par rivâ a di un status di autoguvier plen pe Comunitât. Ai 25 di Otubar dal 2019 a colaran i 40 agns de aprovazion dal Statût di autonomie che pe plui part dai citadins nol à mantignût lis promessis de vilie. Dentri di chê date, a disin i deputâts de çampe indipendentiste basche, al è il câs che la Comunitât Autonome Basche e rivi a di un status di autoguvier che nol pues limitâsi a di une revision statutarie cun cualchi competence in plui, ma al à di dâi ai citadins la pussibilitât di decidi di bessôi dal lôr avignî. No si trate di une utopie, ma di une pussibilitât reâl dal moment che tal Parlament de Comunitât si àn trê fuarcis politichis – la stesse EH Bildu, il PNV e Elkarrekin-Podemos – che si son declaradis a pro dal dirit di autodeterminazion e che a rapresentin plui dal 70% dai citadins.
Font: Naiz:, 13/01/17

Irlande: scuintri politic tal Nord su lis risorsis pal gaelic

La lenghe gaeliche e devente simpri di plui teme di scuintri politic inte Irlande dal Nord. Dopo che il dipartiment pe educazion vuidât dal ministri Peter Weir dal Partît Unionist Democratic (DUP) al veve gjavât l’irlandês e il scots de intestazion, des comunicazions cul public e des publicazions dal dipartiment e al veve boçât la vierzidure di gnovis scuelis pe infanzie cul gaelic veicolâr, juste sul finî dal 2016 il ministri pes comunitâts Paul Givan, ancje lui dal DUP, al veve taiât i fonts pes borsis di studi par frecuentâ i cors di irlandês tes areis dal Dún na nGall / Donegal là che la lenghe e je inmò vivarose. Il program Líofa al permeteve a cent students in cundizions economichis disvantazadis di perfezionâ il gaelic. Il so tai al à za puartât a impugnâ la decision in tribunâl cu la acuse di discriminazion e al à jevât lis critichis duris des associazions pe lenghe e dai deputâts dal Sinn Féin, dal SDLP e dal moviment People Before Profit. Cussì, a front de crisi politiche che si è vierzude intal guvier nordirlandês, il stes Givan al à vût di tornâ sui siei pas e comunicâ di vê “cjatât” i bêçs par finanziâ lis borsis di studi in maniere, al à specificât, di no lassâi al Sinn Féin une arme in plui intant de campagne eletorâl.
Font: BBC, 12/01/17; Irish News, 05/01/17

Paîs Basc: lis fameis di Iruñea a vuelin plui basc

La aministrazion comunâl di Iruñea / Pamplona e à fat cognossi i risultâts di une inchieste su lis scuelis pe infanzie de citât basche che e à cjapât dentri passe un miâr di fameis che a àn almancul un frut di trê agns. Se la reson principâl che e puarte i gjenitôrs a sielzi une scuelute impen di une altre e reste chê de vicinance, e cres simpri di plui la atenzion pe ufierte linguistiche. A chest proposit, la maiorance dai intervistâts si declare sodisfat pe incressite des scuelis cul euskara tant che lenghe veicolâr ancje se la ufierte e reste plui basse de domande. Cun di fat il 38,5% des fameis e varès volût iscrivi i fruts tune scuele cul basc veicolâr, ma dome il 26,6% al à podût fâlu.
Font: Naiz:, 10/01/17; Noticias de Navarra, 10/01/17

Scozie: referendum su la indipendence no tal 2017

La prime ministre scozese Nicola Sturgeon e à fat savê che intal 2017 no si davuelzarà nissun referendum su la indipendence, ma che la consultazion e reste tra lis opzions su la taule. Il guvier scozês, di fat, al à za prontât un test di leç par podê tornâ a votâ. Dut câs, vie pal 2017, si viodarà cemût che l’esecutîf britanic al larà a gjestî lis tratativis pe jessude dal Ream Unît de UE: se lis tratativis no garantiran che almancul la Scozie e puedi restâ intal marcjât unic, alore – e à dite la prime ministre scozese – si calcolaran tradîts i impegns cjapâts dai partîts britanics prime dal vôt precedent su la indipendence e si metaran lis cundizions par un secont referendum.
Font: The Scotsman, 09/01/17

Irlande: McGuinness si dimet, guvier dal Nord in crisi

Ai 9 di Zenâr il prin ministri vicjari dal guvier nordirlandês, Martin McGuinness dal Sinn Féin, al à comunicât lis dimissions de sô incarghe e il so partît al à confermât che nol sarà sostituît. La decision e à viert une crisi politiche che, cun dute probabilitât, si sierarà cun elezions anticipadis. Su la fonde dai ecuilibris definîts cul procès di pâs, il guvier de Irlande dal Nord al scugne poiâsi suntune coalizion formade di almancul un partît espression de comunitât unioniste e di un di chê nazionaliste irlandese. Fin cumò a dividisi lis incarghis di guvier a jerin il Partît Unionist Democratic (DUP) e il Sinn Féin, partît di maiorance framieç de comunitât nazionaliste. La tension tra i doi partîts e jere cressude simpri di plui. Tra i ponts di crisi si veve ancje la mancjance di une leç di promozion de lenghe gaeliche irlandese, previodude dai acuardis di pâs, ma simpri blocade dai unioniscj che di resint a vevin tacât a taiâ ancje misuris za in vore pal gaelic. L’ultin colp al è rivât però dal scandul suntun plan di incentivazions energjetichis inviât de prime ministre Arlene Foster dal DUP. Il Sinn Féin al domandave une comission indipendente par controlâ che la gjestion des risorsis dal plan no platàs câs di coruzion, ma la prime ministre e à pidimentât ogni forme di investigazion. Lis dimissions di McGuinness a permetaran duncje ai citadins di decidi se la Foster e i siei coleghis di partît a meretin ancjemò fiducie.
Font: El País, 09/01/17; The Journal, 11/01/17

Macedonie: pat di guvier tra i partîts albanês

I partîts de minorance albanese a son decisîfs par formâ il gnûf guvier de Macedonie dal moment che par vê la maiorance in Parlament a coventin 61 deputâts, ma lis dôs formazions principâls – la diestre nazionaliste vuidade di Nikola Gruevski (VMRO DPMNE) e i Sociâi Democratics (SDSM) – a ‘nd àn dome 51 i prins e 49 i seconts. Ai 7 di Zenâr trê dai cuatri partîts albanês rapresentâts intal Parlament de Macedonie – la Union Democratiche pe Integrazion (DUI), il moviment BESA, e il Partît Democratic dai Albanês – a àn sotscrit un pat che ju impegne a pretindi il rispiet di siet misuris tant che fonde par ogni acuardi di guvier. Prin di dut si domande che l’albanês al sedi ricognossût tant che lenghe couficiâl in dute la Macedonie, azions paritariis di svilup economic e sociâl in dutis lis regjons che a componin il stât e la creazion di un ministeri pal rispiet dai dirits des comunitâts e pe avualiance tra lis regjons. Si domande po une risoluzion dal Parlament che al ricognossi i crimins cuintri de comunitât albanese jenfri 1912 e 1956, e une comission investigative indipendente par viodi che no si vedi un ûs politic dai procès plui grues là che a son cjapâts dentri membris de minorance. Si domande po che la comunitât albanese e sedi rapresentade intai grups di lavôr che a tratin dai rapuarts internazionâi e che si dedi un sburt ai procès di adesion ae UE e ae NATO.
Font: Balkan Insight, 08/01/17

Ocitanie: sucès de mobilitazion pal ocitan al MUCÈM

E à vût sucès la mobilitazion inmaneade di un grup di militants ocitans alì dal MUCEM, il Museu des civilizazions de Europe e dal Mediterani di Marsilie. Te struture espositive si veve scrit il test dal articul 14 de Declarazion universâl dai dirits in siet lenghis (francês, inglês, todesc, talian, spagnûl, grêc e arap), ma no par ocitan. Dopo de proteste i responsabii dal museu a àn decidût di dâi spazi ancje ae lenghe proprie dal lûc e cumò il test al è presint ancje in lenghe d’oc.
Font: Jornalet, 06/01/17

Paîs Basc: autostrade privatizade, vie l’euskara

I dodis chilometris de autostrade A64 jenfri Baiona / Bayonne e Samatze / Sames, inte part dal Paîs Basc sot aministrazion francese, a son passâts de aministrazion publiche ae societât privade Vinci. La gnove proprietât e à fat diviers lavôrs di sistemazion che a àn interessât ancje la segnaletiche e, tal fâlu, e à sostituît i cartei cu lis scritis par francês e par basc cun altris dome par francês. A front de proteste rivade de comunitât locâl, la societât Vinci e à rispuindût che e tornarà a meti dai cartei bilengâi ma cence dâ nissune indicazion su cuant che lu fasarà.
Font: France Bleu Pays Basque, 04/01/17

Aragon: ativitâts tes lenghis propriis in passe 60 istitûts

Il dipartiment pe educazion dal Aragon al va indenant cu lis iniziativis imbastidis par promovi lis lenghis propriis dal paîs. Plui in detai, cuntun contribût di 14 mil euros si va a infuartî il program “Luzía Dueso” pal aragonês e si torne a inviâ il “Jesús Moncada” pal catalan che al jere stât taiât intant de legjislature stade dal guvier di diestre. Cun chestis risorsis passe 60 centris scolastics a podaran ufrî ai lôr students ativitâts curicolârs di animazion intes lenghis propriis o pûr svilupâ in maniere autonome progjets par aragonês o par catalan.
Font: El Periodico de Aragon, 31/12/16