05/02/08

Pontade 05 08 (05/02/08) - 11

Paîs Basc: altris arescj di dirigjents indipendentiscj

La buinore dai 4 di Fevrâr la polizie spagnole e à arestât il dirigjent de çampe indipendentiste basche Pernardo Barrena, un dai pôcs membris dal diretîf di Batasuna che a jerin inmò a pît libar. Lis fuarcis di polizie a àn arestât ancje altris doi rapresentants dal indipendentisim basc, ven a dî Patxi Urrutia e Unai Fano. Par ducj la acuse e je di jessi leât a ETA par mieç de lôr ativitât dentri di Batasuna.
Font: Gara, 04/02/08


Pontade 05 08 (05/02/08) - 10

Paîs Catalans: ricognossiment uficiâl pal catalan in Catalogne Nord

Il Consei Gjenerâl dai Pireneus Orientâi, intal stât francês, al ricognòs in maniere uficiâl il catalan tant che lenghe de Catalogne Nord. Chest pas al è dentri di un document fat bon inmò ai 10 di Dicembar, ma che fin cumò al jere passât cuasi sot cidin. La gnove, di fat, e je saltade fûr dome cu la difusion, ta chescj dîs, dal boletin dal Consei. Pal vicepresident dal organisim aministratîf, Marcel Mateu, la decision no va cuintri de Costituzion francese. Il proviodiment al ricognòs il catalan tant che lenghe dal dipartiment e si impegne a difindile e a sburtâle, tra lis altris ancje cul meti sù classis bilengâls intes scuelis locâls. Il test al ricognòs ancje la autoritât linguistiche dal Istitût di Studis Catalans. Pai catalaniscj si trate di un risultât storic, ma plui di cualchidun al ricuarde che, dal moment che i podês dal Consei a son limitâts, si trate plui di un at simbolic che di un intervent cuntun pês reâl su la societât de Catalogne Nord.
Font: VilaWeb, 04/02/08; Mon Divers, 04/02/08


Pontade 05 08 (05/02/08) - 9

Paîs Basc: inviât il percors par ilegalizâ ANV e EHAK

Ai 31 di Zenâr il public ministeri Antonio Narváez al à presentât denant dal Tribunâl Suprem (l’organisim judiziari che al à cjapât il puest dal Tribunâl speciâl di ete franchiste) la domande par meti fûr leç il partît nazionalitari basc ANV (Acción Nacionalista Vasca) acusât di no rispietâ la leç dai partîts, fate buine cualchi an indaûr dal Parlament spagnûl par ilegalizâ Batasuna, partît di riferiment de çampe indipendentiste basche. Tal at di acuse si dîs che i membris di ANV no àn condanât lis azions dal grup armât basc ETA. Pal public ministeri cualchi rapresentant dal partît basc al varès ancje vût compuartaments judicâts di poie a ETA, come tal câs de sindiche di Hernani che e à pandût la sô solidarietât a Igor Portu e Mattin Sarasola, i doi zovins acusâts di jessi membris di ETA e torturâts in maniere salvadie de Guardia Civil spagnole. Daûr de acuse, ancje la campagne inviade di ANV cuintri de costruzion de linie feroviarie a alte velocitât (TAV) che e varès di scjavaçâ il Paîs Basc e sarès di considerâ une poie ae azion di “menace e intimidazion” di ETA e di Batasuna cuintri de opare. In plui di meti fûr leç il partît nazionalitari basc, il public ministeri al domande che a sedin sieradis dutis lis sôs sedis e lis struturis di sô proprietât; che a sedin sierâts ducj i conts corints, i dipuesits e che a sedin secuestradis dutis lis financis leadis al partît; e che si impedissi il dirit di presentâsi aes elezions. La zornade prime il public ministeri al veve fat indenant al Tribunâl Suprem lis stessis domandis ancje par un altri partît indipendentist basc, ven a dî EHAK (Partît Comunist dal Paîs Basc). Ancje cuintri di cheste organizazion politiche la acuse e je chê di violâ le leç dai partîts. Chest par vie che EHAK al varès metût a disposizion di Batasuna une des sôs sedis e al varès dât la paie a personis leadis a chel partît. Cun chescj e cun altris ats – e dîs la acuse – al varès dimostrât di jessi subordenât a Batasuna, partît metût fûr leç cualchi an indaûr. Il sburt par inviâ il procediment judiziari di ilegalizazion di chescj doi partîts che a gjoldin de poie di passe il 10% dai eletôrs de Comunitât Autonome Basche al diven dal Guvier spagnûl. Cun di fat, daspò vê anticipât za di timp chest intindiment, il ministri spagnûl pal interni, Alfredo Pérez Rubalcaba, al à fat savê di vê inviât ancje sul front politic il percors par meti fûr leç lis dôs organizazions baschis. A front di chestis iniziativis, la diestre post franchiste dal PP e à dite di preseâ la azion dal Guvier, ma si à lamentade pal ritart intal inviâle. Invezit, sei Aralar (partît nazionalitari basc), sei Ezker Batua (çampe radicâl) a àn fevelât di iniziative antidemocratiche, che e à dome fins eletoralistics.
Font: EiTB, 31/01/08; Gara, 30-31/01/08


Pontade 05 08 (05/02/08) - 8

Rom: a Rome conference europeane su la popolazion Rom

Ai 22 e ai 23 di Zenâr si è davuelte a Rome, alì de Scuele superiôr de aministrazion, la Conference europeane su la popolazion Rom. La iniziative e je stade metude adun dai ministeris talians dal interni e de solidarietât sociâl e e à riclamât rapresentants istituzionâi talians e europeans, intune cun membris des comunitâts Rom e Sinti. Intant de Conference, il rapresentant de OSCE, Andrzej Mirga, al à batût sul concet de rapresentance e de partecipazion di chestis comunitâts ancje inte vite politiche e sociâl dal stât là che a vivin. Chel de “autorapresentazion” dut câs al è un dirit che fin cumò si pues cjatâ dome in cualchi paîs, come in Ongjarie, in Serbie, in Montenegro e in Cravuazie. Il president dal Comitât Internazionâl pai Dirits Umans, Valentino Simonetti, al à fevelât ancje lui dai esemplis positîfs che si àn ator pe Europe, là che a fâ biele figure, dongje de Ongjarie, a son ancje la Svezie che e à fate buine tal 1999 une leç di pueste che e ricognòs i Rom tant che minorance etniche, la Austrie e la Spagne, là che tai ultins agns si àn vudis iniziativis impuartantis sul front de cjase e dal lavôr. Il vicepresident de Comission Europeane, Franco Frattini, al à invezit presentât lis domandis principâls che a rivin des comunitâts Rom de Europe, ven a stâi la garanzie pe lôr sigurece menaçade di prejudizis e politichis discriminatoriis, ma ancje la domande di une politiche serie pe cjase che e je la fonde po ancje par podê lavorâ e mandâ a scuele i fruts. Cun di plui, si à di segnalâ la situazion particolâr des feminis di chestis comunitâts, discriminadis dôs voltis par vie che a son feminis e par vie de lôr partignince etniche. Il ministri talian pe solidarietât sociâl Franco Ferrero al à dite che al covente intervignî massime su doi fronts, ven a dî di une bande cun politichis sociâls che a permetin ai Rom di vê lis stessis oportunitâts di chei altris citadins talians in teme di cjase, lavôr e scuele, e di chê altre cu la difese de identitât linguistiche e culturâl di chestis popolazions par mieç dal ricognossiment tant che minorance linguistiche. Un aspiet, chest ultin, che al è stât frontât ancje de sotsegretarie pal interni, Marcella Lucidi, che e à fevelât de necessitât di ricognossi chestis comunitâts tant che minorancis linguistichis. Chest aspiet, par altri, al è stât al centri di diviers riclams des autoritâts europeanis che a àn denunciât il stât talian par vie che nol à proviodût inmò a fâlu, come che al à ricuardât ancje Alexander Vladichenko, diretôr gjenerâl pe coesion sociâl dal Consei de Europe. Intal stât talian Rom e Sinti, come che e à mostrât a clâr une ricercje de Ispo, a son inmò vitimis di prejudizis. Cun di fat, la plui part de int e mostre di vê une scjarse opinion di lôr o di vênt pôre, ma po cuant che i si domande di contâ ce che a san sui Rom a mostrin di cognossiju pôc o nuie. Duncje, pe plui part de int, si va indenant cui lûcs comuns, come chel che al vûl che Rom e Sinti a sedin forescj: inte realtât la plui part di chei che a vivin dentri dai confins dal stât talian a son citadins talians. Rom e Sinti, di fat, a son une des minorancis linguistichis storichis talianis, ancje se a son stâts lassâts fûr des misuris di tutele previodudis de leç statâl 482/99.

Par cognossi un tic di plui la lôr realtât o segnalìn il blog: www.sucardrom.blogspot.com che al è atîf in forme rignuvide dal Lui dal 2007.
Font: ANSA, 23/01/08; Ministero dell'Interno, 22-23/01/08


Pontade 05 08 (05/02/08) - 7

Fær Øer: sucès pai indipendentiscj

Lis elezions che si son davueltis ai 19 di Zenâr intes isulis Fær Øer, che in dì di vuê a son dentri intal stât danês ancje se cuntune forme significative di autonomie, a àn puartât vôts massime pai partîts indipendentiscj. Il numar di consens plui alt, ven a dî il 23,3%, al è lât al Partît Republican che al è deventât cussì il partît di maiorance relative. I republicans, che a son a pro de indipendence de Danimarcje, a àn cussì otignût vot dai trentetrê deputâts dal Parlament locâl. Al secont puest, cul 21% dai vôts e siet deputâts si è plaçât il Partît de Union, che al puarte indenant une politiche di stamp unionist. In tierce posizion, cul 20,1% des preferencis e sîs deputâts, o cjatìn il Partît dal Popul, che di une idee autonomiste si à mot tai ultins agns su posizions indipendentistis. La cuarte fuarce rapresentade intal Parlament des isulis e je chê dal Partît Socialdemocratic che al à otignût il 19,4% dai vôts e sîs deputâts. I socialdemocratics a son su posizions autonomistis. I unioniscj dal Partît dal Centri a àn vût trê deputâts, invezit i indipendentiscj dal Partît pal Autoguvier a ‘nd àn vûts doi. I trê partîts indipendentiscj, se si metessin adun, a varessin duncje une maiorance intal Parlament locâl, ancje se dome par un deputât. Dut câs, la strade de indipendence no somee masse dongje dal moment che il Partît dal Popul al larà indenant cu la aleance, za sperimentade te legjislature stade, cui unioniscj dal Partît de Union e cui socialdemocratics.
Font: Kringvarp Føroya, 20/01/08; Món Divers, 21/01/08


Pontade 05 08 (05/02/08) - 6

Romanie, Ongjarie: strategjiis in comun a pro dai ongjarês

Il president dal Parlament ongjarês Szili Katalin e l’eurodeputât Laszlo Tokes, rapresentant de comunitât ongjarese de Romanie, si son cjatâts ai 23 di Zenâr par viodi di meti sù un coordenament par svilupâ politichis in comun a pro des comunitâts ongjaresis dal bacin carpatic. Katalin al presentarà al Parlament di Budapest un plan che al ledi ta cheste direzion e al à za dite che une des prioritâts e sarà chê de educazion. Par chest al à dite che al poiarà il finanziament de educazion par ongjarês fûr de Ongjarie, come tal câs dai istitûts universitaris rumens “Partium” e “Sapientia” là che cheste lenghe e ven doprade par insegnâ.
Font: Divers.ro, 24/01/08


Pontade 05 08 (05/02/08) - 5

Scozie: pat di cooperazion culturâl cun Gales, CAB, Catalogne e Flandris

I rapresentants dai Guviers di Scozie, Gales, Comunitât Autonome Basche, Catalogne e Flandris si son dâts dongje ai 19 di Zenâr a Edimburc, là che a àn sotscrit un acuardi che ju impegne a promovi iniziativis in comun tal cjamp de culture e de promozion de diviersitât linguistiche. Intal document sotscrit dai rapresentants dai cinc Guviers locâi si previôt ancje il scambi di ideis, esperiencis e iniziativis che a rivuardin la culture. Daûr di cheste iniziative al è il grup parlamentâr Aleance Libare Europeane (EFA, European Free Alliance) che al met adun diviers partîts che a rapresentin comunitâts nazionâls minorizadis de Europe e che a son cumò dentri intai Esecutîfs dai cinc paîs.
Font: EFA, 19/01/08


Pontade 05 08 (05/02/08) - 4

Scozie, Irlande: iniziativis a pro dal gaelic tes scuelis

Comunn na Gàidhlig (CnaG), la agjenzie nazionâl scozese pal svilup de lenghe gaeliche, e je impegnade ta chestis zornadis cuntune campagne par incressi il numar dai fruts che a studiin intes scuelis là che il gaelic al è doprât tant che lenghe di insegnament par dutis lis materiis. Si trate di iniziativis che a àn chê di informâ la popolazion su lis pussibilitâts ufiertis di chest stamp di educazion e, in particolâr, di mostrâ ai gjenitôrs cemût che a funzionis chestis scuelis, tant che chês in vore a Fort William e a Ullapool. In graciis di azions come chestis il numar di fruts che a frecuentin lis scuelis gaelichis al è daûr a cressi.

Il Guvier de Republiche irlandese, invezit, al à decidût di sostignî i professôrs di lenghe gaeliche impegnâts intes Universitâts dai Stâts Unîts. Ta cheste maniere si vûl incressi lis oportunitâts di imparâ e di studiâ il gaelic in Americhe e, tal stes timp, sburtâ i students a aprofondî la cognossince de lenghe proprie de Irlande cun viaçs intal Gaeltacht, o sei lis areis de isule là che il gaelic al è inmò la prime lenghe. Ta cheste maniere, a disin lis autoritâts de Republiche, si sviluparà ancje il turisim culturâl in Irlande.
Font: CnaG, 8-21/01/08; Gaelport, 17/01/08


Pontade 05 08 (05/02/08) - 3

Paîs Catalans: ancje la “biblie” de biochimiche par catalan

Ai 17 di Zenâr e je stade presentade la traduzion par catalan dal libri “Biochimiche” di Lubert Stryer, considerade une sorte di “biblie” par cheste materie. Il volum, che al conte 900 pagjinis, al è un test di nivel universitari che la sô version origjinarie e je par inglês. Fin cumò al jere stât voltât par cinês, gjaponês, corean, francês, todesc, portughês, spagnûl, talian, serp - cravuat, grêc e polac. Il lavôr di traduzion al è stât puartât indenant inte suaze dal progjet “Scriptorium” che al previôt la traduzion par catalan di oparis di riferiment pal studi universitari intal cjamp sientific e tecnic. Il progjet al è coordenât dal Istitût di Studis Catalans e al à za puartât a voltâ oparis di fisiche, microbiologjie, analisi chimiche cuantitative e matematiche. Si trate di oparis che a van a insiorâ il panorame tecnic sientific in lenghe catalane e che a permetin ai students des Universitâts dai Paîs Catalans di podê studiâ in tescj inte lôr lenghe.
Font: VilaWeb, 17/01/08



Pontade 05 08 (05/02/08) - 2

Union Europeane: Agjenzie pai Dirits Fondamentâi, minorancis plui tuteladis

Cun 420 vôts cuintri 26, il Parlament European al à fat bogns i emendaments che a previodin che la gnove Agjenzie pai Dirits Fondamentâi e viodi ancje des minorancis linguistichis e nazionâls. Cun di fat, cui emendaments aprovâts, intal statût de Agjenzie si dîs a clâr che tra i compits di chest organisim al è ancje chel di batisi par “difindi i dirits des personis che a partegnin a minorancis etnichis e nazionâls” e di fâi cuintri a ogni sorte di discriminazion a dam des “minorancis linguistichis e nazionâls storichis”. Par deventâ operatîf, il test al à cumò di jessi fat bon ancje dal Consei de Europe.
Font: Eurolang, 17/01/08



Pontade 05 08 (05/02/08) - 1

Cossovo: la OSCE e domande il rispiet des minorancis

Intant de sô visite in Cossovo l’alt comissariât pes minorancis etnichis de OSCE (Organizazion pe Sigurece e la Cooperazion in Europe) al à domandât aes autoritâts locâls il rispiet des minorancis che a vivin ta chel teritori. Lis autoritâts cossovaris a àn sigurât il lôr impegn su chest front, ma in dì di vuê lis comunitâts no albanesis a son aromai a pene tra il 8 e il 12% de popolazion totâl. La minorance plui gruesse e je chê serbe che e rapresente tra il 5 e il 6% de popolazion, po a vegnin i rom, i bosgnacs, i turcs e i goranis. La plui part dai serps e dai rom e à bandonât il Cossovo daspò dal intervent de NATO cuintri de Serbie. Cumò, denant de prospetive de indipendence dal Cossovo, ancje chei che a son restâts a riscjin di lassâ i lôr paîs par pôre di gnovis violencis de bande dai albanês.
Font: Món Divers, 16/01/08