Gales: disinterès dai servizis publics pal galês tai tirocinis

Incressi l’ûs dal galês intai lûcs di vore al è fondamentâl pal avignî de lenghe. Par chest – e dîs la organizazion pe lenghe Cymdeithas yr Iaith – no si pues fâ passâ che aministrazions e ents publics a acetin cence bati cei che l’inglês al paroni tal mont dal lavôr e de formazion. La organizazion e domande duncje al guvier galês di impleâ 10 dai 111 milions e mieç di sterlinis che ogni an al met su formazion e tirocinis par infuartî la ufierte formative in lenghe galese. La iniziative de Cymdeithas e diven di un studi che al mostre cemût che tai ultins agns nancje un dai zovins impegnâts intai tirocinis inte polizie locâl, inte sanitât e fintremai te television publiche par galês S4C al rivi di un percors formatîf in lenghe galese.

Font: Nation Cymru, 30/05/19

Paîs Basc: in cressi i fonts pal euskara tai media in Navare

Un dai ultins ats dal guvier de Navare prime de fin de legjislature al è stât che di assegnâ i fonts pal ûs de lenghe basche tai mieçs di comunicazion e di puartâju a 680 mil euros, 50 mil in plui dal an passât. Intal zîr di trê agns l’esecutîf vuidât di Uxue Barkos al à cressût lis risorsis par cheste misure dal 134 par cent. Plui in detai, pe stampe cuotidiane par euskara a son stâts metûts passe 108 mil euros; a son invezit sù par jù 303 mil euros i bêçs che a laran a dodis periodics, nûf di plante e fûr par basc e trê cuntune presince parziâl dal euskara; i fonts pe radiofonie a son sui 185 mil euros e a van a vot radios, siet di chestis ad in plen par basc; pai mieçs di comunicazion in vore su Internet a son stâts assegnâts uns 82 mil euros.

Font: Diario de Navarra, 30/05/19

Irlande: passe 200 personalitâts in cjamp par une leç pal gaelic

A son plui di dusinte lis firmis di personaçs innomenâts dal mont de culture, de educazion, dal sport, des arts, dal volontariât e dal sindacalisim che a compagnin une letare vierte indreçade ai prins ministris dal Ream Unît e de Republiche di Irlande par che si fasi buine une leç par tutelâ e par promovi la lenghe gaeliche te Irlande dal Nord. Il test al riclame i impegns che i doi stâts a vevin cjapât suntune leç pal irlandês cuant che a vevin sotscrit i acuardis di pâs dal Vinars Sant e di S. Andree. Cheste gnove cjolte di posizion si zonte a di une campagne pai dirits linguistics coordenade dal coletîf An Dream Dearg che e à za cjatât la poie de maiorance dai partîts nordirlandês e di grups simpri plui larcs di citadins.

Font: The Irish Times, 29/05/19

Stât spagnûl: preson arbitrarie pai leaders indipendentiscj

Il grup di lavôr su la detenzion arbitrarie dal consei dai dirits umans de ONU al calcole che la preson preventive pai dirigjents indipendentiscj catalans sot procès ta chestis setemanis alì dal tribunâl suprem di Madrid e rapresente une violazion dai dirits umans. L’organisim des Nazions Unidis al à cjapât in esam in particolâr il câs di Oriol Junqueras, Jordi Sánchez e Jordi Cuixart. La lôr presonie e ven judicade arbitrarie e si domande aes istituzions spagnolis di liberâju daurman, ma ancje di proviodi a risarcîju pal dam patît e a inviâ une investigazion indipendente che e sclarissi lis resons di cheste violazion dai dirits umans. Pai avocats dai dirigjents indipendentiscj, se lis istituzions spagnolis a vessin di ignorâ chest intervent si metaressin fûr de legalitât internazionâl. No le pense cussì il guvier di Madrid che al calcole l’intervent dal organisim de ONU tant che une interference sul procès penâl in at.

Font: EiTB, 29/05/19

Irlande: spazi tecnologjic par promovi l’irlandês tra i zovins

Te citât di Gaillimh / Galway al è stât screât un spazi tecnologjic pai zovins dedicât ae lenghe irlandese. La struture e met a disposizion ancje strumentazion par regjistrâ e editâ musiche, e par filmâ e montâ videos. L’intindiment al è chel di sburtâ la promozion de lenghe irlandese framieç dai zovins par mieç di imprescj tecnologjics. Ancje par chest il spazi al è disponibil sore nuie pes scuelis e pes associazions zovanîls. La struture, che e rapresente un progjet pilote, e je stade finanziade dal ministeri pe culture, pal patrimoni storic e pes areis gaelichis che le à svilupade in colaborazion cun diviersis realtâts ativis intal cjamp de promozion de lenghe irlandese.

Font: GBFM News, 28/05/19

Stât spagnûl: ecuilibris dificii tes Comunitâts autonomis

Ai 26 di Mai, intune cu lis elezions europeanis, intal stât spagnûl si à votât ancje par rignuvî cetantis aministrazions locâls e diviersis comunitâts autonomis. Tra chestis ultimis si vevin ancje realtâts teritoriâls che a partegnin a nazions cence stât o là che si àn comunitâts linguistichis o nazionâls minorizadis.

Galizie: un cine par galizian premiât intal festival di Cannes

Il luncmetraç “O que arde” (Chel che al bruse) dal regjist Óliver Laxe al è stât premiât inte sezion “Un certain regard” dal festival di Canas / Cannes che si è davuelt dai 14 ai 25 di Mai te citât ocitane. Il cine al è stât zirât par galizian e, intant de manifestazion, al è stât proietât in lenghe origjinâl stramudantlu duncje tal prin film in lenghe galiziane a partecipâ al innomenât festival. “O que arde” al è ambientât intes areis plui internis des monts de Galizie e al tocje ancje il teme dai fûcs intai boscs che a rapresentin une des plaiis di cheste tiere.

Font: Consello da Cultura Galega, 27/05/19

UE: e cres la rapresentance de EFA tal Parlament european

A son diviers i candidâts di moviments rapresentatîfs des comunitâts minorizadis che a son stâts elets intal Parlament european in ocasion des votazions che si son tignudis intai diviers stâts membris de UE tra i 23 e i 26 di Mai. La vicende che dal sigûr e à fat plui scjas e je stade la elezion di trê dai rapresentants plui significatîfs dal indipendentisim catalan, o sei Oriol Junqueras, che si cjate di plui di un an in regjim di preson preventive, Carles Puigdemont e Toni Comín, che si cjatin in esili inte Belgjiche. Il prin al è stât elet cuntune liste che e meteve adun la çampe nazionalitarie basche, catalane e galiziane e che e à puartât ancje ae elezion di Diana Riba (simpri di ERC) e di Pernardo Barrena (EH Bildu). Puigdemont e Comín si presentavin invezit cu la liste Lliures per Europa. Intal stât spagnûl a son stâts elets al Parlament european ancje Izaskun Bilbao dal PNV e Ernest Urtasun di ICV.

Irlande: dome il 0,7% dai programs de RTÉ par gaelic

In ocasion di une audizion denant de comission parlamentâr competente, il comissari pe lenghe gaeliche irlandese Rónán Ó Domhnaill al à segnalât che te programazion de television publiche irlandese RTÉ il gaelic al mancje cuasi dal dut. Cun di fat, daûr dai ultins dâts disponibii riferîts al 2017, intun an si àn vudis dome cent oris di programs par irlandês, ven a dî a pene il 0,7% dal totâl. E je vere che la lenghe nazionâl e je plui presinte tai spazis digjitâi de emitente ma chest – al ricuarde il comissari – nol scancele l’oblic pe television publiche di garantî une presince significative dal gaelic intes sôs emissions. La situazion e je presentade in detai tal rapuart 2018 su la lenghe irlandese dât fûr dal comissari tal Avrîl stât là che si segnalin ancje dute une rie di mancjancis di aministrazions e ents publics sul plan de tutele e de promozion de lenghe proprie. I problemis a son inmò cetancj, si va de assence di prevision di personâl public bilengâl intes areis là che l’irlandês al è ancjemò doprât in maniere significative a plans ministeriâi publicâts dome par inglês, di sîts publics voltâts in maniere pastroçade cun Google Translate a programs di ents publics che no son in stât di acetâ nons scrits par irlandês.

Font: The Irish Times, 22/05/19

Stât francês: atac ministeriâl cuintri des scuelis a imersion

A àn jevât no pôc scjas, massime in Bretagne, lis declarazions fatis dal ministri francês pe educazion Jean-Michel Blanquer in mert al insegnament imersîf come chel proponût des Diwan, lis scuelis parificadis in lenghe bretone. Inte suaze dal dibatiment su la gnove leç su la educazion, Blanquer al à declarât che il sisteme a imersion al è negatîf par vie che al sburte il monolinguisim e al puarte i fruts a ignorâ la lenghe francese. Tra lis tantis rispuestis rivadis dopo di cheste jessude dal ministri, si pues segnalâ chê de vicepresidente de Regjon Bretagne, Lena Louarn, che e à ricuardât cemût che, no dome lis scuelis a imersion a garantissin dutis lis oris di lenghe francese previodudis dai programs ministeriâi, ma a palesin nivei certificâts di cognossince dal francês une vore alts. Cun di plui – e à zontât la rapresentante de Regjon – l’ambient dulà che a vivin i fruts al è cussì imbombât di francês che, ancje se a scuele a doprassin dome il breton, nol è pericul che a sedin monolengâi.

Font: France Bleu, 21/05/19; Ouest France, 22/05/19

Cossovo: dubis sui risultâts des comunâls inte aree serbe

Intes elezions comunâls che si son tignudis ai 19 di Mai inte aree a maiorance serbe dal Cossovo la vitorie e je lade pardut ae Srpska Lista, partît di racuelte de comunitât serbe leât ad in dopli cul guvier di Belgrât. Diviers osservadôrs internazionâi a àn però jevât critichis su la plene democraticitât dal vôt. La Srpska Lista e à passât il 90% dai consens in ducj i cuatri comuns a maiorance serbe, o sei Mitrovica / Kosovska Mitrovica, Leposavić / Leposaviq, Zvečan / Zveçan e Zubin Potok, ma chest risultât al diven dal fat che no si à presentade nissune altre liste serbe. Cun di fat, il partît Justizie, Democrazie, Serbie al à decidût di no partecipâ al vôt par vie de clime di intimidazion intai siei confronts, massime dopo dal sassinament dal so leader Oliver Ivanović che i siei responsabii a restin ancjemò discognossûts. Si son invezit presentâts doi moviments albanês – il PDK (Partît Democratic dal Cossovo) e Vetevendosje (Autodeterminazion) – che però a àn cjapât sù dome i vôts de piçule comunitât di lenghe albanese che ancjemò e vîf inta chescj comuns.

Font: Balkan Insight, 21/05/19