13/10/09

Sahara Ocidentâl: siet ativiscj pai dirits umans secuestrâts in Maroc


Un grup di siet ativiscj saharawi pai dirits umans a son stâts secuestrâts dai servizis segrets marochins a pene che a son sbarcjâts al aeropuart di Casablanca. I siet a tornavin di un viaç là che a vevin visitât i cjamps di profugance de popolazion saharawi in Alzerie e che a vevin tignût intervents par denunciâ la repression in vore intal Sahara Ocidentâl sot ocupazion marochine. Di lôr no si àn plui notiziis e no si sa là che a sedin stâts puartâts. I rapresentants de comunitât saharawi a àn domandât aes autoritâts internazionâls, a tacâ dal consei di sigurece de ONU, di ativâsi daurman pe lôr liberazion. Intes presons marochinis a son une vore i ativiscj saharawi impresonâts, di un pôcs di lôr no si àn plui notiziis ancje di une vore di timp.

Font: Ambassade RASD Rome, 09/10/09


Scozie: ai 30 di Otubar i LibDems a decidaran se poiâ il referendum


Daspò che su la stampe si son moltiplicadis lis declarazions di parlamentârs liberâi democratics scozês che si declarin a pro dal referendum su la indipendence, la direzion dal partît e à decidût di frontâ la cuestion intune riunion a puartis sieradis che si davuelzarà ai 30 di Otubar. I LibDems a son contraris al progjet indipendentist dal Partît Nazionâl Scozês (SNP), ma diviers dai sei membris a crodin che refudâsi di poiâ un referendum che la plui part dai citadins e domande al riscji di dâi plui fuarce al SNP e ae sô politiche pe indipendence. Se i liberâi democratics a vessin di decidi di cambiâ la lôr linie di oposizion al referendum, intal Parlament scozês a saressin i numars par aprovâ la leç che e permetarà di davuelzi il referendum intal 2010.

Font: Nationalia, 08/10/09; The Scotsman, 08/10/09


Aragon: prin pas pe leç su lis lenghis


Il Parlament dal Aragon al à acetât la presentazion de propueste di leç su lis lenghis fate indenant dal Partît Socialist (PSOE). A votâ par che il test al sedi esaminât de Aule, in plui dai socialiscj, a son stâts Izquierda Unida (IU) e Chunta Aragonesista (ChA). Il Partît Aragonês (PAR), aleât di guvier dai socialiscj, al à sielt di astignîsi dal moment che nol condivît cierts contignûts de leç. I unics a votâ cuintri a son stâts i popolârs (PP). Il test al ricognòs un pôcs di dirits linguistics ai citadins de Franja che a fevelin par catalan e a chei des valadis pirenaichis che a doprin l’aragonês. Lis dôs lenghis, dut câs, no vegnin ricognossudis tant che couficiâls intai teritoris là che a son feveladis, come che invezit e domande la Chunta Aragonesista.

Font: Món Divers, 08/10/09


Italie / Slovenie: prin pas pe leç su lis lenghis


L’europarlamentâr liberâl democratic sloven Jelko Kacin al à inviât al comissari european pe culture e a chel pal multilinguisim une letare là che al denuncie la violazion dai dirits umans de comunitât slovene intal stât talian. La proteste e nas in particolâr pe vicende dal teatri sloven di Triest là che lis autoritâts talianis no varessin rispietât i impegns previodûts de leç pal so funzionament. Kacin al domande aes autoritâts europeanis di nomenâ un comissari pai dirits umans.

Font: ANSA, 07/10/09


Scozie: vie libare al ûs dal gaelic cu lis istituzions europeanis


Il guvier scozês, chel britanic e lis autoritâts europeanis a àn sotscrit un acuardi che al permet ai citadins che a fevelin par gaelic scozês di comunicâ par scrit cu lis istituzions comunitariis te lôr lenghe proprie e di ricevi rispuestis inte stesse lenghe. Il gaelic, che al è fevelât di mancul di 60 mil personis, si zonte duncje al basc, al catalan, al galês e al galizian tra lis lenghis no statâls che si puedin doprâ par comunicâ cu lis istituzions europeanis. I coscj des traduzions a saran cuvierts dal guvier scozês. Il ministri pe culture Mike Russell al à declarât che si trate di un pas indenant impuartant pal ricognossiment dal gaelic in patrie e intal forest.

Font: BBC, 07/10/09


Italie: consegnât il tierç rapuart su la Convenzion pes minorancis nazionâls


Il guvier talian al à inviât al Consei de Europe, ancje se cuntun ciert ritart, il tierç rapuart su la metude in vore de Convenzion cuadri pe protezion des minorancis nazionâls. Il document al presente lis misuris di tutele metudis in vore intal stât talian a pro des lenghis minoritariis. Lis misuris previodudis de Convenzion a interessin dutis lis comunitâts minorizadis ricognossudis cu la leç statâl 482/99 plui rom e sinti. Lis autoritâts talianis a son stadis riclamadis plui voltis di chês europeanis par no vê rispietât ad in plen i dirits des minorancis.

Font: Ministeri dal Interni talian, 06/10/09


Paîs Basc: i socialiscj a rompin i acuardis cun Nafarroa Bai intai Comuns


Intal 2007 i socialiscj de Navare (PSN), sburtâts des pressions che a rivavin di Madrid, a vevin refudât un acuardi cu la coalizion nazionaliste basche Nafarroa Bai (NaBai) e cu la çampe radicâl (IUN) e a vevin duncje lassât il guvier de Comunitât Forâl intes mans de diestre (UPN e CDN). Cumò a àn decidût di rompi ancje i acuardis di guvier che a vevin cun NaBai in siet Comuns de Navare. I socialiscj a àn justificât cheste decision cul fat che il sindic di Atarrabia / Villava (in fuarce a NaBai) al à permetût a un rapresentant di ANV, partît de çampe indipendentiste basche metût fûr leç, di dâ il vie uficiâl (txupinazo) ae fieste dal paîs. In pratiche, il PSN al acuse la coalizion nazionaliste basche di svicinâsi ae çampe indipendentiste e, duncje, di cimiâ a ETA. Daspò di cheste decision, i rapresentants de çampe indipendentiste basche a àn declarât che il PSN al mostre simpri plui a clâr che al è daûr a colaborâ cu la UPN par impedî cualsisei cambi politic in Navare.

Font: Gara, 05-06/10/09


Gales: delusion pe ordenance su la lenghe


La version definitive de ordenance di competence legjislative (LCO) su la lenghe galese e à lassât cu la bocje garbe la plui part des organizazions impegnadis inte promozion di cheste lenghe. Il coment plui dûr al rive de Cymdeithas yr Iaith Gymraeg che e lamente il fat che no si à vût il trasferiment plen des competencis sul galês di Londre a Caerdydd / Cardiff. Dal moment che il guvier galês al à dome dai podês limitâts – e spieghe la presidente de associazion, Menna Machreth – no si varà la pussibilitât di garantî ae popolazion dal Gales ducj i dirits linguistics che i jerin stât imprometûts tal acuardi di guvier jenfri socialiscj e nazionaliscj. La Cymdeithas e bat massime su la mancjance di garanziis pal ûs de lenghe sul puest di vore e intai servizis ufierts des compagniis privadis. Une cierte delusion pal proviodiment e salte fûr ancje dal Ufici pe lenghe galese. O sin contents che si vedi rivâts al trasferiment di ciertis competencis e che si vedi fat cualchi pas indenant – a àn dite i rapresentants dal Ufici – ma nus displâs che il test fat bon al sedi plui limitât de version proponude sul imprin.

Font: Welsh Language Board, o5/10/09; Cymdeithas, 06/10/09


Romanie: acuardi tra la ETV e la television ongjarese


Il vicepresident de television publiche ongjarese (MTV), Balazs Medveczky, e il president de fondazion “Janovics Jeno” che e gjestìs la Television Ongjarese in Transilvanie (ETV), Zsolt Nagy, a àn sotscrit un contrat di colaborazion tra lis dôs emitentis. L’acuardi al previôt il scambi des trasmissions produsudis des dôs televisions e al garantìs ae ETV l’acès plen ai archivis de television publiche magjare. Cun di plui, il personâl de emitente de comunitât ongjarese de Romanie al varà la pussibilitât di formâsi alì de MTV.

Font: Divers.ro, 05/10/09


Paîs Catalans / Ocitanie: gnovis cuotidianis par aranês su la tv catalane


Cui 5 di Otubar, il canâl informatîf de Televisió de Catalunya 3/24 al à tacât a trasmeti un boletin informatîf cuotidian par aranês, ven a dî la varietât ocitane che si fevele inte Val di Aran. La emission e cuvierzarà dut il teritori de Catalogne e no dome la valade pirenaiche là che si dopre l’ocitan. Cun di plui, la television catalane e à ancje vierzût un portâl di pueste pe Val di Aran cu lis informazions dedicadis a chest teritori e i materiâi produsûts de emitente par aranês.

Font: Món Divers, 05/10/09


Ladinie: fieste pe dì de culture ladine


Ai 2 di Otubar, a San Martin de Tor, e je stade celebrade cuntune buine partecipazion di public la Dì de culture ladine. Ae iniziative a àn partecipât rapresentants des associazions e des scuelis ladinis de provincie di Bolzan. Al centri de zornade al è stât il teme de libertât, cun aprofondiments storics dedicâts ae partecipazion dai ladins intes bataiis pe liberazion dal Tirôl dai francês intant des campagnis napoleonichis.

Font: Provincie Autonome di Bolzan, 05/10/09


Galizie: il galizian si fâs onôr su Twitter


Su la rêt sociâl Twitter lis lenghis plui dopradis a son l’inglês, cun passe il 60% dai messaçs totâi, e il portughês, cul 9,5%. Chest almancul daûr dai dâts di un studi che al è stât fat in colaborazion cul motôr di ricercje Google. Se la seconde posizion dal portughês e pues lassâ un tic maraveâts, une sorprese inmò plui grande si le à tal scuvierzi che la lenghe minorizade plui doprade su Twitter e je il galizian, che e je fintremai denant dal catalan. Inte classifiche gjenerâl des lenghis plui dopradis su cheste rêt sociâl, il galizian al ocupe il vincjedoiesim puest. Si à ancje di dî che une part dai utents di lenghe galiziane nol ven calcolât par vie che si poie su Lareta.net, o sei un sisteme similâr a Twitter ma svilupât a nivel locâl.

Font: Vieiros Galiza Hoxe, 05/10/09


Ossezie: Gjeorgjie ricognossude responsabile de vuere dal 2008


Une comission indipendente metude in pîts de Union Europeane e à ricognossût il president gjeorgjian Mikhail Saakashvili tant che responsabil di vê inviât la vuere sclopade intal Avost dal 2008 cun chê di ocupâ la Ossezie meridionâl. Il president de Gjeorgjie, invezit, al veve simpri dineât lis sôs responsabilitâts acusant la Russie di vê agredît il so paîs. La comission, dut câs, e à ancje criticât la Russie par vê ricognossût la indipendence proclamade subite dopo dal atac gjeorgjian, sei de Ossezie meridionâl che de Abkhazie.

Font: Món Divers, 01/10/09


Gjermanie: salt indenant dal partîts dai frisons e dai danês


Intes elezions anticipadis pal Parlament dal Land dal Schleswig Holstein il SSW (Südschleswigscher Wählerverband, o sei la Federazion dai eletôrs dal Schleswig meridionâl), il partît che al met adun i rapresentants de minorance danese e di chê frisone, al à otignût il 4,1% dai vôts e al à dopleât il numar dai siei elets che a son passâts di 2 a 4 rispiet aes elezions stadis. Par cjatâ un risultât miôr si à di rivâ fintremai al 1947 cuant che i elets a jerin stâts 6. Il partît al pues contâ ancje su 10 rapresentants intai conseis regjonâi dal teritori e su 136 conseîrs comunâi.

Font: Nationalia, 30/09/09


Corsiche: ancje Corsica Libera e corarà tes prossimis elezions


La direzion di Corsica Libera, la gnove formazion politiche unitarie dal indipendentisim cors, e à comunicât che il partît al parteciparà aes elezions pe Assemblee de isule che si davuelzaran intal 2010, cundut dal sisteme eletorâl che al penalize i moviments plui piçui. Cun di fat, par otignî une rapresentance inte Assemblee, al coventarà cjapâ almancul il 10% dai vôts. Tes elezions stadis i partîts indipendentiscj a vevin corût adun cui autonomiscj, ma la aleance tra chestis dôs areis politichis e je aromai lade sù pai stecs. Par cumò i sondaçs a dan Corsica Libera avonde sot dal 10%, ma la formazion indipendentiste e à dite che e vûl “ocupâ ducj i spazis di lote” e, duncje, ancje chel de corse eletorâl pe Assemblee corse.

Font: Món Divers, 28/09/09