30/05/12

Cossovo: scuintri jenfri FIFA e UEFA sul ricognossiment de nazionâl

Il comitât esecutîf de FIFA, organisim che al regole il mont dal balon a nivel mondiâl, al à dât il permès ai siei associâts di zuiâ partidis amichevulis cu la rapresentative dal Cossovo. Par solit chest al è l'ultin pas prime de jentrade di une rapresentative statâl inte federazion e duncje de sô partecipazion aes competizions internazionâls. La decision e à però cjatât la oposizion dure de Serbie e ancje dai vot membris de UEFA che a son inte FIFA che a àn ricuardât cemût che il regolament de federazion nol permeti la adesion plene di stâts che no son membris de ONU. La federazion serbe e à fevelât di decision "politiche" che e varà consecuencis pesantis su dute la regjon.
Une vore plui grivie di chê cossovane e je invezit la situazion des rapresentativis sportivis dal Paîs Basc, dai Paîs Catalans e de Galizie che zaromai di agns a domandin il ricognossiment uficiâl des lôr scuadris nazionâls. La cuistion e je stade tornade a proponi intun document presentât ta chestis zornadis intal Parlament di Madrid là che si domande al guvier spagnûl di gjavâ i pidiments che a impedissin il ricognossiment internazionâl des rapresentativis di chestis trê nazionalitâts. A poiâ la domande a son ancje i parlamentârs di Amaiur, CiU, ERC, BNG e ICV.
Font: Balkan Insight, 22-23/05/12; Gara, 21/05/12

Nessun commento: