31/01/12

Scozie: referendum su la autodeterminazion, consultazions viertis

Ai 25 di Zenâr il prin ministri scozês Alex Salmond (Scottish National Party) al à presentât i elements di fonde leâts al referendum su la autodeterminazion de Scozie e al à inviât une consultazion, che si sierarà ai 11 di Mai, là che ducj i citadins a puedin dî la lôr sul document presentât. Dut câs, ancje il guvier britanic al à sclarît la sô posizion in proposit e al à inviât une consultazion publiche sul referendum che si sierarà ai 9 di Març.

Finlande: presentadis lis racomandazions dal Consei de Europe

Il Comitât dai ministris dal Consei de Europe al à presentât lis sôs racomandazions su rispiet des minorancis nazionâls in Finlande. Par chel al rivuarde i sami, lis autoritâts europeanis a invidin chês finlandesis a sotscrivi la convenzion internazionâl sui dirits dai popui natîfs e tribâi, a investî di plui sul insegnament de lenghe e a inviâ un dialic costrutîf cul Parlament sami par risolvi la cuistion dai dirits sul ûs des tieris rivendicâts des comunitâts nativis. Cun di plui si domande di coinvolzi di plui lis comunitâts minoritariis intai procès decisionâi e intes politichis cuintri des discriminazions. Il Consei de Europe al invide po la Finlande a incressi lis politichis pai rom e lis azions cuintri dal razisim. Par chel che al rivuarde la minorance svedese si domande di incressi la presince di funzionaris publics in stât di doprâ cheste lenghe, intant che par sami e rus si invide a invistî di plui sui mieçs di comunicazion intes lôr lenghis.
Font: Galdu, 23/01/12

Slovachie: sentence cuintri des “classis speciâls” pai rom

Pe prime volte un tribunâl de Slovachie al à condanât tant che discriminatorie la creazion di “classis speciâls” pai fruts rom. Al centri de vicende judiziarie a son i fats capitâts inte scuele primarie dal paîs di Šarišske Michaľany là che i frutins rom a jerin metûts in classis separadis di chês dai frutins slovacs. I dirigjents de scuele a àn motivât cheste separazion cul fat che cussì si podeve adatâ l’insegnament aes esigjencis specifichis dai fruts rom, ma ancje par vie che une part dai gjenitôrs a vevin menaçât di spostâ i lôr fîs tal câs che si vessin vudis classis mistis. Pes organizazions impegnadis pai dirits umans cheste sentence e je une vore impuartante parcè che e vierç la strade par impedî ogni politiche segregazioniste. Amnesty International e à domandât ancje un intervent dal guvier parcè che, se e je vere che la leç su la educazion e proibìs discriminazion e segregazion nol da definizions specifichis di chestis dôs pratichis e cussì e lasse a ogni scuele la pussibilitât di interpretâ la norme in mût diviers. Lis ONG impegnadis pai dirits umans a spieghin che i problemis principâi che a segnin lis comunitâts rom no son leadis ae lôr nazionalitât, ma ae puaretât e par chest dutis lis istituzions e la societât slovache a varessin di lavorâ par superâ chescj problemis e impegnâsi pe integrazion dai rom, propit a tacâ des scuelis.
Font: Roma Daily News, 23/01/12

Bretagne: il parê dal Consei Culturâl su la politiche linguistiche

Il Consei Culturâl de Bretagne, organisim regjonâl incjariât di proponi gnovis azions e di esaminâ lis politichis metudis in vore intal cjamp de culture, al à cjapât posizion in mert al progjet di modifiche de politiche linguistiche pal breton imbastît dal Consei regjonâl breton. Un dai ponts critics segnalâts al è chel dal numar no suficient di professôrs formâts e la mancjance dal insegnament integrât des lenghis là che il breton al stedi adun cun francês e inglês. Par chest e altris problemis che a integnin la scuele, il Consei Culturâl al propon di meti sù un grup di lavôr che al proponi une riforme de formazion superiôr. Dubis a vegnin po pandûts sui compits di control su media e associazions culturâls afidâts al Ufici pe Lenghe Bretone par chel che al rivuarde l’ûs coret des normis su la lenghe. Il Consei Culturâl al domande invezit di tornâ a meti in vore la valutazion anuâl su la politiche linguistiche. Par finî e ven ancje segnalade la mancjance di un jutori plui fuart pal gallo, o sei la varietât romanze doprade tes areis plui orientâls de Bretagne.
Font: Agence Bretagne Presse, 23/01/12

Austrie: HSK al domande plui cravuat a scuele

Il Congrès Mondiâl dai Cravuats (HSK) di Viene al à domandât aes autoritâts locâls di insegnâ il cravuat intes classis là che si à une presince significative di fruts che a rivin di cheste comunitât. Si stime che in Austrie a vivin uns 200 mil personis di divignince cravuate e che, di chestis, 40 mil a sedin a stâ a Viene. Une part di lôr e je presinte in Austrie di secui, ma tantis a son rivadis plui di resint, o intant des vueris inte ex Jugoslavie o ben par resons economichis. Par lôr, lis scuelis austriachis a ufrissin des oris di lezion là che a son doprâts bosgnac, cravuat e serp. Pal HSK però chest model plurilengâl nol va ben e ogni lenghe e varès di jessi doprade in maniere separade.
Font: Croatian Times, 23/01/12

Letonie: vie libare al referendum sul ricognossiment dal rus

Intal Dicembar stât la Comission eletorâl centrâl de Letonie e veve convalidât cuasi 190 mil firmis fatis indenant par domandâ un referendum par dâi un status di uficialitât al rus. In dì di vuê, di fat, il 44% dai 2 milions di abitants de republiche baltiche a fevelin par rus, ma cheste lenghe no gjolt di nissune forme di ricognossiment e e ven calcolade di lenghe foreste. Chel istès il Parlament de Letonie al veve boçât une propueste di leç par uficializâ il rus. Dut câs, propit ta chestis zornadis, la Cort Costituzionâl e à dât il vie libare al referendum che al propon di ricognossi ae lenghe russe un ciert nivel di uficialitât. Il vôt al varès di davuelzisi za cui 18 di Fevrâr.
Font: RIA Novosti, 20/01/12

Republiche Ceche: un partît gnûf par difindi i rom

Inte Republiche Ceche si è dât dongje un partît gnûf che si propon di difindi i dirits e i interès dai rom e di dutis lis categoriis plui debulis de societât. Daûr de nassite di chest gnûf sogjet politic, batiât Partît de Paritât di Oportunitâts (SRP), a son i scuintris di stamp etnic che a àn segnât la regjon di Šluknov e che a àn fat sintî tra i rom la dibisugne di vê ancje lôr une rapresentance politiche. Cun di fat, vie pai agns ’90 la Iniziative Civiche Rom (ROI) e veve diviers rapresentants in Parlament, ma po il moviment al jere stât segnât di diviersis divisions che a vevin puartât ae sô sierade. Il gnûf Partît de Paritât di Oportunitâts al è in vore par partecipâ aes prossimis elezions aministrativis in program chest Autun.
Font: České Noviny, 20/01/12

UE: nûf stâts riclamâts su lis politichis pai rom

La Comission Europeane, par bocje de comissarie Viviane Reding, e à riclamât nûf dai stâts membris a presentâ i lôr plans di intervent pe integrazion dai rom. La scjadince par consegnâ i plans aes autoritâts europeanis e jere chê dai 31 di Dicembar dal 2011. A no vêlu fat a son Belgjiche, Bulgarie, Cipri, Irlande, Italie, Lituanie, Slovenie, Spagne e Svezie.
Font: Focus Information Agency, 20/01/12

Paîs Basc: scuelis baschis in dute la Navare, no dal Parlament

La division de Navare in trê areis linguistiche, o sei bascofone, miste e no bascofone, no sarà cambiade. Cun di fat, la propueste di modifiche de leç su la lenghe basche (euskara) fate indenant dal partît Izquierda - Ezkerra (I - E) e je stade boçade cul vôt unitari dai socialiscj, de diestre spagnoliste dal Partît Popolâr e de diestre navare de UPN (Unión del Pueblo Navarro).

Irlande dal Nord: pal Consei de Europe la leç sul gaelic e va fate

Il Comitât consultîf dal Consei de Europe che al viôt de metude in vore de convenzion cuadri su la protezion des minorancis nazionâls al à invidât lis autoritâts de Irlande dal Nord a fâ buine cence altris ritarts une leç pe promozion dal gaelic irlandês. Al è zaromai di agns che si spiete une leç pal irlandês, previodude ancje dai acuardis di pâs, ma i partîts unioniscj a van dilunc a pidimentâ ogni tentatîf in proposit. Dongje de mancjance di une leç linguistiche, i ponts critics segnalâts a son la mancjance di volontât intal promovi il gaelic inte vite publiche, il tai pesant des risorsis pe lenghe e il plan di modifiche dai finanziaments pes organizazions che a lavorin pal irlandês.
Font: Gaelport, 17/01/12

Irlande: associazions pe lenghe cuintri dal gnûf model di finanziament

Cuntun comunicât unitari 19 des organizazions plui impuartantis impegnadis inte promozion dal gaelic irlandês a àn cjapât posizion cuintri dal gnûf model di distribuzion des risorsis fat indenant di Foras na Gaeilge, la agjenzie intergovernative che e regole lis politichis pe lenghe irlandese. La prime critiche e je leade al fat che il plan al è stât metût adun cence nancje sintî il parê dal associazionisim. Lis organizazions che a àn sotscrit il document a son dacuardi che il sisteme al à di jessi riformât, ma a disin che la strade cjapade de agjenzie statâl e va cuintri di ogni planificazion linguistiche serie e de continuitât dai servizis. Il tai des risorsis e il gnûf model pe lôr distribuzion e metarès in zenoglon dutis lis organizazions che a operin intal setôr, tratantlis come se a fossin struturis comerciâls e no ents di servizi pe comunitât. Cun di plui, cul gjavâ i finanziaments pai dipendents, il model gnûf al oblearès a mandâ a cjase buine part dal personâl e al dispierdarès cussì competencis fondamentâls e agns di esperience.
Font: Gaelport, 17/01/12

Cossovo: scuintris violents sui confins cu la Serbie

Tor de metât di Zenâr cualchi centenâr di militants dal partît Vetevendosje (Autodeterminazion) si è scuintrât cu lis fuarcis di polizie cossovanis dongje de frontiere cu la Serbie, alì dal passaç di Merdare. I nazionaliscj cossovans a cirivin di blocâ lis marcjanziis che a rivavin de Serbie par rivendicâ la reciprocitât intai rapuarts economics tra i doi paîs.

Paîs Catalans: scuintri su la leç pe lenghe tes Baleârs

E cres simpri di plui la oposizion cuintri de propueste di modificâ la leç di normalizazion linguistiche in vore intes Baleârs fate indenant dal esecutîf de Comunitât autonome des isulis. Il guvier vuidât di José Ramón Bauzá (Partît Popolâr) al ponte a cambiâ vot dai cuarante articui de leç che e ricognòs a ducj il dirit di cognossi e di doprâ il catalan, lenghe proprie des Baleârs. In particolâr si volarès gjavâ la cognossince dal catalan tant che element necessari par podê lavorâ inte aministrazion publiche des isulis.

Albanie: impresonât un rapresentant de minorance greghe

Un tribunâl albanês al à condanât a un an di preson Naum Disho, president de organizazion de minorance greghe Omonia. L’om al jere acusât di vê dissacrât des tombis intal simitieri di Boboshtica intant che al jere daûr a restaurâ un monument pai soldâts grêcs muarts vie pe seconde vuere mondiâl. Par Naum Disho la acuse e je false e la sô condane e je leade a motivazions politichis. La sentence e rive di fat intun moment là che i partîts de diestre albanese e i rapresentants de minorance greghe a son daûr a scuintrâsi su lis domandis su etnie e religjon che a son stadis metudis dentri intal censiment.
Font: Balkan Insight, 05/01/12