16/09/08

Pontade 19 08 (16/09/08) - 12

Sardegne: nassût il Comitadu 482

Ai 12 di Setembar a Bilartzi / Ghilarza, in Sardegne, al è nassût il “Comitadu 482, pro s'ufitzialidade de sa limba sarda” (Comitât 482, pe uficialitât de lenghe sarde). La associazion – come che si pues lei tal so document fondatîf – e à chê di: lavorâ par che la leç statâl 482/99 (pe tutele des minorancis linguistichis storichis) e sedi metude in vore ad in plen; viodi che i progjets e i intervents dai ents locâi a ledin daûr di ce che e previôt la leç; informâ la opinion publiche sui svilups, su la metude in vore o no de leç; meti adun iniziativis e propuestis par sensibilizâ la int e sburtâ ents, istituzions e partîts a meti in vore le leç; controlâ i efiets e denunciâ i atacs cuintri de leç; e, se dal câs, imbastî azions legâls par difindi la aplicazion corete de leç. A meti in pîts il Comitadu al è stât un grup di operadôrs linguistics che al à partecipât al cors di autoformazion promovût dal Ufici pe lenghe sarde de Provincie di Aristanis / Oristano. La gnove realtât associative si zonte duncje al Comitât 482 nassût in Friûl tal 2002 simpri cun chê di difindi i dirits linguistics fissâts de leç 482/99. Il Comitadu al à ancje screât un blog che si cjate alì de direzion: comitadu482.blogspot.com .
Font: Comitadu 482, 13/09/08


Pontade 19 08 (16/09/08) - 11

Paîs Basc: proibide la consultazion domandade dal guvier de CAB

Il Tribunâl Costituzionâl spagnûl al à proibît la consultazion popolâr che il guvier de Comunitât Autonome Basche al voleve davuelzi ai 25 di Otubar di chest an par domandâ ai citadins se a jerin dacuardi che i partîts bascs a tachassin un procès di negoziazion par rivâ a di un acuardi sul esercizi dal dirit di decidi dal popul basc, e cu la fin des azions armadis di ETA. Daûr di cheste decision a saressin massime dôs resons, che a son stadis rindudis publichis ai 11 di Setembar. La prime si riferìs ai contignûts de consultazion: cun di fat, pal orghin judiziari plui alt dal stât spagnûl, nol esist un sogjet clamât “popul basc” titolâr di un dirit di decidi in stât di jessi esercitât. Un dirit di cheste fate, al dîs il TC, al volarès dî vê une sovranitât plene che, invezit, daûr de Costituzion i spiete dome al popul spagnûl. Daûr de sentence, il popul basc nol à dirit di tratâ i siei rapuarts istituzionâi cul stât spagnûl suntun plan di avualiance cul stes stât. Denant di chest resonament, duncje, la consultazion, volude massime dal president dal guvier de CAB Juan José Ibarretxe, e ven judicade anticostituzionâl. Dut câs, di là dai contignûts des domandis che si voleve proponi ai citadins, pal TC spagnûl il probleme al è bielzà tal mani, ven a dî te consultazion stesse. Cun di fat, si dîs te sentence, la pussibilitât di davuelzi dai referendums i spiete dome che al stât spagnûl. La CAB, duncje, no varès nissun dirit di imbastî un referendum, ancje se lu presente cul non di consultazion popolâr.
A front di cheste sentence, il guvier de CAB, come che al veve za anticipât cuant che si veve capît cuale che e sarès stade la decision dal tribunâl, al à invidât i citadins e i sogjets politics e associatîfs bascs a denunciâ la sentence denant dal Tribunâl european dai dirits umans. I partîts spagnoliscj – o sei socialiscj (PSOE / PSE) e popolârs (PP) – a àn, invezit, invidât Ibarretxe e i partîts che lu poin a lassâ pierdi e a no straçâ altri timp suntune cuestion che par lôr e jere za finide inmò prime di partî. Il progjet de consultazion popolâr proponude di Ibarretxe al jere stât criticât ancje de çampe indipendentiste basche che e va dilunc a bati sul fat che nol è pussibil inviâ nissun procès di autodeterminazion nazionâl dentri de suaze costituzionâl spagnole.
Font: Gara, 02 e 12/09/08


Pontade 19 08 (16/09/08) - 10

Paîs Catalans: in miârs ae manifestazion par un stât catalan

Si calcole che a sedin stadis sù par jù 20 mil lis personis che a àn partecipât ae manifestazion pe indipendence che si è davuelte a Barcelone ai 11 di Setembar, zornade che e cole la fieste nazionâl catalane. La iniziative e je stade imbastide di une sessantine di organizazions di stamp diferent, di chês dai imigrâts fintremai a chês sportivis, ma dutis impegnadis intun percors pe indipendence dai Paîs Catalans. Il slogan sielzût par compagnâ la manifestazion al è stât: “O sin une nazion. O volìn un stât par nestri cont” (Som una nació. Volem estat propri). Intant de iniziative si à denunciât la ofensive culturâl metude in vore des istituzions spagnolis e il disfrutament economic e finanziari che la Catalogne e je daûr a patî. Propit la cuestion finanziarie e je stade l’argoment centrâl di une altre iniziative inmaneade de ERC che e à clamât dongje cualchi miâr di personis. Simpri te stesse zornade, une altre manifestazion di stamp indipendentist e je stade inmaneade di altris siglis (Maulets, Endavant, Cajei, e v.i.) che si son dadis dongje alì dal Fossar de les Moreres, un dai lûcs simbul de resistence catalane.
Font: Avui, 11/09/08; VilaWeb, 11/09/08; Món Divers, 11/09/08


Pontade 19 08 (16/09/08) - 9

Galizie: bogns risultâts pal studi dal galizian intal Bierzo

A cressin i fruts che a frecuentin i cors di galizian intes scuelis de infanzie e primariis dal Bierzo, inte provincie dal León. Ta chest teritori, che al è juste par di là dai confins aministratîfs de Galizie, si calcole che a sedin uns 40 mil personis che a fevelin ancjemò par galizian. Cun di fat, daûr dai ultins dâts, a saressin za passe un miâr i students che tal an scolastic 2008 – 2009 a studiaran cheste lenghe, cundut che no je une materie obligatorie. Par sapontâ il studi dal galizian intal Bierzo, la aministrazion de Galizie e à fat savê che e vûl incressi i scambis tra i students e lis dotazions di materiâi didatics.
Font: Galiza Hoxe, 12/09/08


Pontade 19 08 (16/09/08) - 8

Asturiis: ai 4 di Otubar gnove manifestazion pe uficialitât dal asturian

Il Conceyu Abiertu pola Oficialidá al à clamât dongje une gnove manifestazion par domandâ che l’asturian al sedi ricognossût tant che lenghe uficiâl intal gnûf Statût di autonomie des Asturiis. La iniziative si davuelzarà a Uviéu / Oviedo, la capitâl asturiane, ai 4 di Otubar e e varà tant che sproc “Cence uficialitât nol è Statût che al vali” (Ensin oficialidá nun hai Estatutu que valga). I organizadôrs a àn criticât a fuart la linie dai partîts spagnoliscj – PSOE e PP – che no vuelin uficializâ l’asturian. Cun cheste posizion – a disin – si condane a muart il patrimoni linguistic des Asturiis.
Font: Món Divers, 10/09/08


Pontade 19 08 (16/09/08) - 7

Romanie: il CNS al domande un referendum pe autonomie dai Székely

Il Consei Nazionâl Székely (SZNT), la organizazion politiche principâl de comunitât székely, al domande aes autoritâts des provinciis di Hargita / Harghita, Kovászna / Covasna e Maros / Mureş di inmaneâ pai 30 di Novembar un referendum su la autonomie dai lôr teritoris, là che e vîf la plui part de popolazion ongjarese dai székely. L’intindiment al è chel di fâ votâ ai citadins di cheste regjon la propueste di leç su la autonomie dal Székelyföld (o sei la Tiere dai Székely) che il stes Consei Nazionâl Székely al à presentât intal parlament rumen. Dut câs, par diviersis resons, al è dificl pensâ che la propueste e passi. Prin di dut, par vie dai timps masse curts che a restin par inmaneâ il referendum, a front di une lungje schirie di passaçs burocratics. Po par vie de stesse domande di autonomie che, ancje se pal Consei Nazionâl Székely no vûl menaçâ la integritât dal stât rumen, e je za stade judicade in altris ocasions incostituzionâl. A mostrâ dai dubis su la iniziative al è ancje il plui grues partît de comunitât ongjarese rumene, o sei la Aleance Democratiche dai Ongjarês in Romanie (Romániai Magyar Demokrata Szövetség).
Font: Divers.ro, 08/09/09; Nationalia, 08/09/08


Pontade 19 08 (16/09/08) - 6

Transnistrie: la Moldove e sburte par une soluzion pacifiche

La proclamazion de indipendence de Ossezie meridionâl e de Abkhazie e à tornât a saborâ la tension ancje in Transnistrie: une striche di tiere scliçade jenfri Ucraine e Moldove, che sul plan formâl e je part di chest secont stât, ma che zaromai di agns e gjolt di une indipendence di fat. Dut câs, la prime ministre Zinaida Greceanii e à sclarît che, contrari di ce che al à fat il guvier gjeorgjan, la Moldove no à nissune intenzion di provâ a risolvi il conflit sul status de Transnistrie cu la fuarce. La Moldove e lavore pal moment massime sul plan economic, cu la ufierte di percors preferenziâi pal cumierç cu la Union Europeane par chês impresis de Transnistrie che si regjistrin in Moldove. Sul plan politic, invezit, si ufrìs un regjim di autonomie une vore fuart, inmò di plui di chel za metût in vore pe comunitât gagauze. Cun di plui, e à dite la prime ministre moldave, la popolazion russofone de Transnistrie e podarà lâ dilunc a vê ancje la dople citadinance e conservâ il passepuart rus, fale chei che a lavorin tant che funzionaris publics. Ancje il fat di no volê jentrâ inte NATO – e à zontât la Greceanii – e vûl jessi une garanzie in plui pe comunitât russe dal paîs.
Font: RFE/RL, 03/09/08


Pontade 19 08 (16/09/08) - 5

Irlande: gnovis tensions tal guvier nordirlandês

Se no si larà indenant pardabon cu la devoluzion dai podês intal cjamp de justizie e ta chel des fuarcis di polizie, il Sinn Féin al è pront a gjavâsi fûr dal guvier di coalizion che al vuide la Assemblee nordirlandese. Il partît di riferiment de comunitât republicane irlandese al acuse il DUP (Democratic Unionist Party), il partît plui grues dal front unionist, di lâ dilunc a pidimentâ il trasferiment ae Assemblee de Irlande dal Nord dai podês gjestîts fin cumò dal guvier britanic, cundut che al fos previodût prin dai Acuardis dal Vinars Sant, che a vevin inviât il procès di pâs, e po di chei di Saint Andrews. Tant che rispueste, il prin ministri nordirlandês Peter Robinson, che al à cjapât il puest di Ian Paisley sei intal guvier sei intal DUP, al à declarât che se e ves di saltâ la riunion dal esecutîf za fissade pai 18 di Setembar il Sinn Féin a ‘nt paiarà lis consecuencis. Prime de devoluzion de justizie e de polizie, il DUP al va dilunc a domandâ sigurazions sul dismantelament totâl dal IRA (Irish Republican Army), l’Esercit Republican Irlandês. Propit ta chestis zornadis, dut câs, la Comission di control indipendente e à declarât che il Consei diretîf e la struture militâr dal IRA no son plui in vore. Une declarazion che il stes prin ministri britanic Gordon Brown al à judicât suficiente par podê puartâ insom il procès di devoluzion. Un dai problemis sul plat al jere ancje chel su cui meti a cjâf dal ministeri de justizie e de polizie, dal moment che un republican al varès jevât la ostilitât de comunitât unioniste e un unionist chê de comunitât republicane. La soluzion e podarès rivâ de disponibilitât di un rapresentant dal Alliance Party, formazion politiche che no vûl jessi calcolade ni unioniste, ni republicane. Ce che, invezit, al somee restâ fûr de discussion e je la presince massive di armis framieç de comunitât unioniste e la mancjance di inchiestis indipendentis su la colusion jenfri paramilitârs lealiscj e struturis militârs e di polizie britanichis.
Font: Belfast Telegraph, 03/09/08; Món Divers, 03/09/08; Nationalia, 03/09/08; Gara, 02/09/08; BBC News, 26/08/08


Pontade 19 08 (16/09/08) - 4

Sahara Ocidentâl: un altri bloc pal procès di autodeterminazion saharawi

Il procès di autodeterminazion dal popul saharawi al va dilunc a cjatâ pidiments di ogni sorte. Daspò dal no marochin al plan preparât dal inviât de ONU James Baker che al previodeve pal Sahara Ocidentâl un statût di semiautonomie sot dal Maroc par cinc agns prime di un referendum su la autodeterminazion, il puest di Baker al jere stât cjapât di Peter Van Walsum, ma cence che si fasessin dai pas indenant intes negoziazions jenfri lis autoritâts dal Maroc e chês de Republiche Arabe Saharawi Democratiche in esili. Cumò ancje Van Walsum al à lassât il so incaric di inviât de ONU. Cheste volte, dut câs, e je stade la segretarie gjenerâl de ONU a no confermâlu par vie che cu lis sôs declarazions al veve pierdût la stime des autoritâts saharawi. Cun di fat, Van Walsum al veve dite che aromai la strade de indipendence pal Sahara Ocidentâl, che di passe trente agns al patìs la ocupazion marochine, no jere realistiche. Cun chestis sôs declarazions – al à protestât il guvier in esili de Republiche Arabe Saharawi Democratiche – Van Walsum al à bandonât la posizion di neutralitât a pro de linie tignude dal Maroc che, cul so refût di rispietâ lis risoluzions ONU sul dirit ae autodeterminazion dai saharawi, al è la cause prime dal conflit.
Font: Nationalia, 02/09/08


Pontade 19 08 (16/09/08) - 3

Ingussezie: sassinât gjornalist critic cul guvier filorùs

E cres la tension inte republiche russe de Ingussezie daspò dal sassinament, ai 31 di Avost dal gjornalist Magomed Yevloyev par man des fuarcis di polizie al servizi dal guvier filorùs. Yevloyev al gjestive un sfuei internet une vore critic cuintri dal guvier rus e di chel de Ingussezie vuidât di Murat Zyazikov, acusât di vê discjadenât une vere vuere civîl cuintri de popolazion ingusse. Il gjornalist al è stât copât cuntun colp di pistole di un dai poliziots che lu vevin arestât. La version uficiâl e fevele di un colp partît in maniere acidentâl intant che Yevloyev al resisteve al arest. No le pensin cussì, invezit, lis organizazions locâls e internazionâls pai dirits umans che za di timp a denuncin la situazion di repression violente metude in at dal guvier filorùs cuintri dai oposidôrs politics. Za di agns, ancje se in maniere mancul fuarte de vicine Cecenie, e je in vore une resistence che e domande la indipendence de Ingussezie.
Font: Nationalia, 01/09/08; Ingushetiya.wordpress.com, 31/08/09


Pontade 19 08 (16/09/08) - 2

Vojvodine: il guvier regjonâl al lavore par incressi la autonomie

I partîts che a guviernin la Vojvodine daspò des elezions regjonâls dal Mai stât a son daûr a meti jù un Statût gnûf che al dedi plui autonomie a chest teritori che al fâs part dal stât serp. L’obietîf al è chel di recuperâ almancul une part dal nivel di autoguvier che la regjon e veve pierdût, intune cul Cossovo, intal 1990 sot dal guvier di Slobodan Milosevic. Tal 2002 il Parlament serp al veve tornât ae Vojvodine un friç di autonomie, ma cetante di mancul di chê che la regjon e gjoldeve ai timps di Tito. A sburtâ pe riforme a son il Partît Democratic dal prin ministri serp Boris Tadic, i autonomiscj de Leghe dai Socialdemocratics de Vojvodine, la Coalizion Ongjarese, il Partît Socialist de Serbie e i liberâi dal G17. Il president dal guvier regjonâl, Bojan Pajtic, i à tignût a sigurâ che il Statût che si è daûr a scrivi nol rapresente une menace pe integritât teritoriâl serbe. No le pense cussì il Partît Radicâl Serp che al è contrari ae riforme e che al dîs che cun chest Statût la Vojvodine si invie pe stesse strade che e à puartât, intal 2006, ae indipendence dal Montenegro. Inte regjon e vîf une gruesse comunitât ongjarese che e rapresente il 14,5% de popolazion totâl, dongje di minorancis slovachis, cravuatis, rom e rutenis.
Font: Món Divers, 31/08/08


Pontade 19 08 (16/09/08) - 1

Paîs Catalans: prin istitût secondari par catalan tal Rosselló

Ai 30 di Avost si à screât, a El Soler / Le Soler, inte Catalogne Nord il prin istitût secondari cul catalan tant che lenghe di insegnament. La struture, che e je stade dedicade a Pompeu Fabra, e je stade fate sù massime in graciis dai cuasi 3 milions di euros dâts dal guvier catalan (Generalitat de Catalunya) ae associazion “Amics de La Bressola”, che e gjestìs lis scuelis privadis par catalan intal stât francês. Al è za dal 2003 che inte Catalogne Nord a son in vore classis superiôrs par catalan, ma fin cumò a jerin logadis in struturis provisoriis.
Font: Món Divers, 31/08/08