24/05/13

Corsiche: fat bon il statût pe couficialitât dal cors

Ai 17 di Mai, dopo cuasi dôs zornadis di discussion e l’esam di passe un centenâr di emendaments, la Assemblee de Corsiche e à fat bon il statût pe couficialitât dal cors e pe valorizazion de lenghe proprie de isule. Dai 51 membris de Assemblee 36 a àn votât a pro dal proviodiment, ven a dî i indipendentiscj di Corsica Libera, i nazionaliscj moderâts di Femu a Corsica e la plui part dai elets di centri çampe che a guviernin la isule; altris 11, o sei i rapresentants de oposizion di centri diestre e chei de çampe republicane, a àn decidût di no partecipâ al vôt, intant che 4 no jerin presints. Cundut di un pocjis di modifichis leadis ae aprovazion di cualchi emendament, il test jessût de Assemblee nol è masse lontan di chel presentât ae Aule dal referent pe lenghe Pierre Ghionga. Si trate di un segnâl une vore fuart lançât de isule che e spiete cumò la rispueste di Parîs. Cun di fat par che il statût di couficialitât al puedi jentrâ in vore al covente un vôt dal Parlament francês.
Font: Alta Frequenza, 17/05/13

Scozie: la maiorance e poie i invistiments sul gaelic

I risultâts de inchieste sui ategjaments sociâi dai scozês svilupade de Universitât di Edimburc e dal ScotCen Social Research a mostrin a clâr che la maiorance de int e poie i invistiments fats dal guvier a pro de lenghe gaeliche. Il 45% dai scozês al pense di fat che i 24 milions di sterlinis metûts ogni an pe tutele e pe promozion dal gaelic a sedin une spese juste, intant che un altri 16% al volarès che si invistìs di plui par cheste lenghe. I dâts a son une vore significatîfs se o pensìn che tra i intervistâts dome il 0,5% al è in stât di fevelâ avonde ben par gaelic e un altri 15% al cognòs dome cualchi frase di cheste lenghe. Un dai cjamps di intervent là che si à une poie plui fuarte pe azion dal guvier e je chê de segnaletiche bilengâl che e cjate dacuardi cuatri cuints dai scozês; cuasi la metât dai intervistâts e volarès che e fos slargjade a dute la Scozie e no dome intes areis là che la lenghe e je plui presinte. Valutazions positivis a rivin ancje pe radio e pe television par gaelic. Un altri element impuartant al è po leât al fat che chest ategjament positîf de int pal gaelic i fâs cuintri ai prejudizis, aes ironiis e aes informazions faladis che tante stampe e veve sparniçât su cheste lenghe.
Font: BBC, 13/05/13

Gales: inchieste sul ûs dal galês intai servizis sanitariis

Ai 13 di Mai la comissarie pe lenghe galese Meri Huws e à inviât la prime inchieste uficiâl sul ûs de lenghe intai servizis sanitariis, massime chei di prime assistence. L’intindiment al è chel di vê une fotografie clare de presince dal galês ta chest setôr par mieç des testemoneancis e des indicazions che a rivaran dai citadins, dai esperts e dai operadôrs de sanitât. Il cuadri che al vignarà fûr al coventarà par meti jù un rapuart che in plui di fâ il pont su la situazion al proponarà lis azions di meti in vore par miorâ il servizi e garantî i dirits linguistics dai citadins.
Font: Comisiynyddy y Gymraeg, 13/05/13; BBC, 09/05/13

Bulgarie: dome la minorance turche e jentre in Parlament

Lis elezions politichis che si son tignudis ai 12 di Mai in Bulgarie a àn dât la maiorance relative (31% des preferencis) al partît di centri diestre GERB vuidât dal ex prin ministri Boiko Borisov, che si è plaçât denant dai socialiscj par plui o mancul il 4% dai vôts. Dome altris doi partîts a àn rivât a passâ il soiâr dal 4% che al permet di jessi rapresentâts in Parlament, o sei il Moviment pai Dirits e pes Libertâts (10,7% dai vôts) che al rapresente la minorance turche de Bulgarie, e i ultranazionaliscj di Ataka (7,4% dai vôts). I risultâts no permetin nissune maiorance di guvier stabile. Une des ipotesis su la taule e je chê di un guvier di minorance formât dai socialiscj e dal Moviment pai Dirits e pes Libertâts.
Font: Balkan Insight, 12/05/13; BBC, 13/05/13

Bretagne: otignût il domini .bzh

A vierzi la strade a jerin stâts i catalans cul ricognossiment dal domini internet .cat, e cumò ancje une altre nazionalitât cence stât de Europe ocidentâl e oten il stes risultât. Cun di fat l’ICANN, l’organisim internazionâl che al controle i dominis su la rêt, al à comunicât di vê fate buine la domande rivade par une estension .bzh a disposizion di chei sîts internet che a doprin la lenghe bretone o che si ricognossin e a disvilupin la culture e la identitât de Bretagne. A inviâ il percors e jere stade la associazion no profit Point Bzh, che cumò e varà di gjestî lis licencis pal gnûf domini. La organizazion e jere stade metude sù intal 2007 e e veve cjatât la poie de Regjon Bretagne, di cetantis realtâts istituzionâls e associativis di cheste tiere, in plui di 21 mil firmis di citadins.
Font: Agence Bretagne Presse, 11/05/13

Galizie: finanziâts gnûfs servizis linguistics comunâi

Il guvier galizian al à publicât il ripart des risorsis a disposizion dai ents locâi pe promozion istituzionâl de lenghe proprie di cheste comunitât autonome. Si trate di 400 mil euros che a saran dividûts tra 138 aministrazions comunâls par mantignî o ativâ gnûfs servizis linguistics di gjestî di bessolis o in maniere associade. In dì di vuê i servizis linguistics comunâi za in vore a son 50, une disine chei gnûfs che a vegnin ativâts cun chest finanziament. Par chei comuns che no àn un servizi, i contribûts a van par programs di promozion di ûs de lenghe sul teritori.
Font: Xunta de Galicia, 10/05/13

Cossovo: pidiments pal acuardi su la minorance serbe

Lis delegazions de Serbie e dal Cossovo si son dadis dongje ai 8 di Mai par decidi i detais par meti in vore l’acuardi sotscrit dai doi guviers su la gjestion dai comuns a maiorance serbe dal Cossovo, ma la riunion e je lade strucje par vie che i rapresentants cossovans a àn acusât la cuintripart di vê metût su la taule cuistions che no jerin dentri intal acuardi. Marko Djurić, che al vuidave la delegazion serbe, al à spiegât che il plan presentât dal guvier di Belgrât al svilupave plui in detai i ponts dal acuardi in maniere di garantî ad in plen i dirits de minorance serbe in Cossovo e che il test al veve vût il vie libare des autoritâts europeanis che a fasin di mediatôrs intal procès. Viodût che lis delegazions no àn rivât a cjatâ un acuardi, il plan al varà di jessi discutût dai doi prins ministris Ivica Dačić e Hashim Thaçi. L’apontament al è a Bruxelles ai 21 di Mai.

Aragon: fate buine la leç linguistiche che e dinee il catalan

Il Parlament dal Aragon, cui vôts a pro de diestre spagnoliste e regjonaliste (PP e PAR), al à fate buine la gnove leç su lis lenghis che e va a cjapâ il puest di chê dal 2009. Il proviodiment al va in buine sostance a dismantelâ il sisteme di tutele linguistiche inviât di chê leç e al elimine fintremai il concet di lenghe catalane par sostituîlu cu la definizion di “lenghe aragonese proprie de aree orientâl”, intant che l’aragonês al ven definît tant che “lenghe aragonese proprie de aree pirenaiche e prepirenaiche”. La leç e je stade contrastade dai partîts nazionalitariis e di chei di çampe dal Aragon, ma ancje de maiorance di chei catalans (CiU, ERC, PSC, ICV-EUiA, CUP) che a àn marcât la partignince des varietâts feveladis inte fasse orientâl dal Aragon, la cussì clamade Franja, ae lenghe catalane. Critichis une vore duris a son rivadis ancje dal Institut d’Estudis Catalans, che al fevele di proviodiment che al va cuintri des convenzions sientifichis e dal bon sens, e de Plataforma par la Llengua che e denuncie che il test fat bon dal Parlament aragonês al va cuintri dai principis de Costituzion spagnole e de Cjarte europeane des lenghis regjonâls o minoritariis.
Font: VilaWeb, 09/05/13

France: riforme de scuele, pas indaûr pes lenghis minoritariis

Vincent Paillon, ministri francês pe educazion, al à comunicât che il guvier al darà la sô poie a di un emendament su lis lenghis “regjonâls” che al sarà esaminât intant de discussion su la riforme de scuele in program tra i 21 e i 24 di Mai intal Parlament. L’emendament al previôt che si puedi insegnâ lis lenghis e lis culturis “regjonâls” intal orari curicolâr, intes areis là che chestis lenghis a son dopradis e par chei fruts che lis lôr fameis a son dacuardi. L’emendament, se al ves di jessi confermât, al rapresente in realtât un pas indaûr rispiet ae situazion atuâl là che chestis materiis a cjatavin za un piçul spazi inte scuele e cence che e fos la dibisugne di domandâ la autorizazion dai gjenitôrs.
Font: EiTB, 08/05/13; Agence Bretagne Presse, 14/05/13

Paîs Catalans: il tribunâl al suspint la declarazion di sovranitât

Il tribunâl costituzionâl spagnûl al à ametût il ricors fat indenant dal guvier di Madrid cuintri de declarazion di sovranitât aprovade dal Parlament catalan ai 23 di Zenâr. Chest al puarte a di une sospension de declarazion e si trate de prime volte che al sucêt, dal 1978 incà, par un at fat bon dal Parlament di une comunitât autonome. Il tribunâl al à cumò cinc mês di timp par cjapâ une decision definitive. Pal guvier spagnûl la declarazion e je fûr leç par vie che la sovranitât no i spiete ai catalans, ma dome ae “nazion spagnole”. Il president de Generalitat, Artur Mas, al à sigurât che l’esecutîf catalan al larà indenant pe sô strade fintremai che al varà la poie de maiorance dai citadins de Catalogne e al à domandât al tribunâl costituzionâl che al rispieti la volontât popolâr manifestade intes elezions dai 25 di Novembar. Subite dopo de gnove, il Parlament de Catalogne al à decidût di meti sù une comission incjariade di svilupâ il percors pe autodeterminazion cul vôt a pro di CiU, ERC, PSC, ICV-EUiA e CUP e la oposizion de diestre spagnoliste (vôt contrari di Ciutadans e no partecipazion al vôt dal PP).
Font: Vilaweb, 08-09/05/13; Naiz:, 08/05/13

Asturiis: in miârs in place pe uficialitât dal asturian

Diviers miârs di personis si son dâts adun ai 3 di Mai a Uviéu / Oviedo par manifestâ a pro de uficialitât de lenghe asturiane, misure che lis organizazions pai dirits linguistics des Asturiis a van dilunc a domandâ di agns. A inmaneâ la manifestazion e je stade la Xunta pola Defensa de la Llingua Asturiana. In place si son dâts dongje rapresentants des associazions impegnadis inte promozion dal asturian, dai partîts plui sensibii ae cuistion de lenghe (tant che Andecha Astur, Compromisu por Asturies e Izquierda Unida), dai sindacâts principâi (UGT e CCOO) e cetancj citadins.
Font: AsturNews, 06/05/13

Montenegro: il partît dai albanês si gjave dal guvier

Il guvier dal Montenegro jessût des elezions dal Otubar dal 2012 al è daûr a clopâ par vie che diviers dai partîts plui piçui che a poin l’esecutîf a menacin di gjavâsi fûr de coalizion di guvier. Lis elezions a jerin stadis vinçudis de Coalizion par un Montenegro European formade dal Partît Democratic dai Socialiscj, dal Partît Democratic Sociâl e dal Partît Liberâl, ma par guviernâ e veve bisugne ancje de poie di altris fuarcis politichis, pe plui part espression des minorancis nazionâls dal paîs balcanic. Ae coalizion di guvier al partecipave ancje il moviment Gnûf Podê Democratic – Forca che al rapresente une part dal eletorât albanês. Chest partît al à menaçât di gjavâsi fûr par vie che l’esecutîf nol è daûr a rispietâ i impegns che si veve cjapât pal rispiet dai dirits des minorancis nazionâls che a vivin in Montenegro.
Font: Balkan Insight, 07/05/13

Paîs Catalans: intal Principât l’80,5% al fevele catalan

Daûr dal ultin rapuart su la politiche linguistiche in Catalogne, presentât in maniere uficiâl ta chestis zornadis, al ven fûr che l’80,5% de popolazion adulte dal Principât al è in stât di fevelâ par catalan, intant che il 65% al è ancje bon di scrivilu. Rispiet ai agns prime al reste stabil il numar des personis che a àn il catalan tant che lenghe native, ma al cres chel des personis che a stimin il catalan la lôr lenghe di riferiment e ancje chel di cui che lu à tant che lenghe di ûs abituâl.
Font: Generalitat de Catalunya, 06/05/13

Ocitanie: pas indenant inte segnaletiche bilengâl

A son diviersis lis iniziativis inte part de Ocitanie cjapade dentri intal stât francês par slargjâ l’ûs de segnaletiche bilengâl. Tra lis plui resintis si àn chê inviade dal consei gjenerâl de Tarn par che ducj i comuns di chel dipartiment a metin sù i panei di jentrade ai paîs ancje par ocitan. Il progjet di completament de toponomastiche bilengâl si svilupe su trê agns e al previôt la cuvierzidure dal 80% dai coscj de segnaletiche par ocitan de bande dal dipartiment. Il consei gjenerâl dai Pireneus Atlantics al à invezit za tacât a meti jù la segnaletiche bilengâl dilunc dal Camin Verdejant / Voie Verte, une piste ciclabile che si svilupe tra i sîts plui biei di chel dipartiment.
Font: La Pòrta d’òc, 06/05/13; La Depeche, 03/05/13

Scozie: nuie gaelic intal sît plurilengâl de polizie

A son 66 lis lenghis dopradis par voltâ il sît internet dal gnûf cuarp unificât de polizie scozese, ma tra chestis al mancje il gaelic, ven a dî la lenghe proprie de aree ocidentâl de Scozie. Cheste mancjance e à jevât diviersis protestis, ancje a nivel politic, che a àn fevelât di “pataf tai confronts dal popul scozês”. John Angus MacKay, diretôr de organizazion pe lenghe Bòrd na Gàidhlig, al à ricuardât che il gaelic al è ricognossût tant che lenghe uficiâl e che dutis lis autoritâts publichis, duncje ancje chês di polizie, a àn di svilupâ un plan pe promozion di cheste lenghe. Un puartevôs de gnove polizie unificade al à fat savê che si è daûr a meti jù il plan, che al previodarà ancje la traduzion dal sît par gaelic e che al cjaparà sù dutis lis misuris za in vore pe lenghe intal cuarp di polizie locâl che al operave intes areis là che il gaelic al à une presince plui marcade.
Font: Scottish Express, 05/05/13