09/12/14

Scozie: a rivin lis gnovis propuestis di devoluzion

A son stâts presentâts i risultâts de comission Smith, il grup di lavôr metût sù dal guvier britanic la vilie dal referendum pe indipendence scozese cun chê di meti lis fondis par une gnove devoluzion di podês ae Scozie. Chescj indreçaments a varan cumò di jessi svilupâts in progjets normatîfs di un altri grup di lavôr.
Intal document de comission si propon di dâi al Parlament scozês il podê di intervignî su lis alicuotis de impueste sul redit e des tassis sul lavôr e di tignîsi po lis cuotis scuedudis in Scozie. La Assemblee e varès di vê ancje la pussibilitât di creâ gnûfs beneficis sociâi, di otignî dai spazis di gjestion intal stât sociâl e di sbassâ la etât pe partecipazion eletorâl a 16 agns. La gjestion di cierts servizis sociâi par viei, malâts e disabii e varès di jessi devolude ad in plen e, par finî, Parlament e guvier scozês a varessin une funzion consultive inte riforme de radiotelevision publiche BBC. Pe prime ministre scozese Nicola Sturgeon, lis propuestis de comission a son un tradiment des promessis fatis ai scozês la vilie dal referendum par convinciju a dî di no ae indipendence. Cun di fat, e à comentât la prime ministre, il 70% des tassis e l’85% des misuris sociâls a laran dilunc a jessi gjestidis di Londre. Il vôt scozês e lis promessis fatis dal guvier britanic però a àn metût in moviment il panorame politic in dut il Ream Unît e intant che in Irlande dal Nord si spiete la devoluzion des competencis su la tassazion des impresis, in Gales si son za tignûts i prins confronts istituzionâi par incressi i podês de Assemblee e dal guvier galês.
Font: BBC, 27/11/14

Nessun commento: