La Union
Culturâl Economiche Slovene (SKGZ) de provincie di Udin e à fat bon un document
là che e domande ae aministrazion regjonâl di ativâsi par incressi la presince
de lenghe slovene inte scuele. Intant dal so congrès provinciâl, che si è
tignût a Cividât ai 13 di Avrîl, la organizazion de comunitât slovene e à
manifestât la sô poie aes domandis rivadis dai comuns di Bardo / Lusevare,
Tipana / Taipane, Naborjet Ovčja vas/ Malborghet Valbrune e Trbiž / Tarvis par
che al sedi inviât sul lôr teritori un percors scolastic bilengâl o trilengâl.
La SKGZ e lamente il fat che il guvier regjonâl, vuidât dal centri diestre, nol
à metût dentri intal plan de rêt scolastiche regjonâl lis scuelis bilengâls di
Lusevare e di Taipane che a restin cussì dome sul plan progjetuâl. Intal
document de Union Culturâl Economiche Slovene si domande po aes autoritâts
competentis di intervignî par risolvi in curt i problemis logjistics dal
istitût bilengâl di Špeter / S. Pieri dal Nadison, che dal 2010 si cjate in
sedis provisoris e no adatis pes sôs ativitâts. La SKGZ e domande po che il
sloven al jentri ancje intal curriculum scolastic dai istitûts superiôrs leâts
al convit di Cividât, di maniere che i fruts che a àn completât la istruzion
dal oblic inte scuele bilengâl no pierdin il sloven.
Font:
Novi Matajur, 18/04/12
Nessun commento:
Posta un commento