Il prin di Març une cuindisine di
militants curdis e à inviât un siopar de fam a Strasburc cuintri de repression
brutâl che la Turchie e met in at su la popolazion e su lis organizazions
politichis e culturâls dal Kurdistan. Lis organizazions curdis a ricuardin che,
dome intal 2011, il guvier di Ankara al à fat impresonâ 12 mil opositôrs
politics. Dopo passe cuarante zornadis di siopar de fam diviers dai militants
che a partecipin ae proteste si cjatin in condizions critichis e a son stâts
ricoverâts in ospedâl.
La azion di Strasburc e va a zontâsi ai siopars de fam a
stafete puartâts indenant in diviersis citâts europeanis e a chel tacât ancjemò
ai 15 di Fevrâr di uns 400 presonîrs politics sierâts intes galeris turchis. La
decision di puartâ il siopar de fam ancje a Strasburc e à chê di stiçâ lis
autoritâts europeanis a fâ sintî la lôr vôs su la cuistion curde, rapresentade
benon dal destin dal leader dal PKK, Abdullah Öçalan, che di tredis agns si
cjate impresonât intun centri di massime sigurece e che di passe vot mês nol
pues ricevi nancje lis visitis di avocats e familiârs. Chel istès il Comitât
european pe prevenzion de torture al à anulât l’incuintri cu la delegazion
curde programât pai 11 di Avrîl cu la motivazion che no puedin acetâ la
“pression” rapresentade dai siopars de fam. Une rispueste che e à mandât in
bestie i delegâts curdis che si domandin cemût mai che lis autoritâts
europeanis no àn invezit problemis a cjatâsi cun chês turchis cundut des
“pressions” di dute altre nature che a van dilunc a meti in at cuintri di ogni
spazi politic, culturâl e sociâl inviât in Kurdistan.
Font: UiKi, 12/04/12
Nessun commento:
Posta un commento