Disinis di miârs di personis a àn
partecipât sabide ai 14 di Avrîl, sot de ploie, ae manifestazion clamade dongje
a Bilbo / Bilbao par rivendicâ i dirits dai centenârs di presonîrs politics
bascs. La iniziative e je stade inmaneade par protestâ cuintri de ultime
risoluzion dal tribunâl costituzionâl spagnûl che, intai fats, e va dilunc a
poiâ la politiche penitenziarie di ecezion metude in vore cuintri dai presonîrs
bascs che ur impedìs di gjoldi di chês misuris che a valin par ducj chei altris
presonîrs: dal podê scontâ la condane te preson plui dongje dal paîs di
divignince ai sconts di pene, fintremai a misuris di presonie plui lizeris par
cui che al patìs di malatiis une vore seriis.
Se ae manifestazion la presince
plui marcade e jere chê dai militants de çampe indipendentiste basche, di Eusko
Alkartasuna, di Aralar e di Alternatiba, la cuistion dai presonîrs e je cetant
sintude intal Paîs Basc, une vore plui innà di cheste aree politiche. Par
esempli, daûr di un scandai fat dal guvier de Comunitât Autonome Basche al ven fûr
che plui dal 70% dai citadins al è dacuardi cul svicinament dai presonîrs e cun
misuris che ur permetin di tornâ a inserîsi inte societât. Cun di plui, dopo de
decision di ETA di meti fin ae lote armade, di cetantis bandis si à domandât al
guvier spagnûl di cambiâ la politiche penitenziarie par facilitâ il procès di
pâs e plui di cualchidun al propon la strade de amnistie come che si à fat in
altris procès di pâs come chel nordirlandês. Dut câs, pai popolârs (PP) cumò al
guvier intal stât spagnûl, no dome e je fûr di discussion ogni ipotesi di
amnistie, ma fintremai cualsisei misure coletive indreçade a ducj i presonîrs
bascs. Pai socialiscj (PSOE – PSE) invezit si pues ancje pensâ a di une
politiche penitenziarie plui flessibile, ma simpri cun soluzions cjapadis câs
par câs e no cun proviodiments coletîfs.
Font: Gara, 14 e 15/04/12;
El Pais, 15/04/12
Nessun commento:
Posta un commento