Europe: propuestis par infuartî la normative pes lenghis

Intant di un apontament alì dal Consei de Europe a Strasburc, ELEN – la Rêt Europeane pe Avualiance Linguistiche – e à fat indenant diviersis propuestis par infuartî la normative comunitarie su lis lenghis minorizadis che si poie su la Cjarte europeane des lenghis regjonâls o minoritariis e su la Convenzion cuadri pe protezion des minorancis nazionâls. A front di stâts che a vincj agns e passe de aprovazion di chescj documents no ju àn ancjemò ratificâts e di altris che si mostrin clips intal metiju in vore, ELEN e propon che la Comission Europeane e intervegni cuntune diretive di pueste su cheste materie e che pai responsabii des violazions dai dirits si intervegni cu lis proceduris di infrazion za in vore par tancj altris setôrs. La Rêt pe Avualiance Linguistiche e domande ancje che tai procès di control su la metude in vore de Cjarte e de Convenzion si ricognossi un valôr uficiâl aes osservazions fatis indenant des organizazion no governativis impegnadis pai dirits linguistics.

Font: ELEN, 25/06/18

Paîs Basc: euskara e ocitan lenghis di Euskal Elkargoa

Ai 23 di Jugn Euskal Elkargoa – la prime istituzion che e met adun dute Ipar Euskal Herria, o sei il Paîs Basc setentrionâl sot aministrazion francese – e à fat bon il so prin document di politiche linguistiche. Cun 145 vôts a pro, 18 cuintri e 22 astignûts, l’organisim formât dai conseîrs di ducj i comuns bascs a Nord dai Pireneus, al à ricognossût il basc e l’ocitan (te sô varietât vascone) tant che lenghis teritoriâls di Ipar Euskal Herria cun chê di promovi il lôr ûs inte societât e in particolâr intes istituzions locâls. Dongje di sburtâ il plurilinguisim intal sisteme educatîf, l’intindiment al è chel di doprâ lis lenghis teritoriâls sei intal funzionament interni, sei intai servizis gjestîts in maniere direte de istituzion provinciâl. Dal moment che la normative statâl francese no previôt misuris di tutele specifichis dulà poiâsi, la gnove politiche linguistiche e dipendarà de buine volontât dai ents membris di Euskal Elkargoa.

Font: EiTB, 23/06/18

Corsiche: sîs condanis pes “gnots blu” dal 2012

Ai 22 di Jugn la cort di assise di Parîs e à condanât sîs nazionaliscj cors e a ‘nd à assolts altris doi par une serie di atentâts fats intal 2012 cuintri di residencis secondariis logadis in diviersis localitâts de isule. Lis azions a jerin stadis rivendicadis dal FLNC (Front di Liberazion Nazionâl Cors) inte suaze de sô campagne cuintri de speculazion edilizie. I vot nazionaliscj sot procès a vevin dineât di partignî al Front cundut che si vevin refudâts di condanâ lis sôs azions. Ancje intant di chestis “gnots blu” – cemût che a son cognossudis lis gnots segnadis dai atentâts dal Front – no si vevin vûts ferîts, ma dome dams ai edificis. Dal 2012 incà, dut câs, la situazion su la isule e je cambiade in maniere radicâl: il FLNC al à rinunciât ae lote armade e i nazionaliscj a àn otignût impuartants sucès eletorâi che i àn permetût di rivâ al guvier des istituzions corsis. Tancj cors a cjalavin duncje cun atenzion al procès – l’ultin leât ae ativitât armade dal Front – par viodi se la magjistrature francese e varès tignût cont di chest percors di pacificazion. Magari cussì no, cu la sô sentence, la cort speciâl di Parîs e à stiçât une vore di marum ator pe isule. Dai sîs condanâts, doi a àn vût sîs agns di preson e un altri cinc; chei altris trê a son stâts liberâts dal moment che a vevin za scontât la lôr condane cu la preson preventive. Diviers di lôr, di fat, a vevin za fat trê agns in regjim di carcerazion provisorie.

Font: Le Monde, 23/06/18

Asturiis: lenghe proprie disponibile tal 81% des scuelis

Pal responsabil de educazion dal guvier des Asturiis, Genaro Alonso, cul an scolastic 2017-2018 si àn fats pas indenant impuartants intes politichis linguistichis. Cun di fat, la pussibilitât di gjoldi dal insegnament de lenghe asturiane si è slargjade al 81% dai centris scolastics publics de comunitât autonome. L’intindiment, dut câs, nol è dome chel di slargjâ la ufierte ma ancje di rivâ al ricognossiment di une classe di concors par insegnants di lenghe e leterature asturiane e di une specializazion di pueste inte formazion universitarie. Su chest front, lâts strucs i tentatîfs cul esecutîf spagnûl cuant che al guvier al jere il popolâr Mariano Rajoy, si trate cumò cu la gnove aministrazion vuidade dal socialist Pedro Sánchez che si à mostrade plui atente sul teme dal insegnament plurilengâl.

Font: LNE, 20/06/18

Paîs Basc: in 80 mil a Iruñea pai fantats di Altsasu

Chê che si è tignude ai 16 di Jugn par solidarizâ cui zovins di Altsasu, condanâts a penis fin a 13 agns di preson par une barufe cun doi agjents de Guardia Civil in libare jessude, e je stade la manifestazion plui partecipade che si è tignude a Iruñea / Pamplona. Cun di fat si stime che pes stradis de capitâl de Navare a vedin sfilât sù par jù 80 mil personis rivadis di dut il Paîs Basc, ma ancje de Catalogne e fintremai dal rest dal stât spagnûl là che a son avonde chei che a calcolin che la condane e sedi di stamp politic e dal dut spropositade.

Scozie: scuintri viert tal Parlament di Londre su la devoluzion

Il disen di leç su la jessude dal Ream Unît de Union Europeane al è rivât al esam dal Parlament britanic. Il test al previôt ancje che al sedi il guvier di Londre a cjapâ in man la gjestion di diviersis materiis – tra chestis agriculture, pescje e ambient – che a son tra lis competencis assegnadis ae Scozie cu la devoluzion ma che fin cumò la lôr suaze legjislative e jere controlade de Union Europeane. Il Parlament scozês al veve votât a grande maiorance cuintri di cheste clausule e il SNP – il Partît Nazionâl Scozês – al domandave che il teme al fos almancul al centri di une discussion vierte intal Parlament di Londre. Invezit, cundut che su altris temis la discussion e je lade indenant par oris, il dibatiment su cheste cuistion al è stât limitât a cuindis minûts.

Paîs Catalans: prin esam preuniversitari par ocitan

Ai 14 di Jugn une fantate aranese di 17 agns, Lourdes Bruna, e je stade la prime a sostignî i esams par jentrâ intune universitât in lenghe ocitane. Sul imprin, al someave che lis autoritâts academichis de universitât di Lleida a fossin contrariis ma po, ancje in gracie dal intervent de aministrazion de Val di Aran, a àn acetât di permeti ae zovine di davuelzi lis provis di matematiche e di fisiche par ocitan. Cul 2006 si à ricognossût al ocitan, inte sô varietât aranese, un status di uficialitât in dut il principât de Catalogne ma, chel istès, al sucêt da râr che il dirit di doprâ cheste lenghe al vegni esercitât fûr de Val di Aran.

Font: VilaWeb, 12/06/18; Jornalet, 13/06/18

Sardegne: rinviât in comission il progjet di leç su lis lenghis

Dopo di une discussion avonde vivarose, il consei regjonâl de Sardegne al à decidût di rinviâ al esam de comission culture il test unificât su la politiche linguistiche che al viôt tant che prin firmatari il conseîr Paolo Zedda. I contignûts dal test a vevin jevât avonde dubis sei framieç dai rapresentants de maiorance che tra chei des oposizions e, no par nuie, a jerin stâts presentâts uns tresinte emendaments. A contestâ la propueste di riforme de normative su lis lenghis de Sardegne al jere stât ancje il coordenament Pro Su Sardu Ufitziale che al segnalave dute une rieste di problematichis, a tacâ de maniere contraditorie che si frontave il procès di standardizazion de lenghe sarde che tal 2006 al veve puartât ae nassite de Limba Sarda Comuna.

Font: La Provincia del Sulcis Iglesiente, 13/06/18

Paîs Catalans: un ufici pai dirits linguistics ancje tes Baleârs

Il guvier des Baleârs al è daûr a imbastî il progjet di leç par meti sù un ufici pe difese dai dirits linguistics sul model di chei za in vore in Catalogne, tal Paîs Valenzian e te Comunitât Autonome Basche. Il stampon dal proviodiment al è za passât par une consultazion publiche che si à tignude dai 10 ai 30 di Mai. L’intindiment al è chel di meti a disposizion dai citadins un organisim in stât di ufrîur dutis lis informazions sui dirits linguistics e di svilupâ imprescj o intervents par eliminâ lis azions contrariis al rispiet di chescj dirits.

Font: La Vanguardia, 12/06/18

Aragon: indenant cui programs scolastics par aragonês e catalan

Il guvier dal Aragon al à confermât ancje pal prossim an scolastic lis risorsis e lis strategjiis par promovi lis lenghis propriis intal sisteme scolastic de comunitât. A son cussì stâts vierts i bants par acedi ai programs “Luzía Dueso” e “Jesús Moncada” che a permetin aes scuelis che indi fasin domande di ufrî ai lôr students ativitâts curicolârs di animazion par aragonês e par catalan. Si manten ancje il program “El aragonés en el aula”, inviât pe prime volte tal an 2017-2018, che si propon di incressi la cognossince dal aragonês, di sostignî i professôrs che a davuelzin ativitâts scolastichis ta cheste lenghe e di meti a disposizion materiâi didatics di pueste.

Font: 20 minutos, 10/06/18

Paîs Basc: cjadene umane di 202 km pal dirit di decidi

Ai 10 di Jugn passe 175 mil personis a àn dât vite a di une cjadene umane che e à scjavaçât il Paîs Basc par rivendicâ il dirit ae autodeterminazion. La iniziative, inmaneade de organizazion Gure Esku Dago (tes nestris mans), si à disvuluçade dilunc di 201,9 chilometris di Donostia a Gasteiz / Vitoria passant par Bilbo / Bilbao. Inte suaze de manifestazion si àn vûts dai spazis di pueste par manifestâ la poie al procès di indipendence de Catalogne e ancje par domandâ la liberazion dai presonîrs politics catalans e dai zovins di Altsasu. Ispiradis propit al procès di autodeterminazion catalan, lis iniziativis di Gure Esku Dago a previodin ancje des consultazions organizadis a nivel comunâl par domandâ ai citadins se a vuelin la indipendence dal Paîs Basc. Ai 18 di Novembar, Donostia e sarà la prime tra lis capitâls regjonâls baschis là che si tignarà une di chestis votazions: la consultazion e je poiade dal PNV, di EH Bildu, di Elkarrekin Podemos e dai sindacâts ELA e LAB, o sei de maiorance des fuarcis politichis e sindacâls baschis.

Font: Naiz:, 10/06/18; EiTB, 10/06/18

Paîs Catalans: in calâ l’ûs sociâl dal catalan

Intant de conference stampe par presentâ il rapuart 2018 sul stât de lenghe catalane, la organizazion Plataforma per la Llengua e à segnalât che tal zîr di dîs agns in Catalogne lis personis che a doprin in maniere cuotidiane e prioritarie il catalan a son passadis di 2.584.900 a 2.269.600 cuntun câl di passe 300 mil personis intant che chês che a doprin par solit il castilian a son cressudis di 2.650.300 a 3.172.600. L’ûs sociâl dal catalan al dipent in primis dai citadins e des politichis che lis aministrazions a metin in vore par promovilu e duncje, a àn ricuardât i rapresentants de Plataforma per la Llengua, imparâ il catalan nol è avonde se po no si lu dopre par fevelâ cun ducj chei altris. I setôrs là che la lenghe e va dilunc a jessi plui in dificoltât a son la justizie, il cine e lis rapresentancis locâls dal stât centrâl. Cualchi segnâl positîf al rive dai zovins là che, tai ultins cinc agns, l’ûs abituâl de lenghe al è cressût dal 31,5% al 36,4% e dai catalans di seconde gjenerazion, cul 56% dai fîs di imigrâts che a fevelin par catalan cui lôr fîs cundut che di fruts in cjase a fevelavin intune altre lenghe.

Font: La Vanguardia, 08/06/18

Paîs Catalans: consei sociâl des lenghisla tal Paîs Valenzian

Il guvier de Comunitât Autonome Valenziane al à fat bon il decret che al invie e al regole il Consei sociâl des lenghis. Lis sôs funzions principâls a son di partecipâ al procès di normalizazion linguistiche, di valutâ i risultâts de politiche linguistiche, di studiâ i aspiets leâts ae planificazion e ae normalizazion linguistiche, di proponi e di coordenâ lis azions ta chescj cjamps che a interessin aministrazions, istituzions e ents publics. Ae sô presidence si à il president dal guvier valenzian, la vicepresidence invezit e je assegnade al assessôr che al viôt des politichis linguistichis e la segretarie al titolâr de direzion che i sta daûr a chestis tematichis. Il Consei al à ancje une comission permanente formade dal vicepresident dal organisim e di altris sedis membris.

Font: Diario de Castelló, 08/06/18

Ocitanie: bilinguisim visîf intal centri di Agen

Il bilinguisim visîf al fâs un altri pas indenant a Agen, citât storiche de regjon ocitane de Guiane. Ai 6 di Jugn, di fat, a son stadis screadis 91 tabelis cul non par francês e par ocitan di une part des viis dal centri storic. La segnaletiche gnove si zonte aes 70 tabelis bilengâls metudis fûr tal 2015. Pe aministrazion locâl però al sarà plui dificil rivâ a puartâ il bilinguisim ancje tai cuartîrs gnûfs de citât là che no simpri si à une toponomastiche storiche par ocitan.

Font: Jornalet, 08/06/18

Gales: il guvier al frene su lis politichis linguistichis

Cundut dai impegns che si veve cjapât, il guvier galês nol ponte a incressi lis politichis a pro de lenghe proprie. Il pont centrâl al reste chel dai gnûfs nivei di riferiment pe lenghe galese (standards), ven a dî i dirits linguistics minims che aministrazions locâls, ents publics e societâts che a davuelzin ativitâts di interès public a àn di garantî ai citadins. Il sisteme, jentrât in vore tal 2016, in dì di vuê al interesse passe 120 sogjets publics. La ministre pe lenghe galese Eluned Morgan però e à fatis sôs lis critichis rivadis dai sogjets clamâts a meti in vore i standards e e à dite che il sisteme al è ingredeât e al coste masse e che duncje, almancul par cumò, no je intenzion di slargjâju a chês gruessis societâts privadis che a controlin servizis di utilitât publiche tant che aghe, energjie o traspuarts.

Paîs Basc: in Navare in place i opositôrs de lenghe basche

Sù par jù 9 mil personis a àn partecipât ai 2 di Jugn ae manifestazion che si à tignude a Iruñea / Pamplona par fâi cuintri aes politichis linguistichis dal guvier de Navare. La iniziative, promovude dal grup Doble 12, al à vude la plene adesion e la partecipazion di dirigjents e militants dal PP, di Ciudadanos e de UPN, o sei de diestre spagnoliste e regjonaliste. Di profîl plui bas invezit la presince dal partît socialist. La coalizion progressiste nazionalitarie che e je al guvier in Navare e je cumò daûr a svilupâ une leç pe lenghe basche che e ledi a superâ la zonizazion che e garantive i dirits linguistics dome intune aree limitade de comunitât e, tai ultins agns, e à za inviât cualchi misure par lâ ta cheste direzion. I organizadôrs de manifestazion a contindin invezit che in Navare si à di mantignî la prioritât de lenghe castiliane su chê basche.

Font: Naiz:, 02/06/18

Paîs Basc: sentence che e sa di svindic cuintri dai vot di Altsasu

Une pene esemplâr par incjantonâ e cidinâ ogni forme di dissidence tal Paîs Basc. Cheste la interpretazion dade di diviers comentadôrs ae sentence dade fûr il prin di Jugn de prime sezion penâl de Audiencia Nacional, o sei il tribunâl speciâl spagnûl che si à ocupât de risse capitade ai 15 di Otubar dal 2016 tra un grup di fantats bascs e un pâr di agjents de Guardia Civil in libare jessude tun locâl di Altsasu, localitât de Navare a maiorance abertzale (nazionalitarie basche). La procure e veve stramudât une risse di bar intune azion teroristiche cun motivazions juridichis che il stes inventôr dal teoreme dal “todo es ETA” (dut al è part di ETA e duncje terorist), il judiç Baltasar Garzón, al veve calcolât cence nissune fonde.

Paîs Catalans: cu la gnove Generalitat al rive insom il 155

Ai 2 di Jugn si à vût l’insedament uficiâl dal gnûf guvier catalan vuidât Quim Torra. Cu la jentrade in vore dal esecutîf e ven a colâ la gjestion direte esercitade tai ultins siet mês dal guvier spagnûl par mieç dal articul 155 de Costituzion che al à dispueât la Catalogne di ogni forme di autoguvier. Lis autoritâts di Madrid a àn cirût di pidimentâ fin sul ultin la nassite dal guvier catalan. Cun di fat, dome il prin di Jugn il boletin uficiâl de Generalitat al à publicât il decret cu la nomine dai membris dal esecutîf, dopo che la publicazion dal prin decret firmât di Torra ancjemò ai 19 di Mai e jere stade blocade par vie che te liste dai membris dal guvier si vevin ancje cuatri conseîrs che si cjatin in preson preventive o in esili (Josep Rull, Jordi Turull, Lluís Puig e Toni Comín). Torra, in acuardi cui partîts indipendentiscj che lu sostegnin, al à duncje vût di sostituîju par vê il vie libare di Madrid e par meti fin al 155.

Ocitanie: iniziativis a pro dal ocitan a scuele e par television

La organizazion Collectiu Occitan, che e ten adun lis realtâts politichis e associativis plui rapresentativis de Ocitanie, e à inmaneât pai 6 di Jugn une gnove mobilitazion par domandâ une television plui ocitane. Ancje in considerazion de riforme dal setôr audiovisîf che e varès di rivâ al esam dal Parlament francês chest Astât, si domande une presince cuotidiane de lenghe proprie te programazion de television publiche che cumò e ufrìs a pene 17 oris di emissions par ocitan intun an. A son in program presidis in contemporanie denant dai uficis di France 3 a Tolosa / Toulouse, Montpelhièr / Montpellier, Rodés / Rodez, Carcassona / Carcassonne e Nîmes.

Irlande: discriminatoris i tais al program Líofa

La investigazion puartade indenant de comission pe avualiance in Irlande dal Nord e je rivade ae conclusion che il dipartiment pes comunitâts al à mancjât ai siei oblics cuant che, juste sul finî dal 2016, al à taiât i fonts al program Líofa, o sei lis borsis di studi che a permetevin a di un centenâr di students in cundizions economichis disvantazadis di frecuentâ i cors di irlandês intal Dún na nGall / Donegal. Il tai, decidût dal ministri Paul Givan (DUP), al jentrave intune schirie di azions puartadis indenant dai politics unioniscj cuintri des ativitâts pe tutele e pe promozion de lenghe gaeliche irlandese.

Font: CnaG, 01/06/18