Une
pene esemplâr par incjantonâ e cidinâ ogni forme di dissidence tal
Paîs Basc. Cheste la interpretazion dade di diviers comentadôrs ae
sentence dade fûr il prin di Jugn de prime sezion penâl de
Audiencia Nacional,
o sei il tribunâl speciâl spagnûl che si à ocupât de risse
capitade ai 15 di Otubar dal 2016 tra un grup di fantats bascs e un
pâr di agjents de Guardia Civil
in libare jessude tun locâl di Altsasu, localitât de Navare a
maiorance abertzale (nazionalitarie
basche). La procure e veve stramudât une risse di bar intune azion
teroristiche cun motivazions juridichis che il stes inventôr dal
teoreme dal “todo es ETA”
(dut al è part di ETA e duncje terorist), il judiç Baltasar Garzón,
al veve calcolât cence nissune fonde.
In efiets, ancje i
magjistrâts de Audiencia Nacional
a àn fat colâ dutis lis imputazions leadis al terorisim, ma a àn
assegnât ai vot zovins di Altsasu il massim de pene par chês altris
acusis, ven a dî agression a public uficiâl, lesions, disordins
publics e menacis ingravadis dal odi cuintri des fuarcis di polizie.
Ta cheste maniere doi dai acusâts a àn vût une condane a 13 agns
di preson (Oihan Arnanz e Iñaki Abad), altris doi a 12 agns (Jokin
Unamuno e Adur Ramírez de Alda), trê a 9 agns (Jon Ander Cob, Julen
Goikoetxea e Aratz Urrizola) e une a 2 agns (Ainara Urkijo). Za la
zornade stesse de sentence la comunitât di Altsasu si à strente
ator dai zovins e des lôr fameis intune manifestazion di
solidarietât che si à tignude in paîs intant che une manifestazion
popolâr e je stade clamade dongje ai 16 di Jugn a Iruñea /
Pamplona. EH Bildu,
PNV e Elkarrekin Podemos
a àn fevelât di sentence politiche e injuste. Solidarietât ai
fantats condanâts e je rivade ancje di partîts, organizazions e
rapresentants politics dal indipendentisim catalan.
Font:
Naiz:,
01-02/06/18;
El País, 01-02/06/18
Nessun commento:
Posta un commento