19/06/18

Paîs Basc: in 80 mil a Iruñea pai fantats di Altsasu

Chê che si è tignude ai 16 di Jugn par solidarizâ cui zovins di Altsasu, condanâts a penis fin a 13 agns di preson par une barufe cun doi agjents de Guardia Civil in libare jessude, e je stade la manifestazion plui partecipade che si è tignude a Iruñea / Pamplona. Cun di fat si stime che pes stradis de capitâl de Navare a vedin sfilât sù par jù 80 mil personis rivadis di dut il Paîs Basc, ma ancje de Catalogne e fintremai dal rest dal stât spagnûl là che a son avonde chei che a calcolin che la condane e sedi di stamp politic e dal dut spropositade.
Cundut che no vevin fate buine la tesi de acuse, ven a dî chê di une azion di stamp teroristic, i judiçs de Audiencia Nacional a vevin dât ai vot zovins di Altsasu il massim de pene par chês altris acusis (agression a public uficiâl, lesions, disordins publics e menacis ingravadis dal odi cuintri des fuarcis di polizie) e a àn assegnât a doi di lôr une condane a 13 agns di preson, a 12 agns par altris doi, a 9 agns par trê e a 2 agns ae uniche fantate sot acuse. «Libertât par chei di Altsasu» e «Cheste no je justizie» a son stâts tra i slogans plui doprâts intant de manifestazion. La iniziative e je stade inmaneade dal coordenament Altsasukoak Aske.
Font: Naiz:, 16-17/06/18; EiTB, 16/06/18

Nessun commento: