Il
disen di leç su la jessude dal Ream Unît de Union Europeane al è
rivât al esam dal Parlament britanic. Il test al previôt ancje che
al sedi il guvier di Londre a cjapâ in man la gjestion di diviersis
materiis – tra chestis agriculture, pescje e ambient – che a son
tra lis competencis assegnadis ae Scozie cu la devoluzion ma che fin
cumò la lôr suaze legjislative e jere controlade de Union
Europeane. Il Parlament scozês al veve votât a grande maiorance
cuintri di cheste clausule e il SNP – il Partît Nazionâl Scozês
– al domandave che il teme al fos almancul al centri di une
discussion vierte intal Parlament di Londre. Invezit, cundut che su
altris temis la discussion e je lade indenant par oris, il dibatiment
su cheste cuistion al è stât limitât a cuindis minûts.
A front
des protestis dal cjâf grup dal SNP, Ian Blackford, il president de
Assemblee al à decidût di parâlu fûr de aule. Denant dal dinei
totâl di confront de bande des istituzions britanichis, il SNP –
che cui siei 35 parlamentârs al rapresente il tierç partît plui
grant intal Parlament di Londre – al à fat savê che al inviarà
une “vuerilie parlamentâr”: viodût il lôr numar, di fat, i
deputâts scozês a àn la pussibilitât di pidimentâ a fuart i
lavôrs parlamentârs cun azions di ostruzionisim sei intant dai
dibatiments, sei intant des ativitâts di vôt. O sin denant di une
crevadure tai rapuarts istituzionâi – al à dite Blackford –
parcè che il guvier britanic si è mot cuintri dai interès de
Scozie e al à di capî che a saran consecuencis di paiâ.
Font:
The Guardian,
14/06/18
Nessun commento:
Posta un commento