Comunitâts
di lenghe ongjarese a vivin in diviers stâts de Europe centrâl. Lis
plui gruessis a son chês che si cjatin in Romanie e in Slovachie,
ancje se intai ultins dîs agns la lôr consistence si è sbassade in
maniere avonde significative. In Romanie si è passâts di passe un
milion e mieç di personis a un milion e 200 mil, intant che in
Slovachie di mieç milion si è passâts a 458 mil. Il guvier
ongjarês al à mostrât une cirte preocupazion pe situazion e al à
fat savê che al vûl intervignî par invertî cheste tindince. Par
chest il prin ministri magjâr, Viktor Orban, si è cjatât intes
primis setemanis di Lui cui delegâts dai partîts che in Romanie a
rapresentin la comunitât ongjarese, ven a dî la UDMR (Union
Democratiche Magjare in Romanie) – che intes ultimis elezions
aministrativis e à cjapât cuasi 470 mil vôts, o sei il 5,45% su
scjale statâl – il Partît Popolâr dai Ongjarês de Transilvanie
(EMNP) e il Partît Civic Ongjarês (MPP). Intes ultimis
aministrativis, cundut de poie massive dal guvier di Budapest, chescj
doi grups di diestre no vevin rivât a passâ l’un par cent des
preferencis.
Orban al à duncje cirût di svilupâ un rapuart positîf
massime cu la Union Democratiche, ma cundut che l’incuintri al è
stât presentât tant che costrutîf, i rapresentants di chest
moviment a àn dite che prime i vûl fat sù un rapuart di fiducie
tra lis parts che fin cumò nol jere. Dongje di un nivel plui bas di
nassitis e des politichis di assimilazion, une des resons de
diminuzion des comunitâts di minorance magjare e je la emigrazion
che, in buine part, e va a finî propit in Ongjarie. Une presince che
però, massime intun moment economic dificil come chel di cumò, no
viôt masse contents i citadins ongjarês. Un tant si lu capìs ancje
de percezion numeriche che la int e à dai cussì clamâts "ongjarês
etnics". Daûr di un scandai a pene publicât al ven fûr che i
ongjarês a pensin che aromai a sedin tra il 10 e il 12% de
popolazion totâl: une cifre une vore lontane de realtât. La stesse
percezion alterade e puarte a stimâ i rom, che pûr a son la plui
grande minorance dal paîs, jenfri il 24 e il 21%, i ebreus tra il 9
e il 10% e i imigrâts tor dal 10%. In realtât, ancje cul meti adun
ducj chescj grups, no si rive nancje al 15% dal totâl.
Font:
Politics.hu, 11-13/07/12
Nessun commento:
Posta un commento