O sin
aromai al scuintri viert su la gnove leç pal Gaeltacht, o sei lis
areis de Irlande là che la lenghe irlandese e à inmò une presince
significative, e a poiâle a son restâts dome i rapresentants dal
Fine Gael, il partît di guvier. Cuntune azion mai viodude in ocasion
dal dibatiment di un proviodiment su la lenghe, dutis lis fuarcis di
oposizion (Fianna Fáil, Sinn Féin, socialiscj e indipendents) a àn
bandonât la Comission parlamentâr che e veve di dibati su la leç e
il stes a àn fat i rapresentants des organizazions gaelichis che a
jerin alì tant che osservatôrs.
Il test presentât dal guvier, che
pe prime volte dal 1956 incà al cambie la leç sul Gaeltacht, al ven
contestât par tancj aspiets, a tacâ de modifiche de Údarás na
Gaeltachta, la agjenzie di svilup dai teritoris gaelics, che di
organisim elet dai citadins al deventarès un orghin nomenât dal
guvier centrâl e dai ents locâi. Il ministri pes areis gaelichis,
Dinny McGinley, al va dilunc a dî che il test di leç al garantìs
politichis pal gaelic plui fuartis e plui dongje de int e al
permetarà di blocâ il procès di pierdite progressive de lenghe.
Lis organizazions impegnadis pal gaelic (Conradh na Gaeilge, Guth na
Gaeltachta e altris) a lamentin però di no jessi nancje stadis
sintudis sul argoment, intant che lis fuarcis di oposizion a motivin
la lôr proteste cul fat che il guvier no dome nol à fat bon nancje
un dai 150 emendaments presentâts, ma che la maiorance e à imponût
un limit di trê oris pe discussion de leç che no permeteve di
frontâ in maniere serie un cambiament cussì radicâl des politichis
pal gaelic.
Font:
Gaelport, 20/07/12; The Irish Times, 20/07/12
Nessun commento:
Posta un commento