27/07/12

Kurdistan: e cres la repression turche

E je finide cun scuintris une vore violents la manifestazion “Resistence democratiche pe libertât” che si è tignude ai 14 di Lui pe stradis di Amed / Diyarbakır, la plui impuartante citât curde de Turchie. A distance di trente agns juscj de muart di sîs militants dal PKK che a vevin inviât un siopar de fam par denunciâ lis violencis e lis torturis patidis dai militants curdis intes presons turchis, la manifestazion si proponeve di sburtâ il guvier di Ankara a meti fin al isolament patît dal leader dal PKK, Abdullah Öçalan, e a acetâlu tant che puartevôs dai curdis par inviâ un procès di pâs. Ancjemò une volte però la rispueste des autoritâts turchis e je stade brutâl. Lis fuarcis di polizie a son intervignudis in maniere massive cun blindâts, gas lacrimogjens e canons par aghe e a àn atacât i miârs di manifestants che a jerin lâts in place. Dopo oris dai scuintris a son stâts segnalâts une novantine di arestâts e disinis di ferîts, tra di lôr ancje diviers fruts, trê deputadis dal partît BDP e il stes sindic de citât.
Magari cussì no, si trate dome di un dai ultins episodis di violence e violazion dai dirits umans che si àn inta chê part dal Kurdistan che e je cjapade dentri de Turchie. Daûr dai dâts dal osservatori pai dirits umans di Amed / Diyarbakır intai prins sîs mês dal an te aree curde a son stadis plui di 15 mil lis violazions dai dirits umans, un dât in aument rispiet al an prime. Dome tra Zenâr e Avrîl in scuintris a fûc a son muarts 122 milizians dal PKK, 56 membris des fuarcis di sigurece turchis e 16 civîi, lis personis impresonadis par motivazions politichis a son stadis plui di un miâr e chês metudis sot custodie 2.675, intant che i episodis di torture o trataments disumans denunciâts a son cuasi 400. Cun di plui, simpri ta cheste dade, a son stâts sierâts 9 tra partîts politics, sindacâts, istituzions o associazions de comunitât curde e plui di 600 publicazions a son stadis ritiradis o metudis al bant.
Font: UiKi, 09-16/07/12; ANF News Agency, 13-15/07/12

Nessun commento: