Grande partecipazion pe zornade di
mobilitazion che si è davuelte sabide ai 31 di Març par sburtâ il guvier e il
parlament francês par fâ buine une leç che e garantissi i dirits linguistics
des comunitâts minorizadis che a vivin ta chest stât. La manifestazion plui
partecipade e je stade chê di Tolosa / Toulouse là che si à calcolât la
presince di passe 30 mil di lôr e di un bon numar di aministradôrs locâi rivâts
di dute la Ocitanie e ancje de Catalogne setentrionâl. Propit ta chest ultin
teritori, inte citât di Perpinyà / Perpignan, si è tignude invezit la
iniziative plui origjinâl de zornade, ven a dî un “lipdub” (un video musicâl
popolâr) pe lenghe catalane che al è lât indenant par dôs oris cu la
partecipazion di passe 7 mil personis, tra di lôr aministradôrs locâi,
professôrs, scritôrs, artiscj e grups sportîfs e associatîfs de Catalogne dal
Nord. La iniziative e je lade plui innà di ogni prevision e e à ancje segnât il
record dal mont par numar di partecipants a di un “lipdub”.
Altris
manifestazions si son davueltis po ancje in altris comunitâts minorizadis dal
stât francês simpri daûr dal sproc “Lis nestris lenghis, un dirit, une leç”. In
Bretagne, a Kemper / Quimper, lis personis che a àn partecipât ae manifestazion
pai dirits linguistics a son stadis plui di 10 mil. Passe 7 mil bascs, invezit,
si son dâts dongje a Baiona / Bayonne cu la partecipazion di associazions
impegnadis inte promozion dal euskara e ancje di rapresentants politics di aree
nazionalitarie e socialiste. I militants cors si son cjatâts a Aiacciu /
Ajaccio, alsazians e lorenês di lenghe todescje a Strasburc e a Metz, i
flamants a Ryssel / Lille, e i francoprovençâi a Èneci / Annecy. La iniziative
e je vignude a colâ juste intal vîf de campagne eletorâl pes elezions
presidenziâls. Sul front dai dirits linguistics però, l’unic candidât di un
ciert pês ae presidence francese a vê cjapât une posizion clare e fuarte a pro
des comunitâts minorizadis al è stât François Bayrou dal MoDem (Mouvement
Démocrate).
Font: VilaWeb, 01/04/12;
Diario Vasco, 01/04/12; Avui, 02/04/12; Agence Bretagne Presse, 31/03/12
Nessun commento:
Posta un commento