La dì di Pasche di 80 agns indaûr, si
jere ai 27 di Març dal 1932, passe 65 mil bascs si jerin dâts dongje par
celebrâ pe prime volte l’Aberri Eguna, o sei la Zornade de Patrie Basche.
Cheste fieste di rivendicazion metude in pîts dal nazionalisim basc e je lade
dilunc a davuelzisi, par cetancj agns in clandestinitât, e chest an si è
ricjatade a ricuardâ inovâi impuartants. Di fat, dongje dai siei 80 agns di
storie, l’Aberri Eguna dal 2012 al è colât tai 500 agns de concuiste de Navare,
ultin toc dal Paîs Basc a pierdi la sô indipendence, e tai 75 dai bombardaments
nazifassiscj su lis citâts baschis di Gernika e Durango. Cun di plui, la
celebrazion di chest an e je la prime dopo de decision di ETA di meti fin ae
lote armade e propit chest acjadiment al è chel che plui di ducj al à segnât
chest Aberri Eguna.
Lis manifestazions principâls si son davueltis, cu la
partecipazion di miârs e miârs di personis, in dôs citâts: il PNV al à clamât
dongje i siei a Bilbo / Bilbao, intant che lis diviersis animis dal
nazionalisim di çampe a àn rispuindût al apel de rêt Independentistak par dâsi
adun a Iruñea / Pamplona. Cheste ultime manifestazion, la plui partecipade, e à
viodût intune la çampe indipendentiste basche, Eusko Alkartasuna, Aralar,
Abertzalen Batasuna, Alternatiba, altris grups plui piçui dal nazionalitarisim
basc e fintremai delegazions rivadis di altris nazions cence stât de Europe e
no dome. Par ducj l’obietîf di otignî al è clâr, ven a dî la creazion di une
republiche basche indipendente. Plui sfumade la posizion dal PNV che al à però
domandât pas concrets de bande dal guvier spagnûl in teme di rispiet dai dirits
nazionâi dal Paîs Basc, dai dirits dai presonîrs politics e di plene
partecipazion par dutis lis fuarcis politichis baschis.
Font: Gara, 06-09/04/12;
Deia, 06-08/04/12
Nessun commento:
Posta un commento