10/04/12

Asturiis: tes elezions e vinç la çampe, ma cence numars par guviernâ

Lis elezions anticipadis intes Asturiis a àn viodût il sucès dai partîts di çampe, ma cun numars no suficients par guviernâ. Il partît socialist (PSOE) al è stât il plui votât cul 32% des preferencis che i àn garantît 17 puescj inte assemblee regjonâl, doi in plui rispiet aes elezions precedentis, intant che Izquierda Unida (IU) e à sfiliât il 14% dai vôts e elet 5 dai siei, un in plui de volte prime. Plui che premiâ la çampe però, cun chest vôt i eletôrs a àn volût punî i partîts di diestre che intal 2011 a vevin otignût la maiorance ma no jerin stâts bogns di meti sù un guvier stabil obleant duncje i citadins a tornâ a votâ. Il Foro Asturiano Ciudadano (FAC) al à cjapât pôc mancul dal 25% dai vôts, cuasi il 5% in mancul dal 2011, e 12 puescj intal parlament regjonâl, cuatri in mancul de volte prime. I popolârs (PP) invezit a son rivâts sul 21,5% e a àn mantignût i 10 elets che a vevin otignût intes elezions dal 2011. L’unic altri partît che al sarà rapresentât inte assemblee asturiane al è Unión Progreso y Democracia (UPyD), ancje chest di diestre, che cun cuasi il 4% dai vôts al à rivât a elei un dai siei.
A front dai 22 elets parom di chês che a podaressin jessi lis aleancis naturâls, o sei PSOE cun IU e FAC cul PP, propit chest deputât al devente decisîf pe formazion dal gnûf guvier. Dopo dal prin zîr di consultazions, il candidât plui probabil par vuidâ il gnûf guvier des Asturiis al è il socialist Javier Fernández che al pues za contâ suntune prime disponibilitât di IU e che cumò al cîr di convinci ancje il deputât di UPyD a votâ par lui tal moment de elezion dal gnûf president. Po si larès indenant cuntun guvier di minorance che al varès di cjatâ fûr, proviodiment par proviodiment, maiorancis variabilis. Il front di diestre al è di fat crevât e, cundut che su la cjarte al à i stes deputâts de çampe, nol rive a metisi dacuardi viodût che une buine fete dal PP al varès miôr stâ ae oposizion che no guviernâ cul FAC. Par intant però lis tratativis a van indenant. Sul front dai partîts nazionaliscj asturians, invezit, chestis elezions a son stadis pardabon negativis viodût che i doi partîts principâi di cheste aree no son nancje rivâts al 0,5% dai vôts. Cun di fat, il Bloque por Asturies al à vût il 0,32% des preferencis e Andecha Astur a pene il 0,13%.
Font: El Pais, 26-01/03-04/12; El Mundo, 02-05/04/12

Nessun commento: