Ai 9 di Març si è sierade la consultazion
publiche inviade dal guvier britanic in mert al referendum su la
autodeterminazion de Scozie. Cun cheste iniziative, l’esecutîf vuidât di David
Cameron al veve chê di sintî la opinion dai citadins e dai diviers sogjets
interessâts su cuatri ponts, ven a dî: la date miôr par tignî il referendum,
cui che al varès di viodi de organizazion dal vôt, cui che al pues votâ e ce
domande meti te schede. Di Londre no je rivade inmò nissune declarazion su
cemût che e je lade la consultazion e si sa dome che i risultâts a saran
comunicâts ca di cualchi setemane.
Al è di dî che une iniziative similâr e je
stade inviade ancje dal guvier scozês, ma ta chest câs al è timp par rispuindi
fintremai ai 11 di Mai. Chel istès, cualchidun al à za rindude publiche la sô
posizion in proposit. Al è il câs dal Scottish Trades Union Congress che al à
fat savê di jessi dacuardi cu la posizion dal guvier scozês in mert ae date dal
referendum (Autun dal 2014, di maniere di vê plui timp par dibati a fonts i pro
e i cuintri de indipendence) e ancje su la pussibilitât di partecipâ al vôt pai
fantats di 16 e 17 agns, cundut che no mancjin i problemis logjistics di
risolvi. Invezit, in mert ae domande di meti su la schede, pal STUC e à di
jessi secje, ven a dî dome se si è dacuardi o no su la indipendence, cence
proponi altris opzions.
Di segnalâ po lis reazions positivis dal
SNP ae posizion pandude de Comission Europeane in mert ae referendum su la
indipendence de Scozie. Cence jentrâ intal merit dal argoment, la Comission e à
però sclarît che, intal câs che il Ream Unît, si dividi i doi sogjets che a ‘nt
divignaran a saran tratâts in maniere compagne e à saran calcolâts tant che
sucessôrs dal stât di dulà che a rivin cun ducj i dirits e i dovês dal câs. Si
trate di une rispueste clare – al à dite l’europarlamentâr dal SNP, Ian
Hudghton – ai partîts contraris ae indipendence che a metin fûr storiis di pôre
sul avignî de Scozie dentri de UE.
Font: BBC, 08-09/03/12;
EFA, 28/02/12
Nessun commento:
Posta un commento