15/03/12

Irlande: proteste cuintri dai tais intes scuelis gaelichis

Il personâl e i gjenitôrs dai fruts che a frecuentin lis scuelis cul gaelic tant che lenghe veicolâr a àn inmaneât diviersis manifestazions di place ator pe Irlande cuintri dai tais che il guvier di Dublin al à decidût di meti in at ta chest setôr. A jevâ lis protestis e je massime la decision di aumentâ il numar di fruts che a coventin par une scuele cun cuatri insegnants: par chest an si passe di 81 a 83, ma tal 2014 a ‘nt coventaran 86 cuintri dai 76 di pôcs agns indaûr. Cun chescj numars si calcole che a saran une trentine lis scuelis gaelichis che si cjataran a pierdi un insegnant. La campagne di proteste inviade, in plui des manifestazions, e previôt ancje une petizion che si pues firmâ su internet.
Lis misuris di riduzion de spese decidudis dal esecutîf irlandês par fâi cuintri ae crisi finanziarie a àn ancje altris ponts negatîfs pe lenghe gaeliche. Al è il câs dai tais orizontâi ai fonts pai ministeris che a riscjin di pesâ su diviersis ativitâts svilupadis par gaelic, de riduzion des risorsis pe formazion dai insegnants di irlandês e de fusion di diviers organisims di tutele che e podarès puartâ a di une eficience plui basse de lôr azion.
Font: Gaelport, 29/02/12; Irish Times, 06/03/12

Nessun commento: