La gnove clime politiche che si respire
intal Paîs Basc dopo de fin de lote armade decidude di ETA e oblee dutis lis
fuarcis politichis a fâ indenant des propuestis par superâ lis causis che a àn
puartât al conflit e i siei efiets su la societât basche. Par chest e jere
gruesse la spiete pes declarazions che il lehendakari, o sei il president dal
guvier de Comunitât Autonome Basche, il socialist Patxi López, al varès fat ai
8 di Març denant dal Parlament de Comunitât. Ae fin dal so intervent però, la
plui part des reazions e je stade di delusion.
I unics a judicâ in maniere
positive l’intervent di López a son stâts i parlamentârs dal so partît. La
diestre spagnoliste lu à invezit criticât par chês che, a so parê, a jerin
vierziduris fatis aes posizions dal nazionalisim basc. Vierziduris che però,
framieç dai partîts nazionalitaris, nissun al à viodût. Cun di fat, il
lehendakari al à dite di no a dutis lis propuestis fatis indenant ai 26 di
Fevrâr dai rapresentants dal front nazionalitari (çampe indipendentiste basche,
Eusko Alkartasuna, Aralar, Alternatiba, LAB e altris sogjets): no, duncje, a di
une comission che e lavori par recuperâ la veretât storiche dal conflit; no al
superament de logjiche dai sconfits e dai vincidôrs par rivâ a di une
riconciliazion vere; no a di une taule di confront tra dutis lis fuarcis
politichis baschis par cjatâ un troi in comun par superâ i efiets dal conflit.
Fintremai su la cuistion dai presonîrs bascs, Patxi López al somee vê fat dai
pas indaûr rispiet aes posizions pandudis cualchi timp indaûr. Lis responsabilitâts
dal conflit e lis violencis a son stadis po butadis dutis su ETA, cence nancje
calcolâ lis violencis rivadis de bande dal stât, sei prime che dopo de fin dal
franchisim. Critichis duris al so intervent a son duncje rivadis di partîts
tant che PNV (Partido Nacionalista Vasco), Aralar e Ezker Anitza. Denant de
posizion mostrade dal lehendakari, plui di cualchidun i à domandât di dimetisi
par podê tornâ a votâ. A justificâ cheste domande al è ancje il fat che
l’esecutîf cumò in cjarie – un guvier di minorance, formât dai socialiscj cu la
poie esterne dai popolârs – al à podût nassi dome par vie de esclusion des
elezions de çampe indipendentiste basche e che lis ultimis elezions politichis
(cui sucès di Bildu e Amaiur) a àn mostrât a clâr che la maiorance dai eletôrs
bascs e je su posizions diviersis rispiet a chês rapresentadis di Patxi López.
Font: Gara, 09/03/12
Nessun commento:
Posta un commento