Irlande: in cressi lis violazions dai dirits linguistics

A son 704 lis denunciis cjapadis dentri tal rapuart dal comissari pe lenghe irlandese Rónán Ó Domhnaill su lis mancjancis mostradis di aministrazions e ents publics vie pal 2019 intal tutelâ e tal promovi la lenghe proprie. Lis segnalazions a son cressudis dal 11% rispiet al an prime. Intal 35% dai câs a rivin di Dublin e tal 20% dal Gaeltacht, o sei lis areis là che l’irlandês al è ancjemò lenghe di ûs comun. La plui part des denunciis si riferìs ae mancjance de lenghe irlandese te segnaletiche e te tabelonistiche, a rispuestis di organisims publics dadis par inglês a front di une domande par irlandês e ai pidiments che ancjemò si àn cuant che si dopre la forme gaeliche di nons e cognons. Si àn po segnalazions di câs plui specifics come chel dal mancjât rispiet dai ecuilibris linguistics intai plans di svilup urbanistic prontâts de contee di Ciarraí / Kerry. Cun di plui, cundut dal impegn a fâ miôr, e reste ancjemò vierte la cuistion des violazions de normative linguistiche te programazion de television publiche irlandese RTÉ.

Font: RTÉ, 22/05/20

Paîs Basc: scuelute popolâr par difindi il basc a Iruñea

Denant dai tai te ufierte di puescj par basc intes scuelis de infanzie di Iruñea / Pamplona decidût de zonte comunâl, une associazion di gjenitôrs e à fat savê che, in plui di iscrivi distès i fîs intes sezions par euskara ancje se si sa che no saran puescj par ducj, si metarà sù une herri haur eskola, o sei une scuelute popolâr che e permetarà di incressi i puescj disponibii par basc. Si trate di une iniziative temporanie che e à tant che obietîf principâl chel di fâ pression su la aministrazion citadine par che e garantissi ducj i puescj par euskara che a coventin. Par puartâ indenant cheste azion, viodût ancje i coscj, la associazion e invide a di une fuarte mobilitazion popolâr.

Font: Naiz:, 21/05/20

Ucraine: unitât aministrative de minorance bulgare a risi

Cuntune declarazion votade ae unanimitât, il Parlament de Bulgarie al à palesât il so discontent pe riforme aministrative progjetade de Ucraine e al à domandât al guvier di Sofia di inviâ un confront istituzionâl su la cuistion cun chel di Kiev. Il progjet des autoritâts ucrainis, di fat, al previôt di dividi in cinc tocs la provincie di Bolgrad / Bolhrad – là che e vîf la plui part de minorance bulgare dal paîs – menaçant cussì la unitât teritoriâl di cheste comunitât. L’intervent de Assemblee bulgare al à jevât però la proteste uficiâl dal esecutîf ucrain che al rivendiche il so impegn intal rispietâ i dirits e lis libertâts di dutis lis minorancis nazionâls. Fondade di un grup di bulgars intal 1821, Bolgrad e je deventade il pont di riferiment pe diaspore bulgare in Ucraine. In dì di vuê si stime che te sô provincie a vivin tra i 200 e i 300 mil bulgars che a rapresentin plui dal 60% de popolazion.

Font: Balkan Insight, 21/05/20

Galizie: il galizian al piert teren su la Rêt

Il galizian al è daûr a pierdi pês su la Rêt. I sîts internet inta cheste lenghe a son di fat dome il 0,0037% dal totâl, cuant che tal 2017 a jerin il 0,01%. Il galizian si cjate duncje al puest numar 61 intal mont e al piert dodis posizions intal zîr di un pâr agns. Al è di dî che ancje il catalan e il basc a son sbrissâts indaûr, cundut che si cjatin intune posizion miôr dal galizian. Plui tal detai il catalan si cjate te posizion numar 39 cul 0,05% di sîts e il basc al numar 46 cul 0,013%. Cemût che si pues imagjinâ, a fâ di paron al è l’inglês cul 59,6% dai sîts intant che la seconde posizion e je ocupade dal rus cul 8,6% e la tierce dal castilian cun a pene il 4%. Il galizian al piert teren ancje su Wikipedia, là che cui siei 165.085 articui al è cincuantesim su plui o mancul tresinte lenghis (il catalan al à cuasi 650 mil articui e il basc pôc mancul di 360 mil). Par chel che al rivuarde invezit il domini .gal, che al segnale i spazis de Rêt che si identifichin cu la lenghe e la culture galiziane, in dì di vuê i sîts che lu doprin a son 5.249.

Font: Galicia Confidencial, 21/05/20

Ocitanie: borsis di studi par insegnants bilengâi confermadis

Inte suaze des iniziativis par infuartî il disvilup des classis bilengâls francês – ocitan tes scuelis de infanzie e tes primariis dal sisteme public e des scuelis a imersion de rêt associative Calandreta, l’ufici public de lenghe ocitane, intune cu lis regjons de Gnove Aquitanie e de Ocitanie e cul ministeri francês pe educazion, al à confermât ancje pal 2020 il program Ensenhar. Si trate di une iniziative che e met a disposizion une cuarantine di borsis di studi di 8 mil euros su doi agns indreçadis ai students universitaris che a àn chê di specializâsi par insegnâ par ocitan ai fruts tra i 3 e i 11 agns. Il program al previôt ancje une sezion pai insegnants di prin e di secont grât za titolârs di un puest intal sisteme public. Ta chest câs si met a disposizion un jutori par formâju e abilitâju a insegnâ la lôr materie ancje par ocitan. In dì di vuê si calcole che a sedin plui o mancul 10 mil i fruts des scuelis de infanzie e des primariis des regjons de Gnove Aquitanie e de Ocitanie iscrits ai percors di studi bilengâi.

Font: Ofici Occitan, 20/05/20

Paîs Basc: euskara pal turisim sostignibil de Navare

Il guvier de Navare al à proponût di cjapâ dentri ancje la lenghe basche tal gnûf model di turisim sostignibil che il Parlament al è daûr a imbastî. Cun di fat, l’euskara al è un element di identitât e di autenticitât che al incrès il valôr e l’atrat dal teritori. Pal esecutîf de Navare intal gnûf model di turisim sburtât e sostignût des istituzions comunitariis a puedin vê un pês impuartant sei la lenghe proprie che la memorie storiche, di chê leade ai acjadiment plui lontans fintremai a chei de vuere civîl. Si propon ancje la creazion di une marcje di cualitât leade al ûs dal basc intal cumierç di prossimitât intes areis de Navare là che cheste lenghe e je plui fevelade.

Font: Noticias de Navarra, 20/05/20

Gales: galês discriminât inte politiche migratorie

Il guvier dal Gales al à criticât in maniere dure la leç di riforme dal sisteme migratori che e je stade fate buine in seconde leture dal Parlament britanic ai 18 di Mai. Il test al met fin ae libertât di circolazion dai citadins de Union Europeane e al previôt un sisteme di imigrazion “a ponts”. Chest al vûl dî, par esempli, che par vê plui pussibilitâts di trasferîsi tal Ream Unît si varà di vê un titul di istruzion alt, un bon nivel di redit e une buine cognossince dal inglês. Propit chest ultin element al à mandât in bestie lis istituzions dal Gales. Cun di fat, la assegnazion dai ponts e fâs riferiment dome al inglês, ma no al galês o a chês altris lenghis che a àn un ricognossiment uficiâl dentri dal Ream Unît. In Gales – al à spiegât un puartevôs dal esecutîf di Caerdydd / Cardiff – il galês al à il stes status dal inglês e no si pues tratâlu come se al fos di mancul di cheste ultime.

Font: BBC, 20/05/20

Paîs Catalans: canâl gnûf pes rêts sociâls par catalan

Su iniziative di un grup di personaçs une vore cognossûts de Rêt al è nassût Malaia.cat, un canâl che si propon di saborâ la produzion par catalan su lis rêts sociâls tant che Tik Tok, Instagram, YouTube e vie indenant. Si fevele duncje di un spazi di intratigniment e di interazion centrâl massime pai plui zovins e là che la lenghe proprie e pues cressi cetant di plui. Cul metisi adun su chest canâl si vûl dâi duncje plui visibilitât al catalan e superâ chês bariduris fissadis di algoritmis che a favorissin lis lenghis maioritariis.

Font: Generalitat de Catalunya, 18/05/20

Paîs Basc: nassût il servizi di pueste eletroniche “ni.eus”

Ai 15 di Mai la fondazion Puntueus e à presentât il servizi di pueste eletroniche in lenghe basche ni.eus disvilupât adun cu la imprese Guebs. Si trate di un servizi che al dopre l’euskara in dutis lis sôs areis: des relazions cui clients ae interface web, passant pai documents di jutori pai utents. Cun di plui, ni.eus nol impon publicitât, al garantìs la sigurece dai dâts e al cripte lis comunicazions. Al è disponibil sei in forme gratuite che a paiament. Ta chest ultin câs, si garantìs la personalizazion dal non dal domini che, in ogni câs, al previôt simpri il .eus finâl che al identifiche i spazis de rêt là che si dopre l’euskara.

Font: EiTB, 15/05/20

Paîs Catalans: si infuartìs il portâl “canvia.cat”

La organizazion catalane Plataforma per la Llengua e à miorât e infuartît il portâl canvia.cat doprât par promovi lis sôs campagnis pai dirits linguistics. In particolâr, di une bande si à recuperât lis iniziativis plui impuartantis inviadis intai ultins agns in maniere di tornâ a saborâlis e, di chê altre, i citadins a àn cumò la pussibilitât di doprâ la plateforme par proponi gnovis campagnis. La organizazion e tamesarà lis propuestis e e sielzarà di puartâ indenant chês che, ancje sul plan simbolic, a puedin jessi plui di impat.

Imazighen: il CMA al denuncie lis gnovis leçs alzerinis

Il Congrès Mondial Amazigh, organizazion di riferiment pes comunitâts imazighen che e à la sô sede in France, e à denunciât ae ONU, al comitât pai dirits dal om e a diviersis istituzions sorenazionâls africanis i pericui leâts ae aprovazion de bande dal guvier e dal Parlament de Alzerie di une riforme dal codiç penâl e di une gnove leç pe “prevenzion de discriminazion e dai discors di odi”. Cun di fat, di là dal non, la pôre e je che chescj imprescj legjislatîfs a sedin doprâts par reprimi ancjemò cun plui fuarce lis ativitâts di resistence politiche e culturâl dai imazighen. O fevelìn des popolazions – plui cognossudis des nestris bandis cul non di berbers – che a son autoctonis de Afriche nordocidentâl (Alzerie, Maroc e Libie in primis) e che la lôr diaspore e je une vore fuarte in Europe, massime tai stâts francês e spagnûl.

Paîs Catalans: fonts par dopleâ o sottitulâ cines par catalan

La direzion gjenerâl di politiche linguistiche dal guvier catalan e à ativât une linie contributive indreçade aes societâts di dopleadure e a chês di distribuzion par incressi la ufierte di contignûts audiovisîfs dopleâts o sottitulâts par catalan. Il bant, che al restarà viert fintremai i 30 di Otubar, al à une disponibilitât complessive di un milion di euros. Par mieç di chest contribût l’an passât si à sostignût il dopleament par catalan di 62 luncmetraçs e la sottitulazion di altris 52 cines e di diviersis stagjons di sîs seriis televisivis.

Font: Generalitat de Catalunya, 12/05/20

Galizie: etichetis par galizian come marcje di cualitât

Lis organizazions Irmandade Galega de Agroalimentarios e Adegueiros e Foro Peinador, intune cul guvier de Galizie, a son impegnâts inta chestis zornadis a puartâ indenant la campagne “Con acento propio” che si propon di stiçâ i citadins a identificâ lis etichetis di prodots alimentârs scritis par galizian tant che une marcje di cualitât. Cussì di une bande si favorìs l’ûs de lenghe proprie de bande dai produtôrs e di chê altre si sburte il cumierç di prossimitât e, di chê strade, l’implei intal setôr primari e la permanence de int sul teritori.

Font: Consello da Cultura, 11/05/20

Europe: scandai sul ûs des lenghis propriis te crisi Covid-19

Jenfri i 31 di Març e i 30 di Avrîl la FUEN (Union Federâl des Nazionalitâts Europeanis) e à domandât ai siei associâts di davuelzi un scandai sul ûs des lenghis minorizadis intes ativitâts informativis e educativis leadis ae crisi epidemiologjiche in at. Lis rispuestis rivadis a àn tocjât 29 comunitâts presintis in 18 stâts europeans. Il scandai al è duncje parziâl e al fotografe dome la situazion des comunitâts plui ativis ma, chel istès, al ufrìs elements di riflession interessants. Par chel che al rivuarde la informazion su la epidemie e sui siei efiets, intal 52% dai câs si le à vude ancje tes lenghis propriis. A dâle par solit a son stâts i mieçs di comunicazion e lis organizazions di riferiment des minorancis stessis e, in cualchi câs, i guviers regjonâi. Simpri tal 52% dai câs si à vude la difusion di informazions sanitariis intes lenghis minorizadis: su chest front si à vût un ativisim plui fuart de bande des istituzions locâls. Intal 55% dai câs esaminâts si à vude la pussibilitât di vê spazis educatîfs intes lenghis propriis ancje intant de sierade des scuelis. Intal 14% cheste pussibilitât e je stade presinte ma dome in forme limitade. Intal 21% dai câs i students no àn vût acès a nissun gjenar di educazion inte lôr lenghe proprie che si à di zontâi un 10% là che cheste pussibilitât no jere garantine nancje prime de emergjence sanitarie. Al è di dî però che, ancje là che il servizi al è stât garantît, dispès al è stât plui par merit dai insegnants o des scuelis che no des istituzions. La emergjence e à ancje marcât la scjarsetât di formazion, materiâi e imprescj par podê davuelzi in maniere corete l’insegnament a distance.

Font: FUEN, 11/05/20

Ocitanie: campagne par promovi l’ocitan tes secondariis

L’Ufici Public de Lenghe Ocitane (ÒPLO) al à inviât une campagne che si propon di promovi l’insegnament dal ocitan inte educazion secondarie. Il materiâl al ufrìs informazions su lis diviersis modalitâts di insegnament de lenghe proprie e al è disponibil sei su stampe che in formât digjitâl. La campagne e je indreçade in primis ai students e aes lôr fameis, ma ancje al personâl scolastic.

Font: Jornalet, 08/05/20

Paîs Catalans: campagne pal ûs uficiâl dal catalan inte UE

Fintremai che no si podarà doprâ il catalan dentri e cu lis istituzions europeanis, i passe dîs milions di personis che a fevelin cheste lenghe a restaran citadins di seconde categorie. Al è di cheste considerazion che e nas la gnove campagne inviade de organizazion Plataforma per la Llengua che, in ocasion dai 70 agns de declarazion Schuman (tignude par pont di partence dal procès di unificazion continentâl), e à stiçât i catalans a fâsi sintî su lis rêts sociâls par rivendicâ la uficializazion de lôr lenghe proprie de bande des istituzions europeanis. Il president de organizazion catalane, Òscar Escuder, al à domandât une riunion urgjente cul ufici di presidence dal Parlament european par frontâ chest teme. Cundut che il catalan al è la diesime tierce lenghe plui fevelade de UE, no dome al reste fûr des istituzions comunitariis ma si impedìs fintremai di doprâlu par intervistâ i siei rapresentants (cemût che al è sucedût di resint cu la interviste de television catalane TV3 al president dal Parlament, David Sassoli, là che si à imponût il servizi di interpretariât talian – castilian).

Font: PFPLL, 08/05/20

Grecie: azion par sburtâ l’ûs dal turc tai nîts de Tracie

Cundut che a mancjin censiments uficiâi, si stime che la popolazion di lenghe turche che e vîf in Tracie, la regjon nordorientâl de Grecie a confin cu la Turchie, e sedi su lis 150 mil personis. Lis istituzions greghis no ricognossin la esistence di nissune minorance linguistiche dentri dai confins statâi ma, par vie di acuardis internazionâi, a garantissin une cualchi tutele a cheste comunitât no tant pe sô diversitât linguistiche ma par chê religjose (o sei parcè che e je musulmane). Intal 2017 la Grecie e à inviât l’oblic pes fameis di iscrivi i frutins in nîts sot control public là che la lenghe di insegnament e je il grêc. Lis domandin de minorance turcofone par cjapâ dentri ancje la lenghe dal teritori a son coladis intal vueit. Cumò però il ministeri pe educazion al à fat savê che cun chest an che al ven si volarès compagnâ il grêc cul inglês. Lis organizazions de minorance a àn duncje profitât di cheste vierzidure sul plan dal insegnament plurilengâl par tornâ a domandâ che si previodin des oris par turc intai nîts des localitâts de Tracie là che si à une presince significative de minorance.

Font: Daily Sabah, 08/05/20

Bretagne: propuestis par tutelâ il breton inte riforme dai liceus

La riforme dai liceus imbastide dal ministri pe educazion Jean-Michel Blanquer e je lade a colpî ancje i spazis za limitâts che lis lenghis minorizadis a vevin inte scuele publiche francese. La normative, juste par fâ cualchi esempli, i assegne a chestis lenghis un valôr cetant limitât inte valutazion finâl dai students, lis met in competizion cu lis lenghis internazionâls obleant dispès a sielzi dome une tra lis dôs e nol permet di doprâlis intes provis di diviersis specialitâts scolastichis. Cussì, cumò che il ministri si è rindût a mendâ la riforme cu la mediazion di un grup di esperts, il coletîf Kelennomp! – che al met adun i professôrs e i formadôrs di e par breton – al à indreçât une letare vierte a chest comitât di savis là che ur segnale lis problematichis principâls puartadis de riforme e al propon cinc misuris concretis par superâ i pidiments che la gnove normative e à puartât pal insegnament des e tes lenghis minorizadis feveladis intal stât francês.

Font: Agence Bretagne Presse, 07/05/20

Ream Unît: ELEN a pro de nazionalitât corniche tal censiment

ELEN (European Language Equality Network), la Rêt Europeane pe Avualiance Linguistiche, e à scrit al guvier britanic par domandâ che tal censiment dal 2021 si previodi une vôs là che i citadins a puedin declarâsi di nazionalitât corniche. Ancjemò tal 2014 lis istituzions britanichis a vevin ricognossût i cornics come comunitât nazionâl inte suaze de Convenzion cuadri pe protezion des minorancis nazionâls dal Consei de Europe ma, contrari di ce che al sucêt cun chês altris nazionalitâts che a formin il Ream Unît, i citadins de Cornualie no puedin ancjemò declarâ la lôr partignince nazionâl. Compagn di ce che a vevin za fat diviersis organizazions cornichis, la Rêt Europeane pe Avualiance Linguistiche e domande al guvier di Londre che i ricognossi a cheste comunitât chel stes dirit che za a àn scozês, galês e irlandês dal Nord.

Font: ELEN, 04/05/20

Irlande: la sierade des scuelis estivis e menace il Gaeltacht

E monte la preocupazion intal Gaeltacht, o sei lis areis là che l’irlandês al è ancjemò doprât in maniere significative, dopo de decision di tignî sieradis vie pal 2020 lis scuelis estivis a imersion che a permetin a cuasi 27 mil students ogni an di perfezionâ lis lôr competencis linguistichis par gaelic. Se ducj a capissin lis resons de decision – cjapade dal guvier di Dublin par limitâ la difusion de pandemie – ce che al spaurìs al è il fat che l’esecutîf irlandês, almancul par cumò, nol à previodût compensazions pes ativitâts economichis colpidis de decision. Cun di fat si calcole che lis scuelis estivis a movin un zîr economic di 50 milions di euros ad an, che al rapresente la jentrade principâl par tantis comunitâts dal Gaeltacht che, pe plui part, a vivin une situazion di disvantaç economic. Cence compensazions nol è dome il risi che diviersis di chestis scuelis no sedin plui in stât di vierzi chest an che al ven, ma che la depression economiche e sburti une part de popolazion a lâ vie dant un colp mortâl ae tignude des ultimis areis là che l’irlandês al è ancjemò lenghe vive.

Font: The Irish Times, 30/04/20