Il
guvier dal Gales al à criticât in maniere dure la leç di riforme
dal sisteme migratori che e je stade fate buine in seconde leture dal
Parlament britanic ai 18 di Mai. Il test al met fin ae libertât di
circolazion dai citadins de Union Europeane e al previôt un sisteme
di imigrazion “a ponts”. Chest al vûl dî, par esempli, che par
vê plui pussibilitâts di trasferîsi tal Ream Unît si varà di vê
un titul di istruzion alt, un bon nivel di redit e une buine
cognossince dal inglês. Propit chest ultin element al à mandât in
bestie lis istituzions dal Gales. Cun di fat, la assegnazion dai
ponts e fâs riferiment dome al inglês, ma no al galês o a chês
altris lenghis che a àn un ricognossiment uficiâl dentri dal Ream
Unît. In Gales – al à spiegât un puartevôs dal esecutîf di
Caerdydd / Cardiff – il galês al à il stes status dal inglês e
no si pues tratâlu come se al fos di mancul di cheste ultime.
Font:
BBC,
20/05/20
Nessun commento:
Posta un commento