Il
Congrès Mondial Amazigh, organizazion di riferiment pes comunitâts
imazighen che e à la sô sede in France, e à denunciât ae ONU, al
comitât pai dirits dal om e a diviersis istituzions sorenazionâls
africanis i pericui leâts ae aprovazion de bande dal guvier e dal
Parlament de Alzerie di une riforme dal codiç penâl e di une gnove
leç pe “prevenzion de discriminazion e dai discors di odi”. Cun
di fat, di là dal non, la pôre e je che chescj imprescj
legjislatîfs a sedin doprâts par reprimi ancjemò cun plui fuarce
lis ativitâts di resistence politiche e culturâl dai imazighen. O
fevelìn des popolazions – plui cognossudis des nestris bandis cul
non di berbers – che a son autoctonis de Afriche nordocidentâl
(Alzerie, Maroc e Libie in primis) e che la lôr diaspore e je une
vore fuarte in Europe, massime tai stâts francês e spagnûl.
La
gnove normative e previôt penis di un a trê agns di preson par cui
che al dâ fûr “informazions falsis” o che a puedin “atentâ
ae sigurece e al ordin public” o ae “unitât statâl”. Si trate
di une menace plui che clare pe libertât di stampe in gjenerâl e
plui in particolâr par chei ativiscj imazighen che a denunciin lis
violazions dai dirits umans o che a sensibilizin la popolazion sui
siei dirits linguistics, culturâi e nazionâi. E rive invezit a siet
agns di preson la pene par cui che al ricêf fonts dal forest cun chê
di menaçâ la “sigurece dal stât” o la sô “integritât
teritoriâl”. Un tant, ancje in considerazion des menacis za
ricevudis dai ativiscj locâi, al somee fat di pueste par çoncjâ i
jutoris mandâts de diaspore imazighen che a permetin di organizâ
ativitâts umanitariis e culturâls in patrie. O ricuardìn che a son
centenârs i imazighen de Alzerie obleâts al esili, impresonâts o
muarts par vie dal lôr ativisim sociâl e politic o ancje dome par
jessi lâts in place cu la lôr bandiere.
Font:
Minority Rights,
12/05/20
Nessun commento:
Posta un commento