Lis
elezions politichis che si son tignudis ai
4 di Març no àn dât risultâts masse bogns pes
realtâts politichis rapresentativis des nazionalitâts cence
stât e des minorancis linguistichis e nazionâls che
a vivin dentri dai confins dal stât talian.
La
situazion miôr e je ancjemò une volte chê dal Sud
Tirôl là che la Südtiroler
VolksPartei cui siei passe 130 mil vôts al
Senât e i 128 mil ae Cjamare e à rivât a mandâ intal Parlament di
Rome 3 deputâts (Renate Gebhard, Albrecht Plangger, Manfred
Schullian) e 3 senatôrs (Meinhard Durnwalder, Dieter Steger, Julia
Unterberger). In aleance cu la SVP al coreve ancje il Partito
Autonomista Trentito Tirolese che al à
vude elete une deputade (Emanuela Rossini).
In
Val di Aoste
la aleance tra lis listis autonomistis Union Valdôtaine,
Union Valdôtaine Progressiste,
Edelweiss Popolare Autonomista Valdostano e
il PD e à vût elet il so candidât (Albert Lanièce) in Senât cul
25,76% dai vôts, intant che ae Cjamare e je stade superade de
candidade dal M5S. Simpri te circoscrizion valdostane, la liste Pour
Tous Per Tutti Pe Tcheut, nassude de
aleance dai moviments autonomiscj
Alpe, Stella Alpina e Pour Notre Vallée,
si à invezit plaçade al tierç puest pe Cjamare (18,25%) e al cuart
pal Senât (15,59%).
In
Sardegne la liste AutodetermiNatzione
che e meteve adun
buine part dal nazionalitarisim sart e à cjapât
cuasi 20.500 preferencis al Senât (2,52% a nivel regjonâl) e 19.307
vôts ae Cjamare (2,22%). I autonomiscj dal Partidu Sardu -
Partito Sardo d'Azione si presentavin invezit
in aleance cu la Lega
(il partît plui votât a nivel talian dopo dal M5S) e, ta cheste
maniere, a àn vût elet in Senât un lôr rapresentant (Christian
Solinas).
In
Friûl - Vignesie Julie la novitât e
rivave dal Patto per l’Autonomia
che, nassût de union di grups
politics e associatîfs di aree autonomiste furlane,
pe prime volte al provave a puartâ cheste aree politiche al esam des
elezions talianis. Intune regjon dominade dal vôt ae Lega
e al M5S, il Pat al à cjapât sù 7.079 vôts ae Cjamare (1,02% a
nivel regjonâl) e 5.015 al Senât (0,77%). La comunitât
slovene che e vîf inte fasse
confinarie de regjon e à rivât a jentrâ tal Parlament talian in
gracie de elezion di une sô rapresentante tra lis filis dal PD
(Tatiana Rojc).
Font:
elezioni.interno.gov.it, 05-06/03/18
Nessun commento:
Posta un commento